Un Victoria Legal Remarcabel

DEN april di 1995, un victoria di corte importante a ser ganá. Tur cos a cuminsá dia 28 di januari, 1992, ora Luz Nereida Acevedo Quiles, di 24 aña, a ser interná den Hospital El Buen Pastor na Puerto Rico pa un operacion necesario pero no indispensabel pa sobrebibencia. Ora el a ser interná, el a bisa tantu verbalmentecomo por escrito cu como un Testigo di Jehova, lo e no aceptá un transfusion di sanger. (Echonan 15:28, 29) E personal dje hospital enbolbí, incluyendo e dokter cu a trat’é, tabata bon na altura di su deseonan.

Dos dia despues di su operacion, Luz a perde un cantidad excesivo di sanger i a desaroyá anemia agudo debí na hemoragia [sangramentu profuso]. E dokter cu tabata atendiendo, Dr. José Rodriguez Rodriguez, a haña cu e único manera pa yud’é tabata dor di duna un transfusion di sanger. P’esei, sin conocimentu of consentimentu di Luz, el a busca un órden di corte pa duna Luz transfusion.

Aunke Luz tabata completamente conciente i capas pa papia pa su mes, Dr. Rodriguez Rodriguez a insistí cu debi na urgencia dje caso, no tabatin tempu pa haña ningun hende su consentimentu. E procurador dje districto, Eduardo Pérez Soto, a firma e formulario i e hues dje districto, onorabel Angel Luis Rodriguez Ramos, a emití un órden di corte p’e transfusion di sanger.

Pues, dia 31 di januari, 1992, Luz a ser hibá n’e kamber di operacion, unda el a ricibí transfusion. Durante e transfusion, el a tende algun miembro di personal dje hospital ta hari. Otronan a haci mofa di dje, bisando cu loke tabata ser haci cuné tabata pa su mes bon. El a lucha te caminda e tabata por—completamente en bano. Na fin dje dia, Luz a ricibí cuater unidad di sanger.

E caso di Luz no tabata e promé ni e último cu ta enbolbé transfusion di sanger Testigonan di Jehova na Puerto Rico. Promé cu su experencia, por lo ménos 15 órden di corte a ser emití pa transfusion di sanger contra e deseonan di Testigonan di Jehova adulto, i mas a ser emití desde e tempu ei. Trágicamente, den un caso e órden di corte a ser efectuá, i un transfusion di sanger a ser forsá riba un pashent miéntras e tabata inconciente.

Sin embargo, Luz su bataya no a terminá den e kamber di operacion. Den october di 1993 el a entamá un caso hudicial contra e Estado Autónomo di Puerto Rico. E Corte Superior a tende e caso, i dia 18 di april, 1995, nan a yega na un decision na su fabor. E corte a declará cu e órden pa duna transfusion di sanger tabata “inconstitucional i a priva e demandante di su derecho di ehercisio liber di religion, su privacidad i su autodeterminacion físico sin cu e proceso di ley a ser siguí debidamente.”

E decision aki tabata significante, pasobra tabata pa promé bes cu un corte na Puerto Rico a dicta fayo na fabor di Testigonan di Jehova den un caso relacioná cu transfusion di sanger. E huicio a causa un tremendo reaccion. Un conferencia di prensa a ser tené, cu e periodistanan principal di corant, radio i television presente.

E mésun anochi ei un programa radial a transmití un entrevista cu un di Luz su abogadonan. E oyentenan a ser invitá pa yama i haci pregunta. Hopi dokter i abogado a yama i a expresá nan reaccion faborabel riba e caso. Un oyente cu a yama a bisa: “Ciencia no tabata capas pa comprobá cu un transfusion di sanger lo salba bida, i ta un ekibocacion pa pensa asina.” Tambe el a declará: “Pronto, transfusionnan di sanger lo ser registrá den historia como un dje erornan i fayonan di mas grandi di medicina moderno.”

Un profesor den ley altamente respetá mas despues a yama e oficina di sucursal dje Sociedad Watch Tower i a expresá su satisfaccion profundo cu loke el a yama “un victoria resonante.” El a agregá cu e decision di corte ta apoyá e derechonan constitucional, no di Testigonan di Jehova so, sino di tur ciudadano di Puerto Rico.