Predicando den un Pais di Contraste

KANGAROE, koala, wombat i platypus, Baranca di Ayers i e Rif di Gran Barera—ta nombernan cu ta bini na mente ora hende ta pensa di Australia. Pero pa straño cu por parce, mayoria australiano probablemente nunca a yega di bishitá Baranca di Ayers of e Rif di Gran Barera of mira un koala, wombat of platypus pafó di un parke di bestia. E motibu ta cu 85 porciento dje poblacion dje pais di 17,3 miyon hende ta habitante di stad, bibando den cincu stad principal alolargu dje costa.

Biahando for dje áreanan di costa rond di 200 km den direccion di interior dje pais, bo ta yega na cuminsamentu dje continente su famoso teritorio rural. E tereno ta cambia for di selva masha grandi i plantashi ricu pa campo habrí, cayente i secu, unda solamente mata chikitu i yerba grof ta sobrebibí. Sin embargo, tin bida den e teritorio rural. Ranchonan grandi di carné i baca, of stacion manera nan ta ser yamá, ta cubri cientos di kilometer cuadrá. Mas den interior dje pais tin desiertonan cayente, unda tin biaha hende ta muri ora nan no tuma e precaucionnan apropiado.

E Bon Nobo Ta Florecé

Ta den un ambiente asina e bon nobo di Reino ta ser predicá na Australia. Miles di persona cada aña ta respondiendo na Jehova su promesa di un hustu mundu nobo. Ultimo aña di sirbishi, e cantidad di publicador di Reino a alcansá un máximo di mas cu 57.000, casi dobel di esun di dies aña pasá. Aunke mayoria dje publicadornan, mescos cu mayor parti dje poblacion, ta concentrá den e stadnan cant’i costa, e bon nobo ta florecé tambe den e interior.

Pa haña un bistaso di kico predicacion den e inmenso pais di contraste aki ta encerá, laga nos uni cu un di nos cincu superintendentenan di districto i su casá segun cu nan ta bishitá algun dje congregacionnan den e áreanan remoto dje teritorio rural. Nan biahenan ta cubri e estado di West Australia, mitar dje estado di Queensland i e Teritorio Norteño, un área di mas cu 4,7 miyon kilometer cuadrá. Esei ta casi mitar dje tamaño di Europa, excluyendo loke anteriormente tabata Union Soviético.

Nos gira ta cuminsá na Perth, e stad capital di West Australia. Den e stad completamente moderno aki di 1,2 miyon hende, tin awor 49 congregacion di Testigonan di Jehova. Ademas di ingles, tin congregacion griego, italiano, portugues i spañó i tambe gruponan mas chikitu di otro idiomanan. Tin tambe un congregacion cu ta consistí exclusivamente di rumannan indígeno di Australia, kendenan ta concentrá nan esfuersonan di predicacion entre e pueblo indígeno dje continente. Hopi dje hendenan humilde aki ta respondiendo awor n’e mensahe di Reino. Pero con cosnan ta leu for dje stadnan grandi?

For di Perth nos ta biaha pa 1.800 km direccion nort pa Port Hedland, unda e rumannan lo tene un asamblea di circuito. Mayoria dje 289 persona den asistencia a biaha entre 200 pa 700 km pa ta aki. Nan a bini for di áreanan isolá caminda e congregacion di mas cerca kisas por ta 250 km alehá via caminda no-asfaltá cubrí cu piedra skerpi cu hopi biaha ta bora tayer di auto. Tres congregacion den e área aki recientemente a edificá Salonnan di Reino, usando e método di construccion rápido.

Salonnan di Construccion Rápido den Areanan Isolá

Ki un contraste entre e construccion di un Salon di Reino den e áreanan aki i construccion di unu den stad i pueblo mas grandi! Mayoria dje materialnan di construccion mester ser trecé cu truck for di Perth, rond di 1.600 km pa sur. Cientos di rumannan ta biaha e distancia aki i mas den e fin di siman specífico pa bini i construí e Salon di Reino den un calor di 40°-45° C. Un fluho grandi asina di persona drentando den comunidadnan isolá chikitu ta un testimonio sobresaliente riba su mes. Ora un Salon di Reino a ser construí na Tom Price, un pueblo chikitu caminda tin mina di heru, e corant local a proclamá riba su promé página: “Un bon biní caluroso na boluntarionan di fishi i asistentenan enbolbí den e ‘construccion rápido’ di tres dia dje Salon di Reino di Testigonan di Jehova na Tom Price.”

A parce cu casi tur hende den e pueblo tabata ansioso pa cooperá. En bes dje costo normal di 11.000 dollar australiano pa trece 50 ton di material, un doño di truck generoso a pidi e rumannan pa contribuí solamente cu e combustibel. Contratistanan local a haci donacion di 26 galon di verf. Contratistanan specialisá den cobamentu di tera a pone makinaria disponibel, i e compania di mina a pone un kraan disponibel grátis. Pa haña acomodacion pa 300 bishitante a presentá un problema, pero cooperacion dje hendenan di pueblo tabata sobresaliente. Algun a yama na telefon i ofrecé cama. Un homber a yama pa bisa cu lo el a bai afó e fin di siman pero lo no cera e porta patras na yabi. El a bisa: “E cas ta di boso p’e duracion dje proyecto.”

Un incidente gracioso a sosodé ora algun ruman a haña un adres caminda nan mester a recogé e trailer cu ta pertenecé n’e circuito local. Nan a keda asombrá pa mira un borchi na porta cu a bisa, “Nos No Ke Bishita Religioso.” Pero e trailer tabata pará einan. Pues nan a informá e señora dje cas cu nan ta bai cu e trailer, cua tabata yen di potoshi. Segun cu nan tabata limpiand’e, diripiente nan a ripará cu esei no tabata e trailer di circuito! Ora e doño dje trailer a yega cas, su casá a cont’é cu e Testigonan di Jehova a coge su trailer. E rumannan a regresá pronto cu e trailer cu awor tabata bashí, splicando e eror. Un combersacion excelente a sigui, i e personanan aki cu antes tabata opositor tabatin hopi pregunta di haci tocante nos i nos trabou. Awor nan tabata ansioso pa bini i mira e Salon di Reino nobo.

Pa predicá e bon nobo den e área aki ta exigí awante. Promé, tin e distancianan grandi enbolbí. Un ruman muhé pionero i su esposo regularmente ta dal un rondtrip di mas cu 350 km riba caminda di tera, no-asfaltá, for di Port Hedland pa Marble Bar, pa haci rebishita i conducí studio bíblico. Marble Bar ta entre e lugánan mas cayente na Australia, cu temperaturanan hopi biaha alcansando mas cu 50° C for di october pa mart.

E Biahe pa “Parti Ariba” di Australia

Darwin, 2500 km mas pa nort, ta e siguiente pueblo pa un asamblea di circuito. E superintendente di districto i su casá ta haci uso dje oranan largu di corementu den auto pa keda bij cu nan studio personal. Promé nan ta lesa i considerá e texto di dia. Despues nan ta scucha n’e lesamentu di Bijbel riba caset. Segun cu nan ta tuma turno pa conducí, nan ta tuma turno tambe pa lesa artículonan for di E Toren di Vigilancia i ¡Despertad!

Un borchi riba caminda ta spierta nan pa ta alerto pa “trein di caminda.” Eseinan ta vehículonan largu i potente cu tin propulsion riba tur wiel i cu ta touw tres of cuater trailer, i ta midi tur huntu te cu 55 meter. Pues hopi espacio ta necesario ora di pasa un trein di caminda. Ta usa nan pa transportá baca i otro productonan pa pueblo isolá.

E weer ta semper cayente i e region ta secu tur ora. E paisahe secu talbes por wordu mirá eróneamente pa un inmenso santana debí cu e suela ta cubrí cu ceritu di vruminga cu igual espacio entre nan. E ceritunan di vruminga ta varia den color, dependiendo dje tera cu e vruminganan a usa, i nan por tin diferente haltura entre 1 pa 2,5 meter. Despues, segun cu nos biaheronan ta crusa e Riu Victoria, hopi borchi trahá na man ta atraé nan atencion. Un di nan ta bisa, “Peliger: No Ta Permití pa Landa. Crocodil cu Ta Come Hende den E Riunan Aki!” Sabiamente, nan ta dicidí pa busca otro manera pa baña i fresca nan curpa!

Finalmente, nan ta alcansá e punta norteño di Australia, conocí generalmente como e “Parti Ariba.” Tin dos congregacion grandi di Testigonan di Jehova na Darwin, e stad capital dje Teritorio Norteño. E carácter multicultural di Darwin por ser mirá fácilmente ora di asistí n’e asamblea di circuito. Cera conocí cu Charles, di 30 aña di edad, kende originalmente a bini for di Oost Timor, afligí pa guera, na Indonesia. Su mayornan chines a cri’é p’e practicá adoracion di antepasado. El a bira tambe profundamente enbolbí den arte marcial. Pa stop no tabata fácil debí n’e laso fuerte cu spiritismo. Sin embargo, teniendo na mente e promesa di Jesus cu “e berdad lo haci boso liber,” el a bandoná e curso di bida aki. (Juan 8:32) E ta bisa, “Awe, mi tin un concenshi limpi dilanti Jehova, i actualmente mi ta sirbiendo como sirbidor ministerial. Mi meta ta pa asistí n’e Scol di Entrenamentu Ministerial.”

Awor, cera conocí cu Beverly di Papua Nueva Guinea. Beverly ta confesá, “Na principio mi tabatin tiki confiansa pa duna testimonio na hende blancu, pasobra ingles tabata mi di dos idioma i cierto expresionnan, huntu cu e accento australiano, a haci’é difícil pa mi comprendé. Pero cordando cu e Bijbel ta bisa nos pa confia den Jehova i pa purba i mira cu e ta bon, mi a cuminsá den e ministerio di pionero di tempu completo na januari 1991. Mi promé studio di Bijbel ta un pionero awor. Dos di su yunan muher tambe a aceptá e berdad, i un di nan ta trahando pionero huntu cu su casá.”

Promé cu nos bandoná Darwin, laga nos haci un biahe lihé di 250 km den direccion oost p’e Parke Nacional di Kakadu, bon conocí pa su bida abundante di para. Aki nos ta cera conocí cu Debbie, e único predicador isolá dje bon nobo den henter e área. Nos ta puntr’é con e ta haci keda spiritualmente fuerte den un isolacion asina. E ta contestá “Promé, mediante oracion. . . . I mi ta saca consuelo for di textonan manera Isaías 41:10, cu ta bisa: ‘No tene miedu, pasobra ami ta cu bo. No mira na tur banda, pasobra ami ta bo Dios. Lo mi fortificá bo. Lo mi berdaderamente yudá bo. Lo mi berdaderamente tené bo gará cu mi man drechi di husticia.’”

Na Jilkmingan, 450 km sur di Darwin, nos ta topa un grupo chikitu di indígenonan di Australia. Pa hopi aña e comunidad indígeno aki a ser considerá como un comunidad di Testigonan di Jehova pasobra masha tantu hende a asistí regularmente na congreso i asambleanan, maske ningun di nan a bautisá. E comunidad tabata conocí pa su limpiesa. Felismente, awor algun a dal un paso firme p’e berdad i ta bautisá. Nan ta entre e promé indígenonan di cunucu cu ta haci asina. Berdadero curashi i dependencia riba Jehova su spiritu santu ta necesario p’e hendenan humilde aki kibra cu nan tradicionnan i prácticanan spiritista di siglonan bieu di nan pueblo di tribu.

Pa Alice Springs i For di Teritorio Rural

Awor ta tempu pa bandoná “Parti Ariba” i biaha pa 1.600 km direccion sur pa Alice Springs, den e “Centro Corá,” meimei dje continente australiano, cerca dje famoso Baranca di Ayers. Aki den e Salon di Reino aire-condicioná, tin stul comfortabel pa un asamblea, cu 130 persona of mas asistiendo for dje dos congregacionnan den e área aki. Atrobe nos ta mira e bista felis di polynesiano, europeo i indígenonan mesclando huntu den asociacion cristian.

Finalmente nos ta bandoná Alice Springs i ta cuminsá e último parti dje gira cu nos superintendente di districto ambulante cu su casá. E biahe ta hiba nos rond di 2.000 km dwars dor dje continente, bayendo pa nortoost. Segun cu nos ta haci esei, nos ta despidí dje teritorio rural, pasobra finalmente nos ta alcansá e selvanan grandi di Queensland. Aki, na costa di nort Queensland—e pais dje Rif di Gran Barera—tin hopi congregacion cu un promedio haltu di Testigonan pa poblacion.

Sin embargo, nos biahe no a terminá ainda, promé cu nos asistí na un asamblea di circuito mas. Abordando avion na Cairns—e pueblo tropical di Queensland dje famoso Rif di Gran Barera—nos ta bandoná e tera firme di Australia pa un estadia corticu riba e punta norteño dje península di Cabo York, crusa Torres Strait, pa Isla Djaweps. Ei tin un congregacion chikitu di solamente 23 publicador. Ki un goso pa mira 63 persona den asistencia na nos último asamblea riba e biahe aki!

Nos ta spera cu bo a disfrutá dje bistaso aki dje trabou di predicacion di Reino cu ta ser hací den e pais di contraste aki. Talbes algun dia lo bo por bishitá nos den e pais interesante aki, te abou ayá, i topa cara-cara cu e rumannan kendenan ta cumpli fielmente cu nan ministerio den nan asignacion único.

[Map/Picture on page 23]

(For fully formatted text, see publication)

Port Hedland

Canberra

Tom Price

Marble Bar

Newman

Darwin

Katherine

Alice Springs

Baranca di Ayers

Isla di Djaweps

Cairns

Adelaide

Melbourne

Hobart

Sydney

Brisbane

Perth

[Picture on page 24]

Perth, capital di West Australia

[Picture on page 25]

Dunamentu di testimonio den caya ta duna bon resultado