Pacenshi—Pakico E Ta Asina Scars?

EMILIO tabata den su 60 i picu.a El a bini Oahu (Hawai) pa un motibu tristu—pa dera su yu homber adulto. Miéntras e tabata canando den un caya ketu riba un ceritu i papiando cu algun amigu, Emilio a ser sorprendí pa un auto cu a bek sali cu gran velocidad for di e entrada di un cas pa subi caminda público. E auto casi a dal e, i debí na rabia i falta di pacenshi, Emilio a grita e shofer i a dal riba e auto cu su plant’i man. A sigui un discusion. Finalmente e shofer a pusha Emilio, kende a cai i dal su cabes riba e acera duru. Algun dia despues Emilio a muri debí n’e herida na su cabes. Ki un resultado tristu!

Nos ta biba den un mundu caminda pacenshi ta un cualidad masha scars. Mas i mas automobilista ta core auto cu exceso di velocidad. Otronan ta core peligrosamente cerca tras di otro auto cu ta coriendo n’e velocidad máximo. Tambe otronan atrobe ta zwai di un baan pa otro pasobra nan no por soportá core tras di un otro vehículo. Na cas, miembronan di famia ta duna rienda liber na atakenan di rabia i ta bira violento. Asta algun cristian por bira demasiado agitá debí n’e debilidad of faltanan di nan rumannan spiritual.

Pakico pacenshi ta asina scars? Semper e tabata asina? Pakico ta asina difícil pa mustra pacenshi den nos tempu?

Ehempelnan di Falta di Pacenshi

Bijbel ta papia di un muher cu no kier a spera pa consultá cu su esposo promé cu el a tuma un decision crítico. Su nomber tabata Eva. Pasando por haltu di Adam, tal bes parcialmente debí na falta di pacenshi, el a come e fruta prohibí. (Génesis 3:1-6) Kico di su esposo? E tambe kisas a manifestá falta di pacenshi dor di sigui Eva den picá sin acercá promé su Tata celestial, Jehova, pa yudansa of guia. Nan golosidad, posiblemente combiná cu falta di pacenshi cu a hiba na picá, tabatin consecuencia fatal pa nos tur. For di nan nos a ricibí tambe como herencia e tendencia di cometé picá, incluyendo esnan di arogancia i falta di pacenshi.—Romanonan 5:12.

Rond di 2.500 aña despues dje picá di nos promé mayornan, Dios su pueblo scogí, e israelitanan, a manifestá un falta profundo i persistente di fe, i tambe un falta di pacenshi. Aunke Jehova a caba di rescatá nan milagrosamente for di sclabitud na Egipto, nan a ‘lubidá lihé su obranan’ i “no a spera riba su conseho.” (Salmo 106:7-14) Bes tras bes nan a cai den malecho serio pasobra nan no tabatin pacenshi. Nan a traha un bisé di oro i a ador’é; nan a keha tocante Jehova su provision material di mana pa nan; i hopi di nan a asta rebelá contra Jehova su representante divinamente nombrá, Moises. Berdaderamente, nan falta di pacenshi a hiba nan na tristesa i desaster.

E promé rey humano di Israel, Saul, a perde e oportunidad pa su yunan bira su sucesornan real. Pakico? Pasobra e no a spera riba profeta Samuel, kende lo mester a haci un sacrificio na Jehova. Temor di hende a pone Saul pasa dilanti Samuel den ofrecé e sacrificio. Imaginá bo con Saul mester a sinti ora Samuel a presentá djis despues cu el a completá e ceremonia! Si solamente el a spera un ratu mas!—1 Samuel 13:6-14.

Si solamente Eva a spera riba Adam en bes di saca man muchu purá pa tuma e fruta! Si solamente e israelitanan a corda pa spera riba e conseho di Jehova! Sí, pacenshi lo por a yuda spar nan i nos di hopi tristesa i dolor.

Loke Ta Causa Falta di Pacenshi

Bijbel ta yuda nos comprendé un causa principal di falta di pacenshi awe. Segundo Timoteo capítulo 3 ta describí nos generacion como bibando den “tempu crítico, duru pa trata cuné.” E ta bisa cu hende “lo ta stimador di nan mes, stimador di placa, halsá, arogante . . . sin dominio propio, feros, sin amor pa bondad.” (Versículo 2, 3) Un actitud golos i egocéntrico asina ta existí den mente i curason di hopi hende, haciend’e difícil pa tur hende, asta pa cristiannan berdadero, ehercé pacenshi. Ora nos mira hende mundano core auto muchu duru of pasa dilanti nos pará den rij of lansa insulto contra nos, nos pacenshi por ser poné na prueba extremo. Nos por ser provocá pa imitá nan of pa venga contra nan, rebahando nos mes asina na nan nivel di orguyo egoista.

Tin biaha ta nos propio conclusionnan ekibocá cu ta haci nos perde pacenshi. Nota con e Rey sabí, Sálomon, a describí e coneccion entre razonamentu purá i defectuoso cu conducta impaciente i rabiá: “Mihó ta esun cu tin pacenshi cu esun cu ta halsá den spiritu. No sea lihé den bo spiritu pa sintí bo ofendí, pasobra tumamentu di ofensa ta loke ta descansá den scochi di esnan estúpido.” (Eclesiástes 7:8, 9) Si nos tuma e tempu pa obtené un cuadro completo i exacto di un situacion promé cu nos reaccioná riba dje, probablemente nos lo mustra mas comprension, mas consideracion i mas pacenshi pa cu otronan. En cambio, un spiritu halsá i egocéntrico por haci nos bira meskiña, impaciente i amargá, mescos cu e israelitanan murmurador i cabesura cu a tormentá Moises.—Númeronan 20:2-5, 10.

Un otro causa dje mundu aki su falta aumentante di pacenshi ta su condicion di desesperacion, cu ta resultá for di alehamentu for di Jehova. David a expresá hende su necesidad pa spera den Jehova: “Realmente pa cu Dios spera silenciosamente, O mi alma, pasobra di dje ta bini mi speransa.” (Salmo 62:5) Hopi hende cu no conocé Jehova tin un punto di bista limitá i poco prometedor di bida, pues nan ta purba gara cada raticu di placer i probecho cu nan por promé cu nan muri. Mescos cu nan tata spiritual, Satanas e Diabel, hopi biaha nan no ta preocupá cu con nan accionnan por perhudicá otronan.—Juan 8:44; 1 Juan 5:19.

Nada straño cu pacenshi ta asina scars awe. E sistema di cosnan malbado i egoista aki, su dios Satanas, i e tendencianan pecaminoso di nos carni imperfecto ta hacié difícil pa tur hende, asta esnan sincero, tene pacenshi. Sin embargo, Bijbel ta spierta nos pa “ehercé pacenshi,” particularmente relacioná cu e realisacion di Dios su propósitonan. (Santiago 5:8) Pakico pacenshi ta asina balioso? Ki recompensa e por trece pa nos?

Pacenshi—Pakico E Ta Asina Balioso?

“Esnan cu ta wanta i ta spera cu pacenshi tambe ta duna sirbishi.” E palabranan ei a ser expresá dor dje poëta ingles John Milton mas cu tres cien aña pasá den su soneto “Ora El A Bira Ciegu.” Mas promé den e poëma, el a expresá su frustracion i ansiedad tocante su sintimentu di incapacidad pa sirbi Dios plenamente debí cu el a bira ciegu ora e tabatin 40 i picu aña. Pero manera nos por mira for dje frase final dje poëma citá ariba, el a bin realisá cu un hende por adorá Dios dor di wanta tribulacion cu pacenshi i busca cu trankilidad oportunidadnan disponibel pa sirbi Dios. Milton a mira e balor di dependé cu pacenshi riba Dios.

Mayoria di nos por tin bon bista, pero nos tur tin limitacionnan cu por pone nos rabia of angustiá. Con nos por adkerí i ehercé pacenshi?

Ehempelnan Animador

Bijbel ta duna nos vários ehempel excelente di pacenshi. Jehova su pacenshi ta haci bida eterno posibel pa miyones i miyones di hende. (2 Pedro 3:9, 15) Den Jesus su invitacion bondadoso pa nos tuma su yugo i “haña refrescamentu pa [nos] alma,” Jesus ta reflehá perfectamente e pacenshi maraviyoso di su Tata. (Mateo 11:28-30) Meditando riba e ehempelnan di Jehova i Jesus por yuda nos tene mas pacenshi.

Un persona cu aparentemente tabatin hopi bon motibu pa rabia, amargá of venga tabata Jacob su yu homber Josef. Su rumannan a trat’é masha inhustamente, trahando complot pa mat’é i finalmente bendiend’e den sclabitud. Na Egipto, apesar di su sirbishi conciencial i leal na Pótifar, Josef a ser acusá inhustamente i encarcelá. Cu pacenshi el a wanta tur su tribulacionnan, probablemente comprendiendo cu tal pruebanan lo por a yuda cumpli cu Jehova su propósitonan. (Génesis 45:5) Debí cu el a cultivá fe i speransa den Jehova huntu cu humildad i comprension, Josef por a ehercé pacenshi asta bou di circunstancianan masha penoso.

Un otro yudansa importante ta Jehova su spiritu santu. Si, por ehempel, nos ta krepchi i tin un lenga skerpi, nos por haci oracion p’e yudansa di spiritu santu pa nos por cultivá su fruta. Meditando riba cada un dje frutanan aki, manera gran pacenshi i dominio propio, lo yuda nos mira con nan ta profundamente relacioná cu pacenshi.—Galationan 5:22, 23.

E Recompensanan di Pacenshi

Pacenshi por trece hopi beneficio pa nos. E ta fortalecé nos personalidad i ta protehá nos contra di cometé actonan imprudente i bobo. Cua di nos no a yega di cometé erornan doloroso debí cu nos tabata muchu lihé pa reaccioná riba condicionnan difícil of tenso? Nos por a bisa un palabra desagradabel of comportá nos mes den un manera rudo. Nos por a permití un incidente insignificante cu un persona kerí escalá den un desacuerdo formal sin cu ningun di nos dos tabata dispuesto pa cede. Despues di hopi rabia, frustracion i sufrimentu, nos por a pensa cu repentimentu, ‘Si mi solamente a spera djis un poco mas.’ Eherciendo pacenshi por protehá nos contra tur clase di pena. E echo ei so ta duna nos bida muchu mas pas, stabilidad i contentamentu.—Filipensenan 4:5-7.

Pacenshi tambe por yuda nos tene un curason calmu i yen di confiansa. Esaki por contribuí pa nos disfrutá di un mihó salú físico, emocional i spiritual. (Proverbionan 14:30) Si e no ser controlá, rabiamentu furioso por causa malesa emocional i físico severo i tambe morto. En cambio, dor di tene pacenshi nos por haña un actitud mas positivo pa cu otronan, specialmente nos rumannan spiritual i miembronan di famia. E ora ei nos lo ta mas incliná pa mustra consideracion i ta dispuesto pa yuda en bes di ser krepchi i crítico. En buelta, otronan lo haña ta mas fácil i mas placentero pa ta den nos compania.

Specialmente ancianonan den e congregacion cristian mester ehercé pacenshi. Tin biaha, compañeronan cristian ta acercá nan cu problemanan serio. E personan sincero aki por ta confundí, agitá of deprimí, miéntras e ancianonan mes por ta cansá of distraí dor di nan mes problemanan personal of familiar. Sin embargo, ta ki vital p’e ancianonan ehercé pacenshi den circunstancianan difícil asina! Den e manera aki nan por instruí “cu suavedad” i “trata e tou cu ternura.” (2 Timoteo 2:24, 25; Echonan 20:28, 29) Bida precioso ta den wega. Ki un bendicion p’e congregacion ancianonan bondadoso, amoroso i paciente ta!

Cabesnan di famia mester trata nan famia cu pacenshi, comprension i bondad. Tambe nan mester animá i spera pa tur miembro di famia ehercé e mésun cualidadnan aki. (Mateo 7:12) Esaki lo contribuí mashá na amor i pas den cas.

Eherciendo pacenshi miéntras nan ta participá den e ministerio di veld lo yuda ministernan cristian disfrutá dje sirbishi aki mas plenamente. Nan lo ta den un mihó posicion pa wanta cualkier indiferencia i oposicion cu nan encontrá. En bes di discutí cu doñonan di cas rabiá, ministernan cu pacenshi lo ta capas pa duna un contesta suave of bai for dje cas trankilamente, reteniendo asina pas i goso. (Mateo 10:12, 13) Ademas, ora cristiannan ta trata tur hende cu pacenshi i bondad, esnan semehante di carné lo ser atraí n’e mensahe di Reino. Jehova a bendicioná esfuersonan di pacenshi riba un escala mundial, segun cu cientos di miles di buscadornan mansu dje berdad ta basha drenta Jehova su congregacion amoroso tur aña.

Berdaderamente, eherciendo pacenshi lo trece pa nos recompensanan magnífico. Nos lo evitá hopi accidente i problema causá dor di nos actuacionnan desenfrená of dor di ser muchu lihé cu nos lenga. Nos lo ta mas felis, mas calmu i probablemente mas saludabel. Nos lo experenciá mayor goso i pas den nos ministerio, den e congregacion i na cas. Pero mas importante cu tur cos, nos lo disfrutá di un relacion mas íntimo cu Dios. Pues spera riba Jehova. Ehercé pacenshi!

[Notanan]

[Plachi na página 10]

Cuantu pacenshi bo tin den bida diario?