Un Casamentu Masha Special

DEN nort di Mozambique tin un vaye berde rondoná pa cerunan bunita—algun yen di baranca, otronan cubrí cu vegetacion abundante. Aki ta caminda e pueblito di Fíngoè ta situá. Riba anochinan cla di winter, shelu ta briya cu strea, i luna ta asina briyante cu e ta iluminá e casnan cu dak di yerba secu dje habitantenan dje pueblo. Tabata den e esenario espléndido aki cu un casamentu único a tuma lugá.

Cientos di hende a cana pa oranan, asta dianan, pa asistí n’e ocasion special aki. Algun a crusa regionnan desolá i peligroso habitá pa hiena, leon i olefante. Ademas di ekipahe personal, hopi bishitante a bin cu galiña, cabritu i berdura. Despues cu nan a yega n’e pueblito, nan a bai na un área habrí cu normalmente sa ser usá pa tene congresonan cristian. Aunke nan tabata cansá dje biahe, nan tabata contentu, i nan caranan sonriente a reflehá expectativa ansioso di loke tabata bai pasa.

Ken tabata esnan cu lo a bai casa? Nan tabata hopi! Sí, bastante pareha. Esakinan no tabata participando den un of otro casamentu masal sensacionalista. Al contrario, nan tabata parehanan sincero i bon motivá cu anteriormente no por a registrá nan matrimonio debí cu nan tabata biba den regionnan remoto, leu for di oficinanan di registracion. Tur e parehanan aki a bira conciente di normanan divino relacioná cu matrimonio ora nan a studia Bijbel cu Testigonan di Jehova. Nan a siña cu nan tabatin cu casa segun e leynan dje pais pa agradá nan Creador, e Originador di matrimonio, mescos cu José i Maria a cumpli cu rekisitonan di registracion rond dje tempu cu Jesus a nace.—Lucas 2:1-5.

Preparacionnan p’e Acontecimentu

E oficina di sucursal di Testigonan di Jehova na Mozambique a dicidí pa yuda. Promé, nan a tuma contacto cu e Ministerio di Husticia i Asuntunan Interior n’e capital dje pais, Maputo, pa determiná ki proceduranan ley a exigí. Siguientemente, e misioneronan den e stad capital dje provincia di Tete a drenta den contacto cu autoridadnan local pa coordiná areglonan mas aleu. A fiha un fecha p’e misioneronan i funcionarionan di notario i dje Departamento di Identificacion Civil biaha p’e pueblo di Fíngoè. Miéntras tantu, e oficina di sucursal a manda un carta di splicacion pa duna instruccion na tur e congregacionnan enbolbí. Tantu Testigonan como funcionarionan local a anhelá p’e acontecimentu único aki yega.

Diadomingo, 18 di mei 1997, tres misionero huntu cu funcionarionan di gobiernu a yega Fíngoè. E autoridadnan local a prepará acomodacion confortabel p’e funcionarionan, pegá cu e edificio di gobiernu. Sin embargo, e funcionarionan bishitante a keda asina impresioná cu e hospitalidad dje Testigonan di Jehova cu nan a preferá di keda huntu cu e misioneronan den hùtnan improvisá. Nan a keda sorprendí ora nan a haña sa cu un dje kokinan tabata un anciano den e congregacion local i cu un superintendente biahero tabata entre e boluntarionan cu tabata haci e tareanan mas humilde den preparacion p’e casamentu. Tambe nan a ripará e bon disposicion dje misioneronan, kendenan, sin keha, a keda den un hùt simpel i tabata baña usando un canica di awa chikitu. Nunca promé nan a mira un vínculo asina fuerte entre hende di vários antecedente. Sin embargo, loke mas a impresioná nan tabata e fe cu esakinan a desplegá haciendo sacrificionan grandi pa cumpli cu e ley dje pais i cu e areglo di Dios.

Un Ocasion Gososo

Ora e parehanan a yega, mesora nan a prepará p’e promé paso dje matrimonio: obtené un certificado di nacementu. Tur a warda cu pacenshi den fila dilanti e tim di Registro Civil pa duna nan datonan personal. Despues nan a pasa pa un otro fila pa saca nan potret, caba nan a bai n’e tim dje Departamento di Identificacion Civil pa obtené nan tarheta di identificacion. Siguientemente, nan a bolbe bek n’e tim di Registro Civil pa prepará p’e certificado di matrimonio tan deseá. Despues di esaki, nan a para warda cu pacenshi pa nan nomber ser yamá via loudspeaker. E entrega dje certificadonan di matrimonio tabata un esena emocional. Tur hende tabata alegrá mashá ora e parehanan tabata tene nan certificadonan di matrimonio na haltu manera un trofeo precioso.

Tur esaki a tuma lugá den un higra di solo. Tog, ni calor ni stof no a stroba e goso dje ocasion.

E hombernan tabata nèchi bistí, hopi di nan na bachi cu dashi. E muhernan tabata bistí den e manera tradicional, cu tabata un paña largu colorido cu yama capulana rond di nan cintura. Algun tabatin babynan lorá den un pida tela similar.

Cosnan a marcha bon, pero tabatin demasiado pareha pa procesá riba un solo dia. Ora scuridad a dal aden, e funcionarionan di gobiernu tabatin e bondad di sigui duna servicio n’e parehanan. Nan a comentá cu nan no por a laga “nos rumannan” warda despues cu esakinan a haci un sacrificio asina grandi pa tabata einan. Nos lo no lubidá nunca e spiritu di cooperacion i di sacrificio propio aki.

Anochi tabata corta un friu. Aunke algun tabata hospedá den hùtnan, mayoria dje parehanan tabata pafó, agrupá rond di candelanan. Esaki no a mengua e goso dje ocasion. E zonido di harimentu i di cantamentu na armonia di cuater stem tabata superá e zonido di krakmentu dje candelanan. Hopi a conta relatonan di nan biahe, cu nan documento recien obtené duru tené den man.

Ora di dia a habri, algun a bai den e centro dje pueblito pa bende nan galiña, cabritu i berduranan pa yuda cubri e gastu di registrá nan matrimonio. Hopi di berdad a haci “sacrificio” dje animalnan ei, bendiendo nan pa hopi ménos cu nan balor real. Pa hende pober, un cabritu ta algu precioso i caru; tog nan tabata dispuesto pa haci e sacrificio aki pa asina casa i agradá nan Creador.

E Rigornan dje Biahe

Algun dje parehanan a cana distancianan largu pa ta presente. Esaki tabata e caso cu Chamboko i su esposa Nhakulira. Nan a conta nan relato riba e di dos anochi dje evento miéntras nan tabata calentá nan pia na un candela. Aunke Chamboko tabatin 77 aña di edad, tabata ciegu di un wowo i no por a mira bon cu e otro, el a cana pia abou tres dia compañá p’e resto di su congregacion, ya cu e tabata determiná pa legalisá su union di 52 aña.

Anselmo Kembo, 72 aña di edad, tabata biba caba cu Neri pa rond di 50 aña. Algun dia promé cu e biahe un sumpiña grandi a hinca su pia seriamente ora e tabata cultivando su plantacion. Nan a core hib’é e hospital mas cerca pa tratamentu. No obstante, el a dicidí di haci e biahe na pia, cocochando yen di dolor henter e caminda pa Fíngoè. Esei a tuma tres dia. Anselmo no por a contené su goso ora el a tene su certificado di matrimonio den su man.

Un otro recien casá digno pa mencioná tabata Evans Sinóia, un ex-polígamo. Ora el a siña e berdad dje Palabra di Dios, el a dicidí di legalisá su union cu su promé casá, pero esaki a nenga i a bai lagu’é cu un otro homber. Su di dos casá, kende tambe tabata studia Bijbel, a bai di acuerdo pa casa cuné. Tur dos a bin na pia pasando dor di un region peligroso habitá pa leon i otro bestia salbahe. Despues di un biahe di tres dia, nan tambe a logra legalisá nan matrimonio.

Riba diabierne, cincu dia despues cu e misioneronan i funcionarionan a yega, a caba cu e trabou. E resultado tabata cu nan a emití 468 tarheta di identificacion i 374 certificado di nacementu. E cantidad di certificado di matrimonio emití tabata 233! E ambiente tabata unu di euforia. Apesar di cansancio, tur tabata di acuerdo cu e tabata bale la pena. Sin duda, e ocasion ei lo keda marcá pa semper den mente i curason di tur esnan enbolbí. E tabata berdaderamente un casamentu masha special!