Congreso “Siñansa Divino” di Etiopia Un Tempu di Goso Special

NO TABATA Etiopia su promé congreso di districto den libertad, pero e tabata definitivamente special. Desde cu e Testigonan di Jehova a obtené reconocimentu legal dia 11 di november, 1991, nan a reuní pa di tres biaha den e stadion di mas grandi dje pais, e Stadion di Stad, net den centro di Addis Ababa. Ya cu e stadion aki inicialmente no tabata disponibel riba djadumingu ni ningun otro facilidad suficiente grandi por a ser hañá, e programa a ser comprimí den tres dia, for di djahuebs pa djasabra, 13-15 di januari, 1994.

E tres dianan aki a deleitá no solamente dje bunita weer templá bou di cielu blou sino tambe den iluminacion spiritual cu e impacto completo di “Siñansa Divino.” Den e ambiente di un areglo floral atractivo rond dje plataforma, e tema dje congreso ei a resaltá notablemente den forma di letter amárico.

Pero kico a haci e congreso special? Huntu cu e programa ricu, tur hende su pensamentu i sintimentunan tabata fihá riba nos hermandad internacional amoroso i e manifestacionnan claro dje bendicion di Dios riba su pueblo den e forma di aumento crecementu di Reino. Tabatin rond di 270 delegado stranhero for di 16 pais, incluyendo asta Djibouti i Yemen. Mas cu mitar a bini for di weer di winter di Europa i Nort América. E bishitantenan a incluí dos miembro dje Cuerpo Gobernante di Testigonan di Jehova, Lloyd Barry i Daniel Sydlik.

Hospitalidad tradicional di Etiopia combiná cu amor di curason pa nan rumannan di bishita a resultá den un entusiasmo cu a surpasá vence barera di idioma. E saludonan no tabata simplemente dunament’i man sino brasa cu sunchi, te na seis biaha! Hopi bishitante a lesa tocante e trabou di Reino na Etiopia i tabata sa cu nan rumannan etiopio tabata wardadornan di integridad probá cu a perseverá atrabes di encarcelacion i otro formanan di persecucion.a Pero e delegadonan bishitante tabata sorprendí pa mira asina tantu hende yong mustrando caranan contentu i un cortesia cu ta desvaneciendo den hopi pais awe. Hopi ruman muher etiopio a bisti nan pañanan tradicional blancu, ábilmente bordá, agregando asina un toke special n’e spiritu berdaderamente festivo.

E bautismo riba djabierne a resultá di ta emocionante. Un fila largu di 530 persona recien dedicá, for di 10 pa 80 aña di edad, a extendé dwars dor dje mitar parti dje veld den e stadion. Esaki tabata hopi mas cu cualkier hende a spera​—⁠mas cu 1 pa cada 7 Testigo den e pais. Ki un evidencia dje bendicion di Jehova riba su pueblo aki! E bistaso aki a causa hopi lágrima di goso, cua a ser aumentá dor dje bunita cantamentu di mas cu 40 delegado italiano. Hopi a pensa riba e palabranan profético di Isaías 60:5: “N’e tempu ei lo bo mira i siguramente bira radiante, i bo curason realmente lo tembla i expandé, pasobra e rikesa di laman lo dirigí su mes na bo; e recursonan mes dje nacionnan lo bini cerca bo.”

Causanan Special pa Goso

E bendicion di Jehova a ricibí mas énfasis riba djabierne, ora rumannan entrevistá a conta con e trabou di Reino na Etiopia a cuminsá nobo-nobo. E entrevistanan aki a ser conducí cu un grupo di e promé misioneronan cu a sirbi ei den añanan 50 i 70. Mas cu 8.000 persona a tende Ray Casson, John Kamphuis i Haywood Ward describí nan trabou di educacion bíblico, cuminsando dia 14 di september, 1950, ora nan a yega na Addis Ababa. E gobiernu imperial dje dianan ei a rekerí pa nan ta activo den educacion general. Pues nan a establecé un scol pa educacion di adultonan den e centro dje stad, presentando un variedad di materia. Pero den nan tempu liber, e misioneronan aki a busca pa adelantá educacion fihá riba siñansa divino. Nan mester a lucha pa siña amhárico, un idioma complicá cu un alfabet di 250 letter. Mas o ménos mitar aña a pasa promé cu nan a logra conducí nan promé studio di Bijbel na cas. Rond di 43 aña despues, nan a topa hende riba caya cu a corda e ex-maestronan di scol aki. Sin embargo, n’e congreso nan a alegrá pa ser uní atrobe cu decénas di nan ex-studiantenan di Bijbel kendenan a bira balente den fe, i kendenan a introducí nan na nan propio yunan i nietunan spiritual.​—⁠1 Tesalonicense 2:​19, 20.

E auditorio gososo i masha atento a aplaudí pa basta ratu no solamente p’e entrevistanan cu ex-misioneronan sino tambe pa informe i saludonan di Alemania, Cánada, Inglatera, Israel, Italia, Kenia, Merca i Ulanda​—⁠cu e representantenan stranhero a trece. Esaki a bolbe subrayá e hermandad mundial amoroso dje pueblo di Dios. E discursonan principal cu e rumannan ungí dje Cuerpo Gobernante a presentá, huntu cu nan oracionnan di curason, tambe a conmové e auditorio profundamente. E hóbennan den e stadion por a mira nan mes den e personahenan den e drama tocante hóbennan cu ta corda nan Creador, presentá den un manera masha natural i bibu. Ademas dje publicacionnan nobo na ingles, tres publicacion nobo na amhárico a producí masha entusiasmo.b

Durante pausa i na otro momentonan, tabatin oportunidad excelente pa cera conocí cu hopi individuo kerí. Por ehempel, net den e promé rij, cu un garoti trahá na man, tabatin sintá e publicador di mas edad na Etiopia, Tulu Mekuria. Aña pasá, n’e edad avansá di 113 aña, el a bautisá como Testigo di Jehova. N’e congreso aki e tabatin e goso di mira su esposa di 80 aña di edad sigui su ehempel, birando asina su ruman spiritual tambe. Su presencia durante henter e programa tabata un bunita inspiracion pa esnan mas hóben. Un hóben asina tabata Yohanes Gorems, kende na edad di 16 aña i ainda un studiante di scol a sirbi caba pa cuater aña como un publicador pionero regular. E i otro pioneronan di edad escolar kendenan ta asta mas yong a siña cumpra e tempu oportuno, por ehempel dor di testificá mainta trempan riba caminda pa scol of dor di usa pausanan i oranan despues di scol.

Ki Ehempelnan di Integridad!

Cientos di ruman den e auditorio a experenciá pasa den encarcelacion i tortura bou di gobiernunan anterior. Mandefro Yifru ta mira bek riba cincu aña asina den prison, pero awor e ta disfrutá sirbiendo na Addis Ababa den e oficina recien establecí, cu ta percurá pa traduccion, imprenta i expedicion. Un otro hóben cu ta sirbiendo cuné, Zecarias Eshetu, no a desviá di su integridad ocho aña pasá ora su tata a ser matá dor cu el a mantené neutralidad cristian durante tres aña di encarcelacion. Zecarias, un di cincu yu, tabatin dies aña di edad ora su tata a bai prison. Meswat Girma i su ruman muher, Yoalan, awor yegando nan binti aña di edad i bayendo scol ainda, ta corda nan tata solamente di potret, ya cu nan tabata masha chikitu ora el a ser ehecutá inesperádamente pa su neutralidad. Su lealtad a inspirá nan, i ámbos ta sirbiendo como pionero regular, mescos cu nan tata tabata haciendo n’e tempu di su morto.

Un otro wardador di integridad tabata Tamirat Yadette, kende ta sirbiendo awor como pionero special den un bunita region di Rift Valley. Debí na su neutralidad cristian, el a pasa tres aña den siete diferente prison, algun biaha na cadena i sometí na sota severo. Sin embargo, den prison el a yuda mas cu un dozein di hende tuma nan posicion p’e Reino di Dios.

Tesfu Temelso, sirbiendo awor como superintendente di circuito, a ser encarcelá 17 bes durante su añanan como pionero special. E tin cicatris dje sotanan, pero e ta emocioná pa mira cu tin congregacionnan den su asignacionnan anterior. Decénas di ruman homber i muher for dje congregacion Akaki a sufri encarcelacion i crueldad, tog e congregacion a crece na mas cu cien publicador. Nan a edificá e promé Salon di Reino di Testigonan di Jehova na Etiopia. For di Dese, un pueblo den un área pintoresco aproximadamente 300 kilometer nort dje capital, a bini un grupo di cincu ruman kendenan a enfrentá morto i a mira un ruman local muri dje tortura cu el a ser sometí na dje. Un anciano entre nan, Maseresha Kasa, a splica cu el a perseverá durante seis aña di encarcelacion, no pasobra e tabata special den cualkier manera, sino simplemente pasobra el a siña dependé riba Jehova.​—⁠Romano 8:​35-39; compará cu Echo 8:⁠1.

Asta recientemente, otronan a demostrá nan fieldad bou di prueba. Un grupo grandi a bini n’e congreso for di un pais den cercania unda, debí na nan neutralidad, e Testigonan a ser nengá proteccion policial, documento di biahe, certificado di matrimonio, tratamentu di hospital i empleo. Tempu cu tabatin guera cerca di Mesewa, un haf eritreano na Laman Corá, henter e congregacion, un total di 39 persona, incluyendo mucha, a biba pa mas o ménos cuater luna bou di un brug abou den e desierto pa scapa e bombardeo di nan casnan dor dje gobiernu anterior. Den e circunstancia di desierto aki di calor i privacion, nan consideracion dje texto diario i otro reunionnan a duna nan fortalesa i un apego estrecho na Jehova i tambe un na otro. Dos ruman muher pionero special sirbiendo cerca e fuente dje riu Nilo Blou a soportá menasa di multitud desordená i hostigamentu molester instigá dor dje Iglesia Ortodox, pero e dos rumannan a perseverá i a mira varios studiante di Bijbel simbolisá nan dedicacion mediante bautismo n’e congreso aki.

Un ruman homber a relatá su prueba di isolacion na un trabou alehá den e region secu di Ogaden, no leu for di Somalia. El a keda spiritualmente bibu dor di predicá i anto tene reunionnan cu personanan interesá, incluyendo dokternan médico, kendenan a beneficiá di siñansa divino i awor ta siña otronan. Un otro ehempel excelente di wardamentu di integridad tabata un pionero special na Addis Ababa kende, na 1992, a ser batí brutalmente i lagá pa morto dor di un multitud desordená instigá pa sacerdotenan ortodox. Felismente, el a recobrá i ta sigui sirbi den e mésun teritorio. E sonrisa radiante riba su cara no ta revelá ningun rastro di amargura. P’e, mescos cu esnan probá i esnan mas nobo, e Congreso “Siñansa Divino” aki tabata un festival di goso.

E organisacion di congreso a funcioná suavemente, haciendo e bishitantenan pensa cu e boluntarionan enbolbí tabatin hopi aña di experencia. Realmente, nan a haci progreso rápido durante e último dos añanan. E congreso di tres dia a finalisá muchu lihé. E asistencia máximo riba djasabra tabata 9.556. E television nacional, radio i corantnan a duna informe faborabel. Tur persona por a mira cu Jehova tabata haciendo su pueblo spiritualmente ricu. E auditorio a incluí miles di persona interesá cu a cuminsá beneficiá di “Siñansa Divino.” Un campo hanchu ta habrí pa Testigonan di Jehova den e pais aki di rond di 50 miyon habitante, i e congreso a fortalecé tur den nan determinacion pa usa e tempu restante den e sistema di cosnan aki pa yuda esnan sincero beneficiá tambe di siñansa divino.

[Footnotes]

[Caption on page 23]

Addis Ababa, 13-15 di januari, 1994

[Caption on page 24]

Un grupo di pionero na Addis Ababa (drechi); wardadornan di integridad di cua tur a ser encarcelá (abou); un Testigo di 113 aña di edad i su esposa