Predicando cu Awante den e Tera di Ijs i Candela
IJSLAND ta situá den Nort Atlántico mas o ménos meimei di Nort América i Europa. Aunke e ta posicioná net bou di Polo Norte, su clima ta mas suave di loke bo por spera, gracias n’e efectonan di calor dje Coriente di Golfo. Ijsland a ser yamá e tera di ijs i candela pasobra e tin e gletsjer [bloki di ijs moviente] di mas grandi di Europa i e ta tambe un dje áreanan volcánico mas activo na mundu. Su hopi fuentenan di awa cayente i áreanan volcánico cu ta producí vapor cayente i gas sulfuroso ta bon-conocí.
E 260.000 habitantenan dje di dos isla di mas grandi di Europa ta desendiente dje vikingonan [piratanan antiguo escandinavo], kendenan a establecé nan mes ei mas cu 1.100 aña pasá. Idioma ijslandes ta esencialmente mescos cu nors bieu, e idioma escandinavo dje época vikingo. El a keda casi intacto debí cu e ijslandesnan tabata gusta lesa nan leyendanan bieu, cuanan a ser skirbí pa mayor parti den siglo 13.
Pa siglo 16, Bijbel a cuminsá ser traducí na ijslandes. Un “Testament Nobo” a aparecé na 1540 i un Bijbel completo na 1584. Mas cu 90 porciento dje pueblo ta pertenecé n’e Iglesia Evangélico Luterano, e religion oficial di Estado. Aunke casi cada cas tin un Bijbel, poco ta kere cu e ta e Palabra di Dios. Mayoria ijslandes tin punto di bista liberal tocante religion i, generalmente, ta pensadornan independiente.
E Bon Nobo Ta Yega Ijsland
E promé ijslandesnan cu a tende e bon nobo di Reino tabata biba na Cánada n’e tempu ei. Un di nan tabata Georg Fjölnir Lindal. Su mayornan tabata di Ijsland i el a papia ijslandes. Djis despues di a dedicá su bida na Jehova Dios, el a bira un predicador di tempu completo dje bon nobo. Na 1929, ora e tabatin 40 aña di edad, el a hiba e bon nobo n’e pueblo den e tera di ijs i candela ei.
Ki un tarea tremendo pa un solo persona! Ijsland ta rond di 320 km di nort pa zuid i rond di 500 km di oost pa west. E liña di costa, incluyendo boca i entrada entre ceru stijl, ta rond di 6.400 km largu. N’e tempu ei, no tabatin echt caya i prácticamente ningun auto of cualkier otro medio moderno di transporte. No obstante, ruman Lindal a cubri henter e isla den dies aña i a plama miles di buki. El a biaha cant’i costa den boto, i ora el a bishitá e cunucunan den interior dje pais, el a usa dos cabai, un pa carga e mes i e otro pa carga su literatura i su pertenencianan.
Pa casi 18 aña, Ruman Lindal tabata e único Testigo na Ijsland. Apesar di su trabou duru, e no a mira ningun persona tuma un posicion p’e Reino durante e tempu ei. Su permanencia largu i solitario a terminá dia 25 di mart, 1947, ora e promé graduadonan dje Scol Bíblico di Galad di Watchtower a yega. Bo por imaginá su goso ora Jehova finalmente a contestá su oracionnan pa mas trahadó p’e cosecha. (Mateo 9:37, 38) Ruman Lindal a sigui su sirbishi na Ijsland te ora el a regresá Cánada na 1953.
Mas Trahadó p’e Cosecha
E misioneronan cu a yega na 1947 tabata dos ruman homber danes. Mas misionero a yega dos aña despues. Segun cu nan a sigui e trabou di predicacion huntu cu un par di amigu cu a muda pa Ijsland, nan a plama miles di publicacion. Mayoria ijslandes ta lectornan ardiente, pero no hopi a respondé n’e bon nobo. Despues di 27 aña di trabou di planta i muha, e rumannan paciente a cuminsá mira fruta di nan labor. Na 1956 siete persona nobo a tuma nan posicion p’e Reino i a dedicá nan bida na Jehova.
Durante e último dies aña, e cantidad di publicador di Reino a bira mas cu dobel. Awor, tin siete congregacion i un grupo isolá cu un total di 280 proclamador dje bon nobo. Laga nos haci un paseo rond e isla pa bishitá e congregacionnan aki.
Rond dje Capital
E rumannan homber i muher cu a perseverá tur e añanan ei a ser bendicioná ricamente. Tin awor dos congregacion prosperando na Reykjavík, e stad capital. Nan ta reuní den un bunita Salon di Reino situá den e mesun edificio cu e oficina di sucursal, cu a ser dedicá na 1975.
Friðrik i Ada tabata entre e sietenan cu a bautisá aya na 1956. “Mi ta corda cu nos tabatin custumber di tene reunion den un sala chikitu den e zolder caminda e misioneronan tabata biba,” Friðrik ta bisa. “Tabatin lugá pa 12 stul, pero tin biaha, ora mas cu e cantidad normal a presentá, nos a habri e porta p’e siguiente sala chikitu. Ki un diferencia awe ora dos congregacion ta yena e Salon di Reino!”
Friðrik tabata na encargo dje Departamentu di Servicio di Cuminda ora e promé asambleanan a ser tení. “Mi a haci mayoria dje trabou mi mes, i na mesun tempu, no tabata algu straño cu mi tabatin tres of cuater parti den e programa cada dia. Miéntras mi tabata traha den cushina, mi a bisti un frescot (lantera). Ora tabata tempu pa duna un discurso, mi a bisti mi bachi i core drenta salon. Varios biaha e rumannan tabatin cu cordá mi pa kita e frescot. Awor nos tin 400 pa 500 persona asistiendo n’e asambleanan, incluyendo ancianonan excelente cu ta participá den dunamentu di parti den e programa. Tin tambe hopi man boluntario cu ta yuda den e Departamentu di Servicio di Cuminda.”
E congregacion mas cerca di Reykjavík ta Keflavík, rond di 50 km den direccion west. E careda ta hiba nos dor di camponan di lava. Dies porciento di Ijsland ta cubrí cu lava. E promé vegetacion cu ta aparecé den e camponan aki ta consistí di yerba di mos, pero den e camponan di lava mas bieu, lo bo haña beshi di mondi i mata cu ta crece abou.
E congregacion na Keflavík tin 19 publicador i a ser formá na 1965. Ei cerca tin e aeropuerto internacional, i un base militar mericano tambe ta situá ei. Aunke e Testigonan nunca por a traha di cas pa cas den e base mes, hopi studio di Bijbel a ser conducí ei, i basta un par di persona a siña e berdad.
Un otro congregacion ta na Selfoss, 55 km oost di Reykjavík. Aki nos ta mira paisahe di plantacion berde cu baca i carné, incluyendo e lecheria mas grandi di Ijsland. Riba caminda, nos ta pasa banda di Hveragerði, un pueblo chikitu den un vaye pintoresco. For di un distancia nos ta nota columnanan di vapor for di fuentenan di awa cayente riba henter e vaye. Esaki ta un dje áreanan di airu cayente di mas extenso den e pais, i hende a traha hopi ‘broeikas’ pa utilisá e recursonan aki i producí tomati, konkomber i un variedad di flor.
Den e área aki tin un congregacion chikitu pero activo di 19 publicador di Reino. Sigurður i Guðrún Svava a muda for di Reykjavík pa sostené e grupo chikitu aki rond dje tempu cu e congregacion a ser formá na 1988. Sigurður ta e único anciano aki. Promé cu el a bira un Testigo di Jehova casi dies aña pasá, e tabata un músico masha conocí, cu a toca drum den varios banda. Awe, e ta biba di laba bentana i tambe e ta duna les di música. Su estilo di bida como músico a dun’é hopi problema, manera abusu di droga, bebementu pisá i un matrimonio kibrá. Ki satisfecho e ta awor, teniendo un propósito den bida i sirbiendo Jehova!
Pa Banda Oost
Bandonando Selfoss, nos ta subi un caminda di 680 km, consistiendo pa mayor parti di caya smal i di greis brutu. Nos ta tumba p’e siguiente congregacion, den e pueblo di Reyðarfjörður, na costa oost. Den mei ora, nos ta haña bista di Hekla, e volcan ijslandes di mas famoso. E tabatin cuater erupcion den e siglo aki.
Na 1973 un erupcion volcánico dramático a tuma lugá na Vestmannaeyjar (Islanan di Westman). Henter e poblacion di rond di 5.300 hende a move sano i salbo p’e isla principal den cuestion di un par di ora. Despues di restoracion dje pueblo, mayoria di su habitantenan a regresá gradualmente. Dos Testigo awor ta biba ei i ta predicá e bon nobo n’e hendenan den e comunidad chikitu aki. Coriendo pa dos ora mas, nos ta ser encantá p’e bista bunita dje mahestuoso Vatnajökull, sin duda e gletsjer di mas grandi di Ijsland, cu un área di 8.300 km cuadrá. Na caminda, nos ta pasa tambe hopi waterval i riu bunita.
Despues di a pasa rond di dies ora riba caminda, nos ta yega nos destinacion. Na Reyðarfjörður nos ta topa e 12 publicadornan dje congregacion di mas yong na Ijsland. Ningun Testigo a biba den e área aki te ora un cas di misionero a ser establecí den e último parti di 1988. Kjell i Iiris, un pareha misionero sueco kendenan a sirbi na Ijsland desde 1963, a ser asigná pa traha den e 15.000 hendenan den e área di cunucu aki. Hopi hende ta biba den e pueblecitonan di piscadó cantu dje liña di costa, extendiendo rond di 500 km.
Kjell ta conta: “No tin duda cu Jehova a bendicioná ricamente e trabou di Reino den e parti aki di Ijsland. Dia 1 di januari, 1993, un congregacion a ser formá i nos ta conduciendo hopi bon studio di Bijbel cu personanan cu ta haciendo progreso excelente. Aunke e medionan di transporte a cambia desde cu Ruman Lindal a biaha riba cabai, no ta semper fácil pa core auto riba e camindanan meimei di ceru riba caya tur na ijs durante e lunanan scur di winter, ni cu un jeep ‘four-wheeldrive.’ Un biaha nos auto a ser suplá for di un caya tur na ijs i a boltu dos of tres biaha for di un subida. Ki contentu nos tabata pa scapa sin herida!”
Despues di 30 aña na Ijsland, Iiris ta bisa: “Durante e añanan hopi a bini for di otro paisnan pa yuda. Aunke mayoria tabatin cu bandoná e pais pa varios motibu, nan siguramente tabatin un participacion grandi den e trabou di planta i muha. Nos ta contentu cu nos por keda, siendo cu awor nos tin e privilegio di mira e recogimentu dje cosecha. Jehova ta acelerando su trabou aki tambe.”
Hopi dje aumento a bini debí cu esnan nobo ta duna testimonio na nan coleganan di trabou. Atli a siña e berdad for dje misioneronan i a cuminsá papia cu otronan den e compania di construccion caminda el a traha. Dos di su coleganan di trabou ta participando awor den e trabou di predicacion, di cua un a bautisá huntu cu su casá na november 1992. Un di tres colega ta studiando Bijbel cu e Testigonan.
Cohiendo e Ruta di Nort
Saliendo for di Reyðarfjörður, nos ta tumba pa west. E siguiente congregacion ta 300 km leu, den e pueblo di Akureyri. Predicadornan special di tempu completo a ser asigná pa traha ei na cuminsamentu di añanan 50. For di cuminsamentu mes, e trabou a topa cu oposicion severo di parti di algun clero. Artículonan a ser publicá den corantnan local pa spierta hende contra Testigo di Jehova. Hopi hende di pueblo tabata enbolbí tambe den spiritismo. Pero gracias n’e awante i pacenshi di varios pionero i misionero, awe tin un congregacion activo i amoroso di 35 predicador di Reino.
Friðrik, un dje ancianonan aki, tabata piscadó. Despues di a asistí n’e congreso di districto na 1982, el a ser convencí cu loke e tabata siñando tabata e berdad. El a regresá Akureyri determiná pa duna testimonio na su famia, amigu i coleganan di trabou. Friðrik a traha plan pa stop cu su trabou como piscadó di manera cu e por tabatin mas tempu cu e congregacion. El a bisa su frei, Helga, cu nan lo no por a biba huntu mas te ora cu nan casa, ya cu e tabata bai bira Testigo di Jehova. Tambe Friðrik tabata kier p’e studia Bijbel pasobra lo e no a ‘casa cu un incrédulo.’ (1 Corintio 7:39) Pa su sorpresa Helga a cuminsá studia. Nan a casa na februari 1983 i a bautisá djis despues. Cu tempu, mama i ruman muhé di Friðrik tambe a aceptá e berdad.
Nos último parada ta Akranes, 350 km for di Akureyri, pasando over di tres rij di ceru i atrabes di hopi vaye bunita. Aki e caya ta asfaltá, haciendo esaki un caminda placentero compará cu e camindanan di greis brutu i smal cu nos a biaha riba pa mayor parti dje caminda. Na Akranes nos tin e congregacion di mas chikitu na Ijsland—cincu publicador, dos di nan sirbiendo como anciano. Nan ta consistí di dos famia cu a respondé n’e yamada di Macedonia, a bandoná un dje congregacionnan mas grandi na Reykjavík i a establecé nan mes den e pueblo chikitu aki pa sirbi unda e necesidad ta mas grandi. (Echo 16:9, 10) Pa mas cu dos aña awor, nan a predicá e bon nobo cu pacenshi den e teritorio aki, cu confiansa cu Jehova lo haci cosnan crece.—1 Corintio 3:6.
Prospectonan Briyante pa Aumento
Cu ‘broeikas’ tení cayente dor di energia di airu cayente i iluminacion artificial, cunukeronan ijslandes por a cultivá un gran variedad di fruta, berdura i otro mata. Dje mesun manera, e Testigonan, ekipá cu berdad spiritual, e calor di persuacion suave i e bendicion di Jehova su spiritu santu, a bin ta experenciá resultadonan maraviyoso den e campo ijslandes.
E aña aki 542 persona a asistí n’e Memorial dje morto di Cristo, i casi 200 studio di Bijbel na cas ta ser conducí awor. Ademas, e reaccion positivo n’e animacion pa sirbi den teritorio no-asigná ta duna nos confiansa cu tur hende semehante di carné riba e isla inmenso aki lo tende e bos dje Wardador Excelente, Jesucristo. (Juan 10:14-16) Ki un resultado gososo p’e fiel proclamadornan di Reino ei cu a mustra asina tantu pacenshi i awante den predicacion dje bon nobo den e tera di ijs i candela durante e 64 añanan cu a pasa!
[Map on page 24]
(For fully formatted text, see publication)
Akureyri
Akranes
Keflavík
Selfoss
Vestmannaeyjar
Reyðarfjörður
Hekla
Geysir
VATNAJÖKULL
REYKJAVÍK
[Credit Line]
Basá riba mapa di Jean-Pierre Biard