“No Ta Soña Mi Ta Soña, No?”

E siguiente informe ta bini for di Malawi relacioná cu un dje Congresonan di Districto histórico “Alabadornan Gososo” di Testigonan di Jehova tené durante e zomer di 1995.

“CANTU di un caminda principal, casi na mitar dje caminda den direccion dje costa west di Lago Malawi, nan a pega un aviso pa promé bes den 29 aña. E ta bisa, ‘Congreso di Districto di Testigonan di Jehova.’

“Tin un truck grandi pará banda dje aviso, i for di su trailer ta sali mas cu 200 delegado for dje pueblo di Mzuzu. Nan a bin cu bonder di paña, klechi, wea di cushiná, hember, cuminda, palu pa candela i Bijbel pa djoin rond di 3.000 di nan rumannan di otro localidadnan.

“Miéntras nos ta cumindá e rumannan cu ta bahando for dje truck, George Chikako di 63 aña, ta yega, pushando su baiskel dor dje santu, despues di a cor’é pa dos dia for dje pueblito Nkhotakota. Den transcurso di añanan, Ruman Chikako a sinta cuater castigu di prizon pasobra el a nenga di comprometé principionan bíblico. Su primu a muri di golpinan cu el a ricibí miéntras e tabata den prizon. ‘No ta soña mi ta soña, no?’ Ruman Chikako ta puntra. ‘E congreso aki ta ser tené di dia cla, i e hendenan aki ta cantando canticanan di Reino na bos haltu! Pa asina tantu tempu, nos tabatin cu reuní den scuridad djanochi, fluister canticanan di Reino, i frega nos mannan huntu como aplauso. Awor nos ta reuniendo abiertamente, i hende ta keda sorprendí pa mira cu nos ta asina hopi ora cu nan a kere cu nos tabata djis un par!’

“E sitio dje congreso ta rondoná pa un curá di yerba i un dak trahá di palu di caña ta duna sombra. Hutnan chikitu trahá di yerba i dormitorionan na aire liber a ser trahá pa hospedá e delegadonan. E aire di anochi ta yen cu e zonido di bunita bosnan melodioso cu no ta zona dòf mas debí na temor di persecucion.

“Ki apropiado cu e congreso tin como su tema ‘Alabadornan Gososo’!”

[Rekonosementu]

Mountain High Maps® Copyright © 1995 Digital Wisdom, Inc.