Tin Bida Despues di Morto?

DOS pregunta a perturbá humanidad pa miles di aña: Pakico nos tin cu bira bieu i cu tempu muri? Tin un clase di bida conciente despues di morto?

E promé pregunta a confundí hopi hende pasobra asta ciencia médico moderno, cu tur su descubrimentunan impresionante, no tabata capas pa duna un contesta definitivo of convincente.

E di dos pregunta tabatin un abundancia di contestanan distinto. Sin embargo, generalmente contestanan tocante si tin bida conciente despues di morto of no, ta partí den esnan cu ta sigur cu e bida aki no ta tur loke tin i esnan cu di mésun manera firme ta bisa cu bida conciente ta terminá ora bo muri. Mayoria hende dje último grupo aki ta bisa nos cu no tin ningun duda den nan mente cu hende su bida corticu ta tur loke e por spera. Hopi bes, cualkier argumento cu ser presentá contrario cu esei ta ricibí un contesta presumido, “Wel, ningun hende nunca a bini bek pa conta nos, no ta berdad?”

Mescos cu ta e caso cu otro cuestionnan controversial, tin hopi hende cu no a dicidí ainda—afirmando cu nan semper ta habrí pa laga un dje dos creencianan ei persuadí nan. Pero otronan lo contestá, kisas den wega, “Nos lo tin cu spera i mira ora e tempu yega!”

Un Pregunta di Hopi Tempu Pasá

Un pregunta antiguo tocante bida despues di morto a ser planteá rond di 3.500 aña pasá dor dje oriental bon conocí, Job, kende tabata famá pa su pacenshi ora el a haña su mes confrontá cu sufrimentu. Asina aki Job a plantea su pregunta: “Homber ta muri i ta ser vencí; e ta hala su último rosea i no t’ei mas. Mescos cu awa ta disparcé for di laman of un fondo di un riu ta seca i bira secu, asina homber ta drumi abou i no ta lanta . . . Si un homber muri, lo e biba atrobe?”—Job 14:10-14, New International Version.

Pero Job no tabata e único cu a puntra tocante bida despues di morto. E Encyclopædia of Religion and Ethics ta presentá e informacion iluminador aki bou dje subtema “Estado dje Mortonan”: “Ningun tópico conectá cu hende su bida síkico a ocupá su mente mes tantu cu su condicion despues di morto. [Hende indígeno] den tur region di mundu generalmente tin conceptonan masha cla i bibu dje mundu di spiritu—su bida, su característicanan, su paisahe—i esaki ta indicá un preocupacion intenso cu e tópico di bida despues di morto. E temor general pa cu hende morto ta señalá na un idea masha antiguo di cu e estado dje mortonan no tabata unu caminda bida a terminá. Morto a corta energianan; esei tabata bastante bisto; pero no tabatin otro energianan obrando, of e energianan ei no tabata capas di manifestá nan mes den maneranan sutil i misterioso? Sea cu hende na principio a kere den un spiritu, alma of fantasma, separá for dje curpa, of no, aparentemente tin tur motibu pa kere cu nan a considerá cu e mortonan ainda tabatin un of otro clase di existencia.”

Tal bes bo ta cai den cualkier un dje tres categorianan mencioná ariba: bo no ta sigur kico ta sosodé despues di morto; bo ta convencí cu tin un of otro clase di bida despues di morto; of bo ta convencí cu e bida aki ta tur loke tin. Sea cual sea e caso, nos ta invitá bo pa considerá cuidadosamente e siguiente artículo. Wak si bo ta haña den dje prueba bíblico convincente di cu tin un maraviyoso expectativa di un bida felis despues di morto, con esei lo tuma lugá, na unda, i na ki tempu.