Corte Europeo Halto Ta Apoya Derecho di Predica den Grecia

PAKICO un homber cu ta recibi elogio di su beciñanan mester ta arestá mas cu 60 bez desde 1938? Pakico tal doño onrado di tienda dje isla griego di Creta mester ta hibá dilanti raad di Grecia 18 bez i sufri di mas cu seis aña cerá den prisón? Sí, pakico Minos Kokkinakis, tata balente di famía mester ta separá for di su esposa i cinco yiu i ser sentenciá na varios isla di pena?

Ley trahá na aña 1938 i 1939 prohibiendo proselitismo of conbertimento di hende na otro religion ta mashá responsabel pa esei. E dictador griego, Ioannis Metaxas, bao di influencia dje religion católico ortodoxo griego, a establece tal ley.

Como resultado di tal legislacion, desde 1938 te na 1992, tabatin 19.147 aresto di Testigo di Jehova, i corte a duna sentencia di un total di 753 aña, i Testigo di Jehova realmente a keda encarcelá pa 593 aña di tal tempo. Tur esei a wordu hací pasobra Testigo di Jehova den Grecia, mescos cu na tur parti, ta sigi instruccion di Jesucristo pa “haci disípel di hende di tur nacion. . . . siñando nan pa warda tur loke” el a manda.—Mateo 28:19, 20.

Pero, dia 25 di Mei di 1993, tabatin un gran victoria pa libertad di adoracion! Riba e dia ei e Corte Europeo di Derecho Humano den Strasbourg, Francia, a defende derecho di ciudadano griego di siña nan creencia na otro hende. Den tal decision, e corte europeo halto a crea proteccion di largu alcance pa libertad di religion cu por tene un efecto profundo riba e bida di hende na tur parti.

Láganos scudriña mas cuidadosamente loke a sosode, incluyendo indignidad cu nan a montona riba un solo ciudadano griego, locual a resulta den e decision importante di tal corte.

Suceso di antes

Na 1938, e ciudadano, Minos Kokkinakis, a bira e promé Testigo di Jehova condená bao dje ley griego cu ta haci conbertimento di hende na otro religion un ofensa criminal. Sin e beneficio di un huzgamento, nan a duna Minos 13 luna di castigo riba isla penal den Lamá Egeo di Amorgos. Na 1939 nan a sentencié dos bez i a encarcelé pa dos luna i mei cada bez.

Na 1940, Kokkinakis tabata setenciá pa seis luna riba e isla di Melos. E sigiente aña, durante Gera Mundial II, e tabata encarcelá den prisón militar den Atenas pa mas cu 18 luna. E ta corda cu durante e tempo ei:

“E falta di cuminda den e prisón a bai di malu pa peor. Nos a bira asina swak cu nos no por a camna. Si Testigo di Jehova di Atenas i Piraeus no a trece cuminda pa nos for di nan cuminda scars, nos lo a muri.” Despues, na 1947, e tabata sentenciá atrobé i tabata encarcelá cuater luna i mei mas den prisón.

Na 1949, Minos Kokkinakis tabata sentenciá ne isla di Makrónisos, locual ta haci griego corda incidente horroroso pa motibo dje prisón ei. Entre e mas cu 14.000 prisionero encarcelá na Makrónisos ne tempo ei, tabatin rond di 40 Testigo di Jehova. E enciclopedia griego Papyros Larousse Britannica ta bisa: “E método di tortura cruel, . . . e estado di bida ei, cu ta inaceptabel den un nacion civilizá, i e conducta degradante di wardador en cuanto prisionero . . . ta un bergüenza pe historia di Grecia.”

Kokkinakis, cu a pasa un aña den e prisón di Makrónisos, a pinta e situacion cu e sigiente palabra: “Soldad, mescos cu miembro dje Inquisicion, a haci prisionero pregunta di maínta te anochi. Palabra no por splica e tortura cu nan a duna. Hopi prisionero a bira loco; otronan nan a mata; un gran cantidad a keda físicamente incapacitá. Durante tal anochi terribel nos a tende grito i lamentacion di hende cu nan a tortura, como un grupo nos a haci oracion hunto.”

Despues di a sobrebiba dificultad di Makrónisos, Kokkinakis tabata arestá mas cu seis biaha entre 1950 i 1960 i a keda encarcelá pa diez luna. Entre 1960 i 1970 e tabata arestá cuater bez mas i tabata sentenciá na ocho luna den prisón. Pero no lunida, Minos Kokkinakis tabata solamente uno di cientos di Testigo di Jehova cu através dje añanan tabata arestá i encarcelá pa motibo cu nan a papia cu otro hende tocante nan fe! Di ki manera tal inhusticia terribel contra Testigo di Jehova den Grecia finalmente a presenta dilanti dje Corte Europeo di Derecho Humano?

Un caso di prueba

E caso tabatin su origen dia 2 di Mart di 1986. Riba e dia ei Minos Kokkinakis, awor un comerciante di 77 aña di edad cu a tuma su retir, i su esposa a bishita e cas di Sra. Georgia Kyriakakia den Sitia, Creta. E casá di Sra. Kyriakaki, cu tabata cantante den misa ortodoxo local, a informa e poliz. E poliz a bini i a aresta Sr. i Sra. Kokkinakis i a híbanan ne warda local di poliz. Nan a keda obligá di pasa anochi ei.

Ki acusacion tabatin contra nan? E mesun acusacion hací contra Testigo di Jehova miles di bez durante e 50 aña di antes, esta, hacimento di disípel. Statuut di Grecia (1975), Artículo 13, ta bisa: “Proselitismo (hacimento di disípel) ta prohibí.” Considera mas leu e ley griego, seccion 4, númber 1363/1938 i 1672/1939, cu ta haci proselitismo un ofensa criminal. E ta bisa:

“‘Proselitismo’ kier men, specialmente, cualkier esfuerzo directo of indirecto pa entremete den kerimento religioso di un persona di un otro conviccion religioso . . . , afin di cambia tal kerimento, sea cu un oferta of e promesa di un oferta of apoyo moral of yudanza material, of cu uso di fraude of probechando di nan falta di experencia, confianza, necesidad, falta di inteligencia of simplicidad.”

E Corte Criminal di Lasithi, Creta, a scucha e caso dia 20 di Mart, 1986, i a haya cu Sr. i Sra. Kokkinakis tabata culpable di proselitismo. Nan dos tabata sentenciá na cuater luna den prisón. Ora nan a condena e pareha, e corte a declara cu e dos acusado a entremete “den kerimento religioso di cristian ortodoxo . . . a probecha di nan falta di experencia, inteligencia i simplicidad.” E dos acusado tabata acusá además di a “anima [Sra. Kyriakaki] cu nan splicacion huicioso i apto . . . pa cambia su kerimento ortodoxo cristian.”

E decision tabata apelá ne Corte di Apelacion di Creta. Dia 17 di Mart di 1987 tal corte di Creta a declara Sra. Kokkinakis inocente pero a apoya e condenacion di su esposo, aunque el a reduci su sentencia den prisón te na tres luna. E decision a bisa cu Sr. Kokkinakis a “probecha dje falta di experencia [di Sra. Kyriakaki], di su inteligencia i su simplicidad.” E decision a bisa cu Sr. Kokkinakis “a cuminza leza texto dje Scritura Santo, cu el a analizá aptamente di manera cu e señora cristian, pa falta di fundeshi adecuado den doctrina, no por a reta.”

Den un opinion contrario, un huez dje corte di apelacion a skirbi cu Sr. Kokkinakis “mester ta declará inocente també, pasobra ningun evidencia ta mustra cu Georgia Kyriakaki . . . specialmente a falta experencia den doctrina ortodoxo cristian, siendo cu e tabata e casá di un cantante, ni no a falta inteligencia ni tabata specialmente simpel, di tal manera cu e acusado por a probecha di dje i . . . [asina] tenté pa bira miembro dje secta di Testigo di Jehova.”

Sr. Kokkinakis a apela e caso ne Corte di Anulacion di Grecia, e Corte Supremo di Grecia. Pero e corte a nenga e apelacion dia 22 di April di 1988. P’sei, dia 22 di Augustus di 1988, Sr. Kokkinakis a apela ne Comision Europeo di Derecho Humano. Cu tempo nan a acepta su peticion dia 21 di Februari di 1992, i e Corte Europeo di Derecho Humano a acepté.

Cuestion dje caso

Siendo cu Grecia ta un gobierno cu ta miembro dje Concilio di Europa, e ta keda obligá di conforma cu Artículo dje Conbenio Europeo riba Derecho Humano. Artículo 9 dje Conbenio ta bisa: “Tur hende tin derecho di libertad di pensamento, concenshi i religion; tal derecho ta inclui libertad di cambia nan religion of kerimento i e libertad, sea so of den comunidad di otro hende i den público of privá, pa manifesta nan religion of kerimento, den adoracion, siñamento, práctica i observacion.”

Asina, e gobierno di Grecia a bira un acusado dilanti dje corte europeo. E tabata acusá di a viola abiertamente derecho humano básico di un ciudadano di practica religion conforme cu e mandamento di Jesucristo, esta, di ‘siña i haci disípel.’ (Mateo 28:19, 20) Además, apóstol Pedro a bisa “[Jesús] a mándanos pa predica ne pueblo i duna un testimonio cabal.”—Echo 10:42.

Un número special di 1992 dje revista na inglés Revista Europeo riba Derecho Humano tabatin e sigiente título riba su capa “Grecia—Violacion Exprés di Derecho Humano.” E revista a splica na bladji 2: “Grecia ta e único país den CE [Comunidad Europeo] i den Europa cu tin ley di duna castigo di multa i sentencia den prisón na hende cu ta motiva otro persona pa cambia nan religion.”

Pues, awor excitacion padén i pafó di círculo legal tabata na un nivel halto. Kico nan lo decidi tocante e ley griego cu a prohibi hende di siña nan kerimento na otro?

Verhoring den Strasbourg

Finalmente e dia dje verhoring a yega—dia 15 di November di 1992. Tabatin nubia scur riba Strasbourg, i e friu tabata penetrante, pero den e Corte abogado a bira ardiente den nan argumento. Nan a presenta evidencia pa dos ora. Profesor Phedon Vegleris, abogado pa Kokkinakis, a toca e corazón dje cuestion, puntrando: ‘E ley restrictivo inventá pa proteha miembro dje religion ortodoxo griego di ser conbertí na otro kerimento religioso mester sigi existi i ser aplicá?’

Claramente perturbá, profesor Vegleris a puntra: “Mi ta puntra pakico tal ley [contra proselitismo] ta considera cu stupidez i ignorancia ta igual cu e religion ortodoxo. Mi semper a puntra pakico e religion ortodoxo tin mester di proteccion for di stupidez i di incompetencia spiritual . . . Esei ta algo cu ta molestiámi i ta scandalizámi.” Significantemente, e representante dje gobierno no por a mencioná ningun instancia ora e ley tabata aplicá na otro religion además di Testigo di Jehova.

E segundo abogado pa Kokkinakis, Sr. Panagiotis Bitsaxis, a mustra ki irrazonabel ta e ley di proselitismo. El a bisa: “E aceptacion di influencia mutua ta un precondicion pa diálogo entre dos adulto. Di otro manera, nos ta pertenece na un sociedad straño di bestia silencioso, cu por pensa pero no por expresa nan mes, cu por papia pero no por comunica, cu por existi pero no por co-existi.”

Sr. Bitsaxis a argumenta també cu “Sr. Kokkinakis tabata condená ‘pa loke e tá’ i no ‘pa loke el a haci.’” P’sei, Sr. Bitsaxis a mustra cu principio di libertad di religion no solamente tabata violá sino totalmente aplastá.

Representante dje gobierno griego a purba di presenta un cuadro distinto di esun berdadero, bisando cu Grecia ta “un paradijs pa derecho humano.”

E decision

E fecha anticipá pa hopi tempo pa publica e decision a yega—dia 25 di Mei di 1993. Den un votamento di seis contra tres, e Corte a decidi cu e gobierno griego a viola e libertad di religion di Minos Kokkinakis di 84 aña di edad. Además di a vindica e vocacion di su bida dje ministerio público, e corte a duné $14.400 pa daño i perhuicio. Asina e Corte a rechaza e argumento dje gobierno griego di cu Kokkinakis i Testigo di Jehova ta usa táctico di presion ora nan ta comunica nan kerimento cu otro hende.

Aunque Statuut Griego i e ley anticuado di Grecia por prohibi proselitismo, e corte halto di Europa a decidi cu e uso di tal ley pa persigi Testigo di Jehova ta malu. E no ta na armonía cu Artículo 9 dje Conbenio Europeo riba Derecho Humano.

E corte a splica: “Religion tabata parti dje ‘corriente di pensamento humano constantemente renovable’ i cu ta imposibel pa concibi di un exclusion di dje for di debate público.”

Opinion concurriente di un dje nuebe huez a bisa: “Proselitismo, splicá como ‘celo den promulgacion dje fe,’ no por ta castigable como tal; esei ta un manera—perfectamente legítimo den su mes—di ‘manifesta e religion di hende.’

“Den e caso actual e aplicante [Sr. Kokkinakis] tabata condená solamente pasobra el a demonstra tal celo, sin haci nada incorrecto di su parti.”

Consecuencia dje decision

E mandamento claro dje Corte Europeo di Derecho Humano ta pa oficial dje gobierno griego pone fin ne mal uso di ley cu ta prohibi proselitismo. Esperanzadamente, Grecia lo obedece mandamento dje corte i descontinuá su persecucion di Testigo di Jehova.

Testigo di Jehova no tin e propósito di introduci cambio social ni reformá e sistema legal. Nan interés principal ta di predica e bon nobo dje Reino di Dios den obedencia ne mandamento di Jesucristo. Sin embargo, pa nan haci esei, nan ta gusta ‘defende i legalmente establece e bon nobo,’ mescos cu apóstol Pablo den e promé siglo.—Filipense 1:7.

Testigo di Jehova ta ciudadano cu ta obedece e ley di tur país den cua nan ta biba. Sin embargo, sobre todo, nan ta keda obligá di obedece ley divino cu ta pará skirbí den e Bijbel Santo. P’sei, si e ley di cualkier país ta prohibínan di papia riba nan kerimento fundá ariba e Bijbel, nan ta keda obligá di tuma e posicion apostólico: “Nos mester obedece Dios como gobernante mas bien cu hende.”—Echo 5:29.

[Box on page 28]

MAS PERSECUCION INSPIRÁ PA CLERO

Esfuerzo di clero den Grecia pa ‘causa penoso afán mediante decreto’ a sigi pa hopi aña caba. (Salmo 94:20) Un otro caso a wordu resolví recientemente riba e isla di Creta. Ayá na 1987 un obispo local i 13 pastor a acusa nuebe Testigo di Jehova di proselitismo (hacimento di disípel). Finalmente, dia 24 di Januari di 1992, e caso a yega dilanti raad.

E sala di husticia tabata yen di hende. Rond di 35 pastor tabata presente pa apoya acusacion dje abogado público. Pero, e mayor parti di asiento tabata yen di Testigo di Jehova caba cu a presenta pa anima nan rumanan cristian. Asta promé cu e proceder regular a cuminza, e abogado di Testigo di Jehova a siñala na equibocacion legal serio cu e abogado público a haci.

E resultado tabata cu esnan enbolbí den e caso a aparta pa tene un conferencia privá. Despues di dos ora i mei di consultacion, e Presidente dje Corte a anuncia cu e abogado dje acusado tabatin razón. P’sei, tur acusacion contra e nuebe Testigo di Jehova tabata cancelá! El a declara cu e investigacion tabatin cu cuminza di nobo pa establece si esnan acusá tabata culpable di proselitismo.

Asina cu el a haci e anuncio, pandemonio a explota den e sala di husticia. Tur pastor a cuminza grita amenaza i insulto. Un pastor a ataca e abogado di Testigo di Jehova cu un cruz i a purba di forzé di adoré. Poliz tabatin cu interrumpi, i finalmente e Testigonan por a sali den paz.

Despues di cancelacion dje caso, e abogado público a prepara un acusacion nobo contra e nuebe Testigo di Jehova. E dia pe huzgamento tabata poní pa dia 30 di April di 1993, solamente tres siman promé cu e Corte Europeo di Derecho Humano a declara su decision tocante e caso di Kokkinakis. Una bez mas tabatin hopi pastor cu a asisti.

E abogadonan dje nuebe acusado a introduci e keho di cu acusador dje Testigonan no tabata presente den e sala di husticia. Den su purá pa prepara un acusacion nobo, e abogado público a haci e equibocacion serio di no manda invitacion pe acusadornan. P’sei, e abogadonan di Testigo di Jehova a pidi e corte cancela e huzgamento riba base dje error serio.

E ora ei, tur huez a bandona e sala di husticia i a consulta hunto pa casi un ora. Ora nan a bolbe, e Presidente dje Corte, cu su cara pa suela, a declara tur nuebe Testigo di Jehova inocente di acusacion.

Testigo di Jehova den Grecia ta keda agradicido pe resultado dje caso, i també e resultado dje decision dje Corte Europeo di Derecho Humano cu nan a declará den e caso di Kokkinakis dia 25 di Mei dje aña aki. Nan oracion tá cu como resultado di tal victoria legal, nan por sigi hiba nan bida cristian ‘calmo i ketu cu plena debocion piadosa i seriedad.’—1 Timoteo 2:1, 2.

[Picture on page 31]

Minos Kokkinakis huntu cu su casá