Pakico Lo Bini un Fin na Religion di Mundu

“Sali for di dje, mi pueblo, si boso no kier participá cuné den su picánan, i si boso no kier ricibí parti di su plaganan.”—REVELACION 18:4.

1. (a) Den ki sentido Babilonia e Grandi a cai? (b) Con e suceso aki a afectá Testigonan di Jehova?

“BABILONIA E GRANDI a cai!” Sí, desde Jehova su punto di bista e imperio mundial di religion falsu a cai. Esaki tabata e caso for di 1919 bini ariba, ora e resto dje rumannan di Cristo a sali for di bou dje influencia di cristiandad, un parti dominante di Babilonia místico. Como resultado, nan tabata liber pa denunciá religion falsu i pa anunciá e gobernacion hustu di Dios mediante e Reino Mesiánico. Atrabes dje siglo aki Jehova su Testigonan leal a desenmascará Satanas su conglomeracion di religionnan marioneta, cu el a manipulá pa gaña “henter e tera habitá.”—Revelacion 12:9; 14:8; 18:2.

Con Babilonia e Grandi A Cai?

2. Con e estado actual di religionnan di mundu ta?

² Sin embargo, un hende lo por puntra, ‘Con bo por bisa cu Babilonia a cai, ora religion ta parce di ta floreciendo den asina tantu pais?’ Catolicismo i Islam ta pretendé cu nan cada un tin mas cu mil miyon creyente. Protestantismo ainda ta florecé den Nort i Sur América, unda misanan i capelnan nobo ta surgi constantemente. Cientos di miyones di hende ta sigui e ritonan di budismo i hinduismo. No obstante, te na ki grado tur e religionnan aki ta ehercé un influencia positivo riba e conducta dje miles di miyones di hendenan aki? El a prevení católico i protestant di mata otro na Nort Irlanda? El a trece berdadero pas pa hudiu i moslim na Medio Oriente? El a hiba na armonia entre hindú i moslim na India? I, mas recientemente, el a prevení serbionan ortodox, católiconan croata i moslimnan bosnio di sigui e caminda di “purificacion étnico,” plundermentu, violacionnan sexual i matamentu di otro? Religion hopi biaha ta djis un etiketa, un casca fini cu ta kibra bou dje mínimo presion.—Galationan 5:19-21; compará cu Santiago 2:10, 11.

3. Pakico religion ta den huicio dilanti Dios?

³ Desde e punto di bista di Dios, e apoyo cu e masanan di hende ta duna religionnan no ta cambia un echo inevitabel—tur religion ta den huicio dilanti Dios. Babilonia e Grandi, manera e evidencia di su historia ta mustra, ta merecé un huicio adverso pa motibu cu “su picánan a montoná huntu te na shelu, i Dios a corda su actonan di inhusticia.” (Revelacion 18:5) Den idioma profético Oséas a skirbi: “Pasobra ta bientu ta loke nan ta sigui sembra, i un bientu di tempestad ta loke nan lo cosechá.” Tur Satanas su religionnan falsu rond mundu lo paga e prijs caru p’e echo cu nan a traicioná Dios, su amor, su nomber i su Yu.—Oséas 8:7; Galationan 6:7; 1 Juan 2:22, 23.

Bo Mester Scoge

4, 5. (a) Den ki condicionnan nos ta bibando awe? (b) Ki preguntanan nos mester contestá?

⁴ Nos ta bibando den e parti final di “e último dianan,” i como cristiannan berdadero nos ta luchando pa sobrebibí e ‘tempu crítico aki, duru pa trata cuné.’ (2 Timoteo 3:1-5) Cristiannan berdadero ta residentenan temporal den e mundu di Satanas, cua berdaderamente ta reflehá su personalidad corupto como un matador, un gañador i un calumniador. (Juan 8:44; 1 Pedro 2:11, 12; Revelacion 12:10) Nos ta rondoná pa violencia, engaño, fraude, corupcion i inmoralidad grosero. Principionan a bai perdí. Bida di placer i oportunismo ta e palabranan cu ta tipificá e situacion. I den hopi caso e clero ta consentí cu corupcion moral dor di suavisá Bijbel su condenacion claro di homosexualidad, fornicacion i adulterio. Pues e cuestion ta, Bo ta apoyá i consentí cu adoracion falsu, of bo ta participá activamente den adoracion berdadero?—Levítico 18:22; 20:13; Romanonan 1:26, 27; 1 Corintionan 6:9-11.

⁵ Awor aki ta un tempu di seftamentu. P’esei, tin asta mas motibu pa haci un distincion entre adoracion falsu i berdadero. Kico mas e religionnan di cristiandad a haci cu ta haci nan asina reprensibel?—Malakías 3:18; Juan 4:23, 24.

Religion Falsu Ta Ser Acusá

6. Con cristiandad a traicioná e Reino di Dios?

⁶ Aunke miyones di persona den cristiandad ta usa regularmente e Oracion di Nos Tata den cua nan ta resa p’e Reino di Dios bini, nan a apoyá diligentemente tur forma di expresion político, excluyendo e gobiernu teocrático ei. Siglonan pasá “prinsnan” di Iglesia Católico, manera cardenalnan Richelieu, Mazarin i Wolsey a actua tambe como hombernan seglar di estado, ministernan di gobiernu.

7. Con Testigonan di Jehova a desenmascará cleronan di cristiandad mas cu 50 aña pasá?

⁷ Mas cu 50 aña pasá, den e foyeto titulá Religion Reaps the Whirlwind [Religion Ta Cosechá e Remolino], Testigonan di Jehova a desenmascará enbolbimentu di cristiandad den política.a Loke a ser bisá e tempu ei ta aplicá cu mes forsa awe: “Investigacion onesto dje conducta dje cleronan religioso di tur denominacion lo revelá cu e lidernan religioso di henter ‘cristiandad’ ta participando cu interes profundo den política di ‘e mundu malbado actual aki’ i ta mete den su asuntunan mundano.” E tempu ei Testigonan a criticá Papa Pio XII severamente pa su convenionan cu Hitler nazista (1933) i Franco facista (1941), i tambe p’e papa su intercambio di representantenan diplomático cu e nacion agresor, Hapon, na mart 1942, djis un par di luna despues dje atake notorio na Pearl Harbor. E papa no a haci caso di Santiago su spiertamentu: “Adúlteronan, boso no sa cu amistad cu e mundu ta enemistad cu Dios? Ken, anto, cu kier ta amigu di mundu ta haci su mes enemigu di Dios.”—Santiago 4:4.

8. Con e Iglesia Católico Romano ta enbolbí den política awe?

⁸ Con e situacion djawe ta? E institucion di papa ainda ta enbolbí den política, tantu mediante su cleronan como mediante su representantenan laico. Papanan recien a pone nan seyo di aprobacion riba Nacionnan Uní dor di dirigí nan mes pa pas n’e imitacion falsificá ei trahá dor di hende. Un edicion recien di L’Osservatore Romano, e corant oficial vaticano, a anunciá cu shete diplomático nobo, “embahadornan p’e Sede Santu,” a presentá nan credencialnan n’e “Tata Santu.” Nos por imaginá Jesus i Pedro enbolbí den tal intercambionan diplomático? Jesus a nenga di ser hací rey dje hudiunan i a bisa cu su Reino no tabata dje mundu aki.—Juan 6:15; 18:36.

9. Pakico nos por bisa cu e cleronan protestant no ta mihó cu nan coleganan católico?

⁹ Lidernan protestant ta mihó cu nan coleganan católico? Na Merca, hopi religion protestant conservativo i mormonnan tambe, ta ser identificá cu un cierto orientacion político. E organisacion Coalicion Cristian ta profundamente enbolbí den política mericano. Otro cleronan protestant ta identificá nan mes claramente cu un posicion político diferente. Tin biaha hende ta lubidá cu na Merca, boceronan político manera Pat Robertson i Jesse Jackson ta of tabata tambe “reverendo,” manera e miembro británico di Parlamento, Ian Paisley, di Nort Irlanda ta. Con nan hamas por hustificá nan posicion?—Echonan 10:34, 35; Galationan 2:6.

10. Ki declaracion claro a ser hací na 1944?

¹⁰ Mescos cu e foyeto Religion Reaps the Whirlwind a puntra na 1944, asina nos ta puntra awor: “Cualkier organisacion cu ta cera convenio cu podernan di mundu i cu activamente ta maniobrá su mes den asuntunan político dje mundu aki, buscando bentaha den i proteccion for dje mundu aki . . . por ta e iglesia di Dios of por representá Cristo Jesus riba tera? . . . Obviamente, tur siguidor di religion cu ta compartí e mésun metanan cu e reinonan dje mundu aki no por representá e reino di Dios pa medio di Cristo Jesus.”

Religion Falsu Su Spiritu di Cain

11. Con religion falsu a sigui e ehempel di Cain?

¹¹ Atrabes di historia, religion falsu a demostrá e spiritu di ruman cu ta mata ruman cu Cain tabatin, kende a mata su ruman Abel. “E yunan di Dios i e yunan di Diabel ta keda bisto p’e echo aki: Tur cu no ta ocupá su mes cu husticia no ta originá cu Dios, ni tampoco esun cu no ta stima su ruman. Pasobra esaki ta e mensahe cu boso a tende desde principio, cu nos mester tin amor pa otro; no manera Cain, kende a originá cu e malbado i a mata su ruman. I pa causa di kico el a mat’é? Pasobra su mes obra tabata malu, pero esnan di su ruman tabata hustu.” Cain no a tolerá su ruman su adoracion puru i aceptabel na Dios, i el a recurí na violencia—e último recurso di esnan cu no por splica nan accionnan.—1 Juan 3:10-12.

12. Ki evidencia tin di religion su complicidad den guera i conflicto?

¹² Echonan ta apoyá e acusacion aki di religion falsu? Den e buki Preachers Present Arms [Predicador Ta Presentá Arma], e autor a bisa: “Den e historia di civilisacionnan, . . . dos forsa semper a uni huntu den un aliansa dualista. Nan ta guera i religion. I, di tur e religionnan grandi di mundu, . . . ningun tabata mas dedicá na [guera] cu [cristiandad].” Algun aña pasá, e corant The Sun di Vancouver, Cánada, a declará: “Ta un debilidad di tal bes tur religion organisá cu iglesia ta nacionalista . . . Cua guera hamas a ser bringá den cua cada un dje bandanan no a pretendé cu Dios ta cu nan?” Bo por a mira prueba di esaki den algun iglesia local. Demasiado biaha, banderanan nacional ta dorna e altar. Bou di cua bandera bo ta kere cu Jesus lo a marcha como soldat? Su palabranan a rezoná den transcurso di tur siglo: “Mi reino no ta parti dje mundu aki”!—Juan 18:36.

13. (a) Con religion falsu a fracasá na Africa? (b) Ki señal di identificacion pa cristianismo Jesus a duna?

¹³ E religionnan di cristiandad no a siña nan tounan e berdad di amor fraternal genuino. Na lugá di esei, nan ta permití diferencianan nacional, tribal i étnico dividí nan filanan. Informenan ta indicá cu cleronan católico i anglicano a hunga un papel importante den e divisionnan cu a resultá den e genocido di tribu na Ruanda. The New York Times a informá: “E masacrenan na Ruanda a pone hopi católico romano aya sinti nan traicioná dor di mando di iglesia. Iglesia hopi biaha tabata dividí den sentido étnico, entre e hutunan i e tutsinan.” E mésun corant a cita un pastor siguidor dje movimentu Maryknoll cu a bisa: “Iglesia a fracasá masha miserablemente na Ruanda na 1994. Hopi ruandes a pone den un sentido e iglesia un banda. E no tin ningun credibilidad mas.” Ki un contraste cu e palabranan di Jesus: “Cu esaki tur hende lo sa cu boso ta mi disipelnan, si boso tin amor entre boso mes.”—Juan 13:35.

14. Ki registro di conducta e religionnan principal no-cristian ta presentá?

¹⁴ E otro religionnan principal di Babilonia e Grandi no a pone un mihó ehempel. E masacrenan teribel di 1947, ora e tera di India a ser dividí, ta mustra cu e religionnan principal aya no a producí tolerancia. Violencia continuo den e pueblo na India ta confirmá cu mayoria hende no a cambia. Nada straño cu e revista India Today a concluí: “Religion tabata e lema bou di cua e crímennan di mas horibel a ser cometé. . . . E ta desencadená violencia tremendo i ta un forsa masha destructivo.”

“Contradiccion Notabel”

15. Con e estado di religion den e mundu occidental ta?

¹⁵ Asta comentaristanan seglar a tuma nota di religion su fracaso pa convencé, pa inculcá berdadero balornan i pa resistí e entrada di tendencia mundano. Den su buki Out of Control [Fuera di Control], ex-consehero di siguridad nacional Zbigniew Brzezinski a skirbi: “Ta un contradiccion notabel cu e victoria di mas grandi p’e proposicion cu ‘Dios ta morto’ a sosodé, no den e estadonan dominá pa marxismo . . . sino den e sociedadnan liberal democrático di occidente, cuanan pa via di cultura a alimentá apatia moral. Den e sociedadnan di occidente, echo ta cu religion a stop di ser un forsa principal social.” El a continuá: “E gara di religion riba cultura europeo a desvanecé mashá, i e Europa djawe—asta mas cu Merca—ta esencialmente un sociedad seglar.”

16, 17. (a) Ki conseho Jesus a duna relacioná cu e cleronan di su dia? (b) Ki principio excelente Jesus a expresá tocante fruta?

¹⁶ Kico Jesus a bisa tocante e cleronan hudiu di su dia? “E escribanan i e fariseonan a sinta den e asiento di Moises [pa siña e Tora, e Ley]. P’esei tur loke nan bisa boso, haci nan i warda nan, pero no haci segun nan obranan, pasobra nan ta bisa pero no ta haci.” Sí, hipocresia religioso no ta nada nobo.—Mateo 23:2, 3.

¹⁷ E fruta di religion falsu ta conden’é. E regla cu Jesus a duna ta masha aplicabel: “Tur bon palu ta producí fruta excelente, pero tur palu putrí ta producí fruta sin balor; un bon palu no por carga fruta sin balor, ni un palu putrí no por producí fruta excelente. Tur palu cu no ta producí fruta excelente ta ser cortá i tirá den candela. Realmente, anto, na nan fruta boso lo reconocé e hombernan ei.”—Mateo 7:17-20.

18. Con cristiandad mester a tene su filanan limpi?

¹⁸ Si e religionnan di cristiandad tabata conciensudo pa aplicá e disiplina cristian di scomulgacion, of expulsion, pa tur e obranan malu cu esnan cu ta pretendé di ta su miembronan a cometé, kico lo sosodé? Kico lo sosodé cu tur e gañadornan, fornicadornan, adúlteronan, homosexualnan, estafadornan, criminalnan, narcotraficantenan i adictonan, i miembronan di mafia no-repentí? Indudablemente, e fruta putrí di cristiandad ta hacié hechu solamente pa destruccion dor di Dios.—1 Corintionan 5:9-13; 2 Juan 10, 11.

19. Kico algun persona a admití en cuanto liderato religioso?

¹⁹ E asamblea general pa Iglesia Presbiteriano na Merca a admití: “Nos ta enfrentando un crísis di proporcionnan i implicacionnan teribel. . . . Entre 10 pa 23 porciento di cleronan den henter e nacion a haña nan enbolbí den conducta sexualmente sugestivo of contacto sexual cu parokianonan, clientenan, empleadonan, etc.” Un comerciante mericano a resumí e punto hopi bon: “Institucionnan religioso a faya na transmití nan balornan moral histórico, i den hopi caso, a bira parti dje problema.”

20, 21. (a) Con Jesus i Pablo a denunciá hipocresia? (b) Ki preguntanan ta resta pa ser contestá?

²⁰ Jesus su denunciacion di hipocresia religioso ta mes cierto awe cu e tabata den su tempu: “Hipócritanan, Isaías a profetisá aptamente tocante boso, ora el a bisa, ‘E pueblo aki ta onrá mi cu nan lipnan, pero nan curason ta masha leu fo’i mi. Ta en bano cu nan ta sigui adorá mi, pasobra nan ta siña mandamentu di hende como doctrina.’” (Mateo 15:7-9) E palabranan di Pablo na Tito tambe ta describí nos situacion moderno: “Nan ta declará públicamente cu nan conocé Dios, pero nan ta nengu’é cu nan obranan, pasobra nan ta detestabel i desobediente i no aprobá pa ningun bon obra.”—Tito 1:16.

²¹ Jesus a bisa cu si un ciegu guia un ciegu, tur dos lo cai den pos. (Mateo 15:14) Bo kier yega na un fin huntu cu Babilonia e Grandi? Of bo kier cana den camindanan stret cu bo wowonan habrí i disfrutá dje bendicion di Jehova? E preguntanan cu ta confrontá nos awor aki ta: Cua religion, si tin, ta producí fruta piadoso? Con nos por identificá e adoracion berdadero cu ta aceptabel pa Dios?—Salmo 119:105.

[Nota]

Bo Ta Corda?

◻ Kico ta e posicion actual di Babilonia e Grandi dilanti Dios?

◻ Riba ki base religion falsu ta ser acusá?

◻ Con religion falsu a desplegá e spiritu di Cain?

◻ Ki principio Jesus a expresá pa husga cualkier religion?

[Plachi na página 13]

Atrabes di historia lidernan religioso a entremeté den política

[Plachi na página 15]

E cleronan aki tabata tambe hombernan poderoso di estado

Cardenal Mazarin

Cardenal Richelieu

Cardenal Wolsey

[Plachi na página 15]

Cardenal Mazarin i Cardinal Richelieu: For dje buki Ridpath’s History of the World (Vol. VI i Vol. V respectivamente). Cardenal Wolsey: For dje buki The History of Protestantism (Vol. I).