Pronosticando e Futuro di Economía di Mundo
EINSTABILIDAD di mercado económico i un falta di confianza den analista cu no a pronostica e fayo dje bolsa di balornan di 1987 a haci hopi comerciante acudi na astrología pa pronostica nan futuro financiero, segun e revista di Londres Accountancy Age. E revista ta bisa cu “astrólogo financiero ta obtene un lista impresivo di cliente prestigioso pa scucha nan pronosticacion di mercado en detaye.”
Un consultante ta compara ciclo cu e ta mira den 30 aña di datos diario financiero cu movimento di planeta. Riba tal base e ta ofrece su pronosticacion. Aunque hopi cliente a vacila pa acepta su conseho promé cu 1987, awor e ta haya asta financiero práctico prepará pa scucha.
Un otro astrólogo financiero ta pinta cuadro basá riba fecha di nacimento pe ebaluá e carácter di hende i també pa busca “clave pe tempo di posible desaroyo comercial.” Un otro ainda ta kere cu cambio den e mercado di plata ta sigi ciclo di luna. Pero na comparacion cu analista financiero regular, e astrólogo a haya cu cliente a duné “mashá poco margen pa haci error.”
Sin embargo, tin un pronosticacion financiero cu lo ser cumplí sin falta, i e no tin nada cu ber cu astrología. Esei ta e pronosticacion skirbí den e Bijbel i cu Jehova Dios a inspira, e Dios cu no ta permiti su mes ningun margen absoluto “pa haci error.” E ta e Dios cu “no por gaña.” (Tito 1:2) El a inspira su profeta Ezekiel pa declara: “Nan lo tira na caya nan plata mes, i nan mes oro lo bira un cos repugnante. Ni nan plata ni nan oro por líbranan.”—Ezekiel 7:19.
Na ki tempo esei lo tá? Durante e binidero “tribulacion grandi” cu Jesucristo a profetiza, locual Ezekiel a yama e “dia di furia di Jehova.” (Mateo 24:21; Ezekiel 7:19) Prosperidad financiero no por segura sobrebibencia, apesar di loke astrólogo ta pronostica. Solamente confianza den Jehova Dios, e Gran Libertador, por garantiza siguridad durante e tribulacion mundial den locual tur corrupcion lo ser eliminá—político, religioso, i comercial.—Proverbio 3:5, 6; Sofonías 2:3; 2 Pedro 2:9.