Derecho di Pashent Ta Ser Respetá

‘Ta imposibel pa mi efectuá e operacion aki sin usa sanger. Si bo kier haci e operacion, lo bo tin cu bai di acuerdo cu mi método di tratamentu. Sino, lo bo tin cu busca un otro dokter.’

E DOKTER su palabranan no a sagudí e fe di Cheng Sae Joo, un Testigo di Jehova cu ta biba na Tailandia. Diagnosticá cu meningioma, un tipo di tumor celebral, Cheng tabatin cu ser operá urgentemente. Pero e tabata dicididu pa obedecé e mandamentu bíblico: “Sigui abstené . . . di sanger.”—Echonan 15:28, 29.

Cheng a bishitá dos otro hospital, prefiriendo di ser tratá den su mes pais si ta posibel. Pa su decepcion, dokternan einan tambe a nenga di efectuá e operacion sin usa sanger. Finalmente, Cheng a ser poné den contacto cu e Colegio Médico pa Hende Muher dje Instituto Neurológico di Tokio [na Hapon] via e Servicio di Informacion di Hospital (SIH) na Tailandia. E hospital ei a trata mas cu 200 pashent cu tumor celebral usando e cuchú di rayo gamma, un dje desaroyonan mas nobo den terapia di radiacion.

Areglonan a ser hací pa Cheng keda cerca Testigonan hapones bibando cerca dje hospital. Un grupo di Testigo a top’é na aeropuerto, incluyendo dos Testigo di Jehova cu ta papia tai i un representante di SIH. Despues di mas of ménos un siman di examinacion, Cheng a ser interná den hospital caminda el a ricibí tratamentu cu e cuchú di rayo gamma. E procedura a dura solamente rond di un ora. E siguiente dia Cheng a sali for di hospital, i dos dia despues e tabata na caminda di regreso pa Tailandia.

“Nunca mi a imaginá cu asina tantu yudansa lo por a ser percurá mediante e areglo aki,” Cheng a bisa. “Mi tabata realmente impresioná dor di e amor cu a ser mustrá i tambe dor dje cooperacion entre e diferente partidonan enbolbí.”

Informando dje noticia aki, e corant hapones Mainichi Shimbun a comentá: “Te cu awor, e motibunan religioso pa e nengamentu di transfusionnan di sanger a ser resaltá. Sin embargo, transfusionnan di sanger tin efectonan secundario manera AIDS, e rísico di infeccionnan viral manera hepatítis C i alergianan. Pa e motibu aki tin pashentnan cu no kier transfusion di sanger sin importá nan creencia religioso.”

E corant a sigui bisa: “Hopi pashent cu a nenga transfusion di sanger a ser obligá di cambia hospital, pero mester tin un cambio di parti dje institutonan médico pa mustra respet pa e decision dje pashent. Consentimentu informá (despues cu un pashent ta ricibí un splicacion completo di loke ta enbolbí e ora ei e ta bai di acuerdo cu e tratamentu) ta ser rekerí, i casonan di transfusion di sanger no ta ningun excepcion. Mester ser reconocé cu esaki no ta un cuestion cu ta enbolbé solamente un cierto religion.”

Mescos cu Cheng Sae Joo, hopi hende cu ta preferá tratamentu sin uso di sanger tin cu cambia pa otro hospital. No obstante, nan ta apreciá e esfuersonan di dokternan cu ta dispuesto pa respetá e derechonan di nan pashentnan.

Servicio di Informacion di Hospital a ser establecé dor di Testigonan di Jehova den sucursalnan di Sociedad Watch Tower pa busca e cooperacion di dokternan cu ta respetá nan creencianan. Rond mundu, SIH ta desaroyá relacionnan cooperativo cu hospitalnan, dokternan, trahadornan di cuido di salú, abogadonan i huesnan.