Goso Ta Warda Esnan Cu Haña e Berdad

DEN su zolder, un homber finlandes a haña e buki The Divine Plan of the Ages. El a cuminsá les’é inmediatamente, i pronto el a bisa den su mes, ‘Esaki ta e berdad; esaki ta e berdad.’ Bahando for dje zolder, el a bisa su esposa, “Mi a haña e religion berdadero.”

E experencia aki ta excepcional den e manera cu e homber aki a haña e berdad, pero hopi Testigo di Jehova lo por relatá reaccionnan similar. Nan tur por contá bo di e goso cu e ta trece pa haña e berdad. E siguiente experencianan ta resaltá esaki.

Berdadero Siñansanan Bíblico Ta Trece Goso

Margarita Königer a crece na Munich, Alemania, durante Guera Mundial II. Casnan bombardiá i na candela tabata un bista frecuente. Su ruman homber a muri den e guera. Ora e tabata asistí n’e sirbishinan dje iglesia Católico, e tabata tende nan resa p’e soldatnan aleman i p’e ‘führer,’ Hitler. Despues dje guera, el a ricibí un beca pa asistí na un colegio na Merca como parti di un programa di intercambio di studiante. El a haña cu hende tabata amabel cuné, di manera cu el a puntra su mes ta kico tabata parce di ta pusha hende, kende su deseo natural ta pa biba na pas, pa desconfiá i odia otro durante tempu di guera. Una bes bek na Munich, el a bin den contacto cu Testigonan di Jehova, i mediante un studio di Bijbel cu nan, el a haña e contestanan riba su preguntanan. E ta bisa: “Nan a mustrá mi for di Bijbel cu forsanan spiritual malbado tabata enbolbí . . . Bijbel ta yama nan ‘gobernantenan di mundu,’ i, en realidad ta bisa cu Satanas ‘ta gañando henter e tera habitá.’ . . . Considerando e actonan malbado i diabólico dje nacionnan i hendenan, ki razonabel i satisfaciente e contesta aki ta!”—Efesionan 6:12; Revelacion 12:9.

Margarita ta sigui relatá: “A duná mi gran goso pa siña tocante Dios su percuracion pa resolvé problemanan riba tera. No, lo e no ta mediante un of otro ideologia of administracion humano, manera educadornan seglar ta proponé. Mas bien, Bijbel ta mustra cu un gobernacion celestial nobo lo tuma encargo di asuntunan riba tera. . . . Jesucristo a siña su siguidornan pa pidi den oracion: ‘Laga bo reino bin.’ . . . Mi a cuminsá mira cu e reino aki ta un berdadero gobiernu i cu solamente mediante dje berdadero pas mundial lo ser lográ.” Durante casi 30 aña, Margarita a sirbi como misionero den rond di cincu pais africano—di cua el a dedicá e último 19 añanan proclamando e berdad n’e pueblo humilde di Ouagadougou, Burkina Faso.

E experencia di Margarita no ta único. Hopi hende a reaccioná mes positivo ora nan a mira cu clero di cristiandad na tur dos banda dje frontera di bataya ta haci oracion na Dios pa victoria. Esnan di curason onrado ta mira cu e splicacion dje Bijbel ta razonabel, esta, cu Dios no tin nada di haci cu gueranan humano pero cu esakinan ta desaroyá pa motibu cu “henter e mundu ta drumi den e poder dje malbado.” E buscadornan di berdad aki ta siña cu cristiannan berdadero no mester ta “parti di mundu” sino mester permanecé neutral den e asuntunan di mundu. Reconociendo cu Testigonan di Jehova a tuma tal posicion, esnan recien interesá aki ta bira convencí cu nan a haña e berdad. E speransa i goso di personanan asina ta crece segun cu nan sigui aumentá den conocimentu tocante e motibu pa cua Dios a permití maldad i con pronto lo e trece pas i condicionnan hustu riba tera mediante su Reino.—1 Juan 5:19; Juan 17:16; Mateo 6:9, 10.

Berdadero Principionan Bíblico Ta Trece Goso

Daniel Rosero di Ecuador tabata sinti cu bida no tabatin nificacion, pues el a cuminsá bebe hopi. E iglesia na cua e tabata asistí a siñ’é cu e único cos cu e mester a spera tabata morto i un fiernu di candela. Su reaccion tabata, “Mi ta bai kima, awel lagá mi bebe!” E tabatin un famia di ocho persona pa ken e no tabata percurá i tur ora e tabata pleita cu su esposa, Delia. E cambio grandi a sosodé un diadomingo mainta ora nan a haña un bishita di Testigonan di Jehova i a cuminsá studia e Bijbel. E promé biaha cu Daniel a asistí na un asamblea di circuito di Testigonan di Jehova, el a realisá cu el a haña e berdad. E ta bisa: “E organisacion a impresioná mi mashá. Un cantidad di hende, asociando huntu cu otro. Bo por a sinti e amor den e multitud. Ningun hende tabata huma. Ningun palabra malu. . . . Mi ta corda cu mi a pensa, ‘Esaki ta e berdad!’ No tabata miedu di morto of miedu p’e fin di mundu loke a conmové mi. Tabata e limpiesa dje organisacion.”

Henter e famia Rosero a bira Testigo di Jehova. Nan bida di famia i nan situacion económico a mehorá segun cu nan a aplicá principionan bíblico. Delia Rosero ta bisa: “Bo sa, mi ta debe tur esaki na e berdad di Bijbel. Ken sa unda mi yunan lo ta sin Dios su Palabra? Nan tur siete ta bautisá i personanan balansá. Pa mi, e berdad a nificá un bida completamente nobo, felicidad nobo.”

E experencia dje famia Rosero no ta único. Hopi famia den nos dia ta ser afligí dor di problemanan. Un motibu ta cu e normanan moral cu Bijbel ta proveé generalmente no ta ser respetá mas, manera den generacionnan anterior. Mayoria religion a sigui e tendencia aki, sea bou dje lema di tolerancia of pa motibu cu nan ta pensa cu, cu e cambio di tempu, moralnan bieu ta bira ouderwets. Pues, mescos cu otronan, e famia Rosero a ser lagá pa busca den scuridad sin e guia bíblico. Sin embargo, ora hende humilde asina yega na comprendé Dios su punto di bista tocante moralidad i bida di famia, sin tarda nan ta aplicá loke nan ta siña. For di nan relatonan nos por mira e bon resultadonan di haci esei.

Goso Mester Ser Cultivá

Sin embargo, esaki no kier men cu un cristian ta den un estado constante di euforia. Obviamente, e dificultadnan cu hende en general ta enfrentá, tal como desempleo, malesa i morto, ta afectá cristiannan tambe. Cristiannan tambe mester hiba un lucha constante contra nan mes imperfeccionnan i debilidadnan. E relato bíblico ta bisa cu Lot tabata “masha afligí p’e entrega di hende desafiador di ley na conducta inmoral” den e stad di Sódoma. Cristiannan fiel no por evitá sintimentunan similar ora nan ta mira condicionnan malu prevalecé.—2 Pedro 2:7, 8.

Sin embargo, esnan cu a haña e berdad tin un bentaha. Por ehempel, un creyente cu ta pena pa un persona cu a muri no tin nodi sinti “tristesa mescos cu e otronan tambe ta haci cu no tin speransa.” Su pena lo no ta sin límite. Esaki ta cierto en cuanto otro problemanan tambe. E persona cu a haña e berdad sa cu problemanan actual ta solamente temporal. Speransa ta haci mas fácil pa mantené nos mes firme bou di dificultadnan. Un estilo di bida balansá tambe ta yuda.—1 Tesalonicensenan 4:13.

Pablo a duna cristiannan e exhortacion aki: “Alegrá semper den Señor. Un bes mas lo mi bisa, Alegrá!” (Filipensenan 4:4) Esaki ta mustra cu miéntras cu goso ta n’e alcanse di nos tur, tambe ta posibel pa no tin’é. E ansiedadnan dje sistema di cosnan bieu aki por resultá di ta un obstáculo. Ademas, Bijbel ta bisa nos cu nos mester cultivá goso, un dje frutanan di Dios su spiritu. (Galationan 5:22) Si bo continuamente adkerí conocimentu dje berdad i recordá bo mes dje rikesanan spiritual cu el a trece i ainda ta trece, bo goso lo no mengua. Lo e bira mas fuerte segun cu nos ta acercá e tempu ora Dios “lo seca tur lágrima” for dje wowonan di hende i ora lo no tin ni “lamento ni sclamacion ni dolor” mas.—Revelacion 21:4.

[Plachi na página 8]

Hopi hende ta keda impresioná cu e goso i bon organisacion na asambleanan di Testigonan di Jehova