Pregunta di Lector

Jesus sa awor e fecha di Armagedon?

Ta parce bastante razonabel pa kere cu sí e sa.

Algun hende por puntra nan mes pakico e pregunta ei ta lanta mes. Probablemente esei ta debí na Jesus su comentario hañá na Mateo 24:36: “En cuanto e dia i ora ei ningun hende no sa, ni e angelnan di shelu ni e Yu, sino solamente e Tata.” Nota e frase “ni e Yu.”

E versículo aki ta parti di Jesus su contesta n’e pregunta dje apostelnan: “Na ki tempu e cosnan aki lo ta, i cua lo ta e señal di bo presencia i dje conclusion dje sistema di cosnan?” (Mateo 24:3) Den su profecia, cu awor ta famoso, tocante evidencianan cu ta componé “e señal,” Jesus a pronosticá guera, scarcedad di cuminda, temblornan, persecucion di cristiannan berdadero, i otro cosnan riba tera cu lo a indicá su presencia. Mediante e señal aki su siguidornan lo por a reconocé cu e fin tabata cerca. Jesus a ilustrá e cercania dje fin cu e tempu ora un palu di figu ta cuminsá saca blachi, indicando cu zomer tabata cerca. El a agregá: “Di igual manera tambe boso, ora boso mira tur e cosnan aki, sabi cu e ta cerca, den porta.”—Mateo 24:33.

Pero Jesus no a bisa precisamente ki ora e fin lo a bini. Mas bien, el a declará loke nos a lesa na Mateo 24:36. Esei ta e traduccion den e Traducción del Nuevo Mundo de Las Santas Escrituras, i hopi Bijbel moderno ta bisa mescos. Sin embargo, algun version mas bieu no ta contené “ni e Yu.”

Por ehempel, E Testament Nobo ta bisa: “Ma ni dje dia, ni dje ora ei ningun hende no sabi nada, ni e angelnan di ciélu, sino mi Tata so.” E King James Version ta bisa mescos. Pakico nan a omití “ni e Yu,” aunke e ta ser hañá na Marco 13:32? Pasobra aya na principio di siglo 17 ora e versionnan ei a ser prepará, e manuscritonan cu e traductornan a usa no a contené e expresion. Sin embargo, miéntras tantu, hopi manuscrito griego mas bieu a ser descubrí. E manuscritonan aki, cu ta hopi mas cerca dje tempu di Mateo su manuscrito original, ta contené “ni e Yu” na Mateo 24:36.

Interesantemente, e Jerusalem Bible católico ta incluí e frase, cu un nota cu ta bisa cu e Vulgata na latin a omití e expresion “probablemente pa motibunan teológico.” Di mes, no! Traductornan of copistanan cu a kere den Trinidad lo por a ser tentá pa omití un frase cu a indicá cu Jesus tabata falta conocimentu cu su Tata sí tabatin. Con por tabata cu Jesus no tabata sa un cierto echo si tantu e como su Tata tabata parti di un Dios triuno?

Di manera similar, A Textual Commentary on the Greek New Testament, di B. M. Metzger, ta bisa: “E palabranan ‘ni e Yu’ ta falta den mayoria dje testimonionan [manuscrito] di Mateo, incluyendo e texto bizantino di mas despues. Na otro un banda, e mihó representantenan dje tiponan di texto alehandrino, occidental i cesareano ta contené e frase. E omision dje palabranan debí na e dificultad doctrinal cu nan ta presentá ta mas probabel cu asumí cu nan a ser agregá na” Marco 13:32.—Letra cursivo ta di nos.

E “mihó representantenan” ei di manuscritonan di mas promé ta apoyá e indicacion cu ta presentá un progreso razonabel en cuanto sa e ora dje fin. E angelnan no tabata sa e ora dje fin; ni e Yu; sino solamente e Tata. I esaki ta consistente cu e palabranan di Jesus hañá na Mateo 20:23, caminda el a admití cu e no tabatin autoridad pa duna lugánan prominente den e Reino, pero e Tata sí tabatin e autoridad.

Pues, Jesus su propio palabranan ta mustra cu riba tera e no tabata sa e fecha pa ‘e fin di mundu.’ El a haña sa esei entre tantu?

Revelacion 6:2 ta describí Jesus como sintá riba un cabai blancu i ta sali “venciendo i pa completá su victoria.” Siguientemente ta bini ginetenan cu ta representá guera, hamber i plaganan, manera esnan cu nos a experenciá desde cu Guera Mundial I a cuminsá na 1914. Testigonan di Jehova ta kere cu na 1914, Jesus a ser entronisá como Rey dje Reino celestial di Dios, esun cu lo hiba delantera den e binidero bataya contra maldad riba tera. (Revelacion 6:3-8; 19:11-16) Ya cu Jesus awor ta autorisá como esun pa vence den nomber di Dios, ta parce razonabel cu su Tata a bis’é ki ora e fin lo bini, ki ora lo e “completá su victoria.”

No a bisa nos riba tera e fecha, pues e palabranan di Jesus ainda ta aplicá na nos: “Sigui mira, keda lantá, pasobra boso no sa ki ora e tempu señalá ta. . . . Loke mi ta bisa boso mi ta bisa tur, Sigui vigilá.”—Marco 13:33-37.