Bon Nobo di Paradijs na Tahiti

TAHITI! E nomber ta parce di transmití un cierto atraccion exótico. Artistanan i escritornan manera Paul Gauguin, Robert Louis Stevenson i Herman Melville, kende nan pintura i descripcionnan dje bunitesa tropical i trankilidad dje Islanan di Laman Sur a capta e interes di hopi hende, a hacié famoso.

Tahiti ta e isla mas grandi den e mas cu 120 islanan di Polinesia Frances, situá den Laman Sur Pacífico. Aunke e isla di Laman Sur aki ta casi sinónimo cu paradijs den mente di mayoria hende, tog e pueblo di Tahiti tin cu tende tocante un otro paradijs cu lo bini pronto. (Lucas 23:43) Testigonan di Jehova, un total di 1.918 na Tahiti awe, ta trahando duru pa papia cu e 220.000 hendenan tocante e bon nobo cu pronto e Reino di Dios lo introducí condicionnan berdaderamente paradísico, no solamente na Tahiti, sino tambe riba henter e tera.—Mateo 24:14; Revelacion 21:3, 4.

Pa hopi aña e oficina di sucursal di Sociedad Watch Tower na Fidji, rond di 3.500 kilometer leu, a dirigí e trabou di predicá na Tahiti. E distancia inmenso a haci cosnan difícil, i e progreso tabata lento. P’esei, dia 1 di april, 1975, a establecé un oficina di sucursal na Tahiti, i esei a marca un punto crucial den e actividad di cristiannan berdadero den e teritorio aki. Kico a hiba n’e desaroyo aki, i con e trabou di predicá a cuminsá na Tahiti?

Un Cuminsamentu Chikitu

E bon nobo di Reino a ser tendé pa promé biaha na Tahiti den añanan ’30, i hopi dje isleñonan, cu tin hopi respet pa Bijbel, a respondé cu gran interes. Sin embargo, como resultado di un prohibicion di gobiernu i otro restriccionnan, ainda no tabatin Testigo riba e isla na cabamentu di añanan ’50. N’e tempu ei, Agnès Schenck, un nativo di Tahiti cu tabata biba na Merca, a dicidí di regresá Tahiti cu su esposo i yu. E ta splica con tur cos a sosodé.

“N’e congreso di distrito di 1957 na Los Angeles, Ruman Knorr [e tempu ei presidente di Sociedad Watch Tower] a splica cu tabatin un necesidad grandi pa publicadónan di Reino na Tahiti. E tempu ei mi tabatin un aña bautisá, i mi a sclama: ‘Wel laga nos ban Tahiti!’ Dos famia, famia Neill i famia Carano, bon amigu di nos, a tendé mi papia tocante esei. Nan a bisa nos cu nan lo tabatin gana di bai cu nos, pero nos no tabatin hopi recurso. Mi esposo tabata malu pa hopi tempu, i mi yu tabata masha chikitu. P’esei tabata difícil pa nos bai. Amigunan den e congregacionnan den becindario a tende di nos meta, i nan a manda placa i artículonan di cas pa nos. Anto na mei 1958 nos a nabegá pa Tahiti, cu entre otro, 36 laken!

Ora nos a yega Tahiti, mi a sintí mi manera un stranhero, pasobra mi tabata for dje isla pa 20 aña. Nos a cuminsá predicá, pero nos tabatin cu tene cuidou pasobra nos trabou cristian tabata prohibí. Nos tabatin cu sconde e revistanan, i nos tabata usa Bijbel so. Na principio nos tabata duna testimonio solamente na hende cu tabatin abonament caba riba e revistanan Toren di Vigilancia i Spierta!

Clyde Neill i David Carano, huntu cu nan famianan, a djoin nos despues dje congreso internacional na New York City na 1958. Nos tabata predicá huntu i tabata invitá e hendenan pa bin scucha discursonan cu tabata ser duná den cas dje rumannan. Poco poco cosnan a ser organisá, i nos a cuminsá un grupo di studio di Bijbel cu 15 persona. Despues di tres luna famia Neill i Carano tabatin cu bai pasobra nan visa di turista a caducá. P’esei e rumannan a dicidí cu promé cu nan bai, nan lo bautisá tur esnan interesá cu a cualificá. Mi tabatin e privilegio di tabata e traductor pa e promé discurso di bautismo. N’e ocasion aki ocho isleño nativo a simbolisá nan dedicacion na Jehova pa medio di bautismo bou di awa. Despues famia Neill i Carano a bai Merca bek.

E trabou di predicá a continuá. Nos a organisá den gruponan chikitu i tabata bishitá e hendenan parti anochi. Hopi biaha combersacionnan cu esnan interesá tabata dura te meianochi. Tin biaha asta pastornan protestant tabata uni den e discusionnan. Pa 1959, e promé congregacion a ser formá. Anto, pa nos gran deleite, na 1960 gobiernu a reconocé e asociacion di Testigonan di Jehova oficialmente. E promé añanan ei tabata yená cu goso i sucesonan spiritual culminante. Jehova berdaderamente e bendicioná nos decision pa muda bai caminda e necesidad tabata mas grandi.” Ruman Schenck tin awor 87 aña di edad, i ainda e ta sirbiendo Jehova fielmente den su congregacion.

E Trabou A Move Padilanti

Na 1969 dos Testigo for di Francia, Jacques i Paulette Inaudi, a ser asigná na Tahiti como pioneronan special. Jacques ta corda: “Ora nos a yega Tahiti, tabatin solamente 124 publicadó, un congregacion na Papeete, i dos pionero special na Vairao, riba e península.” Un pida tera smal ta uni e península cu Tahiti. Pronto mester a tene e Asamblea Internacional “Pas Riba Tera.” “Esei tabata mi promé experencia den organisá un congreso,” Jacques ta sigui conta. “Nos tabatin cu planea un sesion ingles p’e bishitantenan, forma un orkesta p’e canticanan di Reino i ensayá dos drama. Solamente 126 publicadó a haci tur e trabou aki. Mi tin sigur cu Jehova a haci e mayor parti.” E asistencia di 488 tabata algu emocionante p’e isleñonan. Pa hopi di nan, tabata promé biaha cu nan a reuní cu compañeronan Testigo di otro paisnan.

Pronto despues, Jacques Inaudi a ser asigná como e superintendente biahero. Segun cu el a bishitá e vários islanan, el a mira cu tabatin hopi interes pero poco publicadó di Reino pa cultiv’é. “P’e motibu ei mi a animá hopi famia pa muda p’e islanan aki pa sirbi caminda e necesidad tabata mas grandi,” Jacques ta splica. “Pues poco poco, e bon nobo a ser plamá n’e archipiélagonan ei.” Ruman Inaudi a sirbi como superintendente biahero for di 1969 te 1974, i awe e ta un anciano den un dje congregacionnan na Tahiti.

Un di esnan cu a respondé na Ruman Inaudi su animacion tabata Auguste Temanaha, kende tabata un dje ocho personanan cu a ser bautisá na 1958. E ta relatá loke a sosodé. “Na 1972 e superintendente di circuito, Jacques Inaudi, a animá nos pa pensa riba muda bai sirbi na Huahine, un dje Islanan Abou den e Islanan di Sociedad. Mi tabata duda pasobra mi a duna solamente partinan di lesamentu di Bijbel den e congregacion i mi no tabata sintí mi cualificá pa ser confiá cu un responsabilidad asina. No obstante, Ruman Inaudi a sigui bisá mi, ‘No wori, bo por hacié!’ Despues di un tempu nos a tuma un decision. Pues, na 1973 nos a bende tur cos i huntu cu nos tres yunan yong nos a muda pa Huahine.

Ora nos a yega, mi a hañá mi ta cuminsá cu tur cos—Studio di Toren di Vigilancia, Scol di Ministerio Teocrático, etcétera. No tabata fácil, pero nos a experenciá e proteccion i yudansa di Jehova. Na vários ocasion el a yuda nos haña un lugá di biba. Anto, ora un grupo di opositor a purba core cu e Testigonan for dje isla, un político local a lanta pa defendé nos. Berdaderamente, Jehova sí a cuida nos durante tur e tempu ei.” Awor, tin dos congregacion na Huahine—un congregacion frances cu 23 publicadó i un tahitiano cu 55 publicadó.

Na 1969, Hélène Mapu a ser asigná como pionero special pa traha riba e península. “Tabatin hopi interes riba e península, i den poco tempu, mi a cuminsá hopi studio di Bijbel,” Hélène ta bisa. Pronto un congregacion chikitu a ser formá na Vairao, pero tabatin necesidad pa anciano. Cu tempu, Colson Deane, kende tabata biba 35 kilometer leu na Papara, tabata por a duna yudansa. “Nos mester tabata bon organisá pa por a sirbi na Vairao,” Ruman Deane ta conta. “Mi tabata traha na Faaa, 70 kilometer for di Vairao n’e otro banda dje isla. Despues di trabou, mi tabatin cu pura bai cas, busca mi famia i despues bai Vairao. Mas despues nos tabatin cu muda pa Faaa pa motibu di mi trabou. Nos lo por a sigui apoyá e congregacion di Vairao? Di berdad nos kier a yuda e rumannan einan, pues nos a dicidí di continuá. Riba anochinan di reunion masha poco biaha nos tabata yega cas promé cu meianochi pasobra nos tabatin cu haci diferente biahe pa hiba esnan cu no tabatin auto. Nos a haci esaki pa cincu aña. Awor ta un gran goso pa mira cuater congregacion den e parti aki dje isla, i nos tin grato recuerdo dje dianan ei.”

Tahiti Ta Bira un Sucursal

Pa 1974 e cantidad di publicadónan di Reino na Tahiti a aumentá na 199. E siguiente aña ora N. H. Knorr i F. W. Franz, e tempu ei presidente i vicepresidente di Sociedad Watch Tower, a bishitá Polinesia Frances, nan a mira cu lo tabata mas práctico p’e trabou di predicá na Polinesia Frances ser dirigí, no for di Fidji, mas cu 3.500 kilometer leu, sino for di Tahiti. Pues, dia 1 di april, 1975, e sucursal di Tahiti a ser establecé, i e superintendente di circuito, Alain Jamet, a ser nombrá como e superintendente di sucursal.

Un par di aña pasá, Ruman Jamet por a relatá e bendicionnan maraviyoso for di Jehova. “Desde 1975 hopi esfuerso a ser hací pa hiba e bon nobo na tur e islanan i archipiélagonan den nos teritorio, cu ta cubri un área mes grandi cu West Europa. E resultadonan ta yena nos cu goso. Pa 1983 e cantidad di publicadónan a crece bira 538. Den e aña ei un edificio pa un oficina di sucursal i Cas di Betel a ser construí na Paea. Awor, tin rond di 1.900 publicadó plamá den 30 congregacion riba e Islanan di Sociedad, un congregacion i un grupo isolá riba e Islanan Austral, un congregacion i dos grupo isolá riba e Islanan Marquésas, i vários grupo isolá riba e Islanan Tuamotu i Gambier. Hopi Salon di Reino nobo ta den construccion—tres riba e Islanan Marquésas i shete na Tahiti—pa percurá p’e cantidad semper aumentante di hende nobo cu ta bini n’e reunionnan. Den e último 20 añanan, Jehova berdaderamente e bendicioná nos esfuersonan pa cultivá e campo tahitiano.”

Ainda Tin Hopi di Haci

E prospectonan pa crecementu na Polinesia Frances ta excelente. Dia 23 di mart, 1997, rond di 5.376 hende a reuní cu Testigonan di Jehova rond Polinesia Frances p’e Memorial dje morto di Jesucristo. Pa satisfacé e necesidadnan spiritual di e hendenan interesá aki, nos publicacionnan bíblico ta ser hací disponibel den un cantidad di idioma local. Ademas di tahitiano, literatura a ser prepará na paumotu, cu ta ser papiá riba e Archipiélago Tuamotu i riba e Islanan Marquésas den nort i sur.

E crecementu continuo i e experencianan excelente a yuda publicadónan di Reino na Tahiti apreciá mas plenamente e amor i pacenshi di Jehova, “kende su boluntad ta pa tur clase di hende ser salbá i yega na un conocimentu exacto dje berdad,” asta riba e islanan lehano di Laman Sur. (1 Timoteo 2:4) Testigonan di Jehova na Tahiti i e otro islanan di Polinesia Frances tin pleno fe den e promesa di Jehova: “Den mi e islanan mes lo spera, i riba mi brasa nan lo warda.”—Isaías 51:5.

[Mapa na página 26]

(Pa teksto den su formato kompleto, wak publikashon)

E sucursal di Tahiti ta percurá p’e necesidadnan di Polinesia Frances

AUSTRALIA

[Plachi na página 25]

Di robes pa drechi: Alain Jamet, Mary-Ann Jamet, Agnès Schenck, Paulette Inaudi i Jacques Inaudi

[Plachi na página 27]

Oficina di sucursal di Tahiti