Nan ‘A Cumpra Berdad’!

“CUMPRA berdad mes i no bend’é.” (Proverbionan 23:23) Asina e homber sabí Sálomon a exhortá. Maske por bisa esaki di berdad en general, ta specialmente asina ora ta trata dje berdad hañá den e Palabra di Dios, Bijbel. E berdad ei por hiba na bida eterno! (Juan 17:3, 17) Sin embargo, ripará cu adkerí e berdad ei no ta bini sin costo. Bo mester ta dispuesto pa ‘cumpr’é,’ es decir, sacrificá of entregá algu pa asina obten’é. (Compará cu Mateo 13:45, 46.) Por lo general hende no ta dispuesto pa haci esei. Pero den hopi pais, cantidadnan cada bes mas grandi di personanan cu curashi ta cumpra berdad bíblico—hopi bes a gran costo personal.

Tuma, por ehempel, Testigonan di Jehova n’e pais di Ghana, West Africa. Na juni 1989, tabatin mas cu 34.000 persona den e pais ei cu a aceptá berdad bíblico i cu tabata compartié activamente cu otronan. Despues gobiernu a pone restriccionnan legal riba e trabou di predicacion público. No obstante, personanan di curason onrado a sigui “cumpra berdad”—apesar di impedimentunan legal. E restriccionnan a terminá dia 31 di october, 1991, i medio 1995, solamente tres aña i mei despues cu a kita e restriccionnan ei, e cantidad di Testigo di Jehova activo na Ghana a aumentá te na 46.104! I e aña aki e cantidad a crece te na mas cu 52.800.

Kico a atraé hende n’e berdad dje Palabra di Dios? Ki sacrificionan algun tabatin cu haci pa “cumpra berdad”? Como contesta, laga nos considerá e experencia di tres cristian ghanes.

Atraí pa Siñansanan Bíblico

Laga nos considerá promé un mucha muher den su 20 i picu aña. Su tata tabata pastor, tog el a scoge pa bandoná e religion di su tata. E motibu? Su amor pa berdad.

El a yega di splica: “Testigonan tabatin custumber di bini nos cas ora nan tabata pasa di cas-pa-cas. Despues di un par di combersacion cu nan, mi a realisá cu loke nan tabata siña tabata bon fundá riba Bijbel. Mi a plantia preguntanan tocante tópiconan manera Trinidad, fiernu di candela, inmortalidad di alma i specialmente sanacion di fe. Mi a kere fuertemente cu e doctrinanan aki a bini for di Bijbel. Pero e Testigonan a yudá mi mira cu esei no tabata e caso.”—Pa un indicacion dje punto di bista bíblico riba tópiconan asina, por fabor, wak Marco 13:32; Romanonan 6:23; Echonan 10:40 i 1 Corintionan 13:8-10.

E mucha muher a agregá: “Tog, tabatin oposicion fuerte di parti di mi famia, specialmente mi tata. El a pensa cu mi tabata ser engañá. Sin embargo, ami tabata sa cu loke mi tabata siña cerca e Testigonan di Jehova tabata e berdad. Mi a purba mustra mi tata e cosnan aki for di Bijbel, pero e no kier a scucha. De echo, e oposicion a bira mas fuerte.

Sin embargo, mi no a laga nan intimidá mi. Mi tabata sa cu solamente berdadero conocimentu ta hiba na bida eterno den Paradijs, i mi tabata dicididu pa tene duru na dje. Ora e Testigonan local a tende dje problemanan cu mi tabata enfrentá, amorosamente nan a yudá mi, dor di animá mi i percurá pa algun di mi necesidadnan. Esaki a yudá mi comprendé e importancia dje palabranan di Jesus na Juan 13:35: ‘Den esaki tur lo sa cu boso ta mi disipelnan, si boso tin amor entre boso.’ Mi conviccion cu Testigonan di Jehova ta practicá e religion berdadero a bira mas profundo. Mas despues, ora mi mayornan a ripará cu mi a cuminsá hiba un mihó bida, nan a gusta loke nan a mira, i nan actitud pa cu mi a cambia—asina tantu cu mi tata a pidi e Testigonan pa studia Bijbel cu mi ruman homber mayó!”

Convencé Bo Mes dje Berdad

“Cumpra berdad” ta un desafio tambe pa algun hóben cu a ser criá dor di mayornan Testigo. Algun hóben ta incliná pa tuma e berdad bíblico como algu di mes. Si nan no convencé nan mes di e berdadnan ei, nan fe por bira swak i superficial. (Compará cu Mateo 13:20, 21.) Nathaniel, un homber ghanes den su 30 i picu aña, ta conta con el a “cumpra berdad” tempu e tabata hobencito ainda.

“Mi mayornan a siñá mi Bijbel for di mi infancia,” e ta recordá. “Segun cu mi a crece, mi a compañá nan den e trabou di predicá, pero mi no a dicidí ègt di bira un Testigo. Cu tempu mi a realisá cu mi tabatin cu examiná Bijbel pa mi mes.

Promé, mi mester a convencé mi mes di cu ta Bijbel, i no ningun otro buki religioso sagrado, ta e Palabra di Dios. Mediante studio personal, mi a haña sa cu e ta e único buki sagrado cu ta contené hopi profecia cla cu a cumpli cu exactitud. Tambe mi a haña sa cu Bijbel ta contené un cantidad di berdad científico—por ehempel, cu e tera ‘ta cologá riba nada.’ (Job 26:7) E palabranan aki a ser skirbí miles di aña promé cu científiconan tabata sa tocante nos sistema solar. Ta Dios so por a inspirá hende pa skirbi cosnan asina!a

Siguientemente, mi kier a haña sa cua organisacion religioso ta siña i practicá e berdadnan cu Bijbel ta siña. Mayoria religion ta siña di fiernu di candela, Trinidad i un alma inmortal cu ta keda na bida despues di morto. Pero mi no a haña cu e doctrinanan aki ta zona lógico. Mi a razoná: Un tata cu ta castigá su yu dor di tene su man den un wea di awa cu ta herebé lo no ta un tata malbado? Con anto, un Dios di amor lo por pone su yunan den un fiernu di candela pa laga nan sufri? Sin embargo, Testigonan di Jehova ta siña na armonia cu textonan bíblico manera Romanonan 6:23, cu ta bisa: ‘Pago cu picá ta paga ta morto’—no un fiernu di candela. Esei mi a haña ta zona lógico.

Tambe mi a observá cu Testigonan di Jehova ta rekerí pa tur miembro biba di acuerdo cu normanan bíblico i cu nan ta scomulgá tur esnan cu ta practicá picá sin repentí. A base di tur esaki, mi a concluí cu Testigonan di Jehova tin e berdad, i mi a haci un decision personal pa bira un di nan. Mi a traha duru pa cualificá pa bautismo como un Testigo.”—1 Corintionan 5:11-13.

E experencia aki di Nathaniel ta ilustrá bon cu asta hóbennan criá pa mayornan cristian tin cu “cumpra berdad.” Nan no mester bai reunionnan di congregacion djis pa bai. Mescos cu e bereanonan di antigwedad, nan mester ‘examiná cuidadosamente e Scritura diariamente en cuanto si e cosnan aki ta asina.’ (Echonan 17:11) Esaki ta tuma tempu i esfuerso, pero e por resultá den fe i conviccion sólido.—Compará cu Efesionan 3:17-19.

Desilusioná cu Religion Falsu

Un homber ghanes yamá Godwin tabatin casi 70 aña ora el a bandoná e Iglesia Presbiteriano i un lodge di mazon. “Tabatin cosnan ta tuma lugá den iglesia cu mi tabata haña inaceptabel,” Godwin ta bisa. “Por ehempel, tabatin hopi pelea interno, i ainda esei ta tuma lugá. Tin biaha polis mester a bini pa restorá pas i ordu! Segun mi esaki no tabata corecto pa siguidónan di Cristo. Despues un problema a lanta entre ami cu un otro presbiteriano. Un corte público a tende e caso i a haña e otro homber culpabel. Sin embargo, e pastor dje iglesia inhustamente a tuma parti p’e homber aki i a purba censurá mi dilanti henter e congregacion! Mi a bis’é bon cla kico mi tabata pensa di asuntu aki i a sali bai for dje iglesia—pa no bolbe nunca mas.

Poco tempu despues, Testigonan di Jehova a bishitá mi cas. Na principio, mi a scucha djis pasobra mi no kier a core cu hende cu ta papia tocante Dios. Pero mi a cuminsá ripará cu maske mi tabata un presbiteriano pa décadanan, tabatin hopi cos di Bijbel cu mi no tabata sa. Por ehempel, mi no tabata sa nunca cu Bijbel ta ofrecé e speransa di biba pa semper den Paradijs riba tera.b I ora mi a cuminsá asistí n’e reunionnan di Testigonan di Jehova, e bon manera, i specialmente e manera di bisti i areglá dje hóbennan entre nan, a impresioná mi mashá. Esakinan tabata hende cu realmente a biba di acuerdo cu principionan bíblico!”

Pero, “cumpra berdad” a rekerí p’e haci algun ahuste pisá den su bida. Godwin ta corda: “Mi tabata miembro di un lodge di mazon. I aunke e ta conocí como un sociedad fraternal cu ta percurá yudansa pa su miembronan, mi a tene ritonan cu a enbolbé e uso di cabes di carpachi i wesu, i tambe inbocá spiritu. E spiritunan aki supuestamente ta yuda esnan cu trata cu nan desaroyá spiritualmente.

Mi studio di Bijbel a yudá mi mira cu Jehova Dios ta odia cualkier enbolbimentu cu spiritismo, pasobra esei por pone un persona bou dje influencia di Satanas i su forsanan spiritual malbado.c Lo mi a sigui como miembro dje lodge di mazon cu tur su misticismo, of lo mi a bandoná esei i agradá Jehova? Mi a scoge e último. Mi a destruí tur mi artículonan di mazon cu mi tabatin, asta e trahe cu mi a usa pa reunionnan di lodge. Mi a experenciá e berdad di Jesus su promesa ora el a bisa: ‘E berdad lo haci boso liber’! (Juan 8:32) Awor mi ta contentu di compartí loke mi a siña cu otro hende. No ta duel mi niun tiki cu mi a tuma e decision aki.”

Hopi miles di persona di curason onrado tambe a haci sacrificionan grandi pa por “cumpra berdad.” Mescos cu e tres cristiannan cu nos a considerá aki, no ta duel nan cu nan a haci e cambionan ei. Berdad bíblico a duna nan “un fundeshi excelente pa futuro, pa nan por haña un gara firme riba e berdadero bida.” (1 Timoteo 6:19) Abo tambe por haña e “berdadero bida” ei i tur e bendicionnan cu ta compañ’é pa semper si bo “cumpra berdad.”

[Nota]

[Plachi na página 9]

Nathaniel

[Plachi na página 9]

Godwin