Mira! Un Salon Di Reino Na Niue
NIUE ta un isla chikitu formá pa coral den Sur Pacífico, 2.160 kilometer nortoost di Nueva Zelandia. Segun un foyeto di biahe, e nomber Niue ta bini for di dos palabra, Niu, cu ta nificá “palu di coco,” i e, cu ta nificá “contemplá” of “mira.” E foyeto ta bisa: “Segun leyenda e promé colonisadornan polinesio a expresá e palabranan aki na nan yegada ora nan a mira e palunan di coco cu ta crece riba e tera.”
Awe, Testigonan di Jehova na Niue ta orguyoso pa bisa bishitantenan, “E! Fale he Kautu ha mautolu!” cu ta nificá, “Mira! Nos Salon di Reino!” Pakico nan tin un sintimentu asina profundo pa cu e salon aki? Testigonan di Jehova na tur parti ta orguyoso di nan Salon di Reino, specialmente si nan mes a construy’é. Pero pa construí un Salon di Reino riba un isla remoto meimei dje inmenso Laman Sur Pacífico ta un asuntu basta diferente. Al fin i al cabo, Niue tin un tamaño di solamente 260 kilometer cuadrá, i tin solamente 2.300 hende riba henter e isla.
Tabatin e cuestion di ken lo construí e Salon di Reino. E único congregacion na Niue tin solamente 32 Testigo. Tur e ekipo principal necesario, manera truk, ‘bulldozer’ i kraan, ta di gobiernu. Ademas, prácticamente tur e materialnan esencial di construccion—staal, bloki, material pa dak, instalacion eléctrico i sanitario, ekipo di zonidu, i stulnan—lo mester a ser importá for di Nueva Zelandia riba un barcu cu ta nabegá pa Niue solamente un biaha cada cincu siman. Finalmente, e isla su superficie di baranca lo a haci construccion difícil, i e salon lo mester a ser construí pa resistí horcan tropical. En berdad, un tarea formidabel pa cualkier hende!
Sin embargo, tabatin un diferencia principal aki. Pa Testigonan di Jehova, un Salon di Reino ta e centro di adoracion berdadero localmente, i nan ta acudí na Jehova Dios pa guia i yudansa. (Salmo 56:11; 127:1) Rumannan cristian na Nueva Zelandia, incluyendo miembronan di un congregacion niueano na Auckland, a bini pa yuda e grupo chikitu di Testigonan na Niue, apoyando di henter alma e proyecto di construccion.
E Decision pa Dal Bai
Na juni di 1994 na un sitio unda un Salon di Reino tabata den construccion na Rotorua, Nueva Zelandia, a sali un invitacion pa esnan interesá pa participá den e proyecto di Niue. Asombrosamente, 200 ruman cristian a ofrecé nan mes. Di esakinan, 80 a ser selectá, incluyendo carpinté, trahadornan cu ta traha cu staal, loodgieter, metsla, ferfdó, electrishen, técnico di zonidu i peon.
E rumannan a traha ‘tekening’ i a dal bai, confiando den Jehova. Un dje dos ancianonan di congregacion na Niue, un comerciante local, a cuminsá cu e areglonan pa importá tur e materialnan necesario. Un pakete special di biahe i estadia a ser negoshá p’e trahadornan stranhero, kendenan a ofrecé pa cubri nan mes gastunan, i e fechanan di construccion a ser fihá. E proyecto mester a ser completá den 20 dia, for di 4 pa 23 di mart, 1995, ora e Salon di Reino lo a ser dedicá.
“E promé atake di pánico cu mi a yega di haña tabata ora mi a wak e sitio,” e director dje proyecto a bisa, kende a bini for di Nueva Zelandia un siman adelantá pa prepará cosnan. “E tereno ta baranca so. Lo tuma dos siman pa djis coba e fundeshi.” Pero el a admití despues cu el a balotá e Testigonan local. “E rumannan niueano conocé e composicion dje barancanan,” el a bisa. “Nan sa unda pa dal un baranca di manera cu pidanan grandi ta kita cai.” E cobamentu di fundeshi a ser completá den dos dia!
Dia 4 di mart e promé avion yen di Testigonan di Nueva Zelandia a yega, i a completá e trabou di pone fundeshi. Segun cu gruponan sucesivo di trahadornan a bini, vários fase dje proyecto a keda completá. Dianan di trabou tabata cuminsá 7:00 a.m. cu un consideracion breve dje texto bíblico diario. Algun ruman a traha hornadanan di 12 ora largu den temperaturanan cu tabata subi yega te 36° Celsio. Finalmente, pa dia 23 di mart, a planta mata riba e tereno. Un borchi atractivo trahá di palu di mango a identificá e edificio como e “Salon di Reino di Testigonan di Jehova.”
Spiritu di Cooperacion i Hospitalidad
Un factor vital cu a contribuí n’e éxito dje proyecto tabata e cooperacion dje pueblo di Niue. E habitantenan local dje pueblo, contagiá p’e spiritu dje rumannan, a haci donacion di cuminda i placa. Hopi a mira e construccion di salon como nan proyecto. Funcionarionan di gobiernu i comerciantenan a rindi servicionan cu tabata mas di loke a ser sperá for di nan. Ekipo necesario a ser hací disponibel, i tambe un carpinteria. E compania di transporte marítimo a asta cambia e ruta di su barcu pa haci sigur cu e materialnan necesario lo a yega net na tempu.
E bishitantenan berdaderamente a apreciá e trabou duru i hospitalidad dje Testigonan niueano, kendenan a compartí nan cas i posesionnan. “E ruman muhernan local tabata maraviyoso,” un trahador di construccion a bisa. Ademas dje cuminda cayente di tur merdia, e ruman muhernan a sirbi un desayuno cushiná tur mainta 6:30 a.m. Algun a lanta 4:30 a.m. pa prepará e cuminda. Un trahador di construccion a bisa: “Mi ta kere cu nos tin mihó condicionnan di bida aki na Niue cu nos tin den nos propio cas.”
Dia 10 di mart e corant Niue Star a informá dje acontecimentu den un relato riba promé página cu e titular “E Promé Salon di Reino na Niue” i un potret di rumannan di Nueva Zelandia i di Niue trahando n’e sitio. El a relatá cu e tamaño dje salon ta 280 meter cuadrá i ta duna asiento na 70 pa 100 hende. E artículo a agregá: “E tarea en realidad por ser completá den dos [siman], pero den e caso aki lo e ser extendé. N’e etapa aki, solamente dos dia despues cu e trabou a cuminsá, e fundeshi, erantenan, spannan i dak a ser lantá, hopi delantá riba e skema.”
Un comerciante local a expresá e deseo pa tur hende dje Isla di Niue wak e proyecto i siña un les for di dje. El a bisa cu e ta spera cu e proyecto lo mustra tur hende loke por ser hací cu amor i cooperacion.
Un multitud di 204 persona a bini n’e dedicacion. Loke a resultá di ta un experencia masha conmovedor pa tur hende cu a asistí tabata un presentacion special den cua e ruman hombernan, muhernan i muchanan niueano a describí cu cantica i baile e construccion dje Salon di Reino. Expresionnan di gratitud a bai n’e tim di construccion i na Jehova, kende su spiritu a move mente, curason i mannan pa logra e tarea.—Isaías 40:28-31.