Un Clima pa Crecementu na Guinea Ecuatorial

CRECEMENTU abundante di mata ta e promé impresion cu un biahero ta haña ora su avion toca suela n’e aeropuerto internacional di Guinea Ecuatorial. E pista ta rondoná pa palunan mahestuoso, cu ta haci e edificionan dje aeropuerto parce masha chikitu. Vegetacion berde i abundante ta florecé for di costa di laman te riba top di cerunan, stimulá dor dje abundancia di awaceru i temperatura henter aña di alrededor di 30 grado Celsius.

Un otro clase di crecementu vigoroso tambe ta tumando lugá na Guinea Ecuatorial, “e crecementu cu Dios ta duna.” (Colosensenan 2:19) Mescos cu e funcionario etiopio cu a busca yudansa di Felipe, hopi hende aki ta ansioso pa comprendé e Scritura. (Echonan 8:26-39) No ta algu straño pa un persona acercá un Testigo di Jehova riba caya i pidi pa un studio di Bijbel. E aproximadamente 325 Testigonan na Guinea Ecuatorial ta conduciendo mas cu mil studio di Bijbel.

Sembrando e Promé Simianan

Guinea Ecuatorial, e pais di mas chikitu na Africa, ta situá zuid di Nigeria i Camerun. (Mira e mapa.) E bon nobo a ser hibá ei inicialmente dor di Testigonan di Nigeria cu a bin pa traha den e plantashinan di cacao. Aunke vários congregacion di abla ingles a ser formá, despues nan a disolvé ora e ruman hombernan aki tabatin cu regresá Nigeria. Sin embargo, djis despues cu independencia a ser otorgá na Guinea Ecuatorial na 1968, tres pareha misionero di Watchtower a ser asigná ei. Nan no por a keda hopi debí na dificultadnan político, pero nan testificacion a producí resultadonan excelente.

Santiago, un dje misioneronan, a topa Buenaventura, un homber haltu, yen di músculo, conocí cerca e hendenan local como superman. E tabata un homber religioso cu a respetá e Bijbel, sin embargo e tabatin un genio violento. E menor insulto tabata suficiente p’e dal un hende. Ora e rabia den un bar, tur hende presente tabata plama bai, asta bulando dor di bentana pa scapa di su slanan. Eigenlijk, segun cu e tabata scucha Santiago, e tabatin intencion di dun’é un halá di sota si e no tabata por a duna prueba bíblico convincente pa loke e tabata bisa. ‘Ningun hende ta bai coge superman cabes abou,’ e tabata bisa den su mes. El a keda fasiná cu loke el a tende, specialmente tocante e speransa di bida eterno riba un tera paradísico, p’esei el a bai di acuerdo pa studia Bijbel.

Segun cu e studio a progresá, Buenaventura su deseo pa biba pa semper den Paradijs a bira mas fuerte, i el a siña cu lo e tabatin cu conformá su bida n’e normanan di Dios afin di gana un premio asina. Ora el a realisá cu cristiannan berdadero no mester “paga malu cu malu,” el a cuminsá haci un esfuerso sincero pa controlá su genio.—Romanonan 12:17.

E berdadero prueba a yega un dia ora cu accidentalmente el a dal e glas abou di un cliente den un bar. E homber a rabia i a dal e. Mesora, otro hende den e bar a plama, keriendo cu un pelea lo cuminsá. Pero Buenaventura mansamente a paga p’e glas kibrá, a cumpra un otro bebida p’e homber i a pidi dispensa pa su man pisá. Ora e bisiñanan a mira cu un studio di Bijbel tabata loke a haci cambionan asina grandi den dje, vários di nan tabata dispuesto pa studia cuné. P’e tempu cu Buenaventura a bautisá, ya caba e tabata conducí cincu studio di Bijbel. E ta sirbiendo como anciano p’e último cincu añanan, i aunke ainda hende ta yam’é superman, nan ta hacié awor den wega.

“Conciente di Nan Necesidad Spiritual”

Durante añanan ’70 e poco Testigonan local a haci nan máximo esfuerso pa sigui predicá i reuní huntu. Despues, vários pareha misionero di Spaña a bin pa yuda. Andrés Botella, kende a sirbi na Guinea Ecuatorial pa 12 aña, ta corda cu djis despues cu el a yega, el a keda impresioná p’e manera cu e hendenan berdaderamente tabata “conciente di nan necesidad spiritual.” (Mateo 5:3) “Tabata un berdadero placer pa studia Bijbel cu hende apreciativo asina,” e ta bisa.

Mary, un ruman muher di Spaña, tabata studiando Bijbel cu un mucha muher hóben cu yama María kende a bisa cu su mayornan, Francisco i Fausta, tambe tabata interesá pa studia. Como cu Mary tabata conducí 15 studio i María su mayornan tabata biba poco leu, vários siman a pasa promé cu Mary por a bishitá nan.

Ora Mary cu su esposo, Serafín, finalmente a topa e mayornan, ya caba nan tabatin e buki Bo por biba pa semper den Paradijs riba teraa i un Bijbel, i nan tabata ansioso pa cuminsá studia. Pues nan a cuminsá mesora. Serafín a ripará cu María su mayornan tabata bon conocí cu e informacion. Mescos tabata e caso n’e di dos bishita ora nan a studia e segundo capítulo. “Tabata casi manera studia cu dos Testigo bautisá,” Serafín ta corda. N’e di tres bishita, ya cu nan a parce di sa e informacion asina bon, Serafín a sugerí pa haci un sesion di pregunta-i-contesta pa determiná precis cuantu nan realmente a comprendé. El a descubrí cu Francisco i Fausta riba nan mes a studia henter e buki!

Con nan conocimentu recien adkerí a afectá nan? Na armonia cu loke nan a siña, ya caba nan a stop di asistí na reunionnan spiritista i a kibra nan laso cu Iglesia Católico. Ademas, Francisco a stop di huma, i nan no tabata come carni mas cu no a ser sangrá debidamente. Ya cu tabata bisto cu nan a aplicá tur loke nan a siña, nan a ser animá pa cuminsá compartí nan conocimentu cu otronan. Mesora nan a cuminsá predicá na nan bisiñanan. Den solamente tres luna nan a cualificá pa bautismo. Francisco awor ta un sirbidor ministerial, i gracias na nan ehempel excelente i celo den predicá, tres di nan yu muhernan awor ta Testigo, dos yu homber ta asistí n’e reunionnan, i seis otro miembro di famia ta studiando.

No muchu tempu despues cu el a ser bautisá, Francisco a topa Pablo, un católico deboto cu a sirbi como sacristan den su iglesia. Pablo tabatin custumber di duna e predicashi ki ora cu e pastor tabata ausente. Si un miembro di iglesia tabata malu, e tabata bishit’é; si un hende no tabata na misa, Pablo tabata bel pa duna animacion; i si un hende a muri, el a haci loke e tabata por pa consolá e famia. Ta di comprendé cu Pablo tabata mashá stimá cerca tur e parokianonan.

Ya cu Pablo tabatin respet profundo p’e Bijbel, mesora el a aceptá Francisco su oferta pa studia cuné. Den poco tempu Pablo a mira con razonabel e mensahe di Bijbel tabata, i despues di un par di studio, el a dicidí di usa algun dje textonan bíblico cu el a siña na un di su “bishitanan di pastoreo” cerca un miembro di iglesia cu tabata malu. Corto tempu despues, den un di su predicashinan di diadomingo, Pablo a splica e importancia di usa e nomber di Dios, Jehova, i pakico nos no mester usa imágen.

Como cu el a aceptá e berdad asina lihé, el a spera cu otro miembronan di su iglesia lo a reaccioná di igual manera. Pero despues di tres of cuater dje predicashinan aki basá riba Bijbel, Pablo a ripará cu e hendenan no tabata contentu cu e informacion cu e tabata presentá. Pues el a dicidí di bandoná e iglesia i asociá regularmente cu Testigonan di Jehova. Den un par di luna, el a cualificá pa bautismo, i awor e ta un predicador celoso dje bon nobo. Aunke e no por predicá tempu completo, actualmente e ta conduciendo dies studio di Bijbel.

Promoviendo Crecementu dor di Reuní Huntu

E Testigonan na Guinea Ecuatorial ta tuma na serio e mandamentu bíblico pa no bandoná reunimentu huntu. (Hebreonan 10:25) Desde 1994 ora e trabou a bolbe haña reconocimentu oficial dje gobiernu, e rumannan ta ansioso pa obtené Salonnan di Reino adecuá. Echo ta cu mayoria dje congregacionnan a construí nan mes salon of ta den e proceso di haci esei.

Na Mongomo, caminda asistencia n’e reunionnan di diadomingo hopi bes ta yega te na dos biaha i mei e cantidad di publicadornan di Reino, e congregacion ta trahando duru pa construí un lugá grandi pa tene reunion. Otro religionnan na Mongomo generalmente ta paga trahador pa construí nan iglesianan, pues e actividad dje Testigonan local a capta e atencion di otro hende. Un dia e pastor dje Iglesia Nueva Apostólica a pasa n’e tereno di construccion pa puntra un dje ancianonan cuantu e tabata paga e trahadornan aki cu tabata traha asina duru. E pastor a bisa cu maske el a contratá metslánan cu tabata miembro di su mes iglesia, e trabou tabata bai masha poco-poco. El a puntra su mes si e no por a contratá e trahadornan cu tabata construyendo e Salon di Reino. Ora e anciano a bis’é cu tur e Testigonan tabata traha boluntariamente, el a cana bai babucá.

Asistencia n’e reunionnan por rekerí basta sacrificio pa esnan cu ta biba leu for dje Salon di Reino. Juan, un yoncuman cu a ser bautisá na 1994, a haña su mes confrontá cu e situacion aki. El a tende dje berdad na Gabon, caminda el a studia e promé mitar dje buki Biba pa semper. Despues el a regresá Guinea Ecuatorial, na su pueblito natal rond di 100 kilometer for di Mongomo. Esaki a presentá un desafio pa e sigui cu su studio. Pero e no a ser descurashá. Tur luna, e tabata haci un biahe di ocho ora riba baiskel pa Mongomo, caminda Santiago, un dje ancianonan local, a studia cuné. E tabata keda un par di dia den Mongomo i tabata studia tres of cuater biaha durante su estadia. Dje manera aki e por a completá su studio i cualificá pa bautismo.

Con Juan ta mantené su mes spiritualmente fuerte cu asina tiki asociacion cu otro cristiannan? Mas cu tur cos, dor di ser un predicador celoso dje bon nobo. El a predicá na tur hende den su pueblito, i pa tempu cu el a bautisá, e tabata conducí 13 studio di Bijbel. Seis di su studiantenan a compañ’é n’e dia special di asamblea na Mongomo pa mir’é bautisá. Awor e ta conducí un Studio di Toren di Vigilancia regular cu esnan interesá den su área, i generalmente rond di 20 hende ta presente.

Muhando e Simia cu Pacenshi

No ta tur crecementu spiritual ta bai lihé. Tin biaha hopi pacenshi ta necesario pa mira e simia finalmente producí fruta. Esaki tabata cierto den e caso di Paca, kende a tende e bon nobo pa promé bes aya na 1984 ora Edita, un ruman muher pionero, a predicá na dje na marshe. Ora Edita a bishitá Paca na su cas e siguiente siman, Paca a bai di acuerdo pa studia Bijbel cuné. Aunke e no tabata haci muchu progreso, Edita a persistí debí cu el a dicerní bon cualidadnan den Paca. “El a parce di ta un persona semehante di carné,” Edita ta splica, “i mi a pidi Jehova den oracion pa e por a habri Paca su curason.”

Paca a sigui cu su studio un aden un afó pa cuater aña i mei, pero ketu bai cu masha poco progreso. Pues ora nan a completá e buki Biba pa semper, Edita tabatin un combersacion franco cu Paca tocante e importancia di tuma e berdad na serio. Den su esfuerso pa alcansá e curason di Paca, Edita asta a yora.

“E conseho sincero ei realmente a toca mi curason,” Paca ta corda. “Desde e tempu ei padilanti mi a cuminsá haci cambionan den mi bida. Mi a inscribí mi mes den e Scol di Ministerio Teocrático, i e mésun aña ei mi a bira un publicador no-bautisá. E dia cu finalmente mi a ser bautisá tabata e dia di mas felis den mi bida!” Paca su entusiasmo actual ta contrali na su apatia anterior. Actualmente e ta conducí 13 studio, i naturalmente e tin pacenshi cu esnan cu no ta haci progreso rápido.

Yudando Hende Mehorá Nan Bida

Dor di biba segun normanan di Bijbel, Testigonan di Jehova na Guinea Ecuatorial a gana un bon reputacion di ta onrado i decente. Un homber, cu obviamente a keda impresioná cu nan conducta, a acercá un anciano di Congregacion Bata i a puntra: “Bo tin un buki Razonamientob? Mi ta fadá di ta un persona mundano. Lo mi kier bira un Testigo di Jehova!”

Antonio, un sirbidor ministerial den Congregacion Malabo, ta un ehempel típico di un persona mundano cu a bira un Testigo. Promé cu el a studia Bijbel, el a hiba un bida di paranda. El a gasta mayor parti di su placa cu el a gana trahando como drechador di oloshi na alcohol, i tambe el a hiba un bida inmoral. Kico a yud’é cambia su estilo di bida? El a keda profundamente impresioná pa loke ta ser declará cu palabra fuerte na 1 Corintionan 6:9, 10: “No sea gañá. Ni fornicador, . . . ni buraché, . . . lo heredá e reino di Dios.” El a realisá cu p’e haña Dios su fabor, e mester a cambia su bida. Cu mira riba esei, el a cuminsá vigilá su asociacion. (Proverbionan 13:20) Ora su amigunan bieu tabata pasa invit’é pa bai bebe, e tabata nenga nan invitacion i na su lugá tabata duna nan un testimonio. No a dura mashá cu nan a stop di cans’é.

Tur e esfuerso ei tabata bale la pena? “Mi ta masha felis di a cambia mi bida,” Antonio ta splica. “Mi salú ta hopi mas mihó maske awor mi ta riba 60 aña, miéntras cu mi amigunan di ántes sea a muri of ta sufriendo di mal salú. Awor mi tin berdadero amigunan en bes di esnan cu simplemente kier un compañero cu ta dispuesto pa paga nan siguiente bebida. Mas importante ainda, mi tin un bon relacion cu Dios. Awor mi ta sirbiendo como un pionero regular, i mi tin un studio di Bijbel cu un homber cu tambe tin un problema cu bebementu, di manera cu mi por usa mi experencia pa yud’é.”

Birando Esclabonan di Dios

Rond di 200 aña pasá, hendenan a lo largu dje costa di Guinea Ecuatorial a ser recogé i mandá cu barcu n’e continente di América como esclabo. Awe, hopi di nan ta birando esclabo boluntariamente—esclabonan di Dios. E forma di sclabitud aki a duna nan berdadero libertad, librando nan di doctrinanan babilónico i prácticanan spiritista. Tambe el a siña nan con pa hiba un bida satisfaciente i productivo. Nan a experenciá loke Jesus a primintí: “Boso lo conocé e berdad, i e berdad lo haci boso liber.”—Juan 8:32.

Cu un asistencia di 1.937 persona n’e celebracion dje Memorial di 1995—casi seis biaha e cantidad di publicador den e pais—tin expectativanan excelente pa mas crecementu spiritual. Segun cu e Testigonan na Guinea Ecuatorial celosamente ta sigui sembra i muha e simianan dje berdad, nan ta sigur cu ‘Dios lo sigui lagu’e crece.’ (1 Corintionan 3:6) Sin ningun duda, tin un clima ideal pa crecementu spiritual na Guinea Ecuatorial!

[Nota]