Testigonan di Jehova Rond Mundu—Polonia
DEN otoño di 1989, e gobiernunan comunista dje paisnan for di Laman Báltico te na Laman Pretu a cuminsá cai. Segun cu e Cortina di Heru tabata ser di sker, e nacionnan den Oost Europa a cuminsá busca nan mes direccion. Entre nan tabatin Polonia, un pais cubrí cu ceritunan cu ta subi i baha, sabananan plat i cerunan cu punta skerpi.a
E polaconan ta trahadornan diligente, i Polonia a producí algun dje artistanan i científiconan mas famoso di mundu. Pero, mas cu esei, tin einan awor un multitud creciente di proclamadornan dje bon nobo dje Reino di Dios.
Curashi Den Desenmascará Falsedad
Na Polonia tin hopi hende cu tin gana di siña e berdad for di Bijbel. Pero algun ta ser desanimá dor di nan famia of bisiñanan. Por ehempel, den cercania di Wrocław, un señora interesá a stop di studia Bijbel cu Testigonan di Jehova ora famia i amigunan a pone presion riba dje. No obstante, su yu muher tiener a lesa un seri di artículo di Toren di Vigilancia cu a desenmascará religion falsu. Esakinan a lanta e yu muher su interes den e berdad.
Despues di seis luna di studio di Bijbel, e persona hóben aki a dicidí di kibra tur su lasonan cu religion falsu. El a bishitá e pastor di su iglesia pa inform’é di su decision. E pastor a bis’é pa skirbi lo siguiente: “Ami, K—— P——, ta renunciá e fe católico.”
E siguiente djadumingu, e declaracion aki a ser lesá den misa. E tawela dje hobencita a desmayá, i su wela a cuminsá grita yora. Sin embargo, otro parokianonan a keda impresioná i a remarcá: “Por fin, un hende tin suficiente curashi pa bisa cu tin hopi falsedad den nos iglesia.” E tiener balente aki awor ta un ruman muher spiritual bautisá i a cuminsá siete studio di Bijbel den su pueblo.
‘Na Nan Frutanan’
E revista semanal Kujawy i Pomorze a publicá e informe “Boso Lo Reconocé Nan na Nan Frutanan.” En parte, e artículo a bisa cu adoradornan den cristiandad “en realidad no ta tuma e principionan religioso cu nan a aceptá masha na serio. Nan ta para na contraste skerpi cu Testigonan di Jehova cu ta practicá loke nan ta bisa, i nan ta bisa loke Bijbel ta manda.”
Despues di a haci un contraste entre e aparencia dje Testigonan cu esun di cristiannan pa nomber, e informe a continuá: “E últimonan aki muy probablemente no sa, i demasiado biaha no ta aplicá, e berdadnan esencial i principionan di nan fe. . . . Dor di nan actitud, Testigonan di Jehova ta manifestá e armonia di nan palabra i accionnan, probando asina cu nan no ta ‘profetanan falsu,’ mas bien, nan por ser reconocé na nan frutanan. ‘Hende nunca ta piki druif for di mata di sumpiña ni figu for di bringamosa, no ta berdad?’ (Mateo 7:15-20).”
Un señora a skirbi un carta n’e revista semanal Przyjaciółka, lamentando cu su yu homber a bandoná e Iglesia Católico i a bira un Testigo di Jehova. Kico tabata e conseho dje editor? “Si bo yu homber a cuminsá asociá cu Testigonan di Jehova, a siña i a aceptá nan fe, ta completamente su mes decision, cua mester ser reconocé i respetá. . . . E grupo religioso aki ta ser caracterisá pa hopi rasgo bunita i socialmente deseabel, manera nan solidaridad excepcional i lasonan estrecho como grupo, gran onestidad i pegamentu estricto n’e reglanan aceptá di sociedad, i finalmente, nan abilidad pa biba na armonia cu nan berdad, logrando den práctica e balornan cu nan ta afirmá di tin. Esakinan ta birtudnan precioso.”
[Nota]
a Pa informacion adicional, mira e Calendario de los Testigos de Jehová para 1994.
[Box on page 9]
DETAYENAN DJE PAIS
Aña di Sirbishi di 1993
MAXIMO CANTIDAD DI PUBLICADOR: 113.551
PROMEDIO: 1 Testigo pa 339
ASISTENCIA NA MEMORIAL: 235.642
PROMEDIO DI PUBLICADOR PIONERO: 7.961
PROMEDIO DI STUDIO DI BIJBEL: 79.131
CANTIDAD BAUTISA: 8.164
CANTIDAD DI CONGREGACION: 1.397
OFICINA DI SUCURSAL: Nadarzyn
[Caption on page 9]
Oficina di sucursal di Polonia na Lodz na 1948
[Caption on page 9]
Trahando cu poster, juni 1948, na ex-Oost Prusia
[Caption on page 9]
Setent’i dos miembro dje personal di Betel di Polonia, januari 1993
[Caption on page 9]
E sucursal nobo na Nadarzyn