Sirbiendo cu un Sintimento di Urgencia

SEGUN CU HANS VAN VUURE A CONTÉ

Un maínta den 1962, Paul Kushnir, e superintendente di sucursal dje Sociedad Watch Tower na Holanda, a contra cu mi den e districto dje haf di Rotterdam. El a wak mi for di otro banda di un mesa den un restaurant scur i a bisa: “Bo ta comprende, Hans, cu si bo acepta e asignacion aki, abo i bo casá ta haya pasashi pa bai so, pero pa no bolbe?”

“SÍ, I mi ta basta sigur cu Susie també ta di acuerdo cu esei.”

“Wel, papia riba dje cu Susie. Lagámi sa di bo decision, lo mas pronto posibel.”

Su mañán el a recibi nos contesta: “Nos lo bai.” Pues, dia 26 di December di 1962, nos a braza nos famía i amigonan na Schiphol, aéropuerto di Amsterdam tapá cu sneu, i a bai cu avion te na un territorio nobo pa misionero—Nederlandse Nieuw Guinea (yamá awor West Irian, Indonesia—tera di papú.

Nos tabatin duda tocante aceptacion di tal asignacion desafiador? Realmente cu no. Nos a dedica nos bida cu tur nos curazón pa haci e boluntad di Dios, i nos a confia cu lo e apoyános. Repasando nos bida, nos por mira cu nos confianza den Jehova nunca tabata un equibocacion. Pero, promé cu nos ta relata loke a pasa den Indonesia, lagámi contábo tocante nos bida di antes.

Entrenamento durante e gera

Ora e testigo balente Arthur Winkler a bishita mi famía na principio na 1940, mi tabatin diez aña di edad so. Mi mayornan a haya un golpi ora nan a descubri loke e Bijbel ta bisa tocante siñanza falso di cristiandad. Siendo cu Alemania nazista a domina Holanda ne tempo ei i Testigo di Jehova tabata persigí, mi mayornan tabatin cu decidi si nan kier asociá cu un organizacion prohibí. Nan a decidi di hacié.

Dje ora ei padilanti, e curashi di mi mama i su disposicion di risca su libertad i asta su bida, a impresionámi. Un biaha el a corre su bicicleta 11 km i a spera den scuridad cu un sacu yen di tratado bíblico. Ne tempo siñalá pa un campaña special cuminza, el a corre tanto lihé posibel cu su bicicleta, sacando tratado de bez en cuando for Jesucristodje sacu pa plámanan riba caya. Un otro hende sigiendo tras di dje riba bicicleta por fin a alcancé i, sin rosea, a grita: “Señora, bo ta perde algo!” Nos mester a hari ora Mama a cóntanos e cuenta.

Mi tabata mashá mucha, pero mi tabata sa loke mi kier haci cu mi bida. Durante un reunion na 1942, ora e conductor a puntra, “Ken kier bautiza ne sigiente ocasion?” Mi a hiza mi dede. Mi mayornan a wak otro, preocupá, dudando cu mi a comprende e significacion di tal decision. Pero, aunque mi tabatin 12 aña so, mi a comprende loke dedicacion na Dios kier men.

Predicacion di cas pa cas cu nazista buscando nos a exigi cautela. Pa evita di bishita cas di hende cu por informa nazista, mi a haci lo sigiente, riba dia ora simpatizador di nazista a plak poster riba nan bentana, mi a dal buelta cu mi bicicleta i a skirbi nan direccion. Un biaha un homber a mirámi i a grita: “Bon hací, mi yiu. Skírbinan—nan tur!” Mi tabatin e gana pero claramente no tabatin suficiente prudencia! Ne fin dje gera na 1945, nos a alegrá ne prospecto di mas libertad pa predica.

E principio di un bocacion

Dia 1 di November di 1948, depues di a caba scol, mi a recibi mi promé asignacion di predicacion di tempo completo como pionero. Un luna despues, broeder Winkler a bishita e famía unda mi a keda. E mester a bini pa observámi pasobra pronto despues mi tabata invitá pa traha den e oficina di sucursal dje Sociedad den Amsterdam.

Despues, nan a pidími bishita congregacion di Testigo di Jehova como superintendente di circuito. Anto, na otoño di 1952, mi a recibi un invitacion pa asisti ne klas di 21 dje Scol Bíblico di Galad di Watchtower den New York pa recibi entrenamento di misionero. Pues, cerca e fin di 1952, ocho di nos di Holanda a barca riba e bapor Nieuw Amsterdam rumbo América.

Cerca e fin di curso dje scol, Maxwell Friend, un instructor, a bisa: “Boso lo lubida e mayor parti di loke boso a siña aki, pero nos ta spera cu tres cos lo permanece den boso: fe, speranza, i amor.” Wardá també den mi mente i curazón ta memoria precioso dje organizacion di Jehova Dios trahando cu un sintimento di urgencia.

Despues, mi a recibi un desilusion grandi. Mitá dje grupo holandés—incluyendo ami—tabata asigná pa bolbe na Holanda. Aunque mi tabata desilusioná, mi no a keda molestiá. Mi solamente a spera cu mi no mester haci manera Moisés di antigua, spera 40 aña promé cu mi a recibi un asignacion den stranhería.—Echo 7:23-30.

Un yudante precioso

Ora Fritz Hartstang, mi amigo paternal, a tende di mi plan pa casa, el a revela: “Apenas mi por scoge un mihor bruid.” Casey Stoové, tata di Susie, a hiba delantera luchando den e Resistencia contra nazista durante Gera Mundial II. Pero, ora Testigo di Jehova a haci contacto cuné na 1946, el a acepta un bez e berdad bíblico. Pronto, e i tres di su seis yiunan—Susie, Marian, i Kenneth—a bautiza. Dia 1 di Mei di 1947, tur tres yiu a cuminza e ministerio di tempo completo como pionero. Na 1948, Casey a bende su negoshi, i e també a bira pionero. Despues el a bisa: “E añanan ei tabata esnan di mas feliz di mi bida!”

Mi a conoce Susie na 1949, ora e tabata invitá pa traha den e oficina di sucursal den Amsterdam. Sin embargo, e sigiente aña, e i su ruman muher menor Marian a bai pa asisti na klas di 16 di Galad i a barca pa bai na nan asignacion como misionero den Indonesia. Den Februari di 1957, despues di cinco aña di sirbishi di misionero ei, Susie a bolbe na Holanda pa casa cu mi. Ne tempo ei, mi tabata sirbi como superintendente di circuito, i durante tur e añanan di bida matrimonial, Susie a keda dispuesto pa haci sacrificio personal pa causa di sirbishi di Reino.

Despues di nos casamento, nos a sigi bishita congregacion den diferente parti di Holanda. E añanan di trabao di Susie como misionero den territorio dificultoso a preparé bon pa nos biahamento cu bicicleta di un congregacion pa otro. Tabata durante cu nos tabata den e trabao di circuito na 1962 cu broeder Kushnir a buscámi den Rotterdam i a invitános pa bai na West Irian, Indonesia.

E sirbishi di misionero den Indonesia

Nos a yega ne pueblo di Manokwari—un mundo totalmente diferente! Tabatin sonido spantoso den anochi tropical i e calor i stof. I també tabatin papú dje interior cu minisaya so bistí, tabatin machete, i a gusta camna net tras di nos i purba di mishi cu nos cuero blancu—tur locual no tabata fácil pa costumá cuné.

Dentro di poco siman despues cu nos a yega, pastor a leza carta riba preekstoel spiertando hende contra Testigo di Jehova, i nan a duna copia na tur hende cu a asisti. E radioemisora local asta a transmiti e carta. Anto tres pastor a bishitános i a exigi pa nos bai na interior i traha cu loke nan a yama hende “pagano.” Un poliz papú di rango halto també a urgínos pa bai, i un miembro dje poliz secreto a bísanos cu nos asesinato tabata planeá.

Sin embargo, tur hende no tabata contra nos. Un consehero político di papú, un holandés cu tabata cla pa bai Holanda, a introducínos na varios caiquetío papú. El a bísanan: “Testigo di Jehova ta trece un mihor clase di religion cristian, mihor cu loke boso conoce. P’sei, boso mester recibínan.”

Despues, un oficial di gobierno a yega cerca Susie riba caya i a fluister: “Nos tabata informá di cu boso a cuminza un trabao nobo aki, i, p’sei, nos no por laga boso keda. Pero, wel, . . . si boso solamente tabatin un misa.” Un idea! Lihé nos a kibra muraya den nos cas, a pone banki, a instala un podio, i a pone un borchi dilanti dje cas cu a bisa “Salón di Reino.” Anto nos a invita e oficial pa un bishita. El a yanga cabez, a dal un sonrisa, i a tox e banda di su cabez cu su dede, como si e kier men, ‘Sabí, sabí.’

Dia 26 di Juni di 1964, un aña i mei despues cu nos a yega, e promé 12 papú di nos studiante di Bijbel a bautiza. Un poco tempo despues, 10 mas a bautiza, i e promedio di asistencia na nos reunion tabata 40. Dos pionero indonés tabata mandá pa yúdanos. Ora e congregacion tabata bon establecí den Manokwari, e sucursal indonés dje Sociedad a dúnanos un otro asignacion pa predica den dje, den December di 1964.

Promé cu nos a bai, e cabez dje Departamento di gobierno di Relacion Público a papia cu nos na privá i a bisa: “Ta duelmi cu boso ta bai. Tur siman pastor a rogámi pa despacha boso pasobra nan a bisa cu boso ta cosecha nan fruta. Pero, mi a bísanan: ‘No, mas bien Testigo di Jehova ta gorda boso terreno.’” El a agrega: “Unda cu boso bai, sigi lucha. Boso lo gana!”

Durante un golpi di estado

Un anochi den September di 1965, mientras cu nos tabata sirbi den e capital di Djakarta, rebelde comunista a mata hopi lider militar, a pega Djakarta na candela, i a cuminza un lucha den tur e nacion, locual cu tempo a tumba Sukarno, e presidente dje nacion. Rond di 400.000 a perde nan bida!

Un biaha nos tabata predica mientras cu ne otro caya tiramento i kimamento tabata sosode. Su mañán, nos a tende cu forza militar tabata cla pa destrui un facilidad comunista den e becindario. Doño di cas a parce spantá ora nos a yega cerca nan, pero, ora nan a tende nos mensahe di Bijbel, nan a trankilizá i a invitános pa drenta. Nan a síntinan sigur den nos presencia. E tempo ei a siña nos tur pa depende di Jehova Dios i mantene equilibrio den circunstancia desfavorable.

Derota di mas oposicion

Cerca e fin di 1966 nos a bai biba den e stad di Ambon riba isla bonita di zuid di Moluco. Tabata ei den pueblo cariñoso i sociable cu nos a haya hopi interés spiritual. Nos congregacion chikito a crece lihé, i asistencia na reunion a yega cien. P’sei oficial di religion di cristiandad a bishita e Oficina di Asunto Religioso pa pone presion riba su hefe pa sácanos for di Ambon. Pero, ei mes riba lesenar dje hefe, nan a mira buki dje Sociedad Watch Tower bon desplegá! Den nan fracaso di cambia idea dje hefe, nan a haci contacto cu oficial dje Ministerio di Religion den Djakarta, buscando no solamente nos expulsion for di Ambon sino for di tur Indonesia també.

Nan a parce di goza bon éxito e ora ei, pasobra dia 1 di Februari di 1968 tabata poní como e fecha di nos expulsion. Sin embargo, nos rumanan cristian den Djakarta a haci contacto cu un oficial musulmán halto den e Ministerio di Religion, i el a yuda cambia e decision. Además, un procedimiento di antes tabata cambiá, i permiso den imigracion tabata duná na mas misionero ainda.

Pues, durante e sigiente diez aña, den un ambiente di montaña, bosque, i lagún magnificiente, den nort di Sumatra, nos a traha cu misionero di Australia, Austria, Alemania, Filipina, Suecia, i Estados Unidos. E trabao di predica a prospera, specialmente entre e pueblo Batak, e pueblo principal dje tera.

Sin embargo, por fin conspirador religioso a logra haya prohibicion di nos trabao di predica den December di 1976, i e sigiente aña casi tur misionero a bai na otro asignacion den otro país. Finalmente, na 1979 nos també tabatin cu bai.

Den Zuidamérica

Ne tempo ei nos tabatin rond di 50 aña di edad, i nos a pensa si nos por haci cambio pa un otro país ainda. Susie a puntra: “Nos por acepta un asignacion nobo of mas bien establecénos den un solo lugar?”

Mi a contesta: “Wel, Susie, unda cu Jehova a invitános pa bai, el a cuídanos. Ken sa cua otro bendicion tin den futuro?” Pues, nos a yega den nos asignacion nobo, e país suramericano di Suriname. Dentro di dos luna nos tabata den e trabao di biahamento atrobé i pronto a síntinos na cas.

Repasando nos mas cu 45 aña den e sirbishi di tempo completo, Susie i mi ta tuma na cuenta ki importante e apoyo di nos mayornan tabata pa yúdanos persevera den e trabao di misionero. Na 1969, ora mi a mira mi mayornan atrobé despues di seis aña, mi tata a papia cu mi na privá i a bisa: “Si acaso ta sosode cu Mama ta muri promé, bo no tin cu bini cas. Keda den bo asignacion. Mi por mantenémi. Pero, si acaso mi ta muri promé, bo tin cu puntra Mama tocante dje.” Mama a bisa mescos.

E mayornan di Susie tabatin e mesun actitud sin egoísmo. Na un tempo Susie a pasa 17 aña sin míranan, pero nan nunca a skirbi sikiera un palabra desanimador. Naturalmente, si otro yudanza no tabata disponibel pa nos mayornan, nos mester a bai cas. Pero, e punto tá cu nos mayornan tabatin e mesun aprecio pe trabao di misionero i, te na nan morto, nan a sirbi Jehova cu e mesun sintimento di urgencia cu nan a inculca den nos curazón.—Compara cu 1 Samuel 1:26-28.

Fiel skirbidor di carta també a animános. Tin algun cu nunca a laga un luna pasa sin skirbi nos den nos mas cu 30 aña di sirbishi di misionero! Pero, sobre todo, nos ta tene presente nos estimado Tata celestial Jehova Dios, cu sa con pa sostene sirbidor di dje riba tera. P’sei, mientras cu nos ta yega cerca e culminacion di suceso cu nos a anticipa, Susie i mi ta deseá di “tene mashá presente e dia di Jehova” sigiendo sirbiendo Jehova cu un sintimento di urgencia.—2 Pedro 3:12.

[Picture on page 26]

Casá na 1957

[Picture on page 29]

Ki un emocion—seis hovenan como pionero!