‘Un Solo Página Por Bora e Scuridad Manera un Strea’
AWE, traduccionnan dje Scritura Santu ta casi universalmente disponibel. Sin embargo, e bataya riba Bijbel hopi bes tabata un asuntu di bida i morto.
Den e buki Fifteenth Century Bibles, Wendell Prime a skirbi: “Trinta aña despues dje invento di imprenta, e Inkisicion tabata den accion completamente exitoso na Spaña. Dje 342.000 personanan castigá dor di Inkisicion den e pais ei 32.000 a ser kimá bibu. Posesion di un Bijbel a hiba nan n’e vlamnan di martirio. Igualmente teribel tabata e agente di destruccion aki na Italia, tantu nort como sur. Arsobispunan, yudá p’e Inkisicion, tabata candelanan devorador pa tantu Bijbelnan como nan lectornan. Nero a laga algun cristian briya como lus den e mundu dor di pega nan na candela, cosé den sacu, cubrí cu breu, usando nan como bela pa iluminá e esena di su orgianan. Pero e cayanan di stadnan europeo a briya cu kampvuur di Bijbel. Bijbelnan no tabata manera lectornan cu por a ser hací pober, kitá sunú, torturá, mutilá i tratá como paria. Asta un página cu a sobrebibí por a bora e scuridad aki manera un strea.” (Letter cursivo di nos.)
Loke autor Prime ta describí en realidad a tuma lugá den e caso dje página di Bijbel reproducí aki. E ta e página colofon, esta, e página final dje buki cu un inscripcion cu ta identificá e traductor. E dos columnanan paralelo n’e cabes ta e versículonan di conclusion di Apocalípsis, of e buki di Revelacion.
Relacioná cu e buki aki, The Cambridge History of the Bible ta declará: “Bonifacio Ferrer su traduccion di Bijbel na idioma catalan a ser imprimí na Valencia, Spaña, 1478; tur copia disponibel a ser destruí dor dje Inkisicion promé cu 1500, pero a keda un solo página den e biblioteca Mericano dje Sociedad Hispano.” (Letter cursivo di nos.)
Wendell Prime a skirbi tambe: “Pa cleronan terorisá e único manera aceptabel pa trata un Bijbel tabata di kim’é. Lo tabatin mas candela santu si nan por a haña mas Bijbel pa kima. Den hopi lugá no tabatin kampvuur di Bijbel simplemente debí cu esnan den autoridad tabata asina diligente pa haña tur Bijbel di manera cu no tabatin mas pa kima.” Apesar di tal esfuerso intenso pa caba cu Bijbelnan intencioná pa hende comun, hopi copia a scapa destruccion. Prime a agregá: “Bijbelnan a ser preservá dor cu exiliadonan a bai cu nan, of dor cu nan a ser scondí manera piedra of metal precioso den tempu di afliccion i peliger.”
Isaías, profeta di Dios, a skirbi: “Tur carni ta yerba berde . . . E yerba berde a seca, e flor a marchitá; pero en cuanto e palabra di nos Dios, lo e dura pa tempu indefiní.” (Isaías 40:6, 8) Durante e siglonan, gran cantidad di stimador di Bijbel i hopi traductor balente a risca hopi i a sufri mashá pa causa dje Palabra di Dios. Sin embargo, esfuersonan humano so nunca por a garantisá sigurá su preservacion. P’e preservacion aki, nos ta gradicí e Autor di Bijbel, Jehova.
[Caption on page 7]
Cortesia di E Sociedad Hispano di Merca, New York