Bo Por Pasa dor dje Bareranan Aki!

UN JUMBO jet por tuma cientos di pasahero i hopi ton di carga a bordo. Con un avion asina pisá por lanta for di suela? Simplemente, pa medio di e forsa di elevacion.

Ora e aeroplano ta aumentá su velocidad riba e pista, e aire ta pasa lihé ariba i abou dje alanan cu curva. Esaki ta producí un forsa di elevacion cu ta oponé e forsa di gravedad i cu ta duna e avion un tendencia di subi. Ora e avion generá suficiente forsa di elevacion, e por lanta for di suela i bula. Naturalmente, un avion demasiado cargá no por generá suficiente forsa di elevacion pa bula.

Nos tambe por bira demasiado cargá. Hopi siglo pasá, Rey David a bisa cu su ‘erornan tabata manera un carga muchu pisá p’e.’ (Salmo 38:4) Di igual manera, Jesucristo a spierta contra bira cargá cu e ansiedadnan di bida. (Lucas 21:34) Pensamentu i sintimentunan negativo por pisa manera un carga riba nos te n’e grado cu por parce difícil pa “lanta for di suela.” Abo ta sobrecargá den e manera ei? Of bo a experenciá algun barera cu a strobá bo di sigui desaroyá spiritualmente? Si ta asina, kico por yudá bo?

Bo Ta Fadá?

Fastidia—un keho comun awe—por bira un barera mental, asta pa algun di Jehova su pueblo. Hóbennan specialmente tin e tendencia di descartá algun actividad como laf. Abo ta sinti asina tin biaha tocante reunionnan cristian? Si ta asina, kico bo por haci pa haci bo asistencia na reunion stimulante?

Enbolbé bo mes den e reunionnan ta e clave. Pablo a skirbi n’e hóben Timoteo: “Entrená bo mes cu debocion piadoso como bo meta. Pasobra entrenamentu corporal ta beneficioso pa un poco; pero debocion piadoso ta beneficioso pa tur cos, pasobra e ta encerá promesa dje bida djawor i di esun pa bini.” (1 Timoteo 4:7, 8) Un buki tocante condicion físico lo ta laf i di poco balor si nos no practicá e ehercicionan recomendá. Reunionnan cristian ta diseñá pa entrená nos mente i lo haci esei si nos prepará i participá. E enbolbimentu aki lo haci reunionnan mas recompensador i interesante.

En coneccion cu esaki, un muher cristian hóben yamá Mara a bisa: “Si mi no prepará p’e reunionnan, mi no ta disfrutá di nan. Sin embargo, ora mi prepará delantá, mi mente i mi curason ta mas receptivo. E reunionnan ta bira mas significativo, i mi ta anhelá pa duna comentario.”

Siña scucha tambe lo yuda. Scuchamentu na bon música ta fácil i placentero mesora. Pero no tur satisfaccion ta instantáneo. Nos ta saca satisfaccion for dje programa di reunion solamente si nos ta scucha atentamente na loke ta ser bisá. Un cristian yamá Rachel a observá: “Ora e orador no ta bibitu, mi mester concentrá masha tantu. E regla pa mi ta, ‘Ménos interesante e discurso ta, mas mi mester concentrá.’ . . . Mi ta presta atencion special n’e textonan, tratando na saca mas tantu posibel for di nan.” Nos mester disipliná nos mes, mescos cu Rachel, pa por scucha. E buki di Proverbionan ta bisa: “Mi yu, na mi sabiduria, O di berdad presta atencion. Na mi dicernimentu incliná bo oreanan.”—Proverbionan 5:1.

Cierto informacion cu ta ser presentá n’e reunionnan por ta un poco ripititivo. Esaki ta necesario! Tur sirbidor di Dios mester di recordatorio. E carni imperfecto, cu su inclinacionnan di sigui su mes caminda i su memoria defectuoso, mester di tur e yudansa cu e por haña. Apostel Pedro ‘tabata dispuesto pa recordá compañénan creyente di algun cos, aunke nan tabata sa nan i tabata firmemente establecí den e berdad.’ (2 Pedro 1:12) Jesus tambe a splica cu “tur instructor público . . . ta manera un homber, un doño di cas, cu ta saca for di su tesoro cos nobo i bieu.” (Mateo 13:52) Pues, aunke nos reunionnan ta presentá pensamentunan bíblico conocí, of ‘tesoronan bieu,’ semper tin algun ‘tesoro nobo’ pa deleitá nos.

Kedando determiná pa saca pleno probecho dje reunionnan por resultá den un berdadero forsa elevador spiritual. “Felis ta esnan conciente di nan necesidad spiritual [esnan cu ta limosnero p’e spiritu],” Jesus a bisa. (Mateo 5:3, nota) Un actitud asina pa cu alimento spiritual saludabel percurá na reunionnan lo core cu fastidia.—Mateo 24:45-47.

Desanimá dor di un Mal Ehempel?

Bo a ser trastorná dor dje conducta di un persona den bo congregacion? Tal bes bo a puntra bo mes, ‘Con un ruman por comportá su mes asina i ainda keda cu un bon reputacion?’ Pensamentunan asina por actua manera un barera mental, ciegando nos p’e balor dje compañerismo placentero cu nos por tin cu e pueblo di Dios.—Salmo 133:1.

Tal bes algun miembro dje congregacion na Colosa tabatin un problema similar. Pablo a spierta nan: “Sigui soportá un e otro i pordoná un e otro libremente si algun tin motibu pa keha contra otro.” (Colosensenan 3:13) Pablo a reconocé cu algun cristian colosense por a comportá nan mes malu i asina por a duna otronan un berdadero causa pa keha. Pues nos no mester ta indebidamente sorprendí si un di nos rumannan de bes en cuando ta falta den algun cualidad cristian. Jesus a duna conseho sano riba resolvé dificultadnan serio. (Mateo 5:23, 24; 18:15-17) Pero mayoria biaha, nos por simplemente soportá e limitacionnan di compañénan creyente i pordoná nan. (1 Pedro 4:8) Realmente, un actitud asina por ta pa nos mes beneficio i esun di otronan. Pakico esaki ta e caso?

“Perspicacia di un homber siguramente ta tarda su rabia, i ta bunita di su parti p’e pasa por haltu di falta,” Proverbionan 19:11 ta bisa. Ta cuantu mas mihó pa pordoná cu pa permití rabia i resentimentu cria pus! Salvador, un anciano conocí pa su spiritu amoroso, a bisa: “Ora un ruman tratá mi malu of bisa algu cu ta falta bondad, mi ta puntra mi mes: ‘Con mi por yuda mi ruman? Con mi por evitá di perde mi relacion precioso cuné?’ Semper mi ta conciente ki fácil ta pa bisa e cos incorecto. Ora un persona papia sin pensa, e solucion ideal lo ta p’e hala atras loke el a bisa i cuminsá tur di nobo atrobe. Pero esei ta imposibel, pues ami ta tuma e segundo mihó solucion i ignorá e comentario. Mi ta simplemente atribuy’é na un erupcion dje carni imperfecto mas bien cu un refleccion di mi ruman su berdadero personalidad.”

Bo por sinti cu esaki ta mas fácil pa bisa cu pa haci. Pero hopi ta dependé dje manera cu nos ta dirigí nos pensamentu. “Tur loke ta amabel, . . . sigui considerá e cosnan aki,” Pablo a consehá. (Filipensenan 4:8) “Amabel” literalmente ta nificá “inducí cariño.” Jehova kier pa nos considerá loke ta bon den hende, pa enfocá riba e cualidadnan cu ta inducí cariño en bes di resentimentu. E mes ta duna nos e ehempel supremo en coneccion cu esaki. E salmista a recordá nos di esaki, bisando: “Si ta eror ta loke bo ta vigilá, O Jah, O Jehova, ken lo por keda pará bo dilanti?”—Salmo 103:12; 130:3.

Ta cierto cu de bes en cuando e conducta di un ruman por ta decepcionante, pero e mayoria inmenso di nos co-adoradornan ta ehempelnan sublime di bida cristian. Si nos ta corda esaki, mescos cu David nos lo ta felis ‘pa elogiá Jehova den un gran manera i alab’é entre hopi pueblo.’—Salmo 109:30.

Ser un Testigo Ta Parce Muchu Difícil?

Lamentablemente, debí na un otro barera mental, algun no a cuminsá alabá Jehova ainda. Hopi hende homber cu no ta Testigo di Jehova ta percurá di un manera responsabel pa nan famia i asta ta apoyá nan esposanan den e ministerio cristian. Nan ta amigabel i por mustra interes den e congregacion, pero nan ta keda sin bira sirbidornan dedicá di Dios. Kico ta teniendo nan atras?

Un problema por ta cu e esposonan aki ta tuma nota dje actividad teocrático druk di nan esposanan i ta sinti cu ser un Testigo ta muchu exigente. Of posiblemente nan ta teme cu nan nunca lo por participá den e trabou di predicacion di cas pa cas. For di nan punto di bista, ta parce cu e responsabilidadnan ta hopi mas cu e bendicionnan. Pakico e ta un barera mental? Mayoria studiante di Bijbel ta siña i aplicá e berdad gradualmente. Pero esposonan incrédulo frecuentemente ta hopi conciente di tur e responsabilidadnan cristian promé cu nan a cultivá e motivacion pa aceptá nan.

Manuel, kende tabata den e situacion aki, ta splica: “Pa rond di dies aña, mi tabata compañá mi esposa n’e asambleanan i n’e reunionnan. Pa ta franco, mi tabata preferá e compania di Testigonan cu esun di hende dje mundu, i mi tabata contentu pa yuda nan ora mi tabata por. Mi tabata impresioná p’e amor cu a reina entre nan. Pero e idea di bai di cas pa cas tabata un obstáculo grandi pa mi, i mi tabatin miedu cu mi coleganan di trabou lo a haci bofon di mi.

“Mi esposa tabatin masha pacenshi cu mi i nunca a purba forsá mi studia Bijbel. Tantu e como e yunan a ‘predicá’ principalmente mediante nan bon ehempel. José, un anciano den e congregacion, tabatin un interes special den mi. Mi ta pensa cu tabata su animacion cu finalmente a hací mi cuminsá studia seriamente. Despues cu mi a ser bautisá, mi a realisá cu e obstáculonan tabata den mi mente mas cu tur otro cos. Unabes mi a dicidí pa sirbi Jehova, mi a experenciá su yudansa pa vence mi temornan.”

Con esposanan i ancianonan cristian por yuda esposonan manera Manuel vence nan barera mental? Un studio di Bijbel por edificá aprecio i un deseo pa haci e boluntad di Dios. En berdad, conocimentu bíblico bon desaroyá ta e base pa ehercé fe i haña confiansa den e speransa nos dilanti.—Romanonan 15:13.

Kico lo animá tal esposonan pa aceptá un studio di Bijbel? Hopi biaha, amistad cu un ruman empático den e congregacion por ta un factor decisivo. Tal bes un anciano of un otro ruman experenciá por cera conocí cu e esposo. Unabes un bon relacion ser establecé, tur loke cu e por tin mester ta pa un hende ofrecé pa studia cuné. (1 Corintionan 9:19-23) Miéntras tantu, e esposa cristian discreto por compartí un boca di palabra spiritual cu e esposo incrédulo, realisando cu e probablemente lo no reaccioná bou di presion.—Proverbionan 19:14.

Manera Manuel a siña for di experencia, unabes un persona gana fortalesa spiritual, obstáculonan manera ceru ta bira mas manera ceritunan di mol. Jehova ta yena cu vigor esnan cu ta deseá di sirbié. (Isaías 40:29-31) Cu e fortalesa di Dios i cu e apoyo di Testigonan maduro, bareranan por ser eliminá. Asina e trabou di cas-pa-cas por bira ménos desanimante i coleganan di trabou ménos intimidante, miéntras cu sirbishi di henter alma ta bira mas atractivo.—Isaías 51:12; Romanonan 10:10.

Manteniendo Impulso Padilanti

Ta posibel pa pasa dor di bareranan manera e tresnan cu nos a considerá. Ora un avion ta lanta, normalmente e máximo forsa di motor ta necesario i tambe e atencion completo dje tripulantenan. Durante despegue, e motor ta consumí hopi mas combustibel cu durante cualkier otro parti dje vuelo. Di igual manera, pa un persona libra su mes for di pensamentu i sintimentunan negativo, e ta rekerí máximo esfuerso i concentracion. E cuminsamentu por ta e etapa di mas difícil, miéntras cu progreso ta bira mas fácil unabes cu gana e impulso padilanti.—Compará cu 2 Pedro 1:10.

Progreso continuo ta ser mantené dor di haci caso mesora di animacion bíblico. (Salmo 119:60) Nos por ta sigur cu e congregacion lo kier yuda. (Galationan 6:2) Sin embargo, mas importante cu tur ta e sosten di Jehova Dios. Manera David a bisa, “bendicioná sea Jehova, kende diariamente ta hiba e carga pa nos.” (Salmo 68:19) Ora nos ta descargá nos mes den oracion, nos carga ta bira mas leve.

Tin biaha, un avion ta laga atras un mundu shinishi di awaceru, ta pasa dor di un capa di nubia, i ta bula drenta un cielu cla di solo briyante. Nos tambe por laga atras pensamentunan negativo. Cu yudansa divino, nos por pasa dor dje capa di nubia, na moda di papia, i gosa den e atmósfera briyante i felis di Jehova su famia mundial di adoradornan.

[Plachi na página 23]

Cu Jehova su yudansa, nos por pasa dor di bareranan mental