Testigonan di Jehova Rond Mundu—India

INDIA! Un di cada 6 hende riba e planeta aki ta biba riba e inmenso subcontinente aki. Na tur, mas cu 1.000 idioma i dialecto ta ser papiá den e pais aki di variedad di hende i idioma. E hendenan ta predominantemente hindú, 83 porciento di nan, miéntras cu 11 porciento ta moslim, cu e sobrá consistiendo di sikh, budista, haino i cristiannan nominal.

Testigonan di Jehova a bin ta disfrutá di éxito sobresaliente na India den añanan recien. Nan a haña hende semehante di carné cu ta dispuesto pa tuma un posicion firme na banda di Jehova su Reino, apesar di tur forma di presion i oposicion.

Por ehempel, un mucha muher di un famia hindú ortodox a bira mancaron dor di polio for di chikitu. E sufrimentu cu el a pasa dor di dje a pon’é pensa tocante Dios i e propósito di bida. El a examiná hopi religion pa haña un contesta pero no a haña ningun consuelo. Como resultado, el a perde su fe den religion, maske no den Dios.

Rond dje tempu aki dos Testigo a topa e mucha muher aki den nan ministerio di cas-pa-cas. “Mi a ser conmoví te yora ora mi a tende nan lesa Revelacion 21:4,” e ta corda. El a aceptá hopi dje publicacionnan di Sociedad Watch Tower i a bai di acuerdo pa un studio di Bijbel na cas apesar di oposicion di su mama. E mucha muher a haci hopi cambio den su bida, cu curashi a enfrentá oposicion di famianan i a bira un Testigo bautisá. E ta bisa: “Mi a progresá hopi i e tabata un proceso difícil. Pero Jehova Dios semper tabata huntu cu mi i a duná mi gran pas i goso.”

Firme pa Adoracion Puru na Scol

Un maestra a pidi un ruman muher hóben pa bai un misa católico huntu cu e resto di su klas. E ruman muher cu cortesia a nenga, bisando cu e tabata un Testigo di Jehova i lo no a adorá ningun otro persona of cos cu no ta Jehova. E maestra a bisa cu ora tur e otro alumnonan a bai misa, e ruman muher tambe mester bai. Pero e ruman muher a para firme i a bisa cu ya cu esnan cu ta bayendo misa lo no ta resando na Jehova, e tabata sa cu e no por ta presente einan.

Debí n’e posicion firme dje mucha muher, su maestra kier a sa mas tocante su creencia. P’esei e siguiente dia e ruman muher a dun’é un artículo di Toren di Vigilancia en cuanto adoracion di Jehova. Impresioná dor di loke el a lesa, e maestra e ora ei a dispens’é di tur actividad religioso na scol. E ruman muher a haña chens di laga dies revista cu e maestra ei i e otro maestronan.

Obedencia na e Ley di Dios Relacioná cu Sanger A Ser Recompensá

Recientemente un keintura causá dor di un vírus a explotá den forma di epidemia den algun parti dje estado di Kerala. E malesa aki ta daña e nirnan severamente i ta pone cu bo mester haci diálisis. Transfusionnan di sanger ta ser administrá generalmente. Den un stad 14 hende a drenta hospital cu e malesa aki. Un dje pashentnan aki tabata un Testigo, un anciano den e congregacion local. Nan a bis’é cu transfusion di sanger tabata e único tratamentu disponibel. E anciano a splica su creencianan bíblico i firmemente a nenga sanger. (Echonan 15:28, 29) Despues di hopi discusion e dokternan a bisa cu lo e muri debí na su rechaso di un transfusion di sanger.

E otro 13 pashentnan a ricibí sanger. Trágicamente, nan tur a muri dentro di un par di dia. E ruman tabata e único sobrebibiente! Autoridadnan di hospital tabata masha sorprendí. E personal médico tabata sumamente impresioná dor dje bishitanan regular cu miembronan dje congregacion tabata haci. Despues cu e por a bai cas, e ruman a bai gradicí e dokternan, pero nan a bisa: “Pakico bo ta gradicí nos? Gradicí bo Dios, Jehova. E ta Esun cu a salbá bo. Por fabor haci oracion pa nos tambe na bo Dios, Jehova.”

[Kuadro na página 24]

DETAYENAN DJE PAIS

Aña di Sirbishi di 1994

MAXIMO CANTIDAD DI PUBLICADOR: 14.271

PROPORCION: 1 Testigo pa 65.266

ASISTENCIA NA MEMORIAL: 38.192

PROMEDIO DI PUBLICADOR PIONERO: 1.780

PROMEDIO DI STUDIO DI BIJBEL: 12.453

CANTIDAD BAUTISA: 1.312

CANTIDAD DI CONGREGACION: 410

OFICINA DI SUCURSAL: LONAVLA

[Plachi na página 25]

Oficina di sucursal, Lonavla

[Plachi na página 25]

Testificando en coneccion cu e congreso “Bon Nobo Eterno” na 1963

[Plachi na página 25]

Predicando na un bendedó pafó di Forti Corá na Delhi