Informe di Proclamadornan di Reino

Hóbennan Ta Declará e Bon Nobo na Africa

DJIS despues dje resureccion di Jesus, un homber africano tabata bishitando Jerusalem. Bijbel no ta duna su nomber. E ta conocí solamente como “un homber cu poder bou di Candace reina dje etiopionan, i kende tabata riba tur su tesoro.” Pakico e ta ser mencioná den Bijbel? Pasobra un angel a dirigí e evangelisador cristian Felipe pa declará na dje “e bon nobo tocante Jesus.” E homber etiopio aki tabata e promé africano segun registro bíblico cu a bira un miembro dje congregacion cristian.—Echonan 8:26-39.

Awe, tin cientos di miles di Testigo di Jehova na Africa. Nan ta probechá di tur oportunidad pa compartí cu otronan e bon nobo tocante Jesus. E siguiente experencianan ta mustra cu asta hóbennan na Africa ta hunga un papel den esaki.

◻ Sandy i Priya, dos hobencita di 11 aña di edad na Nairobi, Kenya, tabata bisiña. Nan tabata gusta hunga cu otro i intercambiá bukinan di cuenta. Priya su mayornan a cuminsá studia Bijbel cu Testigonan di Jehova. Awor Priya tabatin un surtido di buki nobo pa agregá na su coleccion, incluyendo un en particular cu a bira su faborito, Scuchando e Gran Maestro, publicá dor di Watchtower Bible and Tract Society. El a compartí su buki Gran Maestro cu su amiga Sandy, i e dos hobencitanan a cuminsá studi’é regularmente.

Sin embargo, mama di Sandy, Una, tabata asistí n’e Iglesia Anglicano i no tabata kier pa su yu muher lesa bukinan di Testigonan di Jehova. Apesar dje mama su oposicion, e studio a continuá. Un dia Sandy a roga su mama pa scucha nan consideracion maske ta un biaha so. E capítulo cu e hobencitanan a lesa e dia ei tabata titulá “Dos Homber Cu A Celebrá Cumpleaño.” Una a scucha i a keda masha impresioná. Mesora el a acercá Priya su mama cu hopi pregunta di Bijbel.

Priya su mama a haci areglo pa un Testigo studia Bijbel cu Una. Pronto Una mes tabata compartiendo loke e tabata siñando cu su colega di trabou Dolly. Miéntras tantu, Priya di 11 aña di edad a sigui haci progreso i a dicidí pa simbolisá su dedicacion na Jehova Dios mediante bautismo di awa na un congreso di districto di Testigonan di Jehova. N’e mésun congreso ei, p’e gran deleite di Priya, Una i Dolly tambe a ser bautisá!

◻ Tin algun pais africano unda e trabou di Testigonan di Jehova no ta registrá. Na un pais asina, tin un clima general di tolerancia pa cu e actividadnan religioso i creencianan dje Testigonan. Na un scol n’e pais ei, un hobencito di siete aña di edad i su ruman homber di seis aña di edad—yunan di Testigonan—a ser permití pa keda ausente for di klas durante e ora di oracionnan religioso.

Un dia un maestro nobo a exigí p’e muchanan uni den oracion cu e otro muchanan. E hobencito mas grandi a nenga i a ser sutá dor dje maestro. Su ruman mas yong, Shadrack di seis aña di edad, a insistí pa bai cerca e cabes di scol den su oficina. E cabes di scol i e maestro nobo a puntr’é pakico e no kier a uni cu e otronan. Nan a puntr’é si ta miedu e tabatin di haña sota cerca su mayornan. El a contestá na hopi bon arabir: “No, e Dios cu mi ta adorá no ta un Dios di confusion sino di ordu. Mi no por ta un Testigo di Jehova na cas i un otro religion na scol!” Como resultado, el a ser duná dispensacion.

Despues cu e homber etiopio mencioná den e buki di Echonan a ser bautisá, el “a sigui su caminda alegrando.” (Echonan 8:39) Di igual manera awe, e proclamadornan di Reino den e inmenso continente di Africa ta alegrá den nan privilegio di ‘declará e bon nobo tocante Jesus.’—Echonan 8:35.