Unidad Mundial—Con Lo E Ser Realisá?

MESCOS cu un edificio decaí cu habitantenan negligente a destrosá malamente, e sistema actual di mundu ta sirbi pa un solo cos—bash’é abou i reemplas’é. Esaki no ta djis un otro punto di bista fatalista. Segun Bijbel, esei ta e único punto di bista realístico. Pakico?

E fundeshi dje ordu actual di mundu ta insigur. Henter e edificio ta yen di comehein i tur putrí. E structura di stal ta frusando. E murayanan principal ta débil. E dak ta bai cai aden. E pipanan ta pasa awa. E sistema di electricidad ta defectuoso i peligroso. E habitantenan ta bringa sin stop i maliciosamente ta causa daño na henter e edificio. Henter e propiedad i su alrededor ta plagá cu pest i por resultá den herida serio of morto.

“Bailando na Rand di Graf”

Pa motibu di conflictonan político incesante, golosidad, agresion i hostilidad étnico i di tribu cu rais profundo, “henter e rasa humano,” manera Gwynne Dyer a bisa, ta “bailando na rand di graf.” Rond parti di mundu, gruponan minoritario dicididu—gruponan di presion, luchadónan pa libertad, bandanan criminal, teroristanan internacional i otronan—ta sigui nan mes plannan egoista i ta parce capas di ruiná cualkier posibilidad pa yega na pas den e mundu casi manera nan kier. Mescos cu habitantenan desordená, nan por haci tur otro hende su bida infelis.

Sin embargo, segun hopi comentarista, no ta solamente gruponan disidente of individuonan ingobernabel ta stroba unidad mundial. E barera di mas grandi ta e nacionnan mes. S. B. Payne, Jr., un escritor cu ta skirbi tocante guera, ta bisa cu nacionnan independiente ta existí den “un estado di anarkia internacional.” Nan ta haci tur loke ta sirbi nan interesnan nacional mihó, cu poco of ningun consideracion pa otronan. Como resultado, atrabes di historia “hende a dominá hende pa su perhuicio.”—Eclesiástes 8:9.

Ta cierto cu gobiernunan nacional tabatin un midí di éxito den nan lucha contra inhusticia i opresion den nan fronteranan teritorial, i, te na cierto grado, riba escala internacional. De bes en cuando nan a establecé un midí di unidad internacional. Pero asta ora algun nacion a uni pa actua contra un nacion agresor, hopi biaha e sospecho ta sigui existí cu nan a actua motivá pa interes propio mas bien cu pa berdadero altruismo. E realidad ta cu gobiernunan humano no tin un solucion completo i duradero pa desunion mundial. Gwynne Dyer ta señalá: “Riba su mes e idea cu tur e nacionnan di mundu lo uni huntu pa stop of castigá un of otro pais disidente ta bunita, pero ken ta definí ken ta e agresor, i ken ta paga e costo na placa i bida cu lo por ta necesario pa stop e?”

Naturalmente, agresion di parti di un nacion contra un otro ta solamente posibel ora e mayoria di su ciudadanonan no ta oponé e agresion ei. Historia ta mustra bes tras bes cu no ta solamente den algun “pais disidente” cu ciudadanonan a apoyá nan lidernan, sea nan tabatin rason of no. De facto, mayoria habitante dje tera a haci esaki. Nan a sigui ciegamente tras di “mentira, demagogia i rumor,” manera e revista Time a bisa, di un sucesion di lidernan político i religioso.

Nacionalismo a cende e pasion di hende cu otro ora ta razonabel i compasivo i a pone nan cometé atrocidad contra hende homber, muher i mucha di otro nacionalidad. Por ehempel, relacioná cu Guera Mundial I, historiadó J. M. Roberts ta comentá: “Un dje contradiccionnan di 1914 ta cu den tur pais gran cantidad di hende, di tur partido político, credo i desendencia, ta parce, sorprendentemente, di a bai guera di buena gana i felismente.” Hende a siña nan les desde e tempu ei? No! E maldad di “nacionalismo ciegu,” manera e reportero Rod Usher a yam’é, ta sigui caba cu cualkier posibilidad pa unidad mundial.

Forsanan di Pafó Ta Trahando

Sin embargo, tin un barera mas grandi pa unidad mundial. Bijbel ta revelá cu forsanan di pafó ta trahando. Esakinan ta ser identificá como Satanas e Diabel i su compinchinan, e demoñonan. Segun Bijbel, Satanas ta “e dios dje sistema di cosnan aki [cu] a ciega mente dje incrédulonan,” pa e “glorioso bon nobo tocante e Cristo,” no haci un impresion riba nan.—2 Corintionan 4:4; Revelacion 12:9.

Naturalmente, esaki no ta absolvé individuonan di carga responsabilidad pa nan mes actonan. Pero e ta splica sí pakico gobiernunan humano nunca por establecé un mundu berdaderamente uní. Tanten cu Satanas e Diabel ta sigui existí, lo e influenciá hende homber i muher pa cultivá loke Bijbel ta yama “obranan di carni,” incluyendo ‘enemistad, pleitu, contencion i desunion.’—Galationan 5:19-21.

Gobiernu Mundial

Kico anto ta e solucion? Rond di shete shen aña pasá, e poëta i filósofo italiano bon conocí, Dante, a señalá kico ta e contesta. El a razoná cu solamente un gobiernu mundial lo por garantisá pas i unidad pa humanidad. Pa hopi hende e speransa di cualkier forma di gobiernu mundial ta simplemente un ilusion, no algu pa pone berdadero confiansa aden. Autor Payne, mencioná anteriormente, ta concluí: “Gobiernu mundial ta imposibel den e etapa aki di historia.” Pakico? Pa motibu cu cualkier gobiernu mundial exitoso lo tin cu garantisá dos cos cu ta parce totalmente fuera di hende su alcanse, esta cu “un gobiernu mundial lo pone fin na guera i cu un gobiernu mundial lo no ta un tirania mundial.”

Ta sigur cu ningun gobiernu humano hamas lo por cumpli cu esaki. Sin embargo, e Reino di Dios den man di Jesucristo, por i lo eliminá guera. (Salmo 46:9, 10; Mateo 6:10) Sí, lo e eliminá tur hacidó di guera. Profeta Daniel ta indicá cu na fin di Dios su tempu señalá pa hende goberná e tera, gobernacion humano lo a “resultá di ta dividí” manera “heru mesclá cu klei muhá.” (Daniel 2:41-43) Esaki lo a resultá den fragmentacion político i conflicto inevitabel. Sin embargo, Daniel ta bisa cu e Reino di Dios lo “aplastá i pone un fin na tur e reinonan [of gobiernunan nacionalista i desuní] aki,” i lo reemplasá nan cu su Reino tan sperá den man di Jesucristo.—Daniel 2:44.

Lo no tin sentido pa crea un bon ambiente pa hende si e tera sigui ser habitá pa personanan cu mentalidad destructivo cu ta sigui haci bida di otro hende infelis. Sin embargo, “malechornan mes lo ser cortá.” (Salmo 37:1, 2, 9, 38; Proverbionan 2:22) P’esei, Cristo lo eliminá tur hende cu deliberadamente ta rechasá e normanan di Dios of cu ta apoyá autoridadnan mundano cu ta causa desunion. Lo e destruí tur esnan cu ta daña e planeta aki. Dios ta primintí di “causa ruina na esnan cu ta ruinando e tera.”—Revelacion 11:18.

Esaki lo no ta un sorto di tirania mundial. Jesucristo lo actua “den e causa dje berdad i humildad i husticia” ora e separá e bonnan for dje malunan. (Salmo 45:3, 4; Mateo 25:31-33) Tampoco esaki ta solamente negativo i destructivo, un abusu di poder. No! No ta como si fuera un desaroyadó di proyecto golos ta bai destruí un bunita edificio histórico. Lo e ta mas manera e destruccion di un edificio decaí pa traha lugá pa un ambiente limpi i agradabel.

Pero kico dje forsanan di pafó cu a causa tal desunion den pasado? Nan lo ta liber pa infiltrá e sistema nobo aki di manera cu su habitantenan lo cuminsá e proceso destructivo di nobo, bringando cu otro hende cu ta ocupá e tera i haci bida di tur hende infelis? Sigur cu no. E exterminacion di maldad i renobacion dje tera lo ta final i completo. “Afliccion lo no lanta un di dos biaha.”—Nahum 1:9.

Bijbel ta compará destruccion final di Satanas cu kimamentu di sushi. E ta bisa cu “e Diabel cu a gaña [e habitantenan dje tera] a ser tirá den e lago di candela i swafel.” (Revelacion 20:10) Ki un símbolo poderoso! Imaginá bo, destruccion compará no simplemente cu un candela chikitu cu solamente un capacidad limitá, sino henter un lago di candela cu ta consumí i eliminá for di existencia tur loke ta malbado i contaminá. Ningun persona, ni hende ni demoño, lo ser permití pa sigui haci cosnan cu ta menasá ordu universal, cu ta violá e normanan di Dios di loke ta bon i malu, of cu ta causa dolor na nan próhimo. Tur persona cu ta kibra unidad lo disparcé!—Salmo 21:9-11; Sofonías 1:18; 3:8.

Un Pueblo Uní for di Tur Nacion

Sobrebibientenan dje limpiesa grandi aki lo forma “un multitud grandi . . . for di tur nacion i tribu i pueblo i lenga.” (Revelacion 7:9) Desacuerdonan nacional i entre tribu lo no dividí nan. Nan lo a siña biba huntu na pas i armonia. (Isaías 2:2-4) Loke ta mas maraviyoso ainda ta cu e ocupantenan di pasado dje planeta tambe lo habitá e tera limpiá mediante e percuracion maraviyoso di resureccion.—Juan 5:28, 29.

Lo bo kier biba den un mundu asina? Solamente esnan cu ta pega n’e rekisitonan di Dios lo haci esei, i su rekisitonan ta claramente describí den Bijbel. (Juan 17:3; Echonan 2:38-42) Testigonan di Jehova lo ta contentu pa yudá bo siña loke Dios ta rekerí pa asina bo por spera di disfrutá di bida pa semper den un mundu berdaderamente uní.

[Plachi na página 7]

Gobernacion den man di Jesucristo lo garantisá un mundu uní