E Fuente di Curashi Infalibel

“UN ZONIDU di gritu skerpi a detené nos acercamentu abruptamente. Anto, for di un mata na nos banda robes, dos para a core bin riba nos cu halanan di span. Dilanti nos, tabatin dos webu den un buracu chikitu den e tera. E paranan a prevení nos di trapa accidentalmente riba nan neshi. Cada biaha cu nos a purba yega mas cerca i saca un potret dje bunita webunan cu spat bruin, e paranan a ripití nan demostracion di menasa. ‘Esta curashi,’ nos a pensa.

Esei tabata e experencia di cuater adulto cu tabata acercando e neshi di un ‘dikkop’ pintá (Burhinus capensis na latin). Un para mas chikitu ta e lopi di blacksmith (Vanellus armatus na latin). Den e buki Everyone’s Guide to South African Birds, e expertonan di para Sinclair i Mendelson ta splica: “Parehanan cu ta broei ta protehá nan neshi i yunan vigorosamente i ta bira masha agresivo ora cualkier intruso yega cerca. Nan no tin miedu dje tamaño dje invasor i ta bula bai haltu cu gritu skerpi, haci un duik sin miedu asta riba hende den un intento pa spierta nan pa keda leu.”

Algun hende a mira olifantenan individual grandi cana sin ningun intencion den direccion dje neshi di un lopi di blacksmith, provocando e despliegue dje para. E olifantenan generalmente ta complacé dor di bira bek.

Unda paranan ta haña e aparente curashi ei? E ta originá cu Esun cu a crea nan. Jehova Dios a programá e criaturanan chikitu aki cu mecanismonan instintivo pa prevení bestia grandi di haci daño na nan neshi of yunan chikitu.

Un Les pa Cristiannan

Hende cristian por siña un les for di esaki, maske nan kier bai mas aleu cu djis un curashi instintivo. Nan ta ser pidí pa imitá nan Doño, Jesucristo, kende sin miedu a obedecé e mandamentunan di Dios. (Hebreo 12:​1-3) Bijbel ta condená hende cobarde cu ta hala atras for di sirbi Dios. (Hebreo 10:⁠39; Revelacion 21:⁠8) N’e mésun tempu, Jehova ta comprendé nos formacion imperfecto i sa cu tin biaha nos por peca of falta e curashi necesario pa haci su boluntad completamente. (Salmo 103:​12-14) Kico un persona por haci si miedu ta haci’é tene su mes atras for di haci loke ta bon?

Un cristian mester acudí na Dios den oracion pa fortalesa pa enfrentá prueba i sigui haci e boluntad divino. Bijbel ta contené e promesa trankilisante aki di Jehova su yudansa: “E ta dunando poder na esun cansá; i esun sin energia dinámico e ta haci abundá den pleno potencia. Mucha hombernan lo cansa i tambe fatigá, i hóbennan mes lo trompecá sin falta, pero esnan cu ta sperando den Jehova lo recobrá poder. Nan lo subi cu hala manera águila. Nan lo core i lo no fatigá; nan lo cana i lo no cansa.” (Isaías 40:​29-31) Hopi hende imperfecto a experenciá e berdad dje palabranan aki i ‘for di un estado débil a ser hací poderoso.’ (Hebreo 11:34) Un bon ehempel tabata apostel cristian Pablo, kende a skirbi: “E Señor a para band’i mi i a infundí poder den mi, pa mediante mi e predicacion ser efectuá plenamente i tur nacion por tend’é.”​—⁠2 Timoteo 4:⁠17.

Asta personanan recien interesá cu kier bira siguidor di Jesucristo por experenciá un yudansa fortalecedor asina. Considerá un homber sur-africano yamá Henry, kende tabata e tesorero di su iglesia i tabata biba como bisiña di su pastor. Henry tabata buscando e berdad. Apesar di su vínculo cu e iglesia, un dia el a aceptá e oferta di un studio di Bijbel grátis cu Testigonan di Jehova. Cu tempu, el a expresá e deseo pa bira un Testigo i a puntra ki pasonan e tabatin cu dal pa alcansá e meta ei. E Testigonan a splica cu na promé lugá lo e mester a renunciá di su iglesia. (Revelacion 18:⁠4) Siendo cu e pastor tabata su bisiña i amigu, Henry a sinti cu lo e no por a djis skirbi un carta di renuncia pero lo mester a splica e asuntu cara-cara. El a haci esaki cu curashi.

E pastor a keda sorprendí i despues a bishitá Henry, compañá pa e presidente dje sinodo i otro miembronan dje iglesia. Nan kier a sa pakico el a bandoná nan iglesia pa bira miembro di un religion cu, segun nan, no tin e spiritu santu di Dios. “Na promé instante, mi tabatin miedu di contestá nan,” Henry a splica, “pasobra semper nan tabatin un gran influencia riba mi. Pero mi a pidi Jehova su yudansa den oracion, i el a capacitá mi pa haci e defensa aki: ‘Di tur religion internacional, cua ta e único cu ta usa Dios su nomber, Jehova? Esei no ta Testigonan di Jehova? Boso ta kere cu Dios lo permití nan di carga su nomber i no duna nan tambe su spiritu santu?’ ” E oficialnan di iglesia no por a refutá tal razonamentu. Agradicidu pa e conocimentu i fortalesa cu Dios ta proveé, awor cu curashi Henry ta participá cu Testigonan di Jehova den e ministerio di cas-pa-cas.

Sí, pa ser un cristian berdadero ta exigí curashi. Segun cu e fin dje mundu aki ta yega cerca, pruebanan di fe lo aumentá. Satanas kier horta e sirbidornan di Dios di nan maraviyoso speransa di bida eterno dor di purba kibra nan integridad na Jehova. (Compará cu Revelacion 2:10.) Pero nos no mester entregá nunca. Asta ora pa un tempu nos ser vencí dor di miedu, Jehova por yuda nos recobrá. Sigui acudí na dje pa fortalesa pa sigui haci su boluntad. Corda, esun cu a crea paranan sin miedu ta e Fuente di curashi infalibel. En berdad, cristiannan berdadero mester “tin curashi i bisa: ‘Jehova ta mi yudante; lo mi no tin miedu. Kico hende por hací mi?’ ”​—⁠Hebreo 13:⁠6.