Loke Ta Clave pa Bon Éxito di Famía

SEGUN un candidato pe presidencia americano aña pasá, “[Na América] tin un degeneracion di famía.”

Realmente, e alcance di degeneracion di famía ta escandaloso. Segun e revista Fortune: “Cambio di grandeza similar den datos económico of industrial lo hácinos keda babucá cu asombro.” Hopi bez asta famía cu ta purba di sigi principio bíblico ta ser afectá trágicamente.

Un poco aña pasá, un ruman cristian cu bon intencion a bisa un tata di seis yiu bao di diesdos aña di edad: “Bo por spera cu cuater di bo yiunan lo no sigi e berdad.” Pero, e tata no a kere cu esei tabatin cu sosode ni sikiera un yiu di dje. El a splica pakico.

El a bisa: “Realmente nos yiunan no ta di nos. Jehova Dios ta confiánan na ami i na mi esposa como un ‘herencia’ of don di dje. I Jehova a bisa cu si nos ta entrenánan den e camina correcto, ‘nan lo no apartá di dje.’ P’sei, nos semper a purba di atende na nan como si nan ta pertenece na Jehova.”—Salmo 127:3; Proverbio 22:6.

Asina e tata a identifica loke ta clave pa un famía tene bon éxito den nan bida: Mayornan tin cu atende na nan yiunan como si nan ta atende ne propiedad di Dios. Aunque esei no kier men cu yiu den tur caso lo obedece bo instruccion excelente, bo tin e responsabilidad di atende ne yiunan cu locual Dios a confiábo.

Un responsabilidad serio

Bo ta percura tal cuido correctamente cu reverencia i interés profundo, no cu descuido i indiferencia. Bo ta dedica tempo i esfuerzo, sabiendo cu bo tin cu rindi cuenta na Dios pe herencia i don cu el a dunábo. No tin necesidad di experimenta cu varios moda di cria yiu. Mayornan tin mester dje instruccion di Dios so cu el a percura den su Palabra, e Bijbel, i mester sigi eseinan cu sumo cuidao.

Esaki ta e instruccion di Jehova Dios: “Bo tin cu inculca [mi palabra] den bo [yiunan] i papia riba nan ora bo ta sinta den bo cas i ora bo ta camna den camina i ora bo ta bai drumi i ora bo ta lanta. I bo tin cu máranan como un siñal riba bo man, i nan mester sirbi como banchi frontal entre bo wowo; i bo mester skírbinan riba kozijn di porta di bo cas i riba porta di curá.” E Bijbel també ta urgi: “Boso, tatanan, . . . sigi cria [boso yiunan] den e disiplina i reglamento mental di Jehova.”—Deuteronomio 6:7-9; Efesio 6:4.

P’sei, cuidamento di yiu ta exigi atencion diario; sí, esei kier men dedica tempo libremente na nan i specialmente dúnanan amor i interés profundo. Mayornan cu ta satisface tal necesidad básico di nan yiunan ta haci loke Dios ta bisa ta necesario afin di goza bon éxito den e bida di famía.

Bo ta kere cu esei ta exigi demasiado? Cu nan accion, hopi mayornan ta indica cu nan ta kere cu sí. Pero, boso yiunan, don di Dios, realmente ta merece atencion extra-special.

Con pa atende na nan

Sabiamente, considera ehempel di esnan cu a goza bon éxito den e criamento di nan yiunan. Un revista, den su artículo principal “Famía asombroso,” a mencioná cuater cos cu ta importante pa tene bon éxito den criamento di yiu: “[1] Conbersacion, ora nan ta sintá na mesa pa come, cu ta estimula nan mente, [2] lezamento di bon buki, [3] e inspiracion di hende pensativo cu tin mente creativo i cu ta bale la pena pa imita, [4] sabiendo cu e famía tin un tradicion pa mantene.”—U.S.News & World Report, 12 di December di 1988.

En cuanto “conbersacion, ora nan ta sinta na mesa pa come,” corda cu Dios ta instrui mayornan pa siña nan yiunan ora nan ta sintá den nan cas. Bo famía cu regularidad ta sinta na mesa pa come hunto, asina percurando oportunidad diariamente pa compañerismo i conbersacion estimulante? Tal tempo ta vital i memorable pa yiu, ofreciendo na nan un sintimento di stabilidad i siguridad. Un mucha di seis aña di edad a bisa cu el a gusta nan ora di come na mesa “pasobra bo no tin cu preocupá un tocante e otro,” siendo cu nan tur ta hunto.

Kico dje calidad di boso conbersacion sintá na mesa? E ta concentra frecuentemente riba e contenido di “bon buki,” incluyendo e Bijbel i literatura bíblica tratando cu nos sirbishi di Dios of asunto relacioná cu e creacion di Dios? Además di conbersacion dje clase ei sintá na mesa pa come, mayornan tin cu cultiva den nan yiunan un amor pa Jehova Dios i pa ley husto di dje, mediante un programa di studiamento cu regularidad.

E tata dje seis yiu mencioná anteriormente a splica, “Comemento hunto na mesa cu regularidad no tabata un problema. Esei tabata automático, i el a yuda unínos. Pero, establecimento di un programa di estudio bíblico cu regularidad tabata dificultoso.” Debí na puro cansancio despues di un dia di trabao duro, tabatin bez cu el a pega soño durante tal estudio. Pero, e nunca a bandona estudio bíblico regularmente cu su yiunan, i el a papia cu nan individualmente cu regularidad i a scúchanan pa hopi tempo largo.

Además di hiba delantera den conbersacion significativo sintá na mesa pa come i percura e compañerismo di bon buki, bo ta zorg pa bo yiunan recibi “inspiracion di hende pensativo cu tin mente creativo”? Berdaderamente, arreglo pa bo yiunan asocia regularmente cu esnan cu ta imita e homber di mas importante cu hamás a biba, esta, Jesucristo, ta vital pa nan crece pa bira adulto di bon éxito.

Finalmente, kico di ‘sa cu e famía tin un tradicion pa mantene’? Bo yiunan tin cu comprende cu boso ta spera pa nan mantene norma dje famía—di cu cierto conducta, papiamento, bistí, actuacion, etc., no ta aceptabel i cu nan ta viola tradicion dje famía. Nan tin cu tuma na cuenta cu violacion di tradicion dje famía ta un asunto serio—cu esei por ofendébo terriblemente, mescos cu Jacob, e patriarca di antigua, ora e conducta bergonzoso di su yiunan a hacié un “holor ofensivo pa habitante dje tera.”—Génesis 34:30.

E tata dje seis yiu cu a considera su yiunan como e propiedad di Dios a enfatiza specialmente e “tradicion dje famía.” El a razona constantemente cu su yiunan tocante con e norma dje famía di bistí, cabei, i separacion for di camina di mundo tabata di acuerdo cu e spiritu i mandamento dje Creador, Jehova Dios. Como resultado dje gran cantidad di tempo, amor, i interés profundo dedicá na nan—siendo entrená den e camina pa nan sigi—tur seis dje yiunan a responde door di ‘no aparta for dje camina pa nan.’—Proverbio 22:6.

Mundialmente, tin miles di famía fuerte uní asina. Nan ta ki un alabanza pa nan Creador, i nan ta ki un recompensa pa nan mayornan inegoísta i amoroso! Cu e pasamento dje añanan, e yiunan cu a beneficiá di nan esfuerzo ta aprecia cada bez mas tal mayornan. Haci fabor di considera e sigiente relato di un hende muher cu mayornan piadoso a cria, i tuma nota dje les balioso cu nos por siña foi dje.