Treciendo Libertad Spiritual pa Esnan den Prizon

“NOS tabata wardando riba boso.” “E último par di anochinan aki, mi a soña cu boso binimentu.” “Danki pa a asigná un persona pa bishitá nos regularmente.” “Nos kier expresá nos gratitud pa cada un dje bendicionnan cu nos inmerecidamente ta ricibí for di Jehova i su organisacion i pa e alimento spiritual duná n’e tempu apropiado.”

Kico tabata e motibu pa e expresionnan di gratitud aki? Esakinan ta algun expresion for di prezunan cerá den diferente prizon na México. Nan ta apreciá e atencion cu nan ta ricibiendo for di Testigonan di Jehova, loke a trece libertad spiritual pa nan maske nan ta den prizon. Na México tin 42 prizon unda Testigonan di Jehova regularmente ta sirbi e necesidadnan spiritual di prezunan. E lugánan aki ta ser yamá Centro Readaptación Social (Centro di Rehabilitacion Social). Den algun dje prizonnan aki, nan asta ta tene reunionnan cristian regularmente cu hopi bon resultado. Por ehempel, na un conteo recien, rond di 380 persona tabata asistiendo n’e reunionnan den e lugánan aki. Na e tempu ei un promedio di 350 studio di Bijbel tabata ser conducí. Trintishete persona a cualificá pa cuminsá predicá, i 32 a dedicá nan bida na Jehova, simbolisando esaki pa medio di bautismo bou di awa.

Con e Trabou Ta Ser Hací

Con Testigonan di Jehova ta efectuá nan trabou di predicá den e lugánan aki? Promé, nan ta bai n’e funcionarionan encargá pa pidi un autorisacion por escrito pa drenta e prizon, splicando e propósito dje bishitanan, esta pa siña e prezunan con pa mehorá nan calidad di bida i sirbi Dios den un manera cu ta agrad’é.

Den cada caso e autoridadnan a duna nan permit. E funcionarionan aki ta apreciá e instruccion bíblico cu ta ser ofrecí na esnan encarcelá. E autoridadnan di prizon a observá cu Testigonan di Jehova ta obedecé e regulacionnan di siguridad establecí p’e lugánan aki. Nan a permití e ministernan bishitante aki usa oficina, comedor i shopnan pa tene nan reunionnan. Den un prizon nan asta a permití e Testigonan construí un Salon di Reino chikitu, manera e siguiente experencia, relatá pa un superintendente biahero na zuidoost México, ta mustra.

“Na principio di 1991 nos a cuminsá bishitá e prizon na Tehuantepec, Oaxaca, unda nos a haña un gran hamber spiritual. Pronto nos a cuminsá 27 studio di Bijbel. En bista dje interes dje prezunan, cincu reunion di congregacion a ser programá. Un dje prezunan, cu a mustra gran amor pa Jehova, a dicidí di construí un Salon di Reino chikitu den a área di prizon afin di haña un lugá pa tene reunion. El a bai cerca e director dje prizon i a pidi permit, i e autoridadnan a cooperá hopi bon. Na cuminsamentu di december 1992, seis prezu a cualificá como publicador dje bon nobo. Debí n’e progreso cu nan a mustra, areglonan a ser hací pa tene e Memorial den e prizon. Nos a pidi e director dje prizon permit pa trece e emblemanan—e pan i e biña—i despues di un consideracion di cuater ora, permit a ser duná.

“A sosodé cu dia 3 di april, 1993 (tres dia promé cu e celebracion di Memorial), algun prezu a ser lagá liber. Ora un di nan cu tabata un publicador a ricibí su papelnan cu el a ser lagá liber, el a pidi p’e papia cu e director dje prizon pa obtené permit pa keda te despues dje celebracion di Memorial. Esaki realmente a sorprendé e director, ya cu esaki no ta un peticion masha comun, pero en bista dje prezu su gran interes pa asistí n’e Memorial ei den prizon, el a onra e peticion. N’e Memorial a asistí 53 persona, cu a drama lágrimanan di goso na fin dje programa. Nos a cumbiní pa yama e grupo aki ‘Libertad Cereso,’ pasobra nan ta liber den un sentido spiritual.”

E obra di Testigonan di Jehova ta ser apreciá masha tantu den e lugánan aki. Den un dje institutonan penal aki, e persona encargá cu e lugá ta recomendá abiertamente pa asistí n’e reunionnan di Testigonan di Jehova como “terapia” pa un rehabilitacion rápido di prezunan.

Un Programa Exitoso di Rehabilitacion

E actividad di Testigonan di Jehova a resultá den e rehabilitacion completo di hopi prezu. Aunke hopi biaha ta cierto cu esnan cu tabata den prizon ta regresá na un bida di crímen una bes nan sali liber, esnan cu berdaderamente a aceptá e mensahe dje Palabra di Dios a cambia completamente. Nan transformacion ta recordá nos dje palabranan di apostel Pablo: “Ni fornicador . . . , ni ladron, ni haragan, ni buraché, ni zundrador, ni estafadornan lo heredá e reino di Dios. I tog esei ta loke algun di boso tabata. Pero boso a ser labá limpi, pero boso a ser santificá, pero boso a ser declará hustu den e nomber di nos Señor Jesucristo i cu e spiritu di nos Dios.”—1 Corintionan 6:9-11.

E cambio sobresaliente den nan personalidad ta bisto ora nan expresá nan sintimentunan. Miguel, kende ta den e prizon Campeche na Ciudad Campeche, a expres’é asina aki: “Awe mi por bisa cu goso cu mi ta considerá mi mes entre e otro carnénan cu tin e speransa registrá na 2 Pedro 3:13 i Mateo 5:5.” José, kende ta den e prizon Koben, Estado Campeche, a comentá: “Aunke mi ta un prezu i mi crímen por ta hopi serio, mi ta comprendé cu Jehova ta masha misericordioso i ta scucha mi oracion i súplicanan. E por pordoná mi delitunan i duná mi e oportunidad di pasa e resto di mi bida compartiendo e bon nobo tocante e Reino di Dios. Un danki ta bai na nos ancianonan pa e tempu cu nan ta saca pa bishitá nos den prizon pa asina nos por beneficiá for dje promesanan dje Reino di Dios. Ki bendicionnan placentero! Mi por bisa cu mi ta un prezu? No, Jehova a duná mi e libertad spiritual cu mi tabatin mester.”

Kico ta haci asesinonan, violadornan sexual, piromannan, ladronnan i otronan cambia bira cristiannan cu ta hiba un bida drechi? Segun e mésun hombernan aki, esei ta e poder transformador dje Palabra di Dios i e bon asociacion cu hende berdaderamente deboto. E caso di Tiburcio, cerá den e prizon na Mazatlán, Sinaloa, ta ilustrá e éxito dje programa di rehabilitacion aki. E tabata den prizon na Concordia, Sinaloa, unda e tabatin problema pa motibu di su genio violento. Su esposa tabata un Testigo di Jehova, i e homber tabatin custumber di maltrat’é, asta ora e esposa tabata bishit’é den prizon. E esposa tabatin pacenshi i a sigui bini pa bishit’é, di manera cu e homber a pidié trece e buki Bo por biba pa semper den Paradijs riba tera p’e, cu el a cuminsá studia riba su mes.a Despues e homber a pidi pa un hende bin prizon pa studia cuné. El a cuminsá haci progreso spiritual, i su relacion cu otro personanan a cuminsá mehorá. El a ser transferí n’e prizon na Mazatlán unda tin un grupo cu ta studia Bijbel, i awor e ta un publicador. E ta comentá: “Awor, huntu cu mi esposa i yunan i mi compañeronan di prizon, mi ta masha gradicidu di por a scucha e berdadnan di Bijbel den e lugá aki, cu e speransa cu den futuro cercano, lo mi sali liber i lo por asistí na tur e asambleanan i reunionnan di congregacion.”

Tambe tin Conrado, kende ta mashá gradicidu p’e cambionan cu e por a haci den su bida. E tabatin asina tantu problema matrimonial cu su esposa a bandon’é. Di manera cu el a busca consuelo den droga. Cu tempu el a bira un narcotraficante. El a ser arestá i sentenciá na castigu di prizon pa a transportá un cargamentu di marihuana i cocaina. Den prizon tabatin un grupo cu tabata studia Bijbel cu Testigonan di Jehova, i el a ser invitá pa studia huntu cu nan. El a expresá su sintimentunan asina aki: “Mi a keda impresioná cu e manera ordená cu e reunionnan a ser conducí, e programa di investigacion pa medio dje publicacionnan, i e echo cu tur cos tabata basá riba Bijbel. Mesora mi a pidi un studio di Bijbel i a cuminsá asistí na reunion.” Esei tabata na januari 1993. Awor Conrado ta for di prizon i ta sigui progresá den e congregacion cristian.

Islas Marías

Na México tin un prizon temí consistiendo di cuater isla yamá Islas Marías. E prezunan por biaha rond e islanan penal riba cua nan ta encarcelá. Algun ta biba ei huntu cu nan esposa i yunan.

Un congregacion chikitu a ser establecé. Tres ruman for di Mazatlán ta biaha bai ei un bes pa luna, pa yuda conducí e reunionnan, percurá literatura i duna animacion. Tin biaha e superintendente di circuito ta bai bishitá nan. E asistencia promedio ta entre 20 pa 25 persona. Tin cuater publicador bautisá i dos no-bautisá. E superintendente biahero ta informá cu “algun ta cana 17 kilometer pa asistí na reunion riba diadomingo i tin cu sali di reunion den purá pa yega nan cel bek pa ora di chekeo. Asta canando duru, ta tuma mas cu dos ora pa yega bek.” Un dje rumannan, cu a siña e berdad den e prizon ei, a bisa recientemente: “Antes mi tabata interesá pa sali pronto for di prizon, pero awor e por ta ki ora cu Jehova kier, ya cu en todo caso mi tin hopi trabou di haci aki den prizon.”

Nos ta contentu pa mira cu e berdad ta eherciendo su poder pa libra esnan sincero cu ta buscando un manera pa agradá Jehova. Mas cu un dozijn di esakinan, cu a siña e berdad den prizon, a sali liber, a bautisá i awor ta hiba un bida onorabel como sirbidor di Dios, algun asta birando anciano di congregacion. E poder cu Bijbel tin pa sana curason i reformá hende a ser demostrá den un manera dramático. Una bes cu e hombernan aki cu tabata encarcelá pa a cometé delitu drenta e caminda di e lus dje Palabra di Dios, nan ta experenciá e berdadero libertad cu Jesus a primintí ora el a bisa: “Boso lo conocé e berdad, i e berdad lo haci boso liber.”—Juan 8:32; Salmo 119:105.

[Nota]

[Plachi na página 23]

Hopi persona a saca beneficio for dje berdadnan cristian cu nan a siña den prizon