Ta Importa Con Bo Ta Adora?

E PUEBLO africano tabata horna den e solo di merdia. Biniendo di un valle cerca ta e sonido di batimento rápido di tambor, cantamento, i aplauso gozoso. Pero esei no ta un asunto social. Esei ta adoracion africano tradicional. Sin embargo, e sonido ta competi cu confusion di boz biniendo di un misa carismático den e becindario. Den dje adorador den éxtasis ta haci “curacion” milagroso i ta papia na lenga. Na otro banda dje pueblo també tin un otro clase di adoracion. E boz fuerte di un proclamador ta yama otro adorador islámico na oracion.

Sí, un gran cantidad di debocion religioso ta existi den hopi stad i pueblo africano. Pa hopi generacion hende africano a keda contento pa sigi nan mes tradicion religioso. Pero, despues misionero di cristiandad a bini, sigiendo ehército militar di diferente nacion europeo, i cruelmente a haci esfuerzo pa “cristianiza” tur hende​—⁠incluyendo cambiamento di asta nan nomber personal na nomber cristian.

Cu cua resultado? Un clase di religion cu ta bruha kerimento i costumber tradicional africano cu kerimento religioso di stranhería. Te ne dia djawe hopi adorador “cristian” ta usa contra i amuleta tradicional. Sin embargo, misionero di cristiandad ta haci mal representacion grosero di berdadero cristianismo, i ta laga atrás un herencia di rencor. Te na un grado enorme, nan ta responsabel pe actitud di prehuicio contra e Bijbel cu ta existi den algun africano djawe.

No obstante, hopi forma di “cristianismo” ta ser practica ainda na tur parti. Den tempo reciente grupo religioso carismático ta bira specialmente popular; religion haciendo curacion religioso ta plama. Un periodista a splica e atraccion di tal religion bisando cu ‘e concepto africano di religion ta cu e mester ta probechoso. Pa mente africano religion mester ta capaz pa duna satisfaccion material directo na existencia humano. P’sei, pa hende africano cu ta kere cu comunicacion spiritual ta un necesidad den casi tur cos, e moda di funcioná di religion spiritista [of cu ta haci curacion] ta conforme cu exigencia di nan bida.’ Sin embargo, lastimosamente hopi religion carismática a ser establecí claramente como casi un negoshi.

Awe, tin mas cu 6.000 secta religioso cu ta funciona den Africa. Kizás bo a kere cu tur religion i secta asina ta clave pa salbacion. Pero, e berdadero pregunta ta, Kico Dios ta pensa?

Cualkier religion por agrada Dios?

Siguramente, e Creador dje universo no ta láganos sin guía den e asunto aki. (Amos 3:7; Echo 17:​26, 27) I evidencia ta innengable di cu hende por haya guía divino den e Bijbel. No, e Bijbel no ta e buki di hende blancu, segun e opinion di algun africano. Realmente, ningun hende​—⁠ni blancu ni pretu​—⁠a origina e Bijbel. “Tur Scritura ta inspira di Dios,” segun 2 Timoteo 3:16. E siñanza berdadero i práctico dje Bijbel, su existencia desde antigua, su conserbacion apesar di atake malicioso, su profecíanan exacto i plamamento sin igual den tur e mundo​—⁠esei ta duna prueba claro di cu e tin un origen divino.

Kico e Bijbel ta síñanos? Entre otro cosnan, e ta bísanos cu ta existi un solo “Dios berdadero.” (Juan 17:⁠3) Ya cu esei ta e caso, con por existi berdad den tur religion? Grupo religioso no ta choca cu otro den asunto tanto básico como ken ta Dios i kico e tá? Santiago, un skirbidor bíblico a menciona e “religion puro i sin mancha.” (Santiago 1:​27, Testament Nobo) Si ta necesario pa identifica e religion berdadero, també mester existi religion falso of hipócrita. Esei ta contradici e idea di cu tur religion ta simplemente diferente manera pa acudi na Dios.

Norma dje Creador pa adoracion

Cua ta e manera correcto pa adora Dios? E Bijbel ta síñanos cu e berdadero adoracion tin raíz den conocimento exacto. E gran profeta Jesucristo a bisa un señora samaritana una bez: “Boso ta adora loke boso no ta conoce.” (Juan 4:22) Tal bez esei ta cierto di bo també? Bo a wordu siñá cu Dios Todopoderoso tin un nomber personal, esta, Jehova? (Salmo 83:18) Bo ta conoce su propósito pa hende i pe tera? (Mateo 6:​9, 10; Efesio 1:​9, 10; 3:11) Bo religion ta ofrecébo un speranza realista di un mihor futuro? I si bo ta considera cu bo ta un hende cristian, bo por splica bo kerimento usando e Scritura, of bo kerimento ta simplemente un herencia duná na bo cu bo realmente no a investiga?

Si bo ta haya cu bo ta falta conocimento exacto, bo por obtene esei mediante un estudio dje Palabra di Dios, e Bijbel. Jehova Dios ta spera pa adorador berdadero di dje sa loke e Bijbel Sagrado ta siña. Mas ainda, e ta spera pa nan aplica e Bijbel den nan bida. Nos actitud mester ta mescos cu e actitud dje salmista cu a bisa: “Bo palabra ta un lampi pa mi pia, i un luz pa mi camina.” (Salmo 119:105) Te na ki grado bo religion a yudábo conoce i comprende e Bijbel?

Un otro rasgo importante di e adoracion berdadero ta fe den Jesucristo, no solamente como un gran profeta sino como e Yiu unigénito di Dios. E Scritura ta declara claramente cu Jesús ta e “Agente Principal di bida.” (Echo 3:15; 4:12) Hopi hende ta bisa cu nan tin fe den Jesús, pero ki berdadero ta nan fe? Berdadero fe den Cristo ta exigi obedencia na su instruccion. Dios mes a favorece esei ora el a declara: “Esaki ta mi Yiu, esun stimá; scuché.” (Marco 9:⁠7) Pues, adorador berdadero ta haci esfuerzo pa camna den e pasonan di Jesús tanto exactamente posibel. (1 Pedro 2:21) Un manera pa haci esei ta di participa den e trabao di predicacion público cu el a principiá. (Mateo 4:17; 10:​5-7) Bo religion ta animábo pa tene un parti personal den tal trabao?

Amor també ta un requisito di e adoracion berdadero. Jehova Dios ta ser pintá como e personificacion mes di amor, i Jesús a bisa sigidor di dje cu e amor cu nan ta manifesta entre nan mes ta nan identificacion. (Juan 13:​34, 35; 1 Juan 4:⁠8) Tumando na cuenta e hopi miyones di hende djawe cu ta yama nan mes cristian, e mundo no mester ta practicamente yen di amor? Pero, en realidad, e mundo djawe ta resulta di ser un lugar henteramente sin amor. Gera a mata miyones di hende den e siglo aki so. Crimen i violencia ta sigi aumenta. Pues, puntra bo mes, ‘Si tur hende ta sigi mi religion, e mundo lo ser un lugar mas amable?’

Finalmente, e Bijbel ta mustra cu adorador berdadero mester keda apartá for di mundo cu no ta conoce Dios. Ora Dios a aparta e nacion di Israel di antigua como e wardador di adoracion puro, el a adverti su pueblo pa evita asociacion estrecha cu nacion degradá rond di nan. (Deuteronomio 7:​1-6) Den Juan 17:​16, Cristo Jesús també a bisa di su sigidornan: “Nan no ta parti di mundo, mescos cu mi no ta parti di mundo.” Berdadero adorador di Dios no ta métenan den político, no ta practica inmoralidad, no ta participa den comercialismo haragán, ni no ta sigi filosofía cu ta desonra Dios. (Juan 18:36; 1 Juan 2:​15-17) Nan ta obedece e mandamento skirbí den Romano 12:2: “Kita for di conformacion cu e sistema di cosnan aki.” Esei ta loke bo religion ta animábo pa haci?

Yudanza ta disponibel

Sí, e manera cu bo ta adora realmente ta importa Dios. Segun Dios, tin un solo religion berdadero. (Efesio 4:​4-6) Nos consideracion breve aki a toca algun punto clave di siñanza bíblico. Pakico no haci esfuerzo pa siña mas?

Apesar di bo crianza religioso, Testigo di Jehova por yudábo haci esei. Nan ta conocí den tur e mundo pa nan trabao intensivo di educacion bíblico. Nan ta síntinan obligá di yuda hende di tur raza i educacion religioso gana un comprendimento mas profundo di e Bijbel. (Proverbio 2:​1-6) Nan ta publica literatura bíblico bon fundá.a Realmente, nan asta lo bishitábo na cas gratis pa siñábo e Bijbel riba un base personal. Miyones di hende den tur e mundo ta beneficiá actualmente di tal programa di educacion bíblico. Pakico bo mes no ta haci esei? En berdad, ta vital pa bo haci esei pasobra e realmente ta importa con bo ta adora.

[Nota]

[Caption on page 5]

Misionero di cristiandad ta haci mal representacion grosero di berdadero cristianismo

[Caption on page 5]

Hopi religion carismática ta negoshi pa gana placa

[Caption on page 6]

Fe den Jesús ta un parti vital di e adoracion berdadero

[Caption on page 7]

Testigo di Jehova ta yuda miyones di hende gana conocimento exacto mediante estudio bíblico di cas gratis