Plamando e Berdad di Bijbel na Portugal

FOR di Caminha den nort te na Vila Real de Santo Antônio den zuid, miles di botonan di piscadó colorido ta dorna e 800 kilometer dje Costa Atlántico di Portugal. Pa hopi siglo piscadónan a ‘baha na laman den nan barcunan,’ haciendo piscá e cuminda principal di hopi portugues.—Salmo 107:23.

Den e último 70 añanan, un otro tipo di piscamentu a bin ta tuma lugá na Portugal. Testigonan di Jehova tabata ocupá hibando e bon nobo na dies di miles di piscánan simbólico. (Mateo 4:19) Na mei 1995 tabatin un máximo di 44.650 publicador di Reino—un proporcion di 1 pa rond di 210 habitante. Den algun stad e proporcion ta mitar di esei.

Cu asina tantu trahador, e teritorionan di duna testimonio den hopi área ta ser cubrí mas of ménos tur siman. Pues e Testigonan portugues ta masha alerto pa usa diferente manera di abordá hende afin di compartí nan speransa di Bijbel cu otronan. Sí, nan ta apreciá e importancia di haci e berdad bíblico conocí den tur manera posibel.—1 Corintionan 9:20-23.

Yudando Esnan Religiosamente Incliná

Di acuerdo cu un censo di 1991, 70 porciento di esnan riba 18 aña di edad na Portugal ta profesá di ta católico romano. Apesar di esaki, tin masha poco conocimentu di Bijbel entre e pueblo. E corant Jornal de Notícias a comentá: “Esaki ta un dje tragedianan mas grandi dje mundu católico: Ignorancia dje Bijbel!” Pakico esaki ta e caso? E corant portugues Expresso ta señalá n’e contesta. Informando di un reunion di 500 pastor na Fátima, e corant ta bisa: “Di acuerdo cu e prelado, ta necesario pa e pastor libra su mes di un cantidad incontabel di actividadnan cu ta fuera di su deber, di manera cu e por reestablecé su posicion exclusivamente como un ‘proclamador.’ . . . Si e pastor traha di henter alma den e predicacion dje Evangelio, lo e no tin tempu pa ningun otro actividad.”

Na contraste cu esei, Testigonan di Jehova na Portugal ta ocupá haciendo e berdad di Bijbel conocí den tur manera posibel. Como resultado, hopi católico sincero ta hañando conocimentu di Bijbel.

Carlota tabata un católico deboto i un miembro di un grupo di hóben den un órden religioso. Tambe e tabata un maestra di kleuterschool na unda Antônio, un Testigo, tabata traha. Como un pionero regular, esta un minister di tempu completo, Antônio semper tabata haci esfuerso pa papia cu su coleganan tocante e Bijbel durante pausanan di merdia. Un dia Carlota a puntr’é tocante creencia den fiernu di candela i e adoracion di Maria. Antônio a mustr’é loke Bijbel ta siña tocante e temanan aki, i esei tabata e comienso di hopi consideracionnan bíblico. Ora Carlota a asistí na su promé reunion na e Salon di Reino local, el a keda masha impresioná. Sin embargo, e oranan di reunion tabata choca cu esnan dje ordu religioso na cua e tabata pertenecé. El a realisá cu e tabatin cu tuma un decision. Kico lo e haci?

Carlota a reuní henter e grupo di hóbennan i a splica nan for dje Bijbel pakico e tabata renunciando. Tur a criticá su decision, cu excepcion di un mucha muher yong yamá Stela, kende a scucha cu masha atencion. Ora Carlota a papia cuné mas despues, Stela a hacié hopi pregunta tocante e orígen i e propósito di bida. Carlota a dun’é e buki La vida... ¿cómo se presentó aquí? ¿Por evolución, o por creación?a i a cuminsá un studio di Bijbel cuné.

Entretantu Carlota a haci excelente progreso spiritual, a ser bautisá na juni 1991, i a cuminsá sirbi como un pionero regular seis luna despues. Na mei 1992, e i Antônio a casa, siguiendo den e sirbishi di pionero huntu den un congregacion bisiña unda tin un necesidad mas grandi. I Stela? El a bautisá na mei 1993 i ta sirbi awor como un pionero regular.

E hóben Francisco tabata masha religioso. Tur diadomingo e tabata asistí na sacrificio di misa mainta i na resamentu di rosario atardi. E tabata sirbi como sacristan, yudando e pastor durante e sacrificio di misa. E tabata asta resa na Dios pa e bira un “santu” un dia!

Francisco tabatin masha gana mes di tin un Bijbel, i un dia un amigu a dun’é unu. El a keda sorprendí pa haña sa cu Dios tin un nomber, Jehova. (Exodo 6:3; Salmo 83:18) Ora el a lesa na Exodo 20:4, 5 cu Dios ta prohibí e uso di imágennan den adoracion, el a keda mas sorprendí ainda! Mirando cu e misa tabata yen di imágennan, el a resa fervientemente na Dios pa yud’é comprendé tur e confusion aki. Vários dia despues el a topa cu un colega di scol di ántes i a puntr’é pakico el a stop di bai scol di anochi.

“Mi ta asistiendo na un mihó scol di anochi awor,” su amigu a contestá.

“Cua scol esei ta, i kico bo ta studiando?” Francisco a puntra. E contesta dje amigu a bini henteramente como un sorpresa.

“Mi ta studiando e Bijbel na e Salon di Reino di Testigonan di Jehova,” e amigu a bis’é. “Lo bo tin gana di bini cu mi?”

Francisco casi no por a kere loke el a mira na su promé reunion—caranan felis i sonriente; hendenan papiando cu otro den un manera caluroso i amical; muchanan sintando huntu cu nan mayornan i prestando atencion na loke tabata ser bisá.

“Atá mi aki, un persona completamente straño, i mi a sintí mi como parti di e famia!” Francisco a sclama. Desde e tempu ei el a asistí na e reunionnan regularmente. Awor Francisco ta sirbi como un anciano den e congregacion, i huntu cu su casá i dos yunan, e ta alegrá den e magnífico promesanan di Reino pará den e Palabra di Dios.

Compartiendo e Berdad cu Parientenan

Manuela, un pionero regular den e área di Lísabon, tabatin un pesca abundante di piscánan spiritual debí na su perseverancia den duna testimonio di un manera bondadoso na tur hende, incluyendo su parientenan. Entre nan tabatin su ruman homber carnal, José Eduardo, cu tabata entrená den artenan marcial i den e uso di armanan. El a kibra ley asina tantu biaha cu finalmente el a ser hibá na huicio pa 22 delitu i sentenciá na 20 aña di prizon. E tabata asina violento cu asta co-prizoneronan tabatin miedu di dje, i el a ser tené den un cel di alta seguridad.

Cu pacenshi Manuela a bishitá José Eduardo pa siete aña, pero semper e tabata rechasá Manuela su mensahe di Bijbel. Finalmente, ora e buki La vida... ¿cómo se presentó aquí? ¿Por evolución, o por creación? a ser publicá, José Eduardo a acept’é i a cuminsá un studio di Bijbel. Di biaha el a haci cambionan tremendo den su conducta. Un siman despues el a duna un testimonio personal na 200 prizonero, i e siguiente siman na 600 mas. El a asta haña permiso pa bishitá e co-prizoneronan den un otro blok dje prizon. Debí n’e cambio remarcabel den su comportacion, e sentencia a ser reducí na 15 aña. Despues di a cumpli 10 aña den prizon, el a ser poní den libertad condicional. Desde e tempu ei cincu aña a pasa, i awor José Eduardo ta un Testigo di Jehova bautisá, sirbiendo como un sirbidor ministerial den e congregacion local. Berdaderamente un caso di ‘e lobo bibando cu e lamchi’!—Isaías 11:6.

Debí na su esfuerso continuo pa duna testimonio na su famia, Manuela tabatin e goso di yuda su casá i cuater otro miembro di su famia bira activo den Jehova su sirbishi. Su casá ta awor un sirbidor ministerial.

“Lo Mi Core cu Nan cu Skop i cu Zwiep”

Maria do Carmo tabata biba den un suburbio di Lísabon ora e Testigonan a yama na su porta. El a gusta loke el a tende i a puntra su casá, Antônio, si e por a haña un studio di Bijbel na cas. “No pensa mes riba dje!” el a contestá. “Si un dia mi haña Testigonan di Jehova den nos cas, lo mi core cu nan cu skop i cu zwiep.” Antônio, por cierto, tabata un instructor di karate i tabatin faha pretu te na di tres grado. Pues Maria do Carmo a dicidí di tene su studio di Bijbel otro caminda.

Mas despues, Antônio tabatin cu bai Inglatera pa un curso di ocho dia di karate, i Maria do Carmo cuidadosamente a empaketá den su maleta e publicacion Mi buki di relato bíblico.b Ya cu Antônio tabatin hopi tempu liber riba su biahe, el a lesa e buki. Riba e vuelo di regreso, un tormento a sagudí e avion violentamente, i e tabatin dificultad pa aterisá. Pa promé biaha den su bida, Antônio a haci oracion na Jehova.

Ora Antônio a yega cas, e Testigo cu tabata conducí e studio cu su casá a invit’é na un reunion. El a aceptá e invitacion i a haña cu tur hende tabata masha amabel. A haci areglonan pa un studio di Bijbel, i despues di poco tempu, Antônio tabata sa cu e mester a tuma algun decision. E resultadonan tabata cu el a stop di siña karate i a cuminsá siña su studiantenan con pa hiba un bida pacífico awor i pa semper. Un di nan, cu tambe tabatin faha pretu, ta awor un cristian bautisá.

Pa loke ta Antônio, el a bautisá na april di 1991. E dia despues di su bautismo, el a cuminsá sirbi como un pionero auxiliar. Seis luna despues el a cuminsá sirbi como un pionero regular, i pronto e tabata conducí 12 studio di Bijbel di cas. Na juli 1993 el a ser nombrá como sirbidor ministerial den e congregacion.

Den Teritorio Frecuentemente Trahá

Den hopi área dje pais, e teritorio ta ser trahá mas of ménos tur siman. Con e Testigonan ta hiba a cabo nan actividadnan di “pisca” di un manera productivo?

João ta purba papia cu tur hende den tur cas. Ora el a bishitá un señora, el a puntra si tin otronan bibando den e cas. E señora a contestá cu su casá i dos yu homber ta biba ei, pero cu lo no ta fácil pa papia cu nan siendo cu nan ta traha i tabata na cas solamente parti anochi. Pues João a continuá cu su dunamentu di testimonio i a bishitá otro hende den e área. Rond di un ora i mei despues, un homber a acerk’é.

“Bo a bisa cu bo kier a papia cu mi,” e homber a bisa João. “Por fabor, bisá mi kico bo kier.”

“Dispensá mi, pero mi no conocé bo,” João a contestá, siendo tumá pa sorpresa. “Ken bo ta?”

“Ami ta Antônio, i mi ta biba djis einan den e caya aki. Bo a bisa mi mama cu bo kier a papia cu e resto dje famia, pues mi a bin pa haña sa loke bo tabata kier.”

João a duna Antônio un testimonio cabal i a cuminsá un studio di Bijbel cuné. Despues dje di dos studio, Antônio a puntra si e studio por a ser tené dos bes pa siman. Den solamente cuater luna, el a uni cu João i a cuminsá predicá e bon nobo den su mes caya. Tres luna mas despues, el a ser bautisá. Recientemente su mama tambe a cuminsá studia e Bijbel. Ki importante ta pa purba papia cu tur e miembronan di famia den e ministerio!

Experencianan excitante asina ta mustra cu ainda tin hopi piscamentu spiritual pa haci den e awanan di Portugal. Jehova a bendicioná e Testigonan cu ta traha duru einan cu miles di studionan di Bijbel progresivo. Segun cu nan ta sigui busca mas i mas maneranan pa haci e berdad di Bijbel conocí na tur, e palabranan di apostel Pablo na e cristiannan di Filípos berdaderamente ta haña nan cumplimentu na Portugal awe: “Den tur manera . . . Cristo ta ser publicá.”—Filipensenan 1:18.

[Nota]

[Mapa na página 23]

(Pa e teksto den su formato kompleto, wak e publikashon)

SPAÑA

PORTUGAL

[Plachi na página 24]

Testigonan na Portugal ta probechá di tur oportunidad pa haci e berdad di Bijbel conocí