‘No Pena Manera e Otronan Ta Pena’
BO A yega di ripará e manera cu un flor ta parce decaí despues di a sobrebibí un tempestad? Den un sentido e ta un bista conmovedor. En realidad, probablemente e yobida a manda cantidad di bestia i hende—creacionnan muchu mas resistente cu cualkier flor—core lihé busca caminda di sconde. Tog, e flor a para ei, inmovibel, enfrentando e pleno furia dje weer. Awor, até aki, intacto, decaí pero no kibrá, demostrando un fortalesa cu ta na contraste cu su aparencia delicado. Kisas bo ta puntra bo mes, segun cu bo ta admir’é, si lo e recobrá su vigor i hisa su bunita cabes pa cielu un biaha mas.
Ta mescos cu hende. Den e tempu turbulento aki, nos ta encontrá tur sorto di tempestad. Dificultad económico, depresion, kebranto di salú, pérdida di un ser kerí den morto—tempestadnan asina ta atacá nos tur tardi of trempan, i tin biaha nos no por evitá nan mescos cu e flor no por saca su rais i core busca refugio. Ta conmovedor pa mira individuonan kendenan ta parce basta frágil, demostrá un fortalesa sorprendente i soportá atakenan asina. Con nan ta logr’é? Hopi biaha e clave ta fe. Santiago, e mitar ruman di Jesucristo, a skirbi: “Boso sa cu ora boso fe ta logra enfrentá pruebanan asina, e resultado ta e abilidad di soportá.”—Santiago 1:3, Today’s English Version.
Un otro clave ta speransa. Ora morto ta tumba un ser kerí, por ehempel, speransa por haci un mundu di diferencia pa esnan cu ta keda atras. Apostel Pablo a skirbi n’e cristiannan na Tesalónica: “Nos no kier pa boso ta ignorante en cuanto esnan cu ta drumi den morto; pa boso no pena manera e otronan cu no tin speransa tambe ta pena.” (1 Tesalonicense 4:13) Aunke cristiannan siguramente ta tristu debí na morto, tin un diferencia. Nan tin conocimentu exacto tocante e condicion dje mortonan i tocante e speransa di resureccion.—Juan 5:28, 29; Echo 24:15.
E conocimentu aki ta duna nan speransa. I e speransa ei, en buelta, gradualmente ta suavisá nan tristesa. E ta yuda nan soportá, i mas. Cu tempu, mescos cu e flor despues dje tempestad, nan por hisa nan cabes for di tristesa i haña goso i satisfaccion den bida un biaha mas.