Kico Ta Pasando cu Hóbennan?

CUA bo kier tende promé—e bon noticia of e mal noticia? Ora bo haci hende e pregunta aki, hopi ta opta pa tende e mal noticia promé, cu speransa cu e bon noticia lo keda cologá den nan mente.

Ora nos ta examiná loke ta pasando cu hóbennan, laga nos considerá promé e situacion actual. Generalmente hende mas grandi ta comentá cu hóbennan djawendia no ta manera e hubentud di pasado. Hóbennan, na otro un banda, ta sinti nan ofendí ora hende haci cualkier implicacion cu nan no ta alcansá e normanan di antaño. No obstante, observadónan atento di humanidad ta di acuerdo cu e hubentud djawendia ta otro.

Con Otro?

Maske hende en general ta haña cu hóbennan mester tin bon manera, un sentido di responsabilidad i respet pa otronan, hopi bes e realidad ta masha leu dje idealnan aki. Segun un encuesta publicá den e korant The Independent di Londen, hóbennan ta “desaroyando un ‘spiritu nobo di rebelion’ contra un mundu cu segun nan pa gran parti a laga nan na caya.” E resultadonan di un investigacion ta reflehá e “spiritu nobo di rebelion” aki, ya cu mas tiki hóben di awe kier mira nan mes como “sensato i responsabel.” Nan ta preferá di ser mirá como “salbahe i impredicibel.”

Por ehempel, na Gran Bretania, crímen raportá—di cua mayoria cometí pa hóbennan—a subi dies biaha mas tantu entre 1950 i 1993. Aumento den uso di droga i abusu di alcohol ta paralelo cu e aumento den crímen. Na mésun tempu, segun The Times di Londen, casi tur pais desaroyá a mira “aumentonan substancial den trastornonan sicosocial entre hóbennan desde e Segundo Guera Mundial.” Segun David J. Smith, profesor di criminologia, e trastornonan aki “di ningun manera ta simplemente relacioná cu pobresa of cu mas prosperidad.” Investigacion ta indicá cu awor e distincion entre hóbennan i hende grandi ta mas bisto.

Awendia mucha i tienernan hóben ta enfrentá mas i mas stres. Intentonan i casonan di suicidio a bira cos di tur dia. Na Escocia e cantidad di mucha bou di 12 aña cu ta purba cometé suicidio a bira dòbel den ménos cu dies aña, segun Herald di Glasgow. Muchanan mas grandi ta laga desesperacion hiba nan den e mésun caminda. Segun e korant, “e intentonan di suicidio ta e resultado extremo dje aumento di problemanan sikiátrico den hóbennan, i ta parce cu e yudansa cu ta ser ofrecé na nan no ta bai ta suficiente.”

Ta Ken Su Falta?

Ta fácil pa adultonan culpa hóbennan p’e puntonan di bista “desviante” di hubentud. Sin embargo, laga nos ta franco. Acaso adultonan no ta carga mayor parti dje culpa pa loke ta pasando awor entre hóbennan? Pa splica e comportacion desviante di hóbennan, hopi bes a mencioná intimidacion di parti di pareunan, negligencia di mayornan, falta di modelonan di conducta cu hóbennan por confia. “Depresion den e poblacion general ta casi mescos cu e tabata 30 aña pasá,” segun Profesor Sir Michael Rutter, hefe dje departamento di Investigacion Médico dje Unidad di Sikiatria Infantil na Gran Bretania. E ta agregá: “Pero, e incidencia di depresion entre tienernan i adultonan hóben a aumentá mashá. . . . No tin duda cu kiebro di famia ta hunga un papel; no simplemente divorcio, sino e nivelnan general di desacuerdo i conflicto entre adultonan.”

Un investigadó ta bisa cu hóbennan ta “rechasando normanan convencional.” Di con? “Pasobra e normanan tradicional no ta realisabel pa nan.” Tuma por ehempel e puntonan di bista cu ta cambia pa cu e papel di homber i muher. Hopi mucha muher ta adoptá e característicanan mas masculino di ta agresivo i violento, miéntras cu mucha homber ta bira femenino. Ki distinto dje normanan di ántes!

Pero di con nos ta mira tal cambionan radical awor? I cua ta e bon noticia cu tin awe tocante hóbennan? Con nan por tin un futuro sigur? Nos siguiente artículo ta considerá e contesta pa e preguntanan aki.