Pregunta di Lector

Efesionan 3:14, 15 ta bisa cu “tur famia den cielu i riba tera ta debe nan nomber na Dios.” Tin famianan den cielu, i tur famia humano ta haña nan nomber di un manera of otro for di Jehova?

No tin famianan den cielu manera tin riba tera, cu un tata, mama i yunan—tur relacioná cu otro den un manera carnal. (Lucas 24:39; 1 Corintionan 15:50) Jesus a indicá claramente cu angelnan no ta casa, i no tin nada cu ta duna idea cu di un manera of otro nan ta producí yunan.—Mateo 22:30.

Sin embargo, Bijbel ta papia den un manera figurativo di Jehova Dios como siendo casá cu su organisacion celestial; e ta casá den un sentido spiritual. (Isaias 54:5) E organisacion celestial ei ta producí yunan, tal como e angelnan. (Job 1:6; 2:1; 38:4-7) Den e sentido aki, anto, ta existí un famia spiritual maraviyoso den cielu.

Ademas, un famia figurativo nobo ta desaroyando den cielu, consistiendo di Jesucristo i su bruid formá pa un congregacion di 144.000 persona. (2 Corintionan 11:2) Mayoria di e ungínan aki a muri caba, cu bida celestial na mira. Algun ta na bida ainda riba tera. Tur ta spera ansiosamente riba e “matrimonio dje Lamchi” den cielu. Bijbel ta conectá e matrimonio ei cu e tempu die binidero tribulacion grandi—e destruccion di Babilonia e Grandi, i despues e eliminacion dje resto dje sistema di Satanas.—Revelacion 18:2-5; 19:2, 7, 11-21; Mateo 24:21.

En cuanto famianan terenal, apostel Pablo no ta indicando na Efesionan 3:15 cu tur grupo di famia individual ta haña su nomber directamente for di Jehova. Mas bien,Pablo evidentemente tin na mente liñanan extenso di famia cu ta preservá un nomber. Hosué 7:16-19 ta duna un ehempel. Ei Jehova tabata sacando na cla e picá di Acan. Na principio, e culpa a ser enfocá riba of limita n’e tribu di Huda. Djei el a ser reducí n’e famia dje zerahitanan. Finalmente e famia di Acan a ser exponé. Nan a considerá, of papia di Acan como parti dje cas (of, famia) di Zabdi, tawela di Acan. E famia ei, en buelta, tabata e grupo extendí cu a preservá e nomber di nan antepasado Zerah.

Entre e hebreonan, tal liñanan di famia tabata di gran importancia, hopi siendo mencioná den Bijbel. Dios a sostené nan preservacion dor di percurá, caminda tabata necesario, pa herederonan continua e nomber dje famia mediante e matrimonio levirato, of di sua.—Génesis 38:8, 9; Deuteronomio 25:5, 6.

Como un otro ehempel di tal famianan mas grandi of extendé, considera Jesus como e yu di David. Obviamente e no tabata e desendiente directo di Rey David, siendo cu el a nace siglonan despues dje morto di David. Sin embargo, un marca di identificacion dje Mesías tabata cu e mester tabata die famia di David, manera e hudiunan por lo general tabata sa. (Mateo 22:42) Jesus tabata den e liña di David mediante tantu su mama como su tata di criansa.—Mateo 1:1; Lucas 2:4.

Pero con famianan asina ta hañia nan nomber for di Jehova? Echo ta cu tabatin un par di ocasion—manera den e caso di Abraham i Isaac—ora Jehova literalmente a nombra un cabes di famia. (Génesis 17:5, 19) Eseinan tabata excepcionnan. Por lo general, Jehova no ta duna cada famia individual e nomber cu e ta pasa over n’e yunan.

Sin embargo, ta Jehova a originá e unidad di famia humano ora el a manda Adam i Eva pa “ser fructifero i bira hopi i yena e tera.” (Génesis 1:28) I Jehova a permiti Adam i Eva imperfecto producí yunan, poniendo asina e fundeshi pa tur famia humano. (Génesis 5:3) Pues den mas cu un sentido, Dios por ser yamá e Originador di nombernan di famia.

Hopi cultura awe no ta sinti e necesidad mas pa mantené nombernan di famia bibu pa generacionnan. No obstante, den tur pais cristiannan ta gradici Jehova p’e areglo di famia i ta onr’E dor di traha duru pa haci nan unidad individual di famia un éxito.