Pakico Stima Bo Próhimo?

BIDA eterno ta dependé di nos amor pa Dios i pa próhimo. E punto ei a bin padilanti durante un combersacion cu a tuma lugá casi 2.000 aña pasá.

Un homber hudiu versá den e ley di Moises a puntra Jesucristo: “Kico mi mester haci pa heredá bida eterno?” Jesus a contestá: “Kico ta pará skirbí den e Ley? Con bo ta lesa?” Citando e Ley, e homber a bisa: “‘Bo mester stima Jehova bo Dios cu tur bo curason i cu tur bo alma i cu tur bo forsa i cu tur bo mente,’ i, ‘bo próhimo mescos cu bo mes.’” Jesus a bisa: “Bo a contestá corectamente. Sigui haci esaki i lo bo haña bida.”—Lucas 10:25-28.

Cu esei, e persona cu tabata haci Jesus pregunta a puntra: “Ken realmente ta mi próhimo?” En bes di contest’é directamente, Jesus a conta un historia di ilustracion tocante un homber hudiu cu a ser hortá, batí i lagá mitar morto. Dos hudiu a pasa ei banda—promé un sacerdote i despues un levita. Tur dos a mira e condicion di nan compañé hudiu pero no a haci nada pa yud’é. Despues un samaritano a pasa ei banda. Conmoví pa duele, el a limpia i mara e heridanan dje hudiu, a hib’é na un posada i percurá pa su cuido mas aleu.

Jesus a puntra esun cu tabata haci’é pregunta: “Cua di e tresnan aki na bo parecer a haci su mes próhimo dje homber cu a cai den man dje ladronnan?” Claramente, esei tabata e samaritano misericordioso. Asina Jesus a mustra cu berdadero amor pa próhimo ta surpasá barera étnico.—Lucas 10:29-37.

Un Falta di Amor pa Próhimo

Awe tin un hostilidad creciente entre hende di diferente grupo étnico. Por ehempel, e neo-nazistanan na Alemania recientemente a tira un homber na suela i trap’é cu nan butsnan pisá, kibrando casi tur su repchinan. Despues nan a pap’é cu un bibida altamente alcohólico i cend’é na candela. E homber cu nan a laga pa muri, a ser atacá pasobra nan a kere cu e tabata un hudiu. Den un incidente los for di esun anterior, un cas cerca di Hamburg a ser bombardeá na candela, kimando tres hende di orígen turco na morto—un di nan un mucha muhé di dies aña.

Na Balkans i mas oost, gueranan étnico tabata cobrando miles di bida. Otronan a muri den confrontacionnan entre hende di diferente antecedencia na Bangladesh, India i Pakistan. I na Africa, conflictonan entre tribu i interracial a cobra mas bida atrobe.

Violencia asina ta shok mayoria hende i nan nunca lo haci algu pa causa daño na nan próhimo. En realidad, demostracionnan grandi na Alemania a condená violencia étnico aya. Sin embargo, The New Encyclopædia Britannica ta bisa: “Miembronan di casi tur cultura dje mundu ta considerá nan mes manera di biba como superior na esun di asta nan bisiñanan mas pegá.” Un punto di bista asina ta stroba amor pa próhimo. Hende por haci algu tocante esaki, specialmente ya cu Jesus a bisa cu bida ta dependé di amor pa Dios i pa próhimo?

[Picture Credit Line on page 2]

Cover: Jules Pelcog/Die Heilige Schrift

[Picture Credit Line on page 3]

E Bon Samaritano/The Doré Bible Illustrations/Dover Publications, Inc.