Contrarestando Acusacionnan Falsu na Francia
RECIENTEMENTE Testigonan di Jehova na Francia tabata e blanco di un avalancha di acusacion falsu. Probechando di sucesonan trágico cu a enbolbé cultonan religioso na Europa i Hapon, medionan di comunicacion a plama informacion trocí tocante e Testigonan. Nan a ser pintá ekibocadamente como un dje cultonan di mas grandi i mas peligroso.
Den un esfuerso pa rectificá asuntunan, Testigonan di Jehova a publicá un tratado cu a contestá preguntanan manera esakinan: Ken Testigonan di Jehova ta? Nan ta cristian? Nan ta aceptá cuido médico? Pakico nan ta bai di cas pa cas? Con nan trabou ta ser financiá? Con Testigonan di Jehova ta beneficiá e comunidad?
E tratado informativo na idioma frances tabata titulá Testigonan di Jehova—Loke Bo Mester Sa. Pa por a laga e tratado cerca mas tantu hende posibel, un campaña a ser organisá. For di 13 di mei pa 9 di juni, 1996, mas cu nuebe miyon ehemplar a ser distribuí.
E tratado aki a impresioná hopi hende, incluyendo funcionarionan público. “E crítica dirigí contra Testigonan di Jehova ta yená mi cu indignacion,” un consehal regional a skirbi despues di a lesa e tratado. “Hopi biaha mi a yega di apreciá e caracter caritativo i inegoista di boso trabou.” Como reaccion riba e tratado, un miembro di Parlamento Europeo a skirbi: “Mayoria hende sa masha bon con pa distinguí e grupo di cristian di cua boso ta forma parti for dje cultonan.”
Na Bretagne un Testigo a presentá e tratado na un pastor, cu a acept’é mesora. “Mi ta encomendá boso pa loke boso ta haciendo,” e pastor a bisa. Anto el a agregá: “Mi ta animá mi parokianonan pa laga boso drenta nan cas i pa ofrecé boso un cop’i cofi. Boso por asta bisa esnan cu boso topa den boso ministerio cu boso a pasa na mi cas. Tambe mi kier bisa boso cu mi ta gusta lesa boso publicacionnan.”
Despues di a ricibí e tratado, un homber protestant na Alsace a skirbi Sociedad Watch Tower pa pidi un studio di Bijbel. “Despues di a perde tur confiansa den mi iglesia,” el a skirbi, “mi ta spera cu anhelo pa un comienso spiritual nobo.” Apesar dje acusacionnan falsu cu de bes en cuando ta ser dirigí contra nan, Testigonan di Jehova na Francia—en berdad, na tur parti dje mundu—ta sigui yuda hende yega na un conocimentu exacto dje propósitonan di Dios, manera Bijbel ta splica.—2 Timoteo 3:16, 17.