Testigonan di Jehova Rond Mundu
Nigeria
NIGERIA ta situá den e curva n’e base dje parti west di Africa. Situá n’e Golfo di Guinea, e ta djis parti nort dje evenaar i tin mas cu 88 miyon habitante.a
Durante e último dos aña di sirbishi, e oficina di sucursal di Watch Tower Society na Nigeria a duna atencion special n’e hóbennan. Un investigacion den e congregacionnan di Testigonan di Jehova a demostrá cu 80 porciento di esnan cu a cuminsá predicá e bon nobo na Nigeria durante 1992 tabatin entre 10 pa 20 aña di edad. Di esnan bautisá durante e aña, 63 porciento tabata dje grupo di edad ei.
Hóbennan Ta Extendé Nan Mes pa Traha Pionero
Hopi hóben ta drentando e trabou di tempu completo como pionero. Un pionero yamá Hannah ta bisa: “Ora mi tabata cerca di caba scol, mi a bishitá esnan cu tabata asistiendo n’e Scol di Sirbishi di Pionero, unda mi a topa dos ruman muher di edad. Mi a pensa den mi mes, ‘Si e dos rumannan ei por traha pionero, pakico ami no por?’
“Pues despues cu mi a caba scol, mi a bira un pionero. Tres luna despues mi a topa Josephine di 26 aña di edad, un adorador di djudju. El a bisa: ‘Boso, Testigonan di Jehova ta mal hende. Boso no ta celebrá Pascu of usa amuleto.’ Mi a contestá cu si e permití mi studia Bijbel cuné, lo e siña pakico nos no ta practicá e cosnan ei. El a invitá mi pa bolbe bek. Pronto el a cuminsá asistí n’e reunionnan i a haci hopi cambio den su bida. Na december 1990 el a ser bautisá. Desde augustus 1991, Josephine ta trahando como pionero. Ora el a asistí n’e Scol di Sirbishi di Pionero aña pasá, el a introducí mi na su compañénan di klas como su mama spiritual!”
E Video i e Salon di Reino
Un dje grabacionnan di video dje Sociedad a yuda un congregacion chikitu obtené tereno pa un Salon di Reino. Buscando un tereno pa cumpra, cuater ruman a acercá e ‘onodji,’ e gobernador tradicional dje área. El a ofrecé nan un pida tereno pa 20.000 naira (US$ 1.025). E congregacion no tabatin moda di paga asina tantu, ya cu tabatin solamente 17 publicador pa financiá e proyecto. E onodji a bisa cu lo e pensa riba un otro sitio.
Algun luna despues, un dje ancianonan di congregacion a bishitá e cas dje onodji. E onodji tabata mirando un grabacion di video di su coronacion. E anciano a bisa: “Mi tin un video cu mi kier pa bo mira. E yama Los testigos de Jehová—La organización tras el nombre.”
Mas despues, e anciano a puntra e onodji kico el a pensa dje video. “Mi a wak e film cincu biaha,” e onodji a bisa. E anciano a recordá e onodji dje Salonnan di Reino cu el a mira den e video i a splica cu e congregacion local kier a edificá algu parecido. Despues e anciano a puntra si e congregacion por a cumpra algun tera pegá cu un pida tereno chikitu cu nan tabatin caba. E onodji a contestá: “Ayera nochi despues di wak e video, mi a pensa dje mésun cos.” Cu esei, el a señalá 6 meter di tera pegá cu e propiedad dje congregacion. “Boso por haña esaki,” el a bisa. “Den largura, boso por tuma cuantu cu boso mester. Prepará e documentonan i lo mi firma nan.”
[Footnotes]
a Pa informacion adicional, mira e Calendario de los Testigos de Jehová para 1994.
[Caption on page 9]
DETAYENAN DJE PAIS
Aña di Sirbishi di 1993
CANTIDAD MAXIMO DI PUBLICADOR:
174.582
PROPORCION:
1 Testigo pa 507
ASISTENCIA NA MEMORIAL:
473.245
PROMEDIO DI PUBLICADOR PIONERO:
19.777
PROMEDIO DI STUDIO DI BIJBEL:
242.028
CANTIDAD BAUTISA:
8.888
CANTIDAD DI CONGREGACION:
3.289
OFICINA DI SUCURSAL:
STAD BENIN, ESTADO EDO