Traducción del Nuevo Mundo Ta Impresioná un Escolástico

SEGUN e escolástico di griego clásico Dr. Rijkel ten Kate, traduccionnan di Bijbel na hulandes ta faya pa traducí cierto palabranan cu exactitud. Por ehempel, den Lucas capítulo 2, nos ta haña tres diferente palabra griego (breʹphos, pai·diʹon, i pais) usá pa describí e estadonan sucesivo di Jesus su crecementu. Cada un dje palabranan aki tin un nificacion liheramente diferente na otro. Sin embargo, den hopi Bijbel, dos of tur tres palabra ta ser traducí vagamente cu “mucha.” Cua ta e traduccion corecto?

Dr. ten Kate ta splica cu den versículo 12 e palabra griego breʹphos ta nificá “un recien nací, of baby.” Pai·diʹon, usá den versículo 27, ta nificá “mucha homber chikitu of mucha,” i pais, hañá den versículo 43, mester ser traducí cu “mucha homber.” Dr. ten Kate a skirbi den e edicion di mart 1993 di Bijbel en Wetenschap (Bijbel i Ciencia), “Te con leu cu ami sa, no tin ni un traduccion na hulandes cu a traducí esaki corectamente, esta, completamente na armonia cu e texto original.”

Mas despues, Dr. ten Kate a ser mustrá e Traducción del Nuevo Mundo de las Santas Escrituras, cu ta obtenibel den 12 idioma, incluyendo hulandes. Su reaccion? “Mi ta masha sorprendí,” el a bisa, “cu en realidad tin un Bijbel na hulandes den cua e diferente uso dje tres palabranan griego breʹphos, pai·diʹon, i pais a ser duná e debido consideracion.” E Traducción del Nuevo Mundo ta traducí e versículonan aki na armonia cu e texto griego original? “Completamente na armonia,” Dr. ten Kate ta respondé.