Tereno Berde pa Hende Semehante di Carné den Teritorio Navaho

HÓZHÓNÍ, den e idioma dje indjannan navaho, ta nificá “bunita,” i asina ei e pueblo navaho ta describí nan teritorio. Desde 1868 gobiernu mericano a asigná 62.000 kilometer cuadrá di tereno di reservaat den nortoost Arizona, alrededor di loke yama cuater skina, unda e cuater estadonan di Arizona, Colorado, New México i Utah ta topa otro. Vaye di Monumento, cu a bira famoso dor di películanan di cowboy, ta preservá awor como e Parke di Tribu Navaho i ta atraé turistanan for di rond parti di mundu. E vaye tin monolitonan di areniet corá espectacular di 300 meter haltu, cu ta destacá cada un nan so magníficamente pará den e yanuranan haltu di desierto. E término navaho p’e vaye ta nificá “e espacio meimei dje barancanan,” i e ta pas bon.

E pueblo navaho den su totalidad ta conocí pa nan bon manera, hospitalidad caluroso i famianan grandi cu lasonan estrecho. E 170.000 residentenan den e área di reservaat ta biba principalmente den pueblonan isolá, siguiendo e estilo di bida tradicional. Algun ainda ta cria carné i ta biba den casitanan di palu cubrí cu tera yamá hogan. E artesania navaho ta popular na tur parti. Specialmente nan tapijtnan i klechinan cu diseño colorido geométrico of tradicional, hilá di wol di carné, ta hopi cotisá. Bon conocí ta tambe e hoyanan di plata navaho cu turkesa i otro material natural.

Treciendo e Bon Nobo den Teritorio Navaho

Pa mas cu 30 aña Testigonan di Jehova a bini n’e teritorio navaho no solamente pa keiru, sino tambe pa trece e bon nobo dje Reino di Dios n’e hendenan den e área remoto aki. (Mateo 24:14) Ministernan pionero regular i special di Testigonan di Jehova a hiba delantera den e trabou di predicá. Hopi di nan a bini reaccionando riba yamadanan for di superintendentenan biahero i Testigonan local pa yuda unda e necesidad tabata mas grandi. Algun a bini for di congregacionnan den cercania, miéntras cu otronan, incluyendo miembronan di diferente tribu di mericano nativo, a bini for di vários parti di Merca.

E homber i muhernan aki cu tabatin un spiritu di sacrificio propio a compará nan ministerio akinan cu un asignacion di misionero. Pakico? Na promé lugá, e idiomanan nativo ta sumamente difícil pa siña, debí na nan zonido, structura i expresionnan complicá. Tambe, e pueblo nativo, por lo general, a pega na nan tradicion den religion, structura di famia i dependencia riba loke e tera ta producí pa nan pan di cada dia. Ademas, bibienda i empleo ta scars pa esnan cu no ta indjan, haciend’e difícil pa esnan cu a muda bin pa keda aki. Por último, e historia largu di maltrato dje hendenan aki na man di hende blancu a hinca den nan un grado di desconfiansa pa hende straño, locual ta di comprendé.a

Na promé instante, ora e Testigonan a bai yama di cas pa cas bistí na camisa cu dashi, nan a ser confundí cu e mormonnan, i hopi hende no tabata habri porta. Ora nan a cambia pa un bistí ménos formal, nan tabata ser invitá paden, hopi biaha pa un of mas ora. Awor e hendenan ta reconocé Testigonan di Jehova, maske nan ta usa camisa cu dashi atrobe den e ministerio.

Pa yega so n’e hendenan cu ta biba den e reservaat navaho ta un berdadero desafio. Ta normal pa core hopi kilometer riba camindanan cu por ta yen di baranca, santu i lodo. Di mes esaki ta gasta vehículonan mas tantu i ta agotá e pasaheronan. Tambe vehículonan por pega den lodo, pero generalmente otro hende cu ta pasa riba e camindanan ta cla pa duna un man. Pa bishitá esnan interesá, pa bai un studio di Bijbel na cas of pa hiba un persona un reunion cristian hopi biaha ta rekerí un biahe di ida i buelta di vários ora. Pero e Testigonan ta haci tur e esfuerso ei di buena gana, demostrando asina nan amor p’e pueblo nativo.—Compará cu 1 Tesalonicensenan 2:8.

Navahonan ta gusta papia over di Bijbel. Generalmente nan ta reuní henter e famia huntu—yunan, mayornan i welonan—pa tende tocante e speransa di un futuro hogar paradísico pa humanidad. Ora e Testigonan a puntra un navaho con el a pensa Paradijs lo ta, el a contestá, “Berde, cu hopi carné,” reflehando nan amor pa e tera i pa nan tounan. Tambe nan ta apreciá literatura di Bijbel, mustrando esaki tin biaha dor di haci donacion di kralchi, habon, lechi na bleki i cosnan por estilo pa sostené e ministerio di Reino. Den un aña un pionero special a obtené rond di 200 abonament riba e revistanan Toren di Vigilancia i Spierta!, incluyendo dos cerca un homber riba cabai.

Estableciendo un “Campamentu di Carné”

Ora zomer yega, ta tempu pa un wardadó di carné navaho muda su tou pa un campamentu di carné. E cas di zomer aki pa carné, scogé pasobra e ta cerca di terenonan berde i un bon fuente di awa, ta yuda e tou bona. Den un sentido figurativo, un Salon di Reino por ser compará cu un campamentu asina—un tereno spiritual berde i un fuente di awa di e berdad. Hende cu ta bini por haña alimentacion spiritual cu ta haci nan spiritualmente sano i fuerte.

Pa algun tempu, reunionnan tabata ser tené den un local di scol na Kayenta, Arizona. Anto na augustus 1992, cu yudansa di cientos di boluntario Testigo for di vários estado, a construí un Salon di Reino nobo na Kayenta. E Salon di Reino aki i vários otronan den e region ta laga e hendenan local sinti cu Testigonan di Jehova t’ei pa keda. Entre e otro Salonnan di Reino cu ta sirbi e inmenso teritorio aki tin esnan n’e stadnan Tuba i Chinle, ámbos den e reservaat, un na Keams Canyon riba e tereno dje tribu hopi cu ta parti dje reservaat navaho, i vários otro den pueblonan cu ta pegá cu e reservaat. Kico tabata e resultado?

Reaccion Faborabel Abrumador n’e Mensahe di Reino

Na Kayenta mas cu un dozijn di hende local a ser bautisá desde cu e Salon di Reino a ser construí, indicando cu Jehova su bendicion ta riba e lugá di adoracion berdadero aki. E salon ta duna evidencia cu Testigonan di Jehova t’ei pa keda i ta edificá confiansa den e bon nobo di Reino cu nan ta predicá. Recientemente e promé discurso público basá riba Bijbel a ser duná aki na idioma navaho. E 40 miembronan dje congregacion tabata contentu pa yama 245 persona bon biní n’e discurso cu a trata cu e responsabilidadnan di mayornan. Cu curasonnan apreciativo, un famia di ocho miembro a biaha tres ora bai i bini pa tende e discurso aki—nan promé bishita na un Salon di Reino.

Un otro herment útil cu Jehova a percurá ta e foyeto Disfruta di bida riba tera pa semper! na idioma navaho. Traduccion dje foyeto na navaho, un idioma sumamente complicá, tabata un tarea sumamente difícil. E traductornan huntu a dedicá mas cu 1.000 ora pa haci sigur cu e foyeto ta transmití e mensahe di Reino corectamente. Desde su presentacion na cabamentu di 1995, e Testigonan local a laga vários mil ehemplar di dje, resultando den numeroso studionan di Bijbel cu buscadónan dje berdad.

Mas i mas, e idioma navaho ta ser usá den e ministerio segun cu publicadónan di Reino ta siñ’é. Congregacionnan den e área a cuminsá usa navaho den e Scol di Ministerio Teocrático, i ta tene cursonan di idioma navaho pa entrená e publicadónan. Ademas, e programa na asambleanan local ta ser traducí tambe na navaho. Ta sigur cu e esfuersonan aki lo hiba na mas reaccion faborabel ainda den e reservaat.

Nos no mag pasa por haltu dje cualidadnan spiritual sobresaliente cu nos rumannan navaho ta manifestá como parti dje fruta di Reino den e reservaat indjan aki. Pa shete aña largu, Jimmy i Sandra tabata trece nan cincu yunan 120 kilometer bai i bini pa asistí n’e reunionnan semanal. E famia tin grato recuerdo di canta canticanan di Reino i studia Bijbel huntu durante nan biahenan largu. E mayornan su amor i celo pa e berdad a motivá e yunan pa sigui nan ehempel i bira alabadónan dedicá di Jehova. Awor cuater di nan ta sirbi como pionero regular, i Jimmy ta un anciano. Pa aumentá e goso dje famia aki, Elsie, ruman muher di Jimmy, recientemente a bira e promé persona cu a ser bautisá cu ta papia solamente navaho.

Wardadónan local di carné i nan tounan ta agregá un toke di serenidad n’e monumentonan di piedra cu ta dorna e reservaat di navaho. Profeta Isaías a profetisá hopi tempu pasá di Jehova: “Manera un wardadó lo e pastoreá su propio tou. Cu su brasa lo e reuní e lamchinan; i den su pechu lo e carga nan. Esnan cu ta duna lechi lo e conducí cu cuidou.” (Isaías 40:11) Pa medio di su Wardador Excelente, Jesucristo, Jehova ta recogiendo den su tereno spiritual berde tur esnan den e reservaat navaho cu ta deseá di tende e bon nobo di Reino i haña e oportunidad di ricibí su bendicion eterno.

[Nota]

[Plachi na página 24]

Wardadó di carné navaho ta tende e bon nobo