Informe di Proclamadornan di Reino

“E Palabra di Dios A Sigui Crece”

E CONGREGACION cristian a crece for di rond di 120 miembro na mas cu 3.000 den masha poco tempu despues cu el a ser formá. (Echonan 1:15; 2:41) Bijbel ta splica cu “e palabra di Dios a sigui crece, i e cantidad dje disipelnan a sigui multiplicá masha tantu den Jerusalem.” (Echonan 6:7) Despues di solamente un par di aña, e congregacion recien formá a bira un organisacion intercontinental cu cristiannan na Africa, Asia i Europa.

Awe, di igual manera, e congregacion cristian ta experenciando un crecementu rápido. Por ehempel, na México, e cantidad di proclamadornan di Reino a crece den solamente cincu aña cu mas cu 130.000 te na 443.640! Na 1995, 1 di cada 59 hende na México a asistí n’e Memorial dje morto di Cristo cu Testigonan di Jehova a celebrá. Sin embargo, e cosecha spiritual den e pais ei no a terminá, manera e siguiente experencia ta ilustrá.—Mateo 9:37, 38.

Den un pueblo den e estado di Chiapas, ningun hende no a aceptá un studio bíblico na cas cu Testigonan di Jehova, ni despues cu nan a predicá e bon nobo mas of ménos 20 aña den e área ei. Claramente, hopi hende dje pueblo a ser intimidá dor di un homber cu tabatin un reputacion di ta violento. Nan tabata teme su reaccion si el a haña sa cu nan tabata studia Bijbel cu e Testigonan.

Dos Testigo yen di curashi cu a muda bin n’e área a dicidí na trata cu e problema bayendo derechito cerca e homber en cuestion. Ora nan a yega su cas, su esposa a habri porta i a scucha nan mensahe cu atencion. E tabata specialmente interesá den loke Bijbel ta bisa tocante bida den un paradijs riba tera. Pero el a reconocé cu su esposo lo caus’é hopi dificultad si e mester a studia Bijbel. E Testigonan a splik’é cu aménos e examiná cuidadosamente loke Bijbel ta bisa, e nunca lo siña con pa sirbi Dios i disfrutá di bida riba tera pa semper. E señora a aceptá un studio di Bijbel.

Manera tabata di spera, su esposo no a keda contentu cu su decision. El a prohibié di usa su auto pa asistí na reunionnan cristian, aunke e tabata permití sí pa us’é pa otro propósitonan. Apesar di su oposicion, e señora tabata cana regularmente bai n’e Salon di Reino di Testigonan di Jehova mas cerca, cua tabata 10 kilometer leu. Pronto, otronan den e pueblo a tuma nota di su curashi i determinacion. Hendenan a cuminsá scucha ora e Testigonan tabata bishitá nan casnan. Algun asta a cuminsá compañá e señora n’e reunionnan. Despues di un tempu corticu, e Testigonan tabata conduciendo rond di 20 studio di Bijbel den e pueblo ei!

Un amiga dje señora aki tambe a dicidí na studia Bijbel apesar dje oposicion di su casá. Sorprendentemente, el a ser animá pa haci esei dor di e esposo dje promé señora. Despues cu e homber a papia cu su esposo, e oposicion a stop. Asina, despues di 20 aña e simia dje berdad di Bijbel finalmente a spruit, cu mas di 15 persona studiando Bijbel i asistiendo na reunionnan cristian, incluyendo e dos señoranan aki, cu awor ta publicando e bon nobo.