Predicando di Pueblo pa Pueblo na Spaña

JESUCRISTO a biaha “di stad pa stad i di pueblo pa pueblo, siñando i continuando riba su biahe pa Jerusalem.” (Lucas 13:22) Pa cumpli cu e ministerio, Jesus i su disipelnan a predicá no solamente “di stad pa stad” sino tambe “di pueblo pa pueblo.” Aunke lo tabata mas fácil pa concentrá riba e stadnan, nan no a pasa e hopi pueblonan den cunucu forbij.a

Testigonan di Jehova na Spaña tabata enfrentá cu un desafio manera esun cu Jesus a confrontá. Te cu aña 1970, tabatin áreanan grandísimo di teritorio rural intacto cla pa cosechá. (Mateo 9:37, 38) Cientos di pueblo den e cerunan yubioso di nort, riba e sabananan central secu i cant’i costa nunca a ser alcansá cu e bon nobo di Reino.

E Testigonan di Jehova spañó tabata determiná pa no spar ningun esfuerso pa hiba e bon nobo n’e regionnan aki. Pero pakico e hendenan den e áreanan aki mester a warda asina largu pa tende e mensahe di Reino? I con nan a reaccioná?

Reconocimentu Legal Ta Stimulá Testificacion den Cunucu

E trabou di Testigonan di Jehova na Spaña tabata bou di prohibicion desde fin dje guera civil na 1939. Durante añanan 50 i 60, Testigonan celoso a predicá cu cautela den e stadnan, unda nan presencia tabata ménos notabel. Ora nan trabou finalmente a ser legalisá na 1970, tabatin rond di 10.000 publicador di Reino na Spaña. Casi nan tur tabata biba den stad i pueblonan grandi, pero e pueblecitonan di Spaña tambe mester a tende e mensahe di Reino. Ken lo a enfrentá e desafio?

Den añanan 70 un campaña a ser lansá pa alcansá tur área dje península cu e bon nobo. Casi tur luna for di 1973 te 1979, anuncionan special cu a describí e necesidad den diferente region dje pais a aparecé den Nos Ministerio di Reino, e publicacion di sirbishi mensual p’e congregacionnan di Testigo di Jehova. Hopi famia boluntario i interesá a respondé n’e yamada i a pone nan mes disponibel pa sirbi unda e necesidad tabata mas grandi.

E ehempel di Rosendo i su casá, Luci, ta típico. Nan a ser mandá como pionero special (predicador di Reino di tempu completo) na un pueblo di piscadó na nortwest di Spaña i despues a dicidí di keda den e área ora nan a bira mayornan. Rosendo ta reconocé: “Mi mester admití cu nos a pasa atrabes di tempu masha difícil. Trabou seglar tabata duru pa haña, pero nos a steun rib’e yudansa di Jehova i nunca a pasa hamber of falta un dak riba nos cabes. Siguramente e tabata balapena.” Durante e añanan, nan por a yuda den e formacion di cuater congregacion den e region aki di Spaña.

‘Busca Ken Ta Merecedor’

Jesus a bisa su disipelnan pa “busca” esnan merecedor den cada stad of pueblo. (Mateo 10:11) Den áreanan rural di Spaña, e búskeda ta rekerí diligencia i iniciativa, manera Ángel, un ruman di Alicante, a descubrí. Net el a caba di bishitá algun cas den e pueblo di Masías ora el a tende zonido di un gai cu ta canta. El a pensa den su mes, “Si tin un gai, mester tin un cas den becindario—un cas cu nos a pasa por haltu.” Despues di busca rond, Ángel a haña un caminda cu a guia riba lomba di un ceru i finalmente na un cas isolá.

N’e hacienda aki tabata biba José i Dolores, ruman carnal den nan 60’i picu aña. Nan a scucha cu atencion i mesora a aceptá e oferta di un studio di Bijbel. Sin embargo, no tabata fácil pa studia cu e personanan humilde aki, ya cu nan no por a lesa ni skirbi i mester a traducí tur cos for di spañó p’e lenga valenciano, e único idioma cu nan a comprendé. Ademas, nan a enfrentá bastante oposicion di nan bisiñanan. Apesar dje obstáculonan aki, tantu José como Dolores a progresá den e berdad, aunke asistencia na reunion a nificá un biahe largu dor dje cerunan. Cu tempu nan a cualificá pa bautismo i tur dos ainda ta sirbiendo Jehova fielmente.

Rosendo i Luci, mencioná anteriormente, ta corda con un persona paralisá den un cas isolá cerca di Moaña, nortwest di Spaña, a aceptá e berdad. Su nomber tabata María. Ora el a papia pa promé bes cu e Testigonan, e no por a lesa ni skirbi i tabata malu na cama pa hopi aña debí cu el a ser contagiá cu polio na mucha. Su cas tabata rond di dos kilometer for dje caya mas cercano. Tog, e tabata ansioso pa studia Bijbel i su determinacion pa sirbi Jehova pronto a bira bisto. María a siña lesa i skirbi i a cuminsá asistí n’e reunionnan, grácias n’e esfuersonan dedicá dje congregacion. Rumannan homber a cargu’é pa un distancia di 200 meter na un caminda no-asfaltá unda nan a bah’é cuidadosamente den un auto. Apesar di oposicion inicial di su famia, el a progresá te n’e punto di bautismo. Debí n’e confiansa cu su progreso spiritual a dun’é, awor el a siña conducí un auto specialmente adaptá i a completá un curso di educacion básico. “Ora bo por yuda hende manera María, cualkier sacrificio ta bira balapena,” Rosendo ta splica.

Lectornan di Bijbel Ta Respondé di Buena Gana

Den añanan 70 pa promé bes Bijbel a bira disponibel p’e público general na Spaña. Hopi spañó a cumpra un copia, i algun a cuminsá lesa e Scritura. Pilar, di Medina del Campo (Valladolid), tabata lesando Bijbel caba ora Testigonan di Jehova pa promé bes a bishitá su pueblo na 1973. Siendo católico, e tabata desconfiá pa aceptá literatura for dje Testigonan, pero e kier a comprendé Bijbel. P’esei, el a bai di acuerdo pa tene consideracionnan semanal pa contestá su preguntanan di Bijbel.

Haciendo bon uso di literatura publicá dor dje Sociedad Watch Tower, e ruman muhé pionero kende a bishitá Pilar tabata capas pa contestá su hopi preguntanan. Impresioná pa loke e tabata siñando, Pilar despues di varios siman a bai di acuerdo pa studia Bijbel usando e buki E berdad cu ta hiba na bida eterna. Promé cu el a completá su studio dje buki Berdad, el a caba di lesa henter Bijbel i tabata convencí cu el a haña e berdad. El a bira e promé Testigo na Medina del Campo, cu awor tin un bunita Salon di Reino i un congregacion di 63 publicador.

Testigonan spañó ainda ta haña hende cu ta “conciente di nan necesidad spiritual” i cu regularmente ta lesa Bijbel den un esfuerso pa comprendé e boluntad di Dios. (Mateo 5:3) Pepi, un ex-católico kende un tempu a duna les di catisashi den e parokia di Zumaia (nort di Spaña), tabata predicando den un pueblo cercano ora el a topa e pastor dje parokia.

E pastor a bis’é: “Pepi, bo ta perdiendo bo tempu. Den e pueblo aki di Itziar, tin solamente dos hende—un pareha casá—cu tin inclinacion spiritual. E sobránan ta bai misa djis pa custumber.”

Pepi a contestá: “Wel, si tin dos hende cu tin inclinacion spiritual, nan lo bira Testigo di Jehova.”

Pepi a sigui su trabou di predicacion di cas-pa-cas huntu cu e otro Testigonan te ora e pueblo a ser completá. I manera bo por a spera, den un cas isolá, e rumannan a haña net e pareha cu e pastor a mencioná. Nan tabata lesa Bijbel pero no a comprend’é. Nan a aceptá un studio di Bijbel ansiosamente, a progresá rápidamente i a bautisá na april 1991.

Algun hende di curason onrado a siña e berdad simplemente dor di lesa riba nan mes e literatura basá riba Bijbel cu e Sociedad Watch Tower ta publicá. Por ehempel, e Testigonan di Almadén (Ciudad Real) tabata predicando den e pueblecito di Ciruelas (Badajoz) ora nan a haña un señora cu a scucha atentamente na nan mensahe. En bista di su interes claro, nan a ofrec’é un studio di Bijbel di cas. Ma el a rechasá, bisando cu un cabayero di edad tabata dunand’e les di Bijbel caba. Varios otro hende den e área tambe a mencioná e mesun cos. E rumannan a bira curioso i a puntra tocante e cabayero di edad. Nan a haña su adres i a bai haci’é un bishita.

Pa nan sorpresa nan a descubrí cu na Madrid e homber aki, yamá Felipe, a obtené e buki Bo por biba pa semper den Paradijs riba tera. Despues di a les’é completo, el a comprendé cu tabata su responsabilidad pa compartí e bon nobo cu su próhimo. P’esei, e tabata usando e buki pa duna nan les di Bijbel. E rumannan a haci areglo pa studia cuné. Un señora cu ken el a studia Bijbel tambe a aceptá un studio. Aunke Felipe tin 80 aña di edad i no ta gosando di bon salú, e ta haciendo bon progreso den e berdad.

Venciendo Prehuicio

Teritorionan rural sa presentá algun problema singular. Tradicion religioso i supersticion generalmente tin un gara fuerte den área asina, i hopi hende cu ta biba den cunucu tin un desconfiansa profundo pa un “religion nobo.” Algun habitante di pueblo ta specialmente sensitivo pa loke nan bisiña i famia lo pensa si nan cambia nan religion. Pero e poder dje Palabra di Dios por vence tal problema i cambia bida di un persona. Esaki tabata e caso den e pueblo di piscadó di Cangas de Morrazo den nortwest di Spaña.

Roberto, un nativo dje pueblo aki, a bai nabegá na edad di 14 aña pasobra el a anhelá pa independencia. Su bida como marinero comerciante a trec’é den compania di otro nabegante hóben cu a bebe pisá i usa droga pa mata e oranan solitario riba laman. Pronto, Roberto tambe a cuminsá bebe pisá i a bira un drogadicto.

Cu tempu Roberto a regresá cas pero tabata incapas i indispuesto pa stop cu su mal custumbernan. Pa financiá su adiccion na droga, el a bira ladron i a terminá den prison na seis diferente ocasion. Ora e tabatin 18 aña, el a bebe un mescla casi fatal di biña i trankilisante. Dokternan a scapa su bida, pero el a perde e uso di su brasa i pianan. El a bandoná hospital paralisá na brasa i pia. Ni e echo cu e tabata limitá na un rolstoel no a haci’é stop e hábito di usa droga. E tabata desilusioná cu religion, i a parce cu droga tabata tur loke a haci su bida balapena—te cu tres aña despues ora Testigonan di Jehova a bishit’é.

Siñando di cumplimentu di profecianan di Bijbel a yuda Roberto vence su skepticismo. E recepcion caluroso cu el a ricibí na Salon di Reino a convenc’é cu e religion berdadero sí ta enrikesé bida di hende. Den nuebe luna, Roberto a vence su adiccion na droga i a ser bautisá. Apesar di su hendikep físico severo, e ta sirbiendo como pionero pa ocho aña caba. Tambe e ta un anciano di congregacion p’e último dos añanan. Francisco, un di su ex-compañénan, tabata asina impresioná p’e cambionan den Roberto su bida cu e tambe a bira un Testigo i awor ta un sirbidor ministerial. E cambio remarcabel den e supuesto adicto incurabel aki a yuda hende den e localidad ei apreciá mihó e carácter di nos trabou. Un muher asta a trece su yu homber hóben, adicto na droga, n’e Salon di Reino pa mira si e Testigonan lo por a cur’é.

Investigando Bijbel pa Haña e Berdad

Generalmente, hende di cunucu tin asina un aprecio p’e berdad cu esaki hopi biaha ta brongosá e sabionan di mundu. (1 Corintio 1:26, 27) Adelina, un muher tímido di edad medio, ta un di esnan apreciativo aki. E tabatin custumber di tuma su fe católico mashá na serio. Tur mainta sin faya e tabata hinca rudia pa resa, bisando varios Nos Tata i Ave Maria. El a dirigí su oracionnan na un “santu” diferente cada dia di siman—pa haci sigur cu por lo ménos algun oracion ta ser tendé.

Ora Adelina a cuminsá studia Bijbel, el a dirigí e mesun celo religioso aki na su fe nobo. Ni su timides no a strob’é, aunke e promé biaha cu e i su casá a bai Salon di Reino, a tuma nan dies minut pa haña suficiente curashi pa drenta. Pero, unabes paden, el a scucha atentamente. Na un ocasion, el a siña tocante e Reino di Mil Aña di Cristo. E tópico aki a fasin’é, i ora el a regresá cas, e kier a lesa mas tocante dje den su Bijbel. Pero ni e ni su casá tabata sa unda pa haña e informacion, aunke nan a pensa cu el a ser mencioná un caminda den e buki di Revelacion. Pues Adelina a cuminsá lesa Revelacion e anochi ei te ora e finalmente a yega na capítulo 20 den e oranan tempran di mainta.

Na un otro ocasion, Adelina a siña cu ta apropiado pa un esposo representá su esposa den oracion. Aunke e tabata dispuesto pa haci oracion, su esposo no tabata sa kico pa bisa den oracion. E mesun anochi ei, Adelina a dicidí pa busca instruccion den Bijbel. Dos’or di mardugá, el a spierta su esposo pa bis’é cu el a haña Mateo capítulo 6, cua ta considerá e tópico di oracion en detaye. Despues di lesa Jesus su instruccionnan, su esposo finalmente a haci un oracion pa nan dos. Awor tantu Adelina como su casá ta Testigo di Jehova.

Un Cosecha Excelente

Despues di casi 25 aña di predicacion den cunucu dor di sirbidornan celoso di Jehova, tur skina di Spaña a tende e bon nobo. Manera tabata e caso di Asia Menor den e promé siglo, ‘e palabra di Jehova ta ser hibá atrabes di henter e pais.’ (Echo 13:49) Como resultado, miles di hende di pueblo a respondé favorablemente.

Na Spaña i otro partinan, predicacion cabal den áreanan rural ta rekerí pacenshi i sacrificio propio. Pero siendo cu ta Dios su boluntad pa ‘hende di tur sorto ser salbá,’ Testigonan di Jehova ta contentu pa busca esnan apreciativo. (1 Timoteo 2:4) I manera e experencianan anterior ta demostrá, Jehova a recompensá ricamente e esfuersonan cu ta ser hací pa predicá di pueblo pa pueblo na Spaña.

[Footnotes]

[Map on page 23]

(For fully formatted text, see publication)

FRANCIA

PORTUGAL

SPAÑA

ISLANAN BALEARICO

ISLANAN CANARIA

[Picture Credit Line on page 24]

Vilac, Lérida

[Picture Credit Line on page 24]

Puebla de Sanabria, Zamora

[Picture Credit Line on page 25]

Casarabonela, Málaga

[Picture Credit Line on page 25]

Sinués, Huesca

[Picture on page 26]

Lekeitio, Vizcaya