Jehova Tabata Mi Refugio

MANERA PENELOPE MAKRIS A RELAT’E

Mi mama a suplicá mi fervientemente: “Laga bo esposo; bo ruman hombernan lo haña un mihó pa bo.” Pakico mi mama amoroso tabata kier pa mi disolvé mi matrimonio? Kico a molesti’é asina tantu?

MI A nace na 1897 den e pueblo chikitu di Ambelos, riba e isla griego di Samos. Nos famia tabata miembro deboto dje Iglesia Griego Ortodox. Tata a muri djis promé cu mi a nace, i ami cu mi Mama i mi tres ruman hombernan tabatin cu traha duru djis pa sobrebibí meimei dje pobresa absoluto dje tempu ei.

Guera Mundial I a cuminsá na 1914, i pronto despues mi dos rumannan mas grandi a ser ordená pa drenta ehército. Pero pa evitá di haci esei, nan a imigrá pa Merca, lagando ami i mi otro ruman homber na cas cu Mama. Algun aña despues, na 1920, mi a casa cu Dimitris, un maestro hóben den nos pueblo.

Un Bishita Importante

Pronto despues cu mi a casa, mi mama su ruman homber a bini for di Merca pa bishitá nos. Pa casualidad el a bini cu un dje volúmennan di Studies in the Scriptures, cu Charles Taze Russell a skirbi. E tabata un publicacion dje Studiantenan di Bijbel, cu awor ta conocí como Testigonan di Jehova.

Ora Dimitris a habri e buki, el a tuma nota di un tema tocante cua e tabatin pregunta desde cu e tabata mucha, “Kico ta sosodé hende ora e muri?” Na scol secundario el a cuestioná un teólogo griego ortodox tocante net e tema aki pero no a ricibí un contesta satisfactorio. E splicacion claro i lógico cu e publicacion a duna, a deleitá Dimitris asina tantu cu el a bai derechitu n’e cafetaria dje pueblo, unda hende homber na Grecia sa tin custumber di bini huntu. Ei el a relatá e cosnan for di Bijbel cu el a siña.

Nos Posicion p’e Berdad Bíblico

Rond dje tempu aki—na cuminsamentu di añanan ’20—Grecia tabata meimei di un otro guera. Dimitris a ser reclutá i mandá n’e tera firme di Turkia, na Asia Menor. El a ser heridá i a ser mandá cas. Despues cu el a recuperá, mi a compañ’é pa Smyrna, Asia Menor (awor Izmir, Turkia). Ora e guera a terminá di ripiente na 1922, nos tabatin cu hui. En realidad, apénas nos a scapa riba un boto mal dañá rumbo pa Samos. Ora nos a yega cas, nos a hinca rudia i gradicí Dios—un Dios di kende ainda nos tabatin solamente poco conocimentu di dje.

Pronto Dimitris a ser asigná pa duna les na un scol na Vathy, capital dje isla. El a sigui lesa literatura dje Studiantenan di Bijbel, i riba un anochi di awaceru dos di nan for dje isla di Chios a bishitá nos. Nan a regresá for di Merca pa sirbi como colporteur, manera evangelisadornan di tempu completo tabata ser yamá. Nos a laga nan pasa anochi cerca nos, i nan a papia cu nos tocante hopi cos relacioná cu e propósitonan di Dios.

Despues di nan bishita Dimitris a bisá mi: “Penelope, mi ta realisá cu esaki ta e berdad, i mi mester siguié. Esaki ta nificá cu mi tin cu stop di canta den Iglesia Griego Ortodox, i cu mi no por bai misa cu e muchanan di scol.” Aunke nos conocimentu di Jehova tabata limitá, nos deseo pa sirbié tabata fuerte. Pues mi a contest’é: “Lo mi no ta un obstáculo pa bo. Dal bai numa.”

Dimitris a sigui basta indeciso: “Sí, pero si loke nos dicidí p’e sali na cla, lo mi perde mi trabou.”

Mi a bis’é: “No wori. Ta tur hende ta gana nan pan di cada dia for dje profesion di duna les? Nos ta yong i fuerte, i cu e yudansa di Dios nos por haña otro trabou.”

Rond di e tempu aki nos a haña sa cu un otro Studiante di Bijbel—un colporteur tambe—a bini Samos. Ora nos a tende cu polis a nenga di dun’é permit p’e duna un discurso público basá riba Bijbel, nos a bai busk’é. Nos a hañ’é den un shop ta combersá cu dos teólogo griego ortodox. Bergonsá pasobra nan no por a defendé nan creencianan cu Bijbel, e teólogonan pronto a bai. Mi esposo, impresioná cu e colporteur su conocimentu, a puntra: “Con bini bo ta usa Bijbel cu asina un facilidad?”

“Nos ta studia Bijbel sistemáticamente,” el a contestá. Habriendo su tas el a saca e buki di studio The Harp of God i a mustra nos con pa usa e buki aki den un studio asina. Nos tabata asina ansioso pa siña cu ami i mi esposo, e colporteur i dos otro homber mesora a compañá e propietario dje shop pa su cas. E colporteur a entregá cada un di nos un copia di The Harp of God, i nos a cuminsá studi’é mesora. Nos a sigui nos studio te hopi despues di meianochi, anto segun cu mainta tabata habri, nos a cuminsá siña e canticanan cu Studiantenan di Bijbel ta canta.

For dje tempu ei padilanti, mi a cuminsá studia Bijbel vários ora pa dia. Studiantenan di Bijbel di otro paisnan a sigui manda literatura bíblico pa nos. Na januari 1926, mi a haci mi dedicacion na Dios den oracion, comprometiendo mi mes sin reserva pa haci su boluntad. Mas despues den e zomer ei ami i mi esposo a simbolisá nos dedicacion mediante bautismo bou di awa. Nos tabatin un deseo fuerte pa papia cu otro hende tocante e cosnan cu nos tabata siña, di manera cu nos a cuminsá participá den e ministerio di cas-pa-cas cu e tratado Message of Hope.

Soportando Oposicion Intenso

Un dia un muher hóben a invitá mi pa asistí na un liturgia na un capiya griego ortodox chikitu. “Mi a stop di adorá Dios den e forma ei,” mi a splik’é. “Awor mi ta adorá Dios cu spiritu i cu berdad, manera Bijbel ta siña.” (Juan 4:23, 24) El a keda pasmá i a cana plama tur caminda loke a sosodé, implicando tambe mi esposo.

Prácticamente tur hende a cuminsá oponé. Ningun caminda nos no por a haña pas—ni den nos cas ni n’e reunionnan cu nos tabata tene cu e poco personanan interesá riba e isla. Riba instigacion dje pastornan ortodox, boshi’ hende tabata bini huntu pafó di nos lugá di reunion, tirando piedra i insultando nos na bos haltu.

Ora nos tabata distribuí e tratado Message of Hope, muchanan tabata bosha rond di nos gritando “milenarionan” i otro términonan di menosprecio. E coleganan di mi esposo tambe a cuminsá causa problema p’e. Yegando na fin di 1926 nan a cuminsá un caso contra dje, acusand’e di ta incompetente como un maestro di scol público, i a sentenci’é na 15 dia den prizon.

Ora Mama a haña sa di esaki, el a consehá mi pa laga mi esposo. “Scucha, mi mama stimá,” mi a contestá, “Mama sa mes bon cu mi cuantu mi ta stimá bo i ta respetá bo. Pero mi simplemente no por laga Mama para den e caminda di nos adoracion dje Dios berdadero, Jehova.” El a sali bai su cas amargamente desapuntá.

Na 1927 un asamblea di Studiantenan di Bijbel a ser tené na Aténas, i Jehova a habri e caminda pa nos asistí. Pa reuní cu gran cantidad di compañeronan adorador tabata algu emocionante i spiritualmente fortalecedor pa nos. Riba caminda bek pa Samos, nos a laga 5.000 copia dje tratado titulá A Testimony to the Rulers of the World den e pueblonan di nos isla.

Rond di e tempu ei Dimitris a ser kitá for di su posicion como maestro, i pa motibu dje prehuicio contra nos, tabata casi imposibel pa haña trabou. Pero ya cu mi por a cose i Dimitris tabata un verfdó cualificá, nos por a gana suficiente placa pa cumpli cu nos necesidadnan. Na 1928 mi esposo, i tambe e cuater otro ruman hombernan cristian na Samos, a ser sentenciá na dos luna di encarcelacion acusá di a predicá e bon nobo. Siendo e único Studiante di Bijbel liber, mi por a percurá cuminda pa nan den prizon.

Bringando Contra Enfermedadnan Severo

Na un dado momento mi a bira malu cu inflamacion tuberculoso di wesu di lomba, e tempu ei un enfermedad crónico desconocí. Mi a perde mi apetit i a sufri di un keintura haltu continuo. Tratamentu a encerá cu nan a bistí mi cu yesu for di mi garganta te na mi bel di pia. Pa por a cubri e gastunan, mi esposo a bende un pida tereno di manera cu mi por a continuá cu e terapia. Afligí, mi a haci oracion na Dios tur dia p’e duná mi fortalesa.

Ora parientenan tabata bishitá mi, continuamente nan tabata waya e vlamnan di oposicion. Mama a bisá mi cu nos tabata pasando tur e problemanan aki pa motibu cu nos a cambia nos religion. Siendo incapas pa move, mi cusinchi tabata keda papa muhá cu lágrima segun cu mi tabata suplicá nos Tata celestial p’e duná mi pacenshi i curashi pa por soportá.

Riba e mesa banda di mi cama, mi tabatin mi Bijbel i un suministro di foyeto i tratado pa bishitante. Tabata un bendicion cu e reunionnan di nos congregacion chikitu tabata ser tené den nos cas; mi por a ricibí animacion spiritual regularmente. Nos tabatin cu bende un otro pida tereno pa paga tratamentu médico di un dokter na Aténas.

Pronto despues, e superintendente biahero a bishitá nos. E tabatin masha duele di mirá mi den e condicion aki i Dimitris sin trabou. Bondadosamente el a yuda nos haci areglo pa bai biba na Mytilene, riba e isla di Lesbos. Nos a muda ei na 1934, i Dimitris a logra haña trabou. Ei nos a haña tambe rumannan cristian maraviyoso cu a cuidá mi durante mi enfermedad. Gradualmente, despues di cincu aña di tratamentu, mi a recuperá completamente.

Sin embargo, na 1946, djis despues di Guera Mundial II, atrobe mi a bira seriamente malu, e biaha aki cu inflamacion tuberculoso di buikvlies. Mi tabata na cama pa cincu luna cu un keintura haltu i dolornan severo. Pero, mescos cu promé, mi nunca a stop di papia tocante Jehova cu mi bishitantenan. Cu tempu, mi a recobrá mi salú.

Trahando Pionero Apesar di Oposicion

Oposicion implacabel tabata e suerte di Testigonan di Jehova na Grecia den e añanan despues di guera. Nos a ser arestá masha hopi biaha segun nos tabata traha den e ministerio di cas-pa-cas. Mi esposo a pasa un total di casi un aña den prizon. Ora nos a cuminsá nos dia den e ministerio, generalmente nos tabata planea pa pasa e anochi bou di aresto na warda di polis. Sin embargo, Jehova nunca a bandoná nos. E semper a percurá e curashi i fortalesa necesario pa por a soportá.

Den añanan ’40, mi a lesa den e Informant (awor Nos Ministerio di Reino) tocante e areglo pa pionero di vacansi. Mi a dicidí di purba participá den e rasgo di sirbishi aki cu a rekerí pa dedicá 75 ora pa luna den e ministerio. Como resultado, mi rebishitanan i studionan di Bijbel a aumentá—pa un tempu mi tabata conducí 17 studio semanalmente. Tambe mi a desaroyá un ruta di revista den e área di negoshi di Mytilene, unda mi a entregá regularmente rond di 300 ehemplar di E Toren di Vigilancia i Spierta! na pacus, oficina i banconan.

Ora un superintendente biahero a bishitá nos congregacion na 1964, el a bisa: “Ruman Penelope, mi a mira for di bo Karchi di Registro di Publicador ki resultadonan maraviyoso bo ta hañando den bo ministerio. Pakico bo no ta yena un aplicacion pa traha como pionero regular?” Lo mi ta semper gradicidu pa su animacion; e ministerio di tempu completo tabata mi goso pa mas cu tres década caba.

Un Experencia Recompensador

Na Mytilene tin un bario densamente poblá yamá Langada, unda refugiadonan griego tabata biba. Nos a evitá di bai di cas pa cas aya pa motibu dje oposicion fanático cu nos a yega di encontrá. Sin embargo, ora mi esposo tabata den prizon, mi tabatin cu pasa dor dje área aki pa bishit’é. Riba un dia di awaceru un señora a invitá mi paden pa puntrá mi pakico mi esposo tabata den prizon. Mi a splik’é cu esei ta pasobra e tabata predicá e bon nobo dje Reino di Dios i cu e tabata sufri mescos cu Cristo a sufri.

Cu tempu, un otro muher a haci areglo pa mi pasa na su cas. Ora mi a yega mi a haña cu el invitá un total di 12 hende muher. Mi a anticipá posibel oposicion, pues mi a haci oracion na Dios p’e duná mi sabiduria i curashi pa enfrentá cualkier eventualidad. E muhernan tabatin hopi pregunta, i algun a bini cu obhecion, pero tabata posibel pa mi duna contestanan bíblico. Ora mi a lanta pa bai, e señora dje cas a pidí mi pa bini e siguiente dia atrobe. Felismente, mi a aceptá e invitacion. Ora ami cu un compañero a yega e siguiente dia, nos a haña e muhernan ta warda nos caba.

Despues di esei nos consideracionnan bíblico a sigui riba un base regular, i nos a cuminsá hopi studio di Bijbel. Un cantidad dje muhernan i nan famia a progresá den conocimentu exacto. E grupo aki mas despues a forma e núcleo di un congregacion nobo di Testigonan di Jehova na Mytilene.

Jehova Tabata Bon pa Mi

Den transcurso di añanan Jehova a recompensá e esfuersonan di ami i di mi esposo pa sirbié. E man yen di Testigonan na Samos den añanan ’20 a crece bira dos congregacion i un grupo cu rond di 130 publicador. I riba e isla di Lesbos, tin cuater congregacion i cincu grupo cu ta incluí rond di 430 proclamador di Reino. Mi esposo a proclamá e Reino di Dios activamente te na su morto na 1977. Ta ki un privilegio pa mira esnan kendenan nos a yuda permaneciendo celoso ainda den e ministerio! Sí, cu nan yunan, nietunan i bisanietunan, nan ta forma un multitud grandi cu ta adorá Jehova unidamente!

Mi curso di sirbishi cristian, cu ta extendé pa mas cu 70 aña awor, no tabata unu fácil. Sin embargo, Jehova tabata un fortalesa incomparabel. Debí na edad avansá i un salú cu ta bayendo atras, mi ta limitá na cama i ta masha limitá den e trabou di predicá cu mi por haci. Pero, mescos cu e salmista, mi por bisa Jehova: “Bo ta mi refugio i mi fortalesa, mi Dios, den ken lo mi confia.”—Salmo 91:2.

(Ruman Makris a muri miéntras e artículo aki tabata ser prepará. E tabatin un speransa celestial.)

[Plachi na página 26]

Cu su esposo na 1955

[Plachi na página 26]

Ruman Makris lo a cumpli 100 aña di edad na januari 1997