Pregunta di Lector

Mateo 28:17 kier men cu algun apóstol a sigi duda hopi tempo despues cu Jesús resusitá a presentá dilanti nan?

No, nos no tin cu saca tal conclusion for di Mateo 28:16, 17, cu ta bisa: “E diesun disípel a bai na Galilea ne ceru unda Jesús a haci arreglo pa nan, i ora nan a miré nan a rindi homenahe, pero algun a duda.”

Hopi tempo di antemano Jesús a purba di yuda disípel di dje comprende cu “e mester bai Jerusalem i sufri hopi cos di parti di anciano i sacerdote principal i scriba, i ser matá, i dia tres ser lantá.” (Mateo 16:21) Sin embargo, su detencion i ehecucion a causa desilusion i confusion pe disípelnan. Ta parce cu su resureccion tabata un sorpresa pa nan. I ora el a manifesta su mes den forma humano, na principio algun “no tabata kere ainda pa puro gozo.” (Lucas 24:36-41) Pero, presentacion di dje despues di su resureccion a yuda sigidor íntimo di dje acepta e echo di su resureccion; i asta apóstol Tomás a keda convencí dje resureccion di Jesús.—Juan 20:24-29.

Despues di esei e 11 apóstol fiel a “bai na Galilea.” (Mateo 28:16; Juan 21:1) Mientras cu nan tabatei, Jesús “a presenta na mas cu cinco cien ruman na un solo tempo.” (1 Corintio 15:6) Tabata den e situacion ei cu Mateo 28:17 ta bisa cu “algun a duda.” Pues, esnan cu a duda ainda por wel tabata den e 500 sigidor.

Leza e comentario interesante riba esei di C. T. Russell, e promé presidente dje Sociedad Watch Tower:

“Nos no por sopone razonablemente cu esnan cu a duda tabata dje diesun apóstol, pasobra nan a keda completamente satisfecho, henteramente convencí, i a expresa esei caba. Nos ta kere cu esnan cu a duda tabatin cu ser dje ‘cinco cien ruman’ presente ne reunion cu nan a celebra, cu no tabatin ningun contacto cuné desde su resureccion, i nos por sopone razonablemente cu algun di nan tabatin un fe hopi mas swak cu e fe dje apóstolnan i di amigo special cu sí tabatin contacto cu Jesús. E palabra ‘algun a duda’ ta duna evidencia dje franqueza dje cuenta dje Evangelizador. Esei ta mústranos, també, cu sigidor di Señor no tabata demasiado crédulo, sino mas bien a keda dispuesto pa sefta i pisa evidencia cu a presenta, i e celo, energía i spiritu di sacrificio propio cu a resultá di esei di parti di esnan creyente ta dúnanos evidencia abundante dje sinceridad di nan conviccion dje resureccion di nos Señor, locual tanto nan como nos a reconoce di ser e fundeshi mes di nos fe den dje. Si Cristo no a lanta, nos fe ta en bano i nos ta den nos picánan ainda.—1 Corintio 15:17.”—Zion’s Watch Tower and Herald of Christ’s Presence, 1 di Mei di 1901, bladji 152.

Nos por ripara també cu e manera cu Mateo a mencioná esei ta dúnanos evidencia dje confiabilidad i onradez dje Bijbel. Si un persona a inventa e cuenta, lo e tin e tendencia di skirbi detaye cu por haci e cuenta cu el a inventá parce creíbel; probablemente cu e idea di cu detaye omití of falta di informacion por lanta duda tocante su cuenta. Kico di Mateo?

E no a sintié obligá di duna un splicacion en detaye di su palabra “algun a duda.” E relato di Marco, Lucas, i Juan, no ta menciona nada di esei, pues e palabra di Mateo so por parce di inclui e 11 apóstol, i Mateo tabata uno. No obstante, Mateo a haci e comentario breve sin duna ningun splicacion. Mas cu 14 aña despues, apóstol Pablo a skirbi e buki di Promé Corintio. Den e luz dje detaye cu el a duna den 1 Corintio 15:6, nos por yega ne conclusion creíbel di cu esnan cu a duda no tabata apóstol sino disípel den Galilea, pa locual Jesús no a presenta ainda. Pues, e comentario di Mateo di cu “algun a duda” ta parce correcto; e tin e aparencia di un skirbidor onrado cu a presenta un relato correcto sin purba di splica tur detaye.