Alegrando den Nos Magnífico Creador

“Israel, alegrá den bo magnífico Creador, yiunan di Sion ​—sea gozoso den boso Rey.”​—SALMO 149:2.

1. Apesar di grito di “libertad por fin,” cua ta e berdadero situacion di humanidad?

E MUNDO djawe ta plagá cu “dolor di afliccion.” Esei ta e expresion cu Jesús a usa den su profecía tocante e “conclusion dje sistema di cosnan,” e era catastrófico cu a cuminza cu e promé gera mundial na 1914. (Mateo 24:​3-8) Hopi homber político ta mira solamente scuridad pe futuro. Apesar di nan grito di “libertad por fin” den Oosteuropa, un ex-presidente den e region a resumí e situacion ora el a bisa: “E explosion dje poblacion i e capa di gas na halto, burracu den e capa di ozón i AIDS, e peliger di terrorismo nuclear i e desigualdad enorme i creciente entre e nort ricu i e zuid pober, e peliger di hamber, e menguamento dje biosfera i recurso mineral dje planeta, e aumento di un mentalidad cu television comercial ta forma i e peliger creciente di gera local​—tur esei, combiná cu miles di otro factor, ta representa un peliger general pa humanidad.” No ta existi un poder humano cu por elimina tal peliger di destruccion total.​—Jeremías 10:23.

2. Ken tin e solucion permanente pa problema di humanidad, i el a dal cua paso caba?

² No obstante, nos por alegrá di cu nos Magnífico Creador tin un solucion permanente. Den e profecía di Jesús, “e conclusion dje sistema di cosnan” ta relacioná cu su “presencia” invisibel. (Mateo 24:​3, 37-39) Pa crea e “cielo nobo,” Jehova Dios a pone Jesús riba su trono como Rey Mesiánico, i evidencia profético ta mustra cu tal suceso histórico a tuma lugar den cielo na aña 1914.a (2 Pedro 3:13) Como gobernante asociado cu Señor Soberano Jehova Dios, Jesús ta ser comisioná awor pa huzga tur nacion i separá hende manso dje tera, semehante di carné, for di hende obstiná, semehante di cabrito. Hende “cabrito” perverso ta ser marcá pa “cortamento eterno” i hende “carné” ta ser marcá pa bida eterna den e reinado terrenal dje Reino.​—Mateo 25:​31-34, 46.

3. Ki motibo cristian berdadero tin pa hubilá?

³ E resto di Israel spiritual riba tera, den e compañía awor di un multitud grandi di carné obediente, tin tur motibo pa alegrá den Jehova, e Rey di eternidad, ya cu e culminacion di su propósito magnífico ta yega su culminacion mediante e Reino di su Yiu. Nan por bisa: “Sin falta lo mi hubila den Jehova. Mi alma lo ser gozoso den mi Dios. Pasobra el a bistími cu e bistí di salbacion . . . Mescos cu e tera mes ta produci taki, i e hofi ta haci nace loke ta sembrá den dje, di igual manera Señor Soberano Jehova lo causa nacimento di husticia i di alabanza dilanti tur e nacionan.” (Isaías 61:​10, 11) Tal “nacimento” ta bisto den e miyones di hende cu ta saliendo awor for di tur nacion pa canta alabanza pa Jehova.

‘Acelerando esei’

4, 5. (a) Con e recogimento dje pueblo di Dios tabata profetizá? (b) Cua aumento sobresaliente tabatin durante e aña di sirbishi di 1992?

⁴ Tal salimento ta acelera mientras cu e fin dje sistema di Satanás ta yega cerca. Nos Magnífico Creador ta declara: “En cuanto bo pueblo, nan tur lo ser husto . . . , e nacimento di mi plantamento, e obra di mi man, pa hacími bonita. E chikito mes lo bira mil, i esun menor un nacion poderoso. Mi mes, Jehova, lo aceleré na su propio tempo.” (Isaías 60:​21, 22) E aceleracion ta ser reflehá maraviyosamente den e Raport di Aña di Sirbishi di 1992 di Testigo di Jehova Mundialmente, publicá riba bladji 20 te 23 dje revista aki.

⁵ Sobresaliente den e raport ta e máximo nobo di 4.472.787 proclamador di Reino, un aumento di 193.967​—un aumento di 4,5 porciento mas cu aña pasá. E máximo di 301.002 bautizá durante 1992 ta mustra també cu multitud di hende ta acepta e berdad bíblico. Cuanto nos ta alegrá di cu awor den e “dia di scuridad i tiniebla, . . . tin un pueblo numeroso i poderoso,” cu mescos cu un nubia di sprinkhan, ta aumenta e testimonio dje Reino “te ne parti mas lehano dje tera”! (Joël 2:​2, 25; Echo 1:8) For di Alaska friu​—unda e avion dje Sociedad Watch Tower a haci mas cu 50 biahe na territorio tapá cu sneu​—te ne desierto kimá di Malí i Burkina Faso i isla plamá di Micronesia, sirbidor di Jehova ta resplandece como “luz dje nacionan, pa [su] salbacion yega te na extremidad dje tera.”​—Isaías 49:6.

6, 7. Cua suceso inesperá a tuma lugar durante añanan reciente, i con sirbidor di Jehova Dios a reacciona na esei?

⁶ Jehova Dios ta manera un fortaleza i un toren fuerte protehando i sosteniendo su pueblo. Den hopi parti di mundo, Testigo di Jehova tabatin cu wanta hopi aña di opresion i persecucion cruel. (Salmo 37:​39, 40; 61:​3, 4) Pero recientemente, como si fuera un milagro, restriccion i barrera a ser kitá den mas cu 21 país, di manera cu awor e pueblo di Dios por proclama libremente cu nos Magnífico Creador a entronizá Cristo como Rey riba e tera.​—Salmo 2:​6-12.

⁷ E pueblo di Jehova ta usa sabiamente nan libertad nobo? Leza den e cuadro tocante e aumento den Bulgaria, Rumania, i loke tabata e Union Soviética den Oosteuropa i den país africano tal como Angola, Benín, i Mozambique. Den Zaire també e aumento tabata fantástico. Cu gozo den nan curazón, nos rumanan libertá ta responde ne yamada: “Duna agradicimento na Jehova, pasobra e ta bon . . . , e Hacidor di cosnan maraviyoso, i grandi, su so: pasobra su bondad amoroso ta te na tempo indefinitivo.” (Salmo 136:​1, 4) Nan ta expresa nan agradicimento den sirbishi celoso den e recogimento di hende semehante di carné cu kier apoya e Reino.

8. Di ki manera alabador nobo di Jehova “a bini bulando manera nubia” den Oosteuropa? den ­Africa?

⁸ Durante e tempo di calor di Europa, asamblea dje pueblo di Jehova celebrá den país ex-comunista a disfruta di asistencia asombroso. Asta mas asombroso ta e cantidad di hende bautizá den tal país. Den Togo, Africa, e prohibicion també tabata kitá dia 10 di December di 1991. E sigiente luna nan a celebra un asamblea nacional. Na comparacion cu e promedio mensual di 6.443 di publicador den e sirbishi, e asistencia ne asamblea a subi te na 25.467 i 556 hende a bautiza​—8,6 porciento dje total di publicador. Manera Isaías 60:8 ta pinté, alabador nobo di Jehova “ta bini bulando manera nubia, i manera paloma pa porta di nan cas” den e congregacion dje pueblo di Jehova.

9. Cua percuracion a ser hací di manera cu hende cristian den país cu recientemente a haya libertad por ‘come i keda satisfecho’?

⁹ E hamber pa alimento spiritual den Oosteuropa i Africa també ta ser saciá. Fábrica dje Sociedad Watch Tower den Alemania, Italia, i Zuidáfrica a manda truck tras truck cargá cu literatura, na varios idioma, pa país cu tin hamber spiritual. Na antes, hopi ruman tabatin cu compartí revista hopi gastá, pero awor nan ta recibi un abundancia di alimento spiritual. Nan ta alegrá participando den e cumplimento dje profecía: “Boso siguramente lo come, comiendo i kedando satisfecho, i boso di sigur lo alaba e nomber di Jehova boso Dios, cu a trata boso asina maraviyosamente.”​—Joël 2:26.

Atendiendo na mas expansion

10. Den bista dje asistencia grandi na Memorial, tur hende interesá ta recibi cua invitacion?

¹⁰ Asombroso en berdad ta e total di asistencia di 11.431.171 ne Conmemoracion dje morto di Jesús, un aumento di 781.013, of 7,3 porciento mas cu aña pasá. Bonbiní, tur hende nobo! Lo ta ki probechoso si tur hende recién interesá den e mensahe bíblico ta acepta un estudio bíblico den nan cas cu un Testigo di Jehova! (Mira Isaías 48:17.) E Raport di Aña di Sirbishi ta mustra cu tur luna nos ta conduci 4.278.127 estudio, un aumento excelente di 8,4 porciento. Sin embargo, hopi mas hende por probecha di tal sirbishi. Cu mucho gusto Testigo di Jehova ta bishitá regularmente hende interesá pa conduci gratis un estudio bíblico di cas, i asina ta yúdanan pone nan pia firmemente riba e camina cu ta hiba na bida eterna. (Juan 3:​16, 36) Pakico no pidi un estudio asina? I corda, semper un caloroso bonbiní ta sperábo den Salón di Reino!​—Salmo 122:1; Romano 15:7.

11, 12. (a) Cua problema ta existi den algun país? (b) Di ki manera “un igualacion” ta tuma lugar entre país mas rico i país mas pober?

¹¹ Congregacion cu tin bon Salón di Reino tin un bendicion ricu. E situacion ta otro den país unda testigonan leal a wanta pa hopi aña bao di prohibicion, reuniendo clandestinamente den grupo chikito. Den varios lugar asina nan ta liber awor pero tin poco Salón di Reino. Por ehempel, den un país africano cu 93 congregacion, tin tres Salón di Reino so. P’sei generalmente nan ta reuni den aire liber. Un congregacion di 150 ruman por tin un asistencia di 450 asistiendo regularmente na nan reunion.

¹² Den Oosteuropa hopi bez ta dificultoso pa cumpra propiedad of haci construccion, pero nan ta haci algun progreso. Nan a programá e dedicacion di un bonita sucursal nobo den Polonia dia 28 di November di 1992. Contribucion generoso pe trabao mundial di Testigo di Jehova ta ser usá pa construi salón i otro facilidad. Asina, “un igualacion” ta ser efectuá pasobra e generosidad dje rumanan cu ta contribui for di nan “abundancia” material ta yuda satisface necesidad spiritual di congregacion di país pober.​—2 Corintio 8:​13, 14.

Mil miyón ora!

13. Cuanto ora tabata dedicá na predicamento i siñamento na 1992, i e total ta refleha esfuerzo di ken?

¹³ Kico bo por haci cu mil miyón ora? Tur hende cu ta alcanza bida eterna por dedica tanto ora, i asta mas, ne sirbishi productivo i satisfaciente di Jehova Dios. Pero, imaginábo e dedicacion di tanto ora den un solo aña! Esei ta loke e pueblo di Jehova a haci durante 1992. Ora nos a saca e total di tur raport individual di tur publicador di Reino, nos a alcanza un máximo nobo di 1.024.910.434 ora dedicá ne mihor manera posibel​—alabando nos Magnífico Creador, “siñando . . . públicamente i di cas pa cas.” (Echo 20:20) Un promedio di 4.289.737 testigo a informa tur luna. Nan ta hende di tur categoría. Algun tin tempo limitá cu nan por contribui ne sirbishi di Reino. Esei ta inclui cabez di famía cu tin cu percura pa nan famía; hende di edad; i hopi cu problema di salud; i també muchanan cu ta den scol ainda. Pero, e raport cu cada un ta skirbi ta un demonstracion balioso di nan amor pa Jehova Dios.​—Compara cu Lucas 21:​2-4.

14. Con hovenan ta ‘corda nan Magnífico Creador’?

¹⁴ Un generacion mas hoven ta crece den e sirbishi di Jehova, i felizmente e mayoría di nan ta aplica e palabra di Salomón den Eclesiastés 12:1: “Corda, awor, bo Magnífico Creador den e dianan di bo hubentud.” Nan ta aplica nan mes na les di scol, i també nan mayornan deboto ta entrenánan den asunto spiritual. Tabata un gozo pa mira un cantidad considerabel di hovenan lanta na asamblea reciente, ofreciendo nan mes pa bautismo. També ta un gozo pa sa cu hopi hoven, siñando un ofishi, ta haci preparacion práctico pe sirbishi di pionero ora nan ta graduá for di scol. Asina nan por mantene nan mes mescos cu apóstol Pablo a haci de bez en cuando trahando tent.​—Echo 18:​1-4.

15, 16. Di ki manera pionero i otro sirbidor di tempo completo a contribui ne progreso dje sirbishi di Reino, i algun di nan a disfruta di cua bendicion?

¹⁵ Ki un contribucion tremendo pionero i otro sirbidor di tempo completo ta haci pe progreso dje sirbishi dje Reino! E cantidad di pionero a alcanza un máximo di 931.521 na 1992. Mientras cu nan ta predica diariamente di cas pa cas i ta conduci estudio bíblico den cas di hende, nan ta bira mashá efectivo den e uso dje Scritura. Además, hopi a cumpli cu requisito i por a asisti pa dos siman ne Scol di Sirbishi di Pionero, cu a yúdanan bira asta mas capaz i aumenta nan gozo den e sirbishi di Dios.

¹⁶ Cada fiel pionero por confirma e palabra di Isaías 50:4: “Señor Soberano Jehova mes a dunámi un lenga di hende siñá, pa mi sa con pa contestá hende cansá cu un palabra.” Hopi hende djawe ta cansá dje mundo corrupto rond di nan pero e palabra cu nos fiel pionero ta papia ta refrescánan.​—Compara cu Proverbio 15:23; Ezekiel 9:4.

Un programa intenso di construccion

17. Además di edificacion spiritual, cua construccion material a tuma lugar na añanan reciente?

¹⁷ E prosperidad spiritual mundial di Testigo di Jehova també ta haci crecimento material necesario. Expansion di facilidad di drukmento, oficina, i cas di Betel i construccion di Salón di Reino i Salón di Asamblea ta bira necesario. P’sei ta necesario pa Testigo di Jehova bira constructor di manera fisical. Construccion similar tabata hací den e tempo di Salomón. Salomón a traha e tempel pe adoracion di Jehova Dios segun e “mapa di arquitecto . . . cu a yega cerca dje pa inspiracion,” ya cu Jehova a duna esei na su tata, rey David. (1 Crónica 28:​11, 12) Pues, Salomón no solamente a edifica su oyentes cu palabra di sabiduría preciosísimo sino també a dirigi construccion di un edificio material di un excelencia cu e mundo seglar nunca a igualá.​—1 Rey 6:1; 9:​15, 17-19.

18, 19. (a) Cua proyecto di construccion di progreso rápido e organizacion di Jehova Dios ta haci? (b) Con e spiritu di Jehova ta ser manifestá tanto den construccion material como den edificacion spiritual?

¹⁸ Awendia, Testigo di Jehova no ta haci construccion usando mapa di arquitecto di inspiracion divino, pero nan sí tin e spiritu di Dios. Mescos cu den e tempo di Israel, esei ta impulsánan pa edifica di manera cu e ta asombrá hende di mundo. (Zacarías 4:6) Ta keda poco tempo mas. Salón di Reino i otro edificio ta necesario sin tarda. Den algun país Salón di Reino di construccion rápido ta mashá común. Por ehempel, durante e último 10 aña Canadá a informa di construccion di 306 salón, cada un den menos cu dos dia. Debí ne expansion rápido dje sirbishi di Jehova Dios mundialmente, un total di 43 edificio nobo of extension di sucursal ta bao di construccion of ta planeá actualmente. Además, un edificio residencial di 30 piso ta casi cla den Brooklyn, cu posada pa rond di mil betelita boluntario. També den Patterson, estado di New York, e construccion di un centro di educacion bíblico, e proyecto di mas grandi cu e Sociedad Watch Tower hamás a propone, ta hopi mas leu cu nan a spera.

¹⁹ Tal proyecto ta progresa cu eficacia i un calidad di trabao cu ta asombrá compañía di construccion di mundo cu tin e saber. Pakico? Debí ne contribucion enorme cu testigo dedicá di Jehova ta haci. Su spiritu ta impulsánan no solamente pa duna apoyo material sino també dedica cu tur nan curazón nan tempo i energía. Sitio di construccion ta abunda cu trahador bon entrená i dedicá. No tin huelga ni hende floho. E spiritu di Jehova ta motivánan, mescos cu el a motiva constructor dje tabernáculo den e tempo di Moisés i esnan cu a construi e tempel den e dia di Salomón. Spiritualidad ta e calidad sobresaliente necesario pa tal trahador.​—Compara cu Éxodo 35:​30-35; 36:​1-3; 39:​42, 43; 1 Rey 6:​11-14.

20. (a) Te na ki grado e bon nobo lo ser predicá ainda? (b) Cua bendito prospecto ta spera e pueblo di Jehova Dios?

²⁰ Salomón a continuá su programa di construccion despues di a completá e tempel. (2 Crónica 8:​1-6) Nos no sa cuanto mas e dunamento di testimonio den e dia djawe lo aumenta ainda, ni cuanto mas construccion di salón i otro facilidad nos tin cu construi den futuro. Pero, nos sí sa cu ora e bon nobo di Reino ta ser predicá te ne grado cu Jehova Dios ta decretá, anto e fin, e “tribulacion grandi,” lo yega. (Mateo 24:​14, 21) E arreglo di Jehova Dios di un “cielo nobo i tera nobo” lo culmina den bendicion incontable riba un planeta cu hende codicioso no a ruiná. P’sei, láganos ‘hubilá i alegrá pa semper den loke Dios ta crea,’ i duna tur e alabanza na nos Magnífico Creador!​—Isaías 65:​17-19, 21, 25.

[Nota]

Bo por splica?

◻ Ki motibo nos tin pa alegrá den nos Magnífico Creador?

◻ Ki aumento tabatin durante e aña di sirbishi di 1992?

◻ Den país unda dunamento di testimonio tabata prohibí na antes, tabatin cua bendicion ricu?

◻ Con hovenan i pionero a contribui ne crecimento dje organizacion di Jehova Dios?

◻ Di ki manera e pueblo di Jehova Dios a keda ocupá den trabao di construccion tanto material como spiritual?

[Kuadro na página 17]

Aña pasá mas cu mil miyón ora tabata dedicá ne trabao di predica i siña

[Chart on page 12-15]

RAPORT DI AÑA DI SIRBISHI PA 1992 DI TESTIGONAN DI JEHOVA MUNDIALMENTE

(See bound volume)

[Picture on page 10]

E cientos di miles di candidato di bautismo aña pasá a demonstra e bendicion di Jehova riba e trabao di predica i siña

[Picture on page 16]

Un gran cantidad di hovenan ta ‘corda nan Magnífico Creador’