Teniendo Nos Wowo “Simpel” den e Trabou di Reino

REPUBLICA Democrático di Alemania, of loke tabata conocí como Oost Alemania, apénas a alcansá cuarenta aña. Cuarent’i un aña di existencia a terminá dia 3 di october, 1990, ora su teritorio, rond dje tamaño di Liberia of e estado di Tennessee na Merca, a ser integrá den República Federal di Alemania, cua tabata yamá West Alemania.

E reunificacion dje dos Alemanianan a nificá un pakete inmenso di reforma. Loke a separá e dos paisnan no tabata un simpel frontera físico, sino un frontera di ideologia. Kico tur esaki a nificá p’e hendenan aya, i con bida a cambia pa Testigonan di Jehova?

Wende, e revolucion na november 1989 cu a haci reunificacion posibel, a sigui inmediatamente despues di cuater década di socialismo rígido. Durante e periodo ei, actividad di Testigonan di Jehova a ser prohibí, i persecucion di nan tin biaha tabata intenso.a Ora Oost-Alemania a bira liber, tabatin gran euforia den e poblacion. Pero segun e alegria tabata desvanecé, hopi persona a bira desorientá, desapuntá, asta desilusioná. E tarea di integrá e dos Alemanianan den un entidad social, político i económico ta resultando formidabel.

Segun e informe special “162 Tage Deutsche Geschichte” (162 Dia di Historia Aleman) den Der Spiegel, despues dje reunificacion tabatin basta temor pa desempleo, inflacion i aumento di huur. “Mi penshun lo ta suficiente?” hopi na ex-Oost Alemania a puntra nan mes. Ke hubo di bibienda? “Tur caminda na Oost-Alemania edificionan bieu ta cayendo den decadencia, cu cayanan completo birando inhabitabel.” Polucion a alcansá nivelnan horibel.

Enfrentá cu tal desordu social i económico, con Testigonan di Jehova na ex-Oost Alemania a manehá asuntunan?

Teniendo e Wowo Apropiadamente Enfocá

Testigonan di Jehova no tin frontera ideológico. Nan fe basá riba Bijbel ta mescos, sea ta na oost of na west. Cu nan ambiente social den transicion, mayoria Testigo ta mantené balansa spiritual dor di tene nan wowo clabá rib’e meta principal di sirbi Jehova. Pakico esaki ta imperativo?

Pasobra “e esena dje mundu aki ta cambiando.” (1 Corintio 7:31) Un anciano cristian ta comentá cu predicando bou di prohibicion promé cu e Wende a exigí curashi; esei a siña e Testigonan pa confia den Jehova i a entrená nan den manehá e Bijbel. Awor, sin embargo, “nos mester ta mas cuidadoso pa no ser desviá dor di materialismo i ansiedad di bida.”

Libertad i progreso hopi biaha ta ser midí den término material. Hopi hende den e region aki ta sinti un necesidad pa recobrá tempu i busca placer cu anteriormente no tabata posibel. Esaki ta bira bisto ora bo ta coriendo den e cayanan di piedra den e pueblonan di Thuringia i Saxony den sur. Talbes e cayanan mester di mantencion, e casnan ta modesto, pero ki un abundancia di ‘dish’ di satélite pa television! Ta fácil pa un persona ser engañá pa kere cu siguridad i felicidad ta resultá for di haña tur loke e wowo mira. Ki un trampa peligroso esei ta!

Den e Sermon di Ceru, Jesus a papia tocante e peligernan di presta indebido atencion na cos material i ansiedad di bida. “Stop di acumulá pa boso mes tesoro riba tera,” el a spierta. El a agregá: “Lampi dje curpa ta e wowo. Anto, si bo wowo ta simpel, henter bo curpa lo ta briyante.” (Mateo 6:19, 22) Kico e tabata kier men? Un wowo simpel ta un cu ta den foco i cu ta transmití imágen claro n’e mente. Un wowo spiritual cu ta simpel ta tene e imágen dje Reino di Dios claro. Pues, un hende cristian su determinacion pa tene su wowo simpel, claramente enfocá rib’e Reino di Dios, i pa laga ansiedad den fondo, ta yud’é keda spiritualmente balansá.

Esaki por ser ilustrá p’e experencia di un pareha di Zwickau, Saxony, kende a mustra interes den Bijbel n’e tempu dje Wende. Nan negoshi a tuma hopi tempu, tog nan a pone interes spiritual promé, asistiendo na tur reunion cristian. Nan a admití: “For di punto di bista di nos negoshi, nos no por permití e tempu, pero spiritualmente nos mester di dje.” Ki un decision sabí!

Considerá tambe, un famia na Plauen, tambe na Saxony. E esposo tabata un relohero, un artesano maestro cu su mes negoshi. Despues dje Wende, e huur di su lugá a subi drásticamente. Kico e mester a haci? “Lo a costa hopi placa, i mi a siña e berdad di biba p’e berdad.” Pues el a muda na un lugá ménos bon-situá pero cu un huur mas abou. Sí, e relohero a siña masha lihé tocante tenementu di su wowo simpel.

Sin embargo, algun a siña demasiado lat. Un anciano cristian, razonando cu e economia di mercado liber recientemente introducí a primintí hopi, a drenta e mundu di negoshi. Un superintendente biahero a inst’é bondadosamente p’e no laga compromiso di negoshi caba cu su spiritualidad. Sin embargo, lamentablemente, esei ta loke a sosodé. Algun luna mas despues e ruman a renunciá como anciano. El a skirbi despues: “Basá riba mi mes experencia, lo mi consehá cualkier ruman cu ta extendiendo su mes pa privilegio di sirbishi pa no lanta nan mes negoshi.” Esaki no ta nificá cu ser bo mes doño di trabou ta malu pa un cristian. Pero sea nos tin nos propio negoshi of no, prestando demasiado atencion na ansiedad económico por haci nos inboluntariamente esclabo di rikesa. Jesus a mustra e resultado: “Ningun hende por sirbi como esclabo pa dos doño; pasobra sea lo e odia esun i stima e otro, of lo e pega na esun i despreciá e otro.” (Mateo 6:24) E poëta aleman Goethe a declará: “Ningun hende ta mas desesperadamente esclabisá cu esnan cu ta kere falsamente cu nan ta liber.”

Ora nos ta den un tempestad literal kisas nos mester cera nos wowo un tiki pa mira mihor of pone man rond di nos wowo pa tene nos meta na bista. Ora nos ta rondoná pa desordu político, económico of social, concentracion ta necesario pa tene nos meta spiritual na bista. Kico algun cristian ta haciendo pa tene nan wowo simpel den trabou di Reino?

Mas Actividad di Reino

Den henter ex-Oost Alemania, Testigonan ta dedicando mas tempu pa predicá cu nunca promé. Den e último dos añanan, e promedio di tempu dedicá den sirbishi di veld a subi cu 21 porciento. E resultado ta un aumento dramático di 34 porciento den studio di Bijbel di cas. Ademas, e cantidad di pionero regular actualmente ta cuater biaha mas haltu cu e tabata djis dos aña pasá! Miéntras otro hende ta preocupá i keha, mas cu 23.000 hende cristian den loke un tempu tabata Oost Alemania ta enfrentando e situacion dor di tene nan wowo simpel. Esaki a contribuí n’e aumento asombroso den actividad di Reino.—Compará cu Hosué 6:15.

E aumento di actividad ta nificá cu e teritorio ta ser bon-trahá den sur, unda mayoria Testigo ta biba. Hopi nomber di lugá tin un coneccion histórico. Si bo ta gusta servies di porcelana, lo bo reconocé e pueblo di Meissen, cerca di Dresden, como orígen di algun dje porcelana di mas delicado di mundu. Awor tin rond di 130 publicador di Reino na Meissen. Of considerá Weimar, “e capital clásico di Alemania.” E Memorial di Goethe-Schiller den centro dje pueblo ta duna testimonio dje coneccion noble cu e dos escritornan aki i ta un fuente di orguyo pa hopi hende ei. Awe Weimar por ta orguyoso di su mas cu 150 publicador dje bon nobo.

Sin embargo, den nort cosnan ta masha diferente, cu ménos publicador i distancianan mas grandi entre e congregacionnan. Trabou specialmente ta scars. Hopi hende cu tin empleo ta bou di presion pa traha ‘overtime’ pa tene nan trabou. Un ruman cu ta sirbi como predicador di tempu completo den nort ta splica: “Bou di prohibicion cada ruman tabatin mester di proteccion di Jehova den sirbishi di veld, pero hañamentu di trabou no tabata difícil. Awor e situacion a cambia. Nos tin libertad pa predicá, pero nos mester di su guia relacioná cu empleo. Ta costa basta pa custumbrá na un cambio asina.”

E publicadornan ta contentu di por predicá mas frecuentemente? Wolfgang su opinion ta: “Ta hopi mas mihó p’e mesun publicador traha e mesun teritorio cada biaha atrobe. Hende ta confi’é mas i ta mas habrí. Apart di esei, doñonan di cas “no tin bergwensa mas pa papia tocante religion na porta, asta ora hende pasando ei banda por tende. Religion no ta un tópico tabú mas.” Ralf i Martina ta di acuerdo. “Nos ta disfrutá di traha nos teritorio cu mas frecuencia. Nos por conocé e hendenan personalmente i ta emocionante tambe pa traha cu e gran variedad di literatura disponibel.”

Aprecio pa Nos Literatura

Ralf i Martina ta apreciá specialmente e buki La vida... ¿cómo se presentó aquí? ¿Por evolución, o por creación? Pa e hopi hendenan cu a brasa ateismo na ex-Oost Alemania, e buki aki ta resultando di ta un yudansa maraviyoso pa studio bíblico. Tambe nan a deseá un publicacion mas corticu conteniendo material similar. “Ki contentu nos tabata cu e anuncio di publicacion dje foyeto Dios Realmente Ta Interesá den Nos? n’e Congreso di Districto di 1992 ‘Cargadornan di Lus’ na Dresden. E tabata un contesta riba nos oracionnan.”

Hopi persona no-Testigo a yega na admirá e publicacionnan di Watch Tower. Na juli 1992 un orador den educacion social a skirbi pa expresá su “profundo respet i gratitud caluroso” p’e publicacionnan, cu e ta usa pa prepará su discursonan. Na januari 1992 un señora na Rostock a aceptá un copia dje buki Bo por biba pa semper den Paradijs riba tera for di dos Testigo cu a bini na su porta. El a skirbi n’e sucursal aleman: “Mi ta pertenecé n’e iglesia luterano. Mi tin masha respet p’e actividadnan dje organisacion di Testigonan di Jehova. Nan ta declará dicididamente cu hende no por existí mas sin guia di Dios.”

Cuantu guia spiritual iglesianan di cristiandad a duna nan miembronan? E prestigioso corant Die Zeit a comentá na december 1991 cu miéntras e iglesia luterano a “disfrutá den gloria pa un tempu corticu como mama dje revolucion pacífico, su evaluacion público ta parce di ta hundiendo rápidamente.” En berdad, un representante dje iglesia luterano a lamentá: “Hende a confundí bida den e sistema di mercado liber cu paradijs.” Un miembro di iglesia na Magdeburg a skirbi e sucursal aleman pidiendo informacion. Pakico? E cabayero a skirbi: “Despues di a sonreí pa añanan den incredulidad, mi ta firmemente convencí awor cu e mundu aki ta den su último dianan i cu nos lo topa problema grandi den futuro cercano.”—2 Timoteo 3:1-5.

Edificando pa Expansion

Promé cu e Wende, no tabata permití Salon di Reino na Oost Alemania. Awor mester di nan urgentemente; construccion di nan ta hañando prioridad. Esaki ta un otro aspecto di adoracion berdadero cu a pasa den un transicion remarcabel. E experencia di un ruman ta ilustrá con rápido e cambio aki a tuma lugá.

Na mart 1990, djis algun ora despues cu Testigonan di Jehova a ricibí reconocimentu legal na Oost Alemania, un ruman a ser invitá pa duna un discurso na un grupo di Testigo, usando un microfon pa promé bes den su bida. Dos aña i mei despues, e congregacion cu e ta asociá cuné a dedicá un Salon di Reino nobo-nobo. Na fin di 1992, siete Salon di Reino a ser construí pa 16 congregacion. Mas di 30 otro, i tambe un bunita Salon di Asamblea, ta den fase di planificacion.

Wowo Fihá rib’e Reino di Dios

Un anciano cristian ta remarcá: “Djis despues dje Wende, hopi hende a rechasá Bijbel. Nan a pone nan speransa den e gobiernu nobo, cua por fin a primintí mihó condicionnan.” Nan speransa a ser cumplí? “Dentro di dos aña nan a cambia nan pensamentu. Awor hende ta di acuerdo cu nos cu gobiernu humano nunca por trece pas i husticia.”

Multitud di hende a alegrá rib’e desaparicion di socialismo rígido na Oost Alemania, anunciando loke nan a considerá un manisé di oro di ideologia occidental. Pero nan a keda desapuntá. Sin importá cua gobiernu ta na poder, Testigonan di Jehova ta tene nan wowo simpel i firmemente fihá rib’e Reino di Dios, cu ta briya manera un strea den cielu. Tal speransa nunca lo hiba na decepcion.—Romano 5:5.

[Footnotes]

[Pictures on page 26]

Testigonan na Alemania ta usando nan libertad pa participá mas i mas den actividad di Reino