Pregunta di Lector

Técnicamente, tin un diferencia entre e términonan bíblico “otro carnénan” i “multitud grandi”?

Sí, aunke nos no mester ta indebidamente sensitivo en cuanto uso di palabra of bira molestiá si de bes en cuando e palabranan ta ser usá un pa otro.

Mayoria cristian ta conocí cu e pasashinan caminda nos ta haña e términonan aki. Juan 10:16 ta un. Ei Jesus a bisa: “Mi tin otro carnénan, cu no ta dje curá aki; eseinan tambe mi tin cu trece, i nan lo scucha mi bos, i nan lo bira un solo tou, un solo wardador.” E otro expresion, “multitud grandi,” ta parecé na Revelacion 7:9. Nos ta lesa: “Despues dje cosnan aki mi a wak, i, mira! un multitud grandi, cu ningun hende por a conta, for di tur nacion i tribu i pueblo i lenga, pará dilanti e trono i dilanti e Lamchi, bistí cu pañanan largu blancu; i tabatin ramanan di palma den nan man.”

Laga nos considerá Juan 10:16 promé. Ken e carnénan ta? Wel, lo ta bon pa corda cu tur siguidor leal di Jesus ta ser yamá carné. Na Lucas 12:32, el a yama esnan di su disipelnan cu lo bai cielu e “trupa chikitu.” Un trupa di kico? Di carné. E “carnénan” dje “trupa chikitu” lo ta parti dje Reino den cielu. Sin embargo, tin otro hende, esnan cu un speransa diferente, kende Jesus ta considerá como carné tambe.

Nos por mira esaki den Juan capítulo 10. Despues di papia tocante carnénan, tal como su apostelnan, kendenan lo e yama pa bida den cielu, Jesus a agregá den versículo 16: “Mi tin otro carnénan, cu no ta dje curá aki; eseinan tambe mi tin cu trece.” Testigonan di Jehova for di hopi tempu a reconocé cu den e versículo aki Jesus tabata papiando di hende cu e prospecto di bida riba tera. Hopi di esnan fiel den tempu pre-cristian, tal como Abraham, Sara, Noe i Malakías, tabatin tal prospecto. Pues corectamente nos por incluí nan como parti dje “otro carnénan” di Juan 10:16. Durante e Mil Aña, tal fiel testigonan pre-cristian lo ser resucitá i e ora ei lo siña di Cristo Jesus i acept’é, birando “otro carnénan” dje Wardador Excelente.

Tambe nos sa cu desde cu e yamada general dje clase celestial a terminá, miyones di hende a bira cristiannan berdadero. Esakinan tambe corectamente ta ser yamá “otro carnénan,” siendo cu nan no ta parti dje “trupa chikitu.” Mas bien, e otro carnénan awe ta mira padilanti pa sigui biba te den un paradijs terenal.

Awor, kico nos por bisa tocante e identidad dje “multitud grandi” mencioná na Revelacion 7:9? Wel, wak versículo 13 i e pregunta, “Ken nan ta i di unda nan a bini?” Nos ta haña e contesta na Revelacion 7:14: “Esakinan ta esnan cu ta sali for di e tribulacion grandi.” Pues e “multitud grandi” ta consistí di esnan cu ta sali, of sobrebibí, e tribulacion grandi. Manera versículo 17 ta bisa, nan lo ser ‘guiá na fonteinnan di awa di bida’ riba tera.

Sin embargo, nos por comprendé cu, pa esakinan sobrebibí e tribulacion grandi cu ta yegando cerca, nan mester a laba nan pañanan largu promé den e sanger dje Lamchi, birando adoradornan berdadero. P’esei, aunke Revelacion 7:9 ta describí e multitud aki despues dje tribulacion, nos por aplicá e término “multitud grandi” na tur esnan cu speransa terenal kendenan awor ta rindiendo sirbishi sagrado na Jehova, net promé cu e tribulacion grandi dal aden cu e atake dje nacionnan riba religion falsu.

En resúmen, nos lo por corda cu e “otro carnénan” ta e término mas amplio, incluyendo tur Dios su sirbidornan cu tin e speransa di biba pa semper riba tera. E ta incluí e categoria mas limitá di personanan semehante di carné awe cu ta ser recogé como un “multitud grandi” cu tin e speransa di biba atrabes dje tribulacion grandi inminente. Mayoria dje cristiannan fiel ei na bida awe ta dje “otro carnénan,” i nan ta parti dje “multitud grandi” tambe.

Ta bale la pena ripití cu, pa bon cu ta pa ser claro riba e cosnan specífico aki, ningun cristian mester ta demasiado conciente di cada palabra—loke lo por ser yamá un crítico di palabra. Pablo a advertí en cuanto algun cu tabata “hinchá cu orguyo” i a enbolbé nan mes den “debatenan tocante palabranan.” (1 Timoteo 6:4) Si nos personalmente ta reconocé cierto distincion entre e términonan, ta bon. Sin embargo, nos no mester criticá, sea cu boca of den pensamentu, un otro persona cu tal bes no ta usa términonan bíblico asina precis.