Ken Ta Jehova?

“KEN ta Jehova?” E pregunta ei a ser hací 3.500 aña pasá dor di fárao orguyoso, rey di Egipto. Aparentemente, na moda desafiante el a agregá: “Mi no conocé Jehova més.” Dos homber pará dilanti fárao sí tabata conocé Jehova. Nan tabata e rumannan carnal, Moises i Aron, dje tribu Levi di Israel. Jehova a manda nan exigí e gobernante egipcio pa manda e israelitanan bai den desierto pa tene un festival religioso.—Éxodo 5:1, 2.

Fárao no tabata kier contesta rib’e pregunta aki. Bou di su autoridad, sacerdotenan a promové e adoracion di cientos di dios falsu. Realmente, fárao mes tabata ser considerá un dios! Di acuerdo cu mitologia egipcio, e tabata e yu homber dje dios-solo Ra i un encarnacion dje dios Horus cu forma di cabes di valki. Hende a dirigí nan mes na fárao cu título manera “e dios poderoso” i “esun eterno.” Pues no tabata un sorpresa p’e puntra cu desprecio: “Ken ta Jehova, cu mi mester obedecé su bos?”

Moises i Aron no tabatin nodi contestá e pregunta ei. Fárao tabata sa cu Jehova tabata e Dios cu e israelitanan, n’e tempu ei sufriendo di sclabitud na Egipto, a adorá. Pero fárao i henter Egipto pronto lo a bin haña sa cu Jehova ta e Dios berdadero. Di igual manera awe, Jehova lo haci su nomber i Divinidad conocí na tur hende riba tera. (Ezekiel 36:23) Pues, nos por saca beneficio dor di considerá con Jehova Dios a engrandecé su nomber den Egipto di antigua.

Superior cu Dios Egipcio

Ora fárao a puntra na moda desafiante ken Jehova tabata, e no a spera e consecuencianan cu el a experimentá. Jehova mes a contestá, mandando dies plaga riba Egipto. E plaganan ei no tabata golpi solamente contra e nacion. Nan tabata golpi contra e diosnan di Egipto.

E plaganan a demostrá Jehova su superioridad riba dios egipcio. (Éxodo 12:12; Número 33:4) Imaginá e sclamacion ora Jehova a cambia Rio Nilo i tur e awanan di Egipto den sanger! Dor dje milager aki, fárao i su pueblo a siña cu Jehova tabata superior n’e dios di Nilo, Hapi. Morto dje piscánan den Nilo tambe tabata un golpi contra religion egipcio, pasobra e egipcionan a venerá algun sorto di piscá.—Éxodo 7:19-21.

Despues, Jehova a manda un plaga di sapu riba Egipto. Esaki a desacreditá e diosa di sapu egipcio, Heqt. (Éxodo 8:5-14) E di tres plaga a confundí e sacerdotenan practicante di magia, kendenan tabata incapas pa duplicá e milager di Jehova di cambia stof na wimpiri. “Ta e dede di Dios!” nan a sclama. (Éxodo 8:16-19) E dios egipcio, Thoth, cu nan a considerá inventor di arte mágico, tabata incapas pa yuda e charlatannan ei.

Fárao tabata siñando ken Jehova tabata. Jehova tabata e Dios cu por a anunciá su propósito mediante Moises i despues cumpli cuné dor di manda plaga milagroso riba e egipcionan. Tambe Jehova por a cuminsá i terminá e golpinan segun su boluntad. Sin embargo, e conocimentu aki no a impulsá fárao pa someté na Jehova. Al contrario, e gobernante egipcio orguyoso a sigui resistí Jehova di un manera terco.

Durante e di cuater plaga, musca a ruiná e tera, a invadí casnan i probablemente a bula den laira na cantidad, cua riba su mes tabata un obheto di adoracion personificá den e dios Shu of den e diosa Isis, reina di cielu. E palabra hebreo pa e insecto aki a ser traducí como “musca,” “musca di cachó” i “bacator.” (New World Translation; Septuagint; Young) Si e bacator escarabago (Sarabaeus sacer) tabata enbolbí, anto e egipcionan a ser plagá pa insectonan cu nan a considerá sagrado, i hende no por a cana rond sin trapa nan bou di nan pia. Di tur manera, e plaga aki a siña fárao algu nobo tocante Jehova. Aunke e diosnan di Egipto no por a protehá nan adoradornan dje muscanan, Jehova sí por a protehá su pueblo. E plaga aki i tur e plaganan cu a sigui despues a afligí e egipcionan pero no e israelitanan.—Éxodo 8:20-24.

E di cincu plaga tabata un pest riba tou di bestia dje egipcionan. E golpi aki a brongosá Hathor, Apis i e diosa di cielu den forma di baca, Nut. (Éxodo 9:1-7) E di seis plaga a trece blufein riba hende i bestia, humiyando e diosnan Thoth, Isis i Ptah, kendenan a ser considerá incorectamente como dios cu tin abilidad di cura.—Éxodo 9:8-11.

E di shete plaga tabata un tempestad pisá di hagel, cu candela vibrando entre piedranan di ijs. E golpi aki a brongonsá e dios Reshpu, supuesto doño di weerlicht, i Thoth, kende supuestamente ta manda riba awaceru i bos. (Éxodo 9:22-26) E di ocho golpi, un plaga di dalakochi, a demostrá Jehova su superioridad riba e dios di fertilidad Min, supuesto protector di cosecha. (Éxodo 10:12-15) E di nuebe golpi, un scuridad di tres dia riba Egipto, a basha menosprecio riba dios egipcio manera e diosnan di solo, Ra i Horus.—Éxodo 10:21-23.

Apesar di nuebe plaga devastador, fárao a sigui nenga di laga e israelitanan bai. Su curason duru a bira masha costoso pa Egipto ora Dios a manda e di dies plaga final—morto dje primogénito di hende i bestia. Asta e yu homber primogénito di fárao a muri, aunke el a ser considerá un dios. Asina Jehova ‘a ehecutá huicio riba tur e diosnan di Egipto.’—Éxodo 12:12, 29.

Fárao awor a manda yama Moises i Aron i a bisa: “Boso lanta, sali for di meimei di mi pueblo, tantu boso como e otro yunan di Israel, i bai, sirbi Jehova, net manera boso a declará. Tuma tantu boso tounan i bacanan, net manera boso a declará, i bai. Tambe, boso mester bendicioná mi ademas.”—Éxodo 12:31, 32.

Preservador di Su Pueblo

E israelitanan a sali, pero pronto a parce na fárao cu nan tabata dwal sin destino den e desierto. E i su sirbidornan a puntra awor: “Kico ta loke nos a haci, di a manda Israel bai di sirbi nos como esclabo?” (Éxodo 14:3-5) E pérdida dje nacion esclabo aki lo tabata un sla económico pisá pa Egipto.

Fárao a reuní su ehército i a persiguí Israel te na Pihahirot. (Éxodo 14:6-9) Militarmente, e situacion a parce bon p’e egipcionan pasobra e israelitanan tabata manera den trampa entre e laman i e cerunan. Pero Jehova a actua pa protehá e israelitanan dor di pone un nubia meimei di nan i e egipcionan. N’e banda egipcio, “el a resultá di ta un nubia huntu cu scuridad,” pues previniendo un atake. N’e otro banda, e nubia tabata briya, “iluminando e anochi” pa Israel.—Éxodo 14:10-20.

E egipcionan tabata determiná pa plunder i destruí israelita pero a ser strobá p’e nubia. (Éxodo 15:9) Ora e nubia a lanta, ki un maraviya! E awanan di Laman Corá a parti i e israelitanan tabata crusando pa bai n’e otro banda riba tera secu! Fárao i su forsa militar a basha drenta den fondo di laman, determiná pa capturá i despohá nan antiguo esclabonan. Sin embargo, e gobernante orguyoso di Egipto no a conta riba e Dios dje hebreonan. Jehova a cuminsá benta e egipcionan den confusion, kitando wiel di nan garoshinan.—Éxodo 14:21-25a.

“Laga nos hui for di cualkier contacto cu Israel!” e hombernan poderoso di Egipto a grita, “pasobra Jehova siguramente ta bringa pa nan contra e egipcionan.” E realisacion aki a yega demasiado lat pa fárao i su hombernan. Sano i salbo n’e otro banda, Moises a saca su man den direccion di laman i e awanan a bolbe, matando fárao i su forsa militar.—Éxodo 14:25b-28.

Les cu Experencia Ta Siña Nos

Pues anto, ken ta Jehova? Fárao orguyoso a haña un contesta p’e pregunta ei. Sucesonan na Egipto a demostrá cu Jehova ta e único Dios berdadero, completamente diferente for dje “diosnan sin balor” dje nacionnan. (Salmo 96:4, 5) Mediante su poder temibel, Jehova “a traha cielu i tera.” E ta tambe e Gran Libertador, Esun kende ‘a saca su pueblo Israel for dje tera di Egipto, cu señal, cu milager, cu un man fuerte i cu gran temor.’ (Jeremías 32:17-21) Ki un prueba excelente cu Jehova por protehá su pueblo!

Fárao a siña e lesnan ei mediante experencia amargo. En realidad, e les final a cost’é su bida. (Salmo 136:1, 15) Lo e tabata muchu mas sabí si el a mustra humildad ora el a puntra, “Ken ta Jehova?” E ora ei tal gobernante lo por a actua na armonia cu e contesta cu el a ricibí. Felismente, awe hopi hende humilde ta siñando ken Jehova ta. I ki clase di personalidad E tin? Kico e ta exigí di nos? Laga e siguiente artículo aumentá nos aprecio p’e único Persona kende su nomber ta Jehova.—Salmo 83:18.

[Rekonosementu di plachi na página 3]

Pictorial Archive (Near Eastern History) Est.