Republica dominicana Habrí Ainda pa Descubrimentu

COMO un simpel hóben, Cristofel Columbus a cuminsá un bida riba laman cu eventualmente a hib’é n’e descubrimentu dje islanan conocí awe como Antiyas. Na december 1492, su barcu principal, Santa María, a yega n’e costa nort dje isla di Española, conocí awe como e isla di Hispañola, compartí dor di Haití i República Dominicana. Ei Columbus a establecé e promé colonia europeo, un forti trahá den purá, i el a yam’é La Navidad. E isla aki a bira e centro di su exploracionnan mas aleu.

Columbus a descubrí cu e isla tabata ocupá pa e indjannan taino, un pueblo notablemente atractivo, leal i hospitalario. Tabatin aproximadamente 100.000 di nan n’e tempu ei. Sin embargo, bou dje trato severo dje invasornan, kende nan interes primario tabata pa haña oro, e poblacion nativo a mengua rápidamente. Pa 1570 segun informe a sobra solamente rond di 500 indjan taino.

Awe, República Dominicana tin un poblacion di hende di hopi rasa i color, kende nan antepasadonan a imigrá aki. Asina mes, nan ta parce di tin hopi dje característicanan excelente dje tainonan, siendo básicamente un pueblo amigabel i trankil. Esaki, combiná cu un creencia sincero den Dios i respet pa Bijbel, a haci e trabou di predicá i siña di Testigonan di Jehova remarcablemente exitoso den e pais aki.

Un Otro Clase di Descubrimentu

E promé misioneronan di Watch Tower, Lennart i Virginia Johnson, a yega República Dominicana durante e era dje dictador Trujillo. Nan a descubrí, pa nan deleite, cu hopi hende a respondé lihé i faborablemente na nan mensahe bíblico. Sin embargo, esaki no a cai na agrado dje autoridadnan i nan conseheronan religioso. Un ola di persecucion pronto a cuminsá, i e fe dje promé Testigonan dominicano ei a ser poné na pruebanan severo. Te awe, nan lealtad i fe—asta te na morto—ainda ta hopi comentá.

Testigonan di Jehova, awor rond di 16.000 na cantidad den e pais, ta bon conocí. Algun tempu pasá, cincu stacion di television rond e pais a transmití e video Los testigos de Jehová—la organización tras el nombre.a

Esaki a duna hopi publicidad n’e trabou dje Testigonan no solamente den stadnan mas grandi sino tambe den pueblonan mas chikitu i algun área di cunucu. Pa probechá dje publicidad aki, nan a monta un campaña special pa extendé i hiba e bon nobo di Reino n’e áreanan alehá aki.

Bendicionnan Debí cu A Extendé

Hopi Testigo yong, enérgico i celoso, a ofrecé nan mes como boluntario pa dedicá periodonan di dos luna predicando den e teritorionan lehano aki. Nan esfuersonan tabata debidamente recompensá. Den un área dos Testigo a descubrí interes excepcional. Ya cu tabata tempu pa tene e Memorial anual di Jesus su morto, nan a haci e areglonan i a invitá e hendenan pa bini. E sala a yena cu hende, i e rumannan a tene e reunion. Ora el a terminá, nan a ripará cu, pa nan gran sorpresa, tabatin un otro grupo grandi di hende pafó dje sala wardando pa drenta paden. Pues e rumannan a invitá nan paden i a ripití e programa. Tin awor un congregacion den e área ei.

E personalidad generoso i amigabel dje hendenan hopi biaha ta impulsá nan pa compartí e berdad di Bijbel cu nan ta siñando cu miembronan di nan famia i otronan. Un studiante di Bijbel tabata abundando cu goso ora cu finalmente el a cualificá pa participá den e ministerio di cas-pa-cas. E tabata conduciendo cincu studio bíblico caba den su becindario, pero e tabata contentu di por tin un participacion mas grandi den e ministerio.

Siendo cu hopi teritorio no ta ser bishitá regularmente dor di publicadornan di Reino, esfuerso ta ser hací pa predicá na hende den bus i na esnan cu ta bini n’e stadnan pa haci diligencia of cumpra cos. Esaki a hiba na resultadonan gososo, manera ta ser ilustrá dor di un experencia en coneccion cu un carta cu e oficina di sucursal a ricibí. E tabata di dos homber (segun e impresion cu nan a crea) den un área di cunucu, kendenan a pidi pa un studio di Bijbel. Ora un Testigo a bishitá nan, a resultá cu e “hombernan” tabatin 10 i 11 aña di edad. Pero con nan a haña sa dje areglo di studio di Bijbel? Wel, un homber for dje pueblo ei a bai n’e capital pa algun diligencia. El a topa un Testigo riba caya, kende a dun’é un tratado i a ofrec’é un studio di Bijbel grátis na cas. Regresando na su pueblo, e homber a duna un hobencita di 12 aña dje becindario e tratado i a cont’é tocante e areglo di studio di Bijbel. Na su turno, e hobencita a pasa e informacion n’e dos hobencitonan, kendenan mesora a skirbi e carta. E Testigonan a cuminsá un studio di Bijbel cu e dos hobencitonan, e hobencita, e homber i su dos yunan.

Reaccion Excelente di Hóbennan

En berdad, tantu e hóbennan lantá den e berdad como esnan cu no ta, ta parce di tuma nan adoracion di Dios na serio. Por ehempel, tantu Tamar como su ruman muher Keila a ser bautisá cu 10 aña i a drenta e ministerio di pionero di tempu completo cu 11 aña. Wendy Carolina tabatin 12 aña ora el a simbolisá su dedicacion mediante bautismo bou di awa, i dos aña despues, na 1985, el a cuminsá traha pionero regular. Awe e ta un maestra eficas, disfrutando ainda dje ministerio di tempu completo. Hóben Jovanny, bautisá cu 10 aña i un pionero regular cu 11 aña, ta conduciendo cuater studio di Bijbel di cas. Ora Rey di 10 aña di edad a haña sa cu un bendedó di buki segunda mano tabatin un foyeto publicá dor di Testigonan di Jehova, Rey a roga su mama pa cumpr’é p’e. El a les’é di kaft pa kaft. Su búskeda pa mas literatura bíblico cu tempu a pon’é den contacto cu e oficina di sucursal. Awe e ta disfrutando dje sirbishi di tempu completo, i su mama tambe ta sirbiendo Dios.

Kico a yuda esakinan i otro hóbennan apreciá e balor di cosnan spiritual? Den hopi caso guia apropiado di mayor a hunga un papel importante. Esaki tabata e caso cu Josué, kende su mayornan cristian ta maestronan di scol. Ora un superintendente biahero a sugerí p’e mayornan purba yuda por lo ménos un di nan yunan tuma e ministerio di tempu completo, nan a duna atencion na Josué. Siendo un studiante sobresaliente, Josué a ricibí un beca di gobiernu pa studia ingenieria. Despues di un aña i mei n’e universidad, el a aceptá un invitacion pa uni cu e proyecto di construccion n’e compleho dje sede pa Testigonan di Jehova na República Dominicana. Su mayornan a expresá satisfaccion profundo di a duna nan yu homber n’e sirbishi di Jehova.

“Exploradornan” For di Otro Paisnan

Jesus su palabranan cu “e cosecha ta grandi, pero e trahadornan ta poco” berdaderamente por ser aplicá n’e campo aki. (Mateo 9:37) E necesidad grandi i e reaccion excelente a impulsá Testigonan di otro paisnan pa bin participá den explorá e teritorio p’e berdadero tesoronan di tempu moderno—buscadornan sincero dje berdad.

For dje isla bisiña di Puerto Rico a bini famianan Testigo kendenan a haña berdadero satisfaccion sirbiendo den diferente áreanan di República Dominicana. Un cabes di famia a bisa: “Siendo capas pa expresá bo fe i speransa na oreanan scuchador realmente ta haci e berdad biba!” Despues cu Cecilia for di Suecia i Nia for di Merca a haña sa dje necesidad aki, nan a uni forsa cu vários otro ministernan muher hóben di tempu completo. Nan ta sirbiendo den e interior caminda nan ta haña un altitud mas haltu i un clima mas moderá. Di igual manera, haltu den e cerunan friu cubrí cu pal’i pino, dos famia canades a uni cu un famia dominicano cu a regresá for di Merca. Nan ta parti di un congregacion chikitu i ta capas pa alcansá e hendenan cu no a ser bishitá dor di Testigonan di Jehova pa mas cu dies aña.

Alfredo i Lourdes huntu cu nan cincu yunan a regresá for dje stad di New York i ta asociá cu un congregacion chikitu den un dje bunita pueblonan di playa turístico. Nan ta alegrá cu nan por participá den busca hende di curason onrado i yuda e congregacion crece. Roland, un operador di computer for di Austria, i su esposa, Yuta, a establecé nan mes den e parti sur dje pais cu ta calor i secu. Nan tabatin e goso di mira un congregacion nobo ser formá desde nan yegada. Den un pueblo den cercania, un grupo di tres ruman muher pionero i un pareha for di California a informá cu nan tabatin asina tantu peticion pa studio di Bijbel cu nan no tabata por a conducí nan tur. Pues nan a animá esnan interesá pa asistí n’e reunionnan n’e Salon di Reino local i pone nan nomber riba un lista di espera pa studionan di Bijbel. Stefan, ruman homber di Yuta, ta sirbiendo fielmente cu un congregacion chikitu den e bunita pueblo di Samaná, n’e parti nortoost. Den solamente dos aña, e cantidad di publicadornan di Reino ei a duplicá.

E amor i celo cu e rumannan aki i otronan cu a bini pa yuda a demostrá, ta berdaderamente encomendabel. Nan a aceptá e desafio di no solamente muda pa un otro pais cu diferente cultura i custumbernan sino tambe, den mayoria caso, di siña un idioma nobo pa por percurá p’e necesidadnan spiritual di hende semehante di carné. Nan esfuersonan a resultá den un reaccion positivo for dje hendenan local.

Algun famia dominicano a bandoná e comodidadnan dje stadnan grandi i a muda pa cunucu. Tur ta ser ricamente recompensá cu e goso di descubrí e berdadero tesoro di buscadornan sincero dje berdad.

E buscadornan di tesoro di siglo 15 a trece no bendicion, sino sclabitud i sufrimentu incalculabel p’e pueblo nativo taino. Ni Columbus mes no a beneficiá for dje tesoronan dje Mundu Nobo. Cu tempu el a ser arestá i sacá for dje isla cu el a descubrí i a regresá Spaña como prizonero.

Awe un otro clase di exploracion ta tumando lugá, i un tesoro mas balioso ta ser hañá. Jehova su pueblo ta ocupá buscando hende di curason onrado cu ta respondé n’e bon nobo di Reino. E resultado ta cu un multitud semper aumentante ta disfrutando dje libertad cu solamente e Palabra di Dios por trece. (Juan 8:32) Nan ta mira padilanti n’e tempu ora e pais aki di ceru, watervalnan precioso, playanan bunita i cuebanan encantador lo bira, no solamente un isla paradísico, sino parti di un mundu nobo cu lo cubri henter e tera.—2 Pedro 3:13.

[Notanan]

[Mapa na página 24]

(For fully formatted text, see publication)

República Dominicana

[Plachinan na página 24, 25]

Hóbennan ta descubrí e balor di cosnan spiritual dor di sigui tras dje sirbishi di tempu completo