Testigonan di Jehova Rond Mundu—Suecia

SUECIA ta situá n’e parti oost dje península di Scandinavia i ta extendé ariba di e Círculo Artico. Famoso rond mundu pa su capa abundante di selva semper berde, i tambe pa su lagonan i cerunan, Suecia ta un dje paisnan mas levemente poblá den Europa. No obstante, Testigonan di Jehova a busca i a haña amantenan di berdad ei desde cabamentu di siglo 19. Considerá un ehempel recien.

Un señora tabata studia Bijbel cu e Testigonan, pero su esposo no tabata gusta esaki. El a bisa su esposa pa stop di studia, i e señora a stop. E homber aki tabata traha na un depósito pa productonan di serbeseria. Un dia un shofeur di truk a bini n’e depósito cu su nietu di dies aña di edad. E tawela a pidi e homber pa wak e mucha miéntras e tabata carga e truk. Djis pa cuminsá un combersacion, e homber a puntra e mucha ki regalo el a ricibí pa su último cumpleaño. P’e homber su sorpresa, e mucha a bis’é cu e i su famia no ta celebrá cumpleaño debí cu nan ta Testigonan di Jehova. Tambe e mucha a bis’é cu e ta haña regalo na otro tempu dje aña i cu e no ta sinti falta di nada, ya cu e tin un famia masha caluroso i amoroso. Ningun regalo ta bal mes tantu cu esei, el a agregá.

E mucha a regresá cu su tawela vários bes. Cada bes, e homber tabata haci e mucha un cantidad di pregunta, i e tabata profundamente impresioná p’e manera cu e mucha tabata duna contestanan onesto i franco sin ningun vacilacion. Tambe el a keda conmoví p’e mucha su comprendimentu di berdadero balornan di bida. Un anochi despues cu e homber a mira un programa di television cu a pasa e condicionnan miserabel den mundu, el a realisá cu e tabatin cu examiná cosnan spiritual mas seriamente. El a yama e Testigo cu tabata studia cu su casá na telefon i a pidi’é p’e bini bek. Pronto, un Testigo a studia cu e homber, i el a progresá rápidamente. El a ser bautisá dia 10 di april, 1994. Su esposa tambe ta bautisá awor.

Crecementu Ta Rekerí Construccion

Suecia ta duna residencia na hopi refugiado for di otro paisnan, i e Testigonan sueco a haña bon resultado predicando na nan. Generalmente e trabou tabatin asina tantu éxito cu Salonnan di Reino nobo tabata necesario pa acomodá e expansion. For di 1986 te 1993, 37 Salon di Reino a ser construí via e método di construccion rápido, miéntras cu 8 salon a ser expandé i renobá. Na 1994 so, siete Salon di Reino adicional a ser construí, i tres a ser renobá.

Actualmente, tin 65 congregacion wardando riba yudansa pa construí un Salon di Reino nobo of pa expandé of renobá nan salon actual. Rond di 2.500 boluntario ta yuda cu tal proyectonan di construccion, i e congregacionnan ta apreciá mashá nan yudansa amoroso.

E parti nort di Suecia, cua ta extendé ariba e Círculo Artico, tin biaha ta ser yamá e tera di solo di meianochi. Esaki ta asina pasobra durante un parti dje zomer, solo nunca ta baha bou di horizonte ei. Sin embargo, rond Suecia, e lus dje berdad tambe ta sigui lusa briyantemente. Cu Jehova su bendicion, e lus spiritual ei nunca lo bira scur sino lo sigui briya mas i mas cla.

[Kuadro na página 8]

DETAYENAN DJE PAIS

Aña di Sirbishi di 1994

MAXIMO CANTIDAD DI PUBLICADOR: 24.246

PROPORCION: 1 Testigo pa 362

ASISTENCIA NA MEMORIAL: 40.372

PROMEDIO DI PUBLICADOR PIONERO: 2.509

PROMEDIO DI STUDIO DI BIJBEL: 11.306

CANTIDAD BAUTISA: 850

CANTIDAD DI CONGREGACION: 358

OFICINA DI SUCURSAL: ARBOGA

[Plachi na página 9]

E oficina di sucursal i Cas di Betel na Arboga

[Plachi na página 9]

E promé Testigonan na Hjo a usa e bus chikitu aki pa cubri un teritorio di rond di 5.000 kilometer cuadrá