Informe di Proclamadornan di Reino

Cristiannan Berdadero Lo Ser Persiguí

DESDE e dianan di Abel, hopi sirbidor di Jehova a wanta persecucion religioso. (Lucas 11:49-51) I esei no ta straño, pasobra Bijbel ta spierta cu “tur esnan cu ta deseá na biba cu debocion piadoso den asociacion cu Cristo Jesus lo ser persiguí tambe”! (2 Timoteo 3:12) Di acuerdo cu esei, awe den mas cu 25 pais, Testigonan di Jehova ta bou di prohibicion i ta wanta persecucion.

Den un pais caminda Testigonan di Jehova no solamente ta bou di prohibicion pero tambe ta ser persiguí dor di fanáticonan religioso, mas cu 12.000 publicador dje bon nobo ta sigui traha celosamente, studiando Bijbel cu mas cu 15.000 hende. Naturalmente, nan trabou di predicacion ta ser hací cu discrecion. Generalmente, nan ta tene nan reunionnan cristian den casnan privá i nan ta cauteloso ora di invitá personanan interesá na tal reunionnan.

Recientemente e gobiernu a adoptá un actitud mas tolerante pa cu e Testigonan, kendenan awor ta haci hopi di nan trabou sin interferencia agresivo. Sin embargo, vários grupo religioso a usa nan influencia pa provocá problema.

Den un stad un multitud desordená i rabiá di aproximadamente 200 fanático religioso a marcha bai den direccion di un cas caminda rond di 50 Testigo di Jehova tabata teniendo un reunion di congregacion. Algun hende den e multitud desordená tabatin piedra den man gritando lemanan religioso. Nan intencion claro tabata pa atacá e Testigonan i vandalisá e cas. E lidernan religioso aparentemente a bin ta vigilá e reunionnan pa algun tempu caba i a spera p’e momento apropiado pa atacá. E multitud desordená tabata cla pa drenta e cas ora cu 15 polis a yega i a ordená e multitud pa plama. Esaki tabata un sorpresa pa e Testigonan, ya cu ningun di nan ni sikiera a haña chens pa notificá polis.

Sin embargo, na otro ocasionnan, e opositornan tabatin mas éxito. Vários Testigo a ser hibá dilanti corte, i sentenciá na castigu di prizon. Un caso den corte tabata pendiente pa vários aña i aparentemente e fiscalnan a perde interes den dje. Sin embargo, bou di instigacion di clero local, e asuntu a ser trecé bek na corte i e Testigo a haña un castigu di prizon.

Den un otro lugá un grupo di Testigo a reuní huntu den un cas privá pa conmemorá e Cena di Señor. Mas despues e anochi ei vários polis a arestá e doño di cas i e anciano cu a conducí e reunion. Na e warda di polis, nan a ser golpiá severamente. Un interogacion brutal a dura pa vários ora. Un dje Testigonan tambe a wanta e tortura di ser tirá den un pos di awa friu.

Pakico polis tabata efectuá tal atake? Atrobe, un grupo di fanático religioso, cu yudansa di e clero local, tabata tras dje accion policial. Despues e hefe di polis a revelá cu e arestonan a ser haci sin su consentimentu. Nan a expresá disculpa i e individuonan responsabel pa e golpiamentu a ser disipliná.

Rond mundu Testigonan di Jehova ta sigui predicá e bon nobo dje Reino di Dios, asta ora nan confrontá oposicion violento. Nan ta sigui e conseho di Jesus: “Mira! Mi ta mandando boso manera carnénan meimei di lobonan; p’esei demostrá di ser cauteloso manera colebra i tog inocente manera palomba.”—Mateo 10:16.

[Plachi na página 31]

Abel tabata e promé cu a ser persiguí