Jehova, Mi Confianza Desde Mi Hubentud Padilanti

SEGUN CU BASIL TSATOS A CONTÉ

E aña tabata 1920; e lugar, den ceru di Arcadia den e bonita Peloponnisos di Grecia. Mi tabata riba cama, seriamente malu cu e spantoso grip spañol cu tabata plamando den tur e mundo.

CADA bez cu klok di misa a bati, mi a tuma na cuenta cu el a anuncia e morto di un otro víctima. Ami por ta e sigiente morto? Afortunadamente, mi a recobra, pero miyones di hende a muri. Aunque mi tabatin solamente ocho aña di edad, tal experencia spantoso ta mashá bibo den mi memoria ainda.

Interés spiritual den mi hubentud

Un poco tempo despues, mi abuelo a muri. Despues dje entierro, mi ta corda cu mama a para cu mi ruman muher i mi riba balcón di nos cas. Purbando, sin duda, pa suaviza nos duele, el a bisa cu boz suave: “Sí, mi yiunan, nos tur tin cu bira bieu i muri.”

Aunque su expresion tabata tanto suave, su palabra a molestiámi. Mi a pensa, ‘Ki tristu! Ki inhusto!’ Pero nos dos a animá ora Mama a sigi: “Pero, ora Señor ta bini atrobé, lo e resusitá hende morto, i nos lo no muri mas!” Ai sí, esei tabata un consuelo!

Dje tempo ei padilanti mi a bira intensamente interesá pa conoce exactamente ki ora tal tempo feliz por yega. Mi a puntra hopi hende, pero ningun hende por a bisámi, ni tampoco ningun hende a parce interesá den un consideracion dje asunto.

Un dia ora mi tabatin rond di 12 aña di edad, mi tata a recibi un buki foi su ruman cu a biba na América. E tabatin e título di Arpa di Dios, publicá pe Sociedad di Bijbel i Tratado Watch Tower. Mi a repasa e index, i mi wowo a alegrá ora mi a mira e capítulo “E regreso di nos Señor.” Mi a lezé cu mashá interés, pero mi a keda desilusioná pasobra e no a menciona e aña di su regreso. Sin embargo, e buki a indica cu e no tabata leu.

Pronto mi a cuminza bai scol segundario i mi a bira ocupá cu les. Pero, de bez en cuando, mi tío na América a manda copia di E Toren di Vigilancia, cu mi a gusta leza. Además, tur diadomingo, mi a bai zondagscol, unda hopi bez e obispo a bini i a papia cu nos.

Riba un cierto diadomingo, e obispo tabata mashá molestiá i a bisa: “Bishitante ta yena nos stad cu publicacion herético.” Anto el a hiza un copia di E Toren di Vigilancia i a grita: “Si cualkier di boso ta haya publicacion manera esaki na cas, trécenan misa, i lo mi kímanan.”

E tono di su boz a molestiámi, pero su spiritu di vinganza a molestiámi asta mas. P’sei, mi no a haci loke el a pidi. Pero, mi a skirbi mi tío i a pidié no manda mas publicacion di Watch Tower. Sin embargo, mi a sigi studia e asunto dje regreso di Cristo.

Mi apetit spiritual a aumenta

Ora vacantie di berano a yega, mi a saca mi maleta pa paketa mi paña. Ei na bom tabatin tres foyeto cu e Sociedad Watch Tower a publica. Di algun manera mi no a míranan na antes. Uno di nan tabatin e título Unda ta hende morto?

Mi a pensa, ‘Esei ta parce interesante.’ Aunque mi a corda e spiertamento dje obispo, mi a decidi di leza e tres foyeto cu sumo atencion pa conoce error cu mi a kere cu nan a contene. Mi a tuma un potlood i cu cautela a cuminza busca. Pa mi sorpresa, tur cos den e foyeto a parce razonabel, i cada declaracion a mencioná texto bíblico di manera cu lector por haci comparacion cu e Bijbel.

Siendo cu nos no tabatin un Bijbel, mi a puntra si texto mencioná tabata aplicá incorrectamente pa apoya e propósito dje autor. P’sei mi a skirbi mi tío i a pidié mandámi un copia dje Bijbel completo. El a hacié un bez. Mi a lezé di principio te na fin dos biaha, i aunque tabatin hopi cos den dje cu mi no a comprende, mi tabata interesá den e buki di Daniel i di Revelacion. Mi tabata kier comprende nan profecía, pero no tabatin ningun hende cu por a yudámi.

Mi a caba scol na 1929, i pronto despues mi tío na América a manda mas copia di E Toren di Vigilancia. Mi a cuminza disfrutá di nan mas i mas i a pidié mándanan pa mi regularmente. Además, mi a cuminza papia cu otro hende tocante e speranza pe futuro cu mi tabata siña for dje revista. Pero, ne tempo ei mi bida a cambia dramáticamente.

Progreso spiritual den Birma

Rumanan menor di mi mama a imigrá na Birma (awor Myanmar), i mi famía a decidi cu si mi ta bai cerca nan, esei por aumenta mi experencia i kizás presenta oportunidad comercial pa mi. Mi semper a keda fasiná cu e oriente, p’sei mi a keda excitá cu e prospecto di bai ei. Den Birma, mi a sigi recibi E Toren di Vigilancia for di mi tío, pero mi nunca a conoce personalmente un Studiante di Bijbel, locual tabata e nomber di Testigo di Jehova ne tempo ei.

Un dia mi a keda emocioná pa leza un anuncio den E Toren di Vigilancia tocante dos volumen dje buki Luz cu ta splica e buki bíblico di Revelacion. Además, mi a leza cu e actividad di Studiante di Bijbel den Birma tabata bao dje sucursal dje Sociedad Watch Tower den India, situá den Bombay. Mi a skirbi un bez pa pidi e dos buki Luz, i a pidi també pa Studiante di Bijbel den India ser mandá pa predica den Birma.

E dos buki a yega pronto via post, i mas o menos un siman despues, Studiante di Bijbel birmano a bishitámi. Mi a keda contentu pa tende cu tabatin un grupo chikito di nan unda mi tabata biba den Rangún (awor Yangon), e capital di Birma. Nan a invitámi pa asisti na nan klas regular di estudio bíblico i també pa participa cu nan den e predicacion di cas pa cas. Mi a vacila un poco na principio pero pronto a cuminza goza compartimento di conocimento bíblico cu budista, hinduísta, i mohamedano, i també cu hende yamá cristian.

Anto e sucursal den India a manda na Rangún dos predicador di tempo completo (yamá pionero), yamá Ewart Francis i Randall Hopley. Nan dos tabata di Inglaterra originalmente pero a sirbi den India pa varios aña. Nan a animámi mashá, i na 1934, mi a bautiza como símbolo di mi dedicacion na Jehova Dios.

Un testigo cu curashi

Cu tempo e sucursal di India a manda mas pionero na Birma. Dos di nan, Claude Goodman i Ron Tippin, a bishita un stacion di trein i a papia cu Sydney Coote, e hefe dje stacion. El a acepta e literatura i a leza tur, i a cuminza skirbi su ruman muher casá, Daisy D’Souza, den Mandalay. E també a haya e literatura interesante i a pidi mas.

Daisy, cu tabata un católico practicante, tabata un persona cu curashi extraordinario. El a cuminza bishita beciña di dje i bísanan tocante loke e tabata siña. I ora e pastor dje parokia a bishité pa puntra pakico e no ta bai misa mas, el a mustra e pastor cu e Bijbel no ta apoya loke pastor a siña, tal como un fiernu di candela.

Pa caba, e pastor a puntré: “Despues di tanto aña di bísanan tocante un candela di fiernu, con mi por bísanan awor cu tal lugar no ta existi? Ningun hende lo deseá di bai misa.”

Daisy a contesta: “Si bo ta un cristian onrado, lo bo síñanan e berdad, apesar dje consecuencia.” Anto el a sigi: “Si bo no ta bísanan, anto ami lo bísanan!” I el a hacié.

Dick i Daisy i nan dos yiu muher mayor a bautiza den Rangún ne tempo cu mi a bautiza. Tres aña despues, na 1937, mi a casa cu Phyllis, nan segunda yiu muher, cu ta sigi como mi estimada esposa.

Escape pa India

Forza militar haponés a invadi Birma durante Gera Mundial II, i Rangún a cai dia 8 di Mart di 1942. Hende stranhero a keda obligá di hui lihé na India. Cientos di hende a purba di pasa door dje mondi tropical, pero hopi a muri riba camina. A sosode cu mi a conoce personalmente e oficial responsabel pe huimento, di manera cu mi por a cumpra pasashi riba e último barcu di carga cu a sali for di Rangún pa Calcutta. Bandonamento di nos cas i casi tur pertenencia tanto purá tabata un tempo tristu pa nos tur. Birma a keda bao di mando dje haponés for di 1942 te na 1945.

Nos no tabatin hopi placa ora nos a yega India, i no tabata fácil pa haya empleo. Esei a resulta den un prueba di fe. Mi a cera conocí cu un oficial británico cu a ofrecémi un trabao cu bon pago no militar, pero el a inclui sirbishi como parti di un establecimento militar. Cu e yudanza di Jehova Dios, mi por a nenga e oferta i asina mantene un concenshi cristian limpi. (Isaías 2:2-4) Di otro manera també, nos a sinti e man amoroso di Jehova.

Nos a establecénos den New Delhi, e capital di India, unda tabata casi imposibel pa obtene habitacion. No obstante, nos a haya un apartamento grandi den e centro dje stad. E tabatin un sala grandi cu un entrada independiente, i e sala a sirbi pa varios aña despues como Salón di Reino pe Congregacion di Delhi di Testigo di Jehova. Sin embargo, pa motibo dje prohibicion di tur publicacion dje Sociedad Watch Tower na 1941 den India, nos no por a obtene literatura bíblica.

Con e prohibicion tabata kitá

Un diadomingo na 1943, hende cu a bai misa den Delhi a recibi un pamfleta cu 13 clero di diferente religion a firma. El a adverti: “CIUDADANO DI DELHI TENE CUIDAO CU TESTIGO DI JEHOVA.” E acusacion tabata cu nos tabata prohibí den India pa motibo político.

Cu e aprobacion dje oficina di sucursal den Bombay, nos rápidamente a druk i a partí un pamfleta cu a desenmascará e clero. Siendo cu mi tabata e superintendente presidente, mi nomber i direccion tabata skirbí ne pia dje pamfleta conteniendo palabra fuerte. Pronto despues, ora poliz a haya Margrit Hoffman i mi partiendo e pamfleta, nan a detene i a céranos. Pero, pronto nos tabata libertá bao fianza.

Despues, durante su evangelizacion, Margrit a bishita e cas di Sr. Srivastava, e famoso minister dje gabinete dje virrey di India. Sr. Srivastava a recibié hospitalariamente, i durante e conbersacion, Margrit a bisé cu nos literatura a ser prohibí inhustamente den India. Riba e mesun dia a sosode també cu Margrit a contra cu un miembro di parlamento dje estado di Madras. E tabata den e stad pa asisti na un reunion di parlamento. Margrit a menciona e inhusticia dje prohibicion di nos literatura, i el a priminti di introduci e cuestion den e binidero reunion.

Ne tempo ei, mi tabata traha como fisioterapista den un hospital local. Wel, a sosode cu Sr. Srivastava a haya un herida, i e hospital a mandámi pa mira si un fisioterapista por yudé. Mi a haya Sr. Srivastava di ser un persona amable, i durante cu nos a conbersa, mi a menciona casualmente cu Srta. Hoffman i mi tabata libertá for di prisón bao fianza. Mi a splica cu tabata debí ne presion dje clero cu nos literatura bíblico tabata prohibí pa motibo político pero cu nos absolutamente no tabata político. Mi a sigi bisa cu nos representante dje sucursal, Edwin Skinner, a pidi entrevista pa splica nos posicion, pero tabata rechazá.

Dos dia despues, Sr. Srivastava a bisámi: “Sr. Jenkins [e oficial dje gobierno cu tabata desfavorable tocante nos trabao] lo retira den poco dia, i Sr. Francis Mudie lo tuma su lugar. Pidi Sr. Skinner presenta, i lo mi introducié na Sr. Francis.”

Sr. Srivastava a haci arreglo pe reunion manera el a priminti. Durante dje, Sr. Francis Mudie a bisa ruman Skinner: “Mi no por priminti nada, pero lo mi investiga e asunto.” Siendo cu parlamento tabatin cu habri den poco dia, ruman Skinner a keda pa mira e resultado. Cumpliendo cu su palabra, e miembro di parlamento di Madras a lanta i a puntra: “Ta cierto cu publicacion dje Sociedad di Bijbel i Tratado Watch Tower ta prohibí pa motibo político?”

Sr. Francis Mudie a contestá: “No, tin un prohibicion pa motibo di precaucion, pero awor e gobierno a decidi di kita e prohibicion.”

Ki un momento emocionante esei tabata pa nos ora nos a tende e noticia! Un siman despues e oficina di sucursal den Bombay a recibi un carta confirmando e fin dje prohibicion.

Bolbiendo na Birma destruí pa gera

Gobernacion británico a bolbe na Birma despues di Gera Mundial II, i diez Testigo di Jehova incluyendo nos a bolbe na Rangún algun luna despues. Nos a keda contentu pa mira atrobé e poco Testigonan local cu a permanece. E país tabata den un estado deplorable. Servicio público, incluyendo corriente i transportacion público, no tabata disponibel. P’sei nos a cumpra un jeep for dje militar i a haci un bon trabao cuné hibando hende na reunion cu nos a organizá pronto despues di nos regreso.

Un persona interesá a ofrecénos terreno, i cu e yudanza di hende bondadoso den e becindario, nos a traha un Salón di Reino basta grandi. Nos a trahé di palu di bambú fuerte, bara di bambú pe muraya, i dak di caña. Den dje den April di 1947, Nathan H. Knorr, e presidente dje Sociedad Watch Tower ne tempo ei, i su secretario Milton G. Henschel, a duna discurso durante nan bishita na Rangún. Ne tempo ei, nos tabatin 19 Testigo di Jehova den Birma henter. Pero 287 hende a asisti ne discurso público di ruman Knorr celebrá den e Teater New Excelsior!

Nos a establecénos den Australia

Dia 4 di Januari di 1948, Birma tabata duná independencia for di Gran Bretaña, i e mayor parti di europeo a considera cu tabata mihor pa nan bandona e país. Despues di consideracion cu oracion, Phyllis i mi a decidi di hiba nos yiu muher i imigra na Australia. Nos a establecénos den Perth, e capital di West Australia.

Tabata un momento mashá tristu pa nos, saliendo for di Birma atrobé, i awor pa semper. De bez en cuando nos ta tende di hende stimá ei, i nos ta keda feliz pa sa cu e trabao di Reino ta progresa continuamente den e país.

Cuminzando na 1978, pa cuater aña nos tabatin e placer di sirbi tur congregacion di abla griego den stad principal di Australia. Esei a nifica biahamento extensivo, siendo cu ta mas cu 4.200 km for di costa di west te na costa di oost dje país grandi aki. Despues di un tempo, e clima, cu ta basta diferente di un estado pa otro, a contribui na decaimento di nos salud. Pues, nos a establecénos di nobo den Perth, unda mi ta sigi sirbi como anciano den un dje 44 congregacion dje stad.

Cu pasamento di añanan, mi bista a bai atrás, i lezamento a bira mas dificultoso. Pero, apesar di problema cu salud, nos curazón ta hoven ainda. Nos dos ta spera cu confianza e dia feliz ora tur hende cu ta teme Jehova Dios lo mira luz di solo di su fabor “briyando, cu curacion den su hala; i [nos] realmente lo sali i coba tera cu nos pata mescos cu bishé engordá.”—Malaquías 4:2.a

[Nota]

[Plachi na página 24]

Mi famía cu ruman Henschel i Knorr den Birma (Myanmar) na 1947

[Plachi na página 25]

Basil Tsatos i su casá, Phyllis, den Australia